Luke 6
6
1Uqpuk nhxp nhxp-nghawt tj 'Boipaw Yesyuq' na a'tabeq heq khrawng cawng dyaw ljt na an'cet khaw vj a'tabeq heq na cawng theq sik na a'hok khrawng an'kut tj pvawuyot na canglung an'e. 2Jnkhaw vjyawng 'Phariqsye' heq na 'Boipaw Yesyuq' j "nang'hi na uqpuk nhxp pj poqcai laq yaq khrawng i-hai yj nan'poqcai" tiyj an'hawu. 3'Boipaw Yesyuq' na "mawnglen 'Davik' na nhi nhu yun tiq heq an'dx ve khaw hxvj nhi na i a'poqcai nghxt nawk khrawng nang'hi na phawt phu yju cuq aw. 4Nhi khrawng 'Pxtpaw Phawlaw' imduk kj vawng na ''Mhawpaw'' heq na an'e dat khrawng cimkya tiq mung lju na a'e tawn yju a'tabeq heq j kha a'pet tiyj a'hawu. 5Jnkhaw vjyawng 'Boipaw Yesyuq' na " 'Ceqcaw' khrawng uqpuk nhxp mawqpaw vj a'thon" tiyj a'hawu. 6A'kyaw uqpuk nhxp pj 'Boipaw Yesyuq' na damarung ngj a'cokhawu khaw hxvj jn dxn nj khet lawm a'kut bjt tiq pjinghawt a'mji. 7'Phariqsye' heq uqpade yawcu tiq sarapaw heq na 'Boipaw Yesyuq' kret sui hai an'lx khennj 'Boipaw Yesyuq' na uqpuk nhxp pj jn a'kut vawng lawm bjt tiq khrawng a'to pet taw to pet yju vaw tiyj an'ning nge. 8'Boipaw Yesyuq' na nhi tiq khin khrawng co na kha jn khet lawm a'kut bjt tiq j "thju na khrawng heq mhuq j tung nga" tiyj a'hawu khaw hxvj jn khrawng kha thju na a'tung. 9Jnkhaw vjyawng 'Boipaw Yesyuq' na nang'hi yj u-nghawt ka'nghiq ai. Ni baw uqpuk nhxp pj bji tiq nan'poqcai yai yaw bji yaq tiq nan'poqcai yai yaw siyaqna khrawng pjinghawt sawk khrawng nan'hen sawk kai yaw nan'tuk kai yaw" tiyj a'nghiq. 10Jn ceng ka vj mji tiq khrawng heq ten ne na a'sot pjnnj khet lawm a'kut bjt tiq j "nang kut hyan cawm ma" tiyj a'hawu na jn khrawng na a'kut a'hyan na nhi kut khrawng a'pawitai ba. 11Jnkhaw vjyawng 'Phariqsye' heq na 'Uqpade yawcu tiq sarapaw' heq khrawng a'lhji yj an'thisju na 'Boipaw Yesyuq' khrawng i-baw poq j bji yai nawk khrawng an'punghaw ko an'krju ve. 12Nhxp-nghawt khaw vj 'Boipaw Yesyuq' khrawng suqtong hai yj tong hawn tjq cet na yawn nghawt kung 'Pxtpaw Phawlaw' ceng ngj suq a'tong nge. 13Kho va na ce a'tabeq heq pan ne theqna jn heq duk kj kxq 'Tavawkaqb' j thonne hai pji kalainhiq a'lui. 14Jn heq ming ce 'Petaruq' ming naw tiq 'Syiqmung' nhi nawu 'Endare', 'Yakuk', 'Yawhen', 'Phiqliqpuq', 'Batawlaqme', 15'Mate', 'Tawmaq', 'Alaqphe' caw 'Yakuk' a'yx khet tiq tiyj an'hawu khrawng 'Syiqmung' 16'Yakuk' caw 'Yuqdaq' na seng ngj 'Boipaw Yesyuq' j cetcaw phjk hai tiq 'Yuqdaqsyakaruk' kj thonne. 17Jnkhaw vjyawng 'Boipaw Yesyuq' khrawng 'Tavawkaq' heq dj tong hawn ngj kxq komlo theqna dek dju nawk dxn nj a'tung. Jn dxn nj a'tabeq heq batnghawt dj 'Yuqdaq' kre, 'Yeruqsalawng', luq, let kawm kon ka vj kxq 'Tuqruq', luq na 'Ciqdung' luq j mji tiq khrawng heq batnghawt kha an'khrai lo. 18Nhi tiq na 'Boipaw Yesyuq' cokhawu khrawng heq nge hai na an'punghaw niqnawng heq to ve hai tok an'khrai lo. Nawtsi kruqsaq khrawng khawm laq tiq heq kha a'pawi yj an'bji ba. 19'Boipaw Yeqsyuq' ceng ngj kxq a'phun heq thok na an'niqnawng heq a'khrxk khennj khrawng tjng na 'Boipaw Yesyuq' khrawng lhem laq hai tok an'thxnthaq-e. 20Jnkhaw vjyawng 'Boipaw Yesyuq' na a'tabeq heq ceng pawt ten ne na a'hawu khrawng ce cek ke tiq nang'hi khrawng nan'bjikhji. Ibahai yj nawk hxvj ce 'Pxtpaw Phawlaw' neng-ngeng khrawng nang'hi tok kj thonne khennj. 21Tuq j mxthak tiq nang'hi khrawng nan'bjikhji. Ibahai yj nawk hxce nang'hi na nghawq hawn nj nan'e ba laq ai khennj. Tuq j oi-kap laq tiq nang'hi khrawng nan'bjikhji. Ibahai yj nawk hxce nang'hi nan'nui laq hai khonhxp a'khrai lo vai nghxq khennj. 22Khrawng heq na 'Ceqcaw' tok kj nang'hi mhudawm theqna phenphoq e-na an'nuiqkheu nawk kai nang'hi ming kha an'khrak kai. Jnkhennj nang'hi nan'bjikhji. 23Jn baw thonne hai khonhxp khrai lo na ce nan'lung lhju na lawm bjiq cuq. Ibahai yj nawk hxce hawn luq j nang'hi laq hai 'suqlet' khrawng a'lhji yj a'len. Nang'hi yj bji yaq poq tiq poksyaw heq na kha 'Parawphek' heq j jn baw tjng ngj an'poqcai nghxt khennj. 24Boima tiq nang'hi heq khrawng bjikhji yju cuq. Ibahai yj nawk hxvj ce nang'hi na bji tiq heq nan'khawm nghxt laq pjn khennj. 25Tuq j nghawq hawn nj e-o laq tiq nang'hi khrawng bjikhji yju cuq. Ibahai yj nawk hxce nang'hi mxthak hai khonhxp khrai lo vai nghxq khennj. Tuq j nuikheu tiq nang'hi khrawng bjikhji yju cuq. Ibahai yj nawk hxce nang'hi nan'oi-kap laq ai nghxq khennj. 26Khrawng heq na nang'hi an'tjuqkauq ve nawk na ce bjikhji yju cuq. Ibahai yj nawk hxce nhi tiq poksyaw heq na kha 'Parawphek' heq baw vj thonne nghxt tiq heq kha jn baw tjng ngj an'tjuqkauq ve nghxt khennj. 27"Jn baw na kha tuq j ke kheukhaw nge tiq nang'hi yj ka'hawu vai nan'sunpui heq khet bjiq cuq. Sunpui heq j kha mitta taw bjiq cuq. Nang'hi mhudawm tiq heq kha a'pawi caw vj mji pui naw bjiq cuq. 28Nang'hi thaiset naw tiq heq j kha a'pawi poqcai pet bjiq cuq. Nang'hi ceng ngj ham soi tiq heq j ce 'Pxtpaw Phawlaw' na bji tiq a'pet hai suqtong pet bjiq cuq. 29Khrawng pjinghawt na nang mhawi vawng lawm a'baq na ce a'tha vawng lawm kha ba ye sawk bjiq. A'khrung phang tong tiq khrawng ngj a'duk phang kha pe bjiq. 30Nang ceng ngj u-nghawt e-nghawt tong lo tiq khrawng ngj peso bjiq. Nang kxqkjn kxq-e ti heq ceng ngj kxq kha tong ba kawq. 31Nan'punghaw vj an'poqcai hai na'lx ve baw vj khrawng ngj kha poqcai pet bji. 32Nang ngj mitta taw tiq j yawng mitta na'tawk ba nawk hxvj ce i-taqljuq ve nawk hai a'mji. Ibahai yj nawk hxvj ce a'kret a'sisaw mawq heq na pawngsum na ce nhi tiq khet tiq heq an'khet ba. 33Nang'hi yj a'bji poqcai pet tiq j yawng a'bji nan'poqcai ba pet tai hxvj ce i-taqljuq ve nawk hai a'mji. Ibahai yj nawk hxce a'kret a'sisaw mawq heq na pawngsum jn baw an'poqcai khok 34Nang'hi yj a'pet ba khoq ai tiyj nan'khin khrawng heq j yawng nan'punyhiq ai nawk hxvj ce i-taqljuq ve nawk hai a'mji. A'kret a'sisaw mawq heq pawngsum na kha an'pet khrawng hyawq an'laq ba hai tok an'punyhiq e-tong. 35I-baw e-baw sinakha nang'hi na nan'sunpui yj mitta taw bjiq cuq. Jn heq tok kj bji tiq poqcai pet bjiq cuq. Kan'laq ba vai tiyj khin theqna punyhiq kawq cuq. Jn baw nan'poqcai hxvj yawng hawn luq j kxq nan'laq ba hai suqlet khrawng a'lhji yj len theqna nang'hi kha lhxng dj len dj tiq 'Pxtpaw Phawlaw' caw-nawu heq j nan'thonne yai. Ibahai yj nawk hxce 'Pxtpaw Phawlaw' na seye naw theq yaq tiq heq na ljng tiq heq khrawng a'manne khen cuvj. 36Nang'hi 'Paw Phawlaw' na nhi tiq a'manne baw tjng ngj nang'hi na kha manne pet bji cuq. 37"Khrawng heq kret phansa kawq cuq. Jn hxvj yawng nang'hi kret kha phansa khrawng khawm laq hai siyju cuq. Khrawng heq sunsawng kawq cuq. Jn hxvj yawng nang'hi kha sunsawng khrawng khawm laq hai siyju cuq. Khrawng heq kret lhjq pet bjiq cuq. Jn hxvj yawng nang'hi kret kha lhju khrawng nan'khawm laq ai. 38Khrawng heq j peso bjiq cuq. Jn hxvj yawng nang'hi yj kha petsot khrawng nan'khawm laq ai. Nang'hi na khrawng heq j nan'petsot baw tjng ngj 'Pxtpaw Phawlaw' na nang'hi yj a'petsot ba vai" tiyj a'hawu. 39Jnpjnnj ce 'Boipaw Yesyuq' na jn heq j khuicut nawk u-nghawt a'hawu batx khrawng ce "mikmhu yaq tiq pjinghawt na a'tha mikmhu yaq tiq pjinghawt tj lawm a'dawn khok kai yaw. Jn baw lawm dawn theqna a'hiq cet na ce pjinhiq djn dvawng duk kj krawlop hai siyju hji yaw. 40Sarapaw thawk kj tawt tiq tabeq nawk khrawng mji yju. Sinakha a'pawi yj coksawng khrawng khawm laq tiq tabeq ce a'punghaw sarapaw baw vj a'thonne khok. 41Nang na na'mikui nghaw duk kj kxq thingtung tiq mji tiq na'mik-ek nghaw mhu ve yaq kaw vj nang khepui mik kj kxq thingmhxn caw tiq mji tiq mik-ek ce ibahai yj na'mhuq. 42Na'mik-ek nghaw lju ve yaq kaw vj "nang khepui mik-ek yawng ka'lju pet tai" tiyj ibahai yj na'hawu laq. Khrawng pawi baw vj mji tiq nang mik kj kxq thingtung tiq len tiq mik-ek yawng cxkcxk lju ve maw va. Jn baw hxyawng nang khepui mik-ek khrawng na'lju pet hai a'pawi caw vj na'mhuq laq ai. 43Pawi tiq thing ngj pawi yaq tiq a'theq the yaq baw vj pawi yaq tiq thing ngj kha pawi tiq a'theq the khoq hai siyju. 44A'theq so na a'thing na'cok khoq. A'lhing thing ngj kxq thabeq theqna'sik khoq yaq baw vj a'lhing khrum duk kj kxq 'Capyek' theq sik khok yju. 45Khrawng pawi na ce nhi lung duk kj mji tiq bji tiq heq khrawng lungbong pawi yj a'dawn theq. Khrawng si na ce nhi lung duk kj mji tiq bji yaq tiq heq khrawng lungbong si yj a'dawn theq. Ibahai yj nawk hxce nang'hi lungbong duk kj mji tiq heq yawng nan'mongkhok kj nan'hawu khennj. 46"Nang'hi na ke kheukhaw ce nge yaq na ibahai yj ke khrawng " 'Boipaw, 'Boipaw'" tiyj nan'pan ne. 47Ke ceng ngj lo na ke tala nge theqna an'yawk baw mjicoq tiq heq khrawng hu-u an'lju ve nawk khrawng nang'hi yj ke na ka'sai yai. 48Jn heq khrawng lung khrung ngj im saw tiq dj an'lju ve. Jn im khrawng lung dek duk thukhum hawn nj cju theqna cangkrak hawn nj a'sawk ke khennj tui ljiq lo na kha cimkrak yaq kaw a'mji. 49Sinakha ke tala heq nge theqna an'yawk khrawng baw mji yaq tiq heq ce dek nju vj laq baw an'sawk khrawng im dj a'lju ve. Tui ljiq lo na ce tanawcaw vj a'cimkrak kyaq ai. Jn im khrawng pjiq cju tyawq a'cimkrak kai.
Seçili Olanlar:
Luke 6: ctpv-rv
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
