मत्ती 12
12
यीशु अरामो ध्याड़ो प्रभु शुह
(मरकु 2:23-28; लूको 6:1-5)
1दुह मुक्का यीशु इच्च़ा अरामो ध्याड़ा रिंङ रीहऊ विचंङज़ि इबि लेहकी तोहई, दंङ दोऊ चेला तिंङ योंहष लेहती दंङ दोहर रिहू दोरच़ी छ्वाऊ सिल थ्वागज़ि ज़े लेहतिर। 2दिह खंड्रीरंङ फरीसी ज़ि दोबि कुहतो, “खंणु, कांह चेलाज़ि छि कम लहज़ातोर दुह अरामो ध्याड़ा रिंङ लह्जी ठीक मशुहद्ध।”
3यीशुज़ि दोतंङ साते कुतोह, “केहच़ी माहपढ़ेकातंईया कि रज्ज़ा दाऊदे, अपेहल दु दोऊ साथीरे योंई तोईरे छि लाहते। 4दुह छना परमेश्वरो घरबारंङ इह्लदे, दंङ तग चढ़ाएसी रोटी ज़हतेर, दुह ज़ेई माह दोबि माह दोऊ साथी तिंङ ठीक तुई पर सिर्फ यहुदी पुरोहिता तु ज़ेई ठीक तोहई? 5छि केहच़ी मूसाऊ कानूना रिंङ दिह माह पढ़ेक्तनीआ कि, यहुदी पुरोहित यहुदी मंदिरंङ अरामो ध्याड़ो विधि माह मनेक्च़िमीरंङ साते ला दोरे दोषी माह शुहबी? 6गेह केहतु कछंङ अंज़े तोतोग, दंङ गेह मंदिर बे लाह खास तोतोग। 7अगर केहच़ी पवित्रशास्त्रारिंङ दिह बचनो मतलब छि शुह, गिऊ थल्जी बलिदान चढ़ाएच़िमी बजाए केहरे ऊईतु थल्जी दाह लहज़ा बणेक्तुंई। अगर केहति पता शुंईआ कि दिऊ मतलब छि शुह, दंङ केहच़ी गिऊ निर्दोष चेला तु बुराई माह लांईया। 8गेह मीहू योह अरामो ध्याड़ो लाह प्रभु शुगाह।”
करची घुड़ो मीहबी ठीक लहज़ी
9दोरच़ी ज़ोये यीशु दोतु यहुदी सभा घरबारंङ अंजा। 10दोहर इच्च़ा मीह तोहई, अतु गुहड़ बीमारीरंङ करची तोहई; दंङ यहुदी मीहच़ी यीशु टोईच़ी बदी लगाच़िमी थल्जी दुह रुहक्ती, छि अरामो ध्याड़ारिंङ ठीक लेहई रूठे शुहदा? 11यीशुज़ि दोतिंङ जवाब रेह, “दिह सोचेक्तुंई कि अगर केहतु बिचंङ अतुआ त्रैंई अरामो ध्याड़ारिंङ दोंङरिंङ दचे योतोता केहच़ी पक्का ए दोबि च़ुमने धह्तेका हुंपोन! 12छि मीहू लस त्रैंई बे महस माह! दिऊ थल्जी अरामो ध्याड़ारिंङ मीहतिंङ ठीक लेह रूठे शुह।” 13दंङ यीशुज़ि दुह टेहची मीहू हखा कुहतो, “केनोह गुह्ट्र तुंखा लोहऊ।” दोई एनोह गुह्ट्र तुंखा लहरी दंङ दोऊ गुह्ट्र अई गुहड़ो ठ्रोह ठीक शुहचे इलि। 14दंङ फरीसी ज़ि यहुदी सभा घरबारंङ च़ि धह्कते इलजे यीशु खिलाप ठ्रोहका शुहचे फेंसला लाहतेर कि दोह्बी छना सच़ी च़रपोंई।
परमेश्वरो अंङषी सेवक
(मरकु 3:7-12)
15पर दिह ञेंहच़ा यीशु दोरच़ी अहच़ा इलि। महस मोडे भीड़ यीशु थले अतिरे दंङ दोई दोरे भत्ते ठीक लहरी। 16दंङ यीशुज़ि दोतिंङ खबरदार लहच़ी कुहतो कि छिला लाह गेह कुहषी तातग दुह अतङ साते ला थकुडु, 17ताकि अंऊ बचन परमेश्वरे यशायाह भविष्यवक्ताओ दोरच़ी कुहषी तहरे पूरे शुहबी जूंस:
18“खांई, दिह गिऊ परगर शुह, अरी गेह अंङषी शुगाह;
गिऊ प्यारे, अतु दोरच़ी गिऊ सेहम राजी शुहचे तोह;
गेह घेंङौ आत्मा दोऊ टोईच़ी केओग;
दंङ दोरे ऊईजाति तु न्यायो खबर रमोतो।
19दोई माह झगड़ा लोहतो माह हल्ला लोहतो;
माह दोई मीहतु बिचंङ हाऊष रेह घमंडी तु ठ्रोह भाषण माह रमतो।
20दोई अतुला नुकसान माह लोहतो, अंऊ मीहरे थकषे ब्रंज़ो ठ्रोह कमज़ोर तोतोर।
अति छिला परेशानी तोह दुह टुह्ह रंड्रा लह्म्पो ठ्रोह तोह, अपि दोई नुकसान माहलोहतो।
अपेहल तचेक न्याय पक्का मलोह्तो।
21दंङ ऊई जातिरे दोऊ टोईच़ी उम्मीद तोहर।”
यीशु ए बालज़बुल शेतान
(मरकु 3:20-30; लूको 11:14-28)
22दंङ मीहरे इच्च़ा काणे ए टंऊंणे अतु अंद्रेग मांजी आत्मा तोहई; यीशु कछंङ हतिरे; दंङ दोई दुह ठीक लेह केहरी; दंङ दुह खंड्री ए कुट्री लेहती। 23दिरंङ भत्ते मीहरे हेरान शुहचे कुट्री लेह्तिरे, “दिह छि मसीह शुहचे तरपोतो आ, अंऊ रज्ज़ा दाऊदो खानदानो शुह, अतिंङ हेनर रुमज़ा तोईन।”
24पर फरीसी ज़ि दिह रेड्री रंङ कुह्तेर, “दिहता मांजी आत्मातु मुख्या शेतानो सेवक शुह, अच़ि मांजी आत्मारे हुंपा।” 25दोई दोतु सेहमो गप्पा ञेंहए दोतंङ कुहतो, “अंऊला नगरारिंङ फूट शोतो, दुह उज्ड़ेके इबी; दंङ अरीला नगरे ऊ घराना अतु विचंङ फूट शोतो दुह योह्सा योतो। 26अगर शेतान एनोह ए बिरोधंङ खड़े शुहचे योतो; दंङ दोऊ राज छना केषोतो? 27भला, अगर गेह शेतानारिंङ साते मांजी आत्मारे हुन्बातग, दंङ केहतु चेलारे अतु मदत ए हुन्बातोह? दिऊ थल्जी दोच़ी ए केहतु न्याय लोहर। 28अगर गेह परमेश्वरो आत्मा रंङ साते शुहचे मांजी आत्मारे हुंपातग, दंङ परमेश्वरो राज केहतु कछंङ पिचे इलज़ा।
29या अंऊ ला मीह अतु ला ताकतवरो घरबारंङ इलजे दुह तकड़े मीह्बी छुचे च़रपोतो। दंङ दुह दोऊ घरबार लुटेके तरपोतो। 30अरी गेरंङ साते माह दुह, गिऊ खिलाप तोह, अच़ि गेरंङ साते ठ्रोहका मलाह, दोई पुरच़ा। 31दिऊ थल्जी गेह केतंङ साते कुट्रातग मीहतु भत्ते पाहठी पाप माफ शुहचे योतो, पर पवित्र आत्मो बुराई माफ माह शोतो। 32अच़िला गेह मीहू योहू खिलाप छाह गप्पा कोतो, दोऊ दि गलती माफ शुहचे योतो पर अच्च़ी लाह पवित्र आत्मो खिलाप छाह कोतो, दोऊ गलती माह दिह संसार माह परलोकंङ माफ शोतो।
छना बुट ध्वांए ए फल
33अगर बुह्ट रूठे तोह ता दोऊ फल ला रुठे शोतो। अगर बुट खराब तोह ता, दोऊ फल ला खराब शोतो; छना कुचे बुटो पहचान दोऊ फलो दोरच़ी शुबी। 34केहरे बिषज़ड़े ओमड्रो कटुतु ठ्रोह तोतोंई! केरे मांजी शुहचे छना रूठे गप्पा कुट्री तरच़ातंई? छना कुचे छि सेहमरिंङ पिंङषी तोह, दुहए आहरिंङ अपि। 35रूठे मीहतु सेहमो अंद्रेगज़ि रूठे गप्पा हुंज़ी, दंङ मांजी मीहतु मांजी भंडारंङ मांजी गप्पा हुंपी। 36गेह केतंङ साते कुट्रातग छि, छि मांजी गप्पारे मीह्जी कोर, न्याय ध्याड़ारिंङ दोबि हर गप्पो हिसाब रंड्री लेह्पोतो। 37छना कुचे अपेहल परमेश्वरे न्याय लोहतो दोपहल इच्च़ा मीहबी दोऊ दोरच़ी कुहषी गप्पो वजाहज़ि ए निर्दोष ठहराएपोतो, दंङ अपेहल दोई न्याय लोहतो ता इच्च़ा मीहबी दोऊ दोरच़ी कुहषी गप्पो बजाहज़ि दोषी ठहराएपोतो।”
स्वर्गीय निशानीऊ मांग
38दिरंङ रेह यहुदी शास्त्रीज़ि ए फरीसीज़ि यीशुबि कुंहई, “हे गुरु। ञेंहरे कांह दोरच़ी इच्च़ा हेरानी ऊ कम खंड्री तहतंई।” 39यीशुज़ि दोतिंङ जुबाब रेंहई, “दिह पीढ़ीऊ मांजी ए कुकम लहज़ा मीहरे निशानी पेट्रातोर, पर दोतिंङ योना भविष्यवक्तारंङ साते छि शुते दुह चमत्कारो अलावा ऊहई छल्ले चिन्ह मखोकसोतो। 40योना भविष्यवक्ता षुमु ध्याड़ा षुमु राहत मोह्ड़े मच्छोह खोकटुंङ बंङाते, ध्वांए गेह मीहू योह ला षुमु रात ए ध्याड़ा धरतीऊ अंद्रेग बंङज़ोग। 41नीनवे शहरो मीहरे न्याय ध्याड़ारिंङ दिह पीढ़ीऊ मीहतंङ साते खड़े शुहचे, दोतिंङ दोषी ठहराएपोतो, छना कुचे दोच़ी योना भविष्यवक्ताओ प्रचार थशे; एनोह पापो दोरच़ी सेहम यहच़ातेर; पर केहच़ी केनातु पाप मनेक्च़िमीरंङ साते ला इन्कार लहज़ातन, दिह दुहए शुह अरी योना भविष्यवक्ताबे ला मोह्ड़े तोह। 42दक्षिण दिशाओ रानी न्याय ध्याड़ारिंङ दिह पीढ़ीऊ मीहतंङ साते खड़े शुहचे दोतिंङ दोषी ठहराएपोतो, छना कुचे दुह सुलेमानो ज्ञान रेड्रिमी थल्जी धरतीऊ मुखंङ ज़ि अन्दे, पर केहच़ी केनातु पाप मनेक्च़िमीरंङ साते ला इन्कार लहज़ातन, दिह दुहए शुह अरी सुलेमानाबे मोह्ड़े शुह।
अधा सुधारज़ि समस्या
43अपेहल मांजी आत्मा मीहू दोरच़ी हुंज़ा यवा, दंङ दोई कारची ठाहरीरिंङ नहच़िमी थल्जी पेट्री पर दोबि माह खोकसी। 44दोई ऐनाहरंङ साते कुट्री, गेह अंऊ मीहू दोरच़ी अंज़े शुगाह दुहए मीहू अंद्रेग अच़ा योह्ग, यह्चीरंङ साते दोई दुह मीह सल्ज़े, साफ सुथरा ए सजेसी खोकसा। 45दंङ दुह मांजी आत्मा इलजे एनाबे ला मांजी निह्ज मांजी आत्मारे एनारंङ साते रेंज़ा हपा, दंङ दुह मीहू अंद्रेग इलजे दोहर बंङज़ा, दंङ दुह मीहू हालात तुहई बे लाह महस खराब शुहचे इबि। दिह पीढ़ीऊ मांजी मीहतु हालात ला ध्यांए शोतो।”
यीशु याह ए न्वा
(मरकु 3:31-35; लूको 8:19-21)
46अपेहल यीशु मीहतिंङ शिक्षा रंड्री लेहकी तोहई, दोऊ याह ए न्वा धह्कते खड़े तोईरे दंङ दोहरंङ गप्पा लहज़िमी तहरेर। 47अच़िया यीशुबि कुहतो, “खंणु काह याह ए काह कवचि न्वा धह्कते खड़े तोतोर दंङ करंङ गप्पा लहज़िमी ततोर।” 48दिह रेड्रीरंङ दोई कुट्रा दोबि जुबाब रेंहई, “अरी शुह गिऊ याह? अरी शुह गिऊ न्वा?” 49दंङ दोई चेला तु हखा गुह्ट्र तुंखा लेह कुंहई, “खांई दिहरे गिऊ याह ए न्वारे शुहरे। 50छना कुचे अरी गिऊ स्वर्गो बाहऊ हिटीरंङ साते जोओतो दुह ए गिऊ न्वा शुह, गिऊ रिहंङ ए गिऊ याह शुह।”
Seçili Olanlar:
मत्ती 12: LBFNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.
