लूका 20

येशूके अधिकारके बारेमे प्रश्‍न

(मत्ती. 21:23-37; मर्क. 11:27-33)

1एक दिन यरूशलेमको मन्दिरमे येशू आदमीके शिक्षा देत रहए, और बिनके अच्छो समाचार परचार करत रहए। यहूदी अगुवनको समुहके सँग मुखिया यहूदी पुजारी और मोशाको नियम कानुन सिखान बारे येशूके ठिन आए, 2और येशूसे पुछीं, “हमसे कहाओ, कौन अधिकारसे तुम जा काम करत हओ, और तुमके अधिकार देन बारो कौन हए?” 3येशू बिनके जबाफ दइ, “मए फिर तुमसे एक बात पुँछत हओं, मोके उत्तर देओ, 4बप्तिस्मा देन बारो यूहन्नासे दओ भओ बप्तिस्मा स्वर्गसे रहए, कि आदमीसे?”

5बे आपसमे बहस करन लागे, “स्वर्गसे, कएहएं कहेसे, ‘तुम यहुन्नामे काहे बिश्वास नाए करत हओ?’ करके कएहए। 6‘आदमीसे कएहएं’ तओ, सब आदमी हमके पत्थर मरेहएं, काहेकी बप्तिस्मा देन बारो यूहन्ना अगमबक्ता हए कहिके बिनको पक्का बिश्वास रहए।”

7जहेमारे बे जबाफ दइं, “हम नाए जानत हएं, कहाँसे आओ हए।” 8तओ येशू बिनसे कही, “अइसो हए तओ महुँ कौन अधिकारसे जा काम करत हओं, मए फिर तुमके नाए बतएहओं।”

दुष्ट किसानकी कहानी

(मत्ती. 21:33-46; मर्क. 12:1-12)

9येशू आदमीनसे जा कहानी कही, “एक आदमी अंगुरको बारी लगाइ, और अधिया दइके, बहुत दिनके ताहीं परदेश चलोगओ। 10जा फरा तोरन समय आइगओ, तओ अंगुरकी बारीसे कुछ फरा लेनके ताहीं बो अपनो एक नोकरके अधिया बारो ठिन पठाइ। तओ अधिया बारो बोके पिटके खाली हात पठाए दइं। 11बो फिरके दुस्रो नोकरके पठाइ, तओ बे बोके फिर पिटीं और बेजत करके खाली हात पठाए दइं। 12बो तिसरोके फिर पठाइ बे बोके फिर मारके पठाए दइं।

13और अंगुरको बारीको मालिक कही, ‘अब मए का करओं? मए अपन प्यारो लौंणाके पठएहओं। शायद बोके त बे आदर करंगे।’ 14जब बोको लौंणा गओ, तओ अधिया बारे बोके देखके आपसमे बात करनलागे, ‘जा त अंगुरको बारीको हकदार हए, हम जाके मारएं, और सम्पतिमे हमरो हक हुइजए हए।’ 15तओ बे बोके अंगुरको बारीसे बाहिर लैजाएके मारीं। अब अंगुरको बारीको मालिक बिनके का करैगो? 16बो आएके बे अधिया बारेनके मारैगो और अंगुरको बारी औरेनके दइदेहए।” आदमी जा सुनके कहीं, “परमेश्वर अइसे कभु नाए होबए।”

17तओ येशू बिनके देखके कही, “जा लिखो भओ का हए तओ?

‘जौन पत्थरके घर बनान बारे रद्द करिहएं,

बहे पत्थर, कोनोको शिर-पत्थर बनो।’

18बो पत्थर उपर गिरन बारे हरेक चकनाचुर हुइजए हएं। पर जौन उपर बो पत्थर गिरैगो, बोके बो किच्लाए देहए।”

मोशाको नियम कानुन सिखान बारे और मुखिया यहूदी पुजारीनको चाल

19तओ मोशाको नियम कानुन सिखान बारे और मुखिया यहूदी पुजारी बहेबेरा येशूके पकणनके ढुँणन लागे। बिनके पता रहए, कि जा कहानी बिनके बिरुद्धमे रहए पर बे आदमीनसे डरात रहएं।

महाराजाके तिरन बारो कर

(मत्ती. 22:15-22; मर्क. 12:13-17)

20बे मौका ढुँणन लागे, और धर्मी हुइके चुपरन बारे जासुसके बे बाके ठिन पठाइं। येशू कही बातमे बाके फसाएके अधिकारीनके और हाकिमके हातमे बाके पकणाएदेनको मौका ढुणत रहएं। 21बे बासे पुछीं “महान गुरु, हम जानत हएं, तुम ठिक-ठिक बोलत हओ और ठिक-ठिक सिखात हओ, और कोइको पक्षपात नाए करत हओ, पर सच्चाईसे परमेश्वरको डगर सिखात हओ। 22हमके रोमको महाराजा कैसरके कर तिरन ठिक हए, कि नाए हए?”

23पर येशू बिनको कपट बुझके कही, 24“मोके एक सिक्का दिखाबओ जामे कौनको फोटुहए और कौनको नाँउ लिखो हए?” बे कहीं, “रोमको महाराजा कैसरको।”

25येशू बिनसे कही, “जहेमारे जो रोमको महाराजा कैसरको हए रोमको महाराजा कैसरके देबओ, और जो परमेश्वरको हए बो परमेश्वरके देबओ।”

26आदमीके अग्गु बे येशूके बातमे फसाए नाएपाइं, और येशूके जबाफमे बे अचम्मो मानके चुप रहिगए।

पुनरुत्थान और बेहा

(मत्ती. 22:23-33; मर्क. 12:18-27)

27तओ पिच्छु येशूके ठिन कोइ सदुकीनको समुह आए। कोइ फिर मरके जिन्दा नाए होत हएं करके बिनको सोँच रहए। बे येशूसे पुछीं, 28“महान गुरु, मोशा हमर ताहीं लिखदइ रहए, कि कोइ फिर आदमीको बेहा करोभओ ददा, बिनए सन्तानको मरिगओ कहेसे, भइया बक बैयरसे बेहा करके ददाको सन्तान खडा करन पणत हए। 29एक परिवारमे सात भइया रहएं। बडो बेहा करी और बिना सन्तानको मरिगओ, 30और मझला भइया अपन मरो भओ ददाको बैयरसे बेहा करलै। पर बो फिर बिना सन्तानको मरिगओ। 31तओ फिर सझला बोसे बेहा करी और उइसी करके बे सातौ जनै बिना सन्तान जन्माएके मरिगए। 32पिच्छु बो बैयर फिर मरिगै। 33तभीमारे जब मरे भए आदमी मरके जिन्दा होमंगे तओ बो बैयर बिन मैसे कौनकी बैयर हुइहए? काहेकी बो सातौ जनैकी बैयर हुइडारी रहए।”

34येशू बिनसे कही, “जा जमानाके आदमी बेहा करत हएं, और बेहा करदेत हएं। 35पर बो जमाना तक पुगान लायक ठहिरन बारे, और मरके जिन्दा हुइके उठान लायक होन बारे नए बेहा करत हएं, नए बेहा करदेत हएं। 36बे फिरसे मरत नाए हएं, काहेकी बे स्वर्गदूत समान होत हएं, और मरे मैसे जिन्दा होन बारोको सन्तान होनके कारणसे बे परमेश्वरको सन्तान हएं 37पर मरे आदमी फिरसे जिन्दा हुइके उठंगे कहान बारी बात मोशा फिर भिथ्राके बारेमे परमप्रभुके अब्राहामको परमेश्वर, इसहाकको परमेश्वर और याकूबको परमेश्वर करके पुकारत पेती दिखाइ दइ। 38परमेश्वर मरेभएन्को परमेश्वर नाए हए, पर जीन्दन्को परमेश्वर हए, काहेकी सब बाके ताहीं जिन्दा हएं।” 39तओ जा सुनके मोशाको नियम कानुन सिखान बारे मैसे कोइ-कोइ कहीं, “हे महान गुरु, तुम ठिकए कहेहओ।” 40जाके पिच्छु फिर कोइ बासे प्रश्‍न पुछन हिम्मत नाए करी।

ख्रीष्ट कौनको लौंणा?

(मत्ती. 22:41-46; 23:1-7; मर्क. 12:35-40)

41तओ येशू बिनसे कही, “ख्रीष्ट दाऊदको लौंणा हए करके आदमी काहे कहात हएं? 42काहेकी भजनके किताबमे राजा दाऊद अपनए कही हए:

परमप्रभु मिर प्रभुसे कही,

43‘तुम मिर दहिना हात घेन बैठओ,

जब तक तुमर शत्रुनके तुमर टाँगके पाउँमे नाए लाओं।’

44जब राजा दाऊद फिर ख्रीष्टके प्रभु कहिके कहात हए कहेसे, ख्रीष्ट राजा दाऊदको सन्तान कैसे हुइहए?”

मोशाको नियम कानुन सिखान बारेके बिरुद्धमे येशूकी चेतावनी

(मत्ती. 23:1-36; मर्क. 12:38-40; लूक. 11:37-54)

45जब सब आदमी सुनत रहएं, तओ येशू अपन चेलनसे कही, 46“लम्बो कुर्ता पैधके इतएउतए नेँगत, और बजारमे अभिबादन ढुणत, और यहूदी सभाघरमे प्रमुख आसन और भोजमे आदरको ठाउँ मन पणान बारे, मोशाको नियम कानुन सिखान बारेसे होसियार रहाओ। 47बे बिधुवानको घर हणप करदेत हएं, और देखावटीके ताहीं परमेश्वरसे लम्बो प्राथना करत हएं। नेहात्तओ परमेश्वर उनके बहुत भारी दण्ड देबैगो।”

Seçili Olanlar:

लूका 20: THRNT

Vurgu

Paylaş

Kopyala