लुका 5
5
येसुइ आफ्निक् सेब्भुना पैल्हेकोक् चेलायकलक् हाँख्राल
(मत्ति ४:१८-२२; मर्कुस १:१६-२०)
1एक्दिनकोक् कहिन् हो येसु गालिलक्#५:१ गालिलक्: गनेसरेत तालाउ आको बाजेला। तालावक् छेंओइ ठध्याइबानाइ बस्ल रैल्हक्। थुप्रोय मानुसलक् परमेस्वरक् सिच्छा सुन्बाक्नि ठेलाम्ठेल कर्ते आइलुहुन्।#मत्ति १३:१-२; मर्कुस ३:९-१०; ४:१ 2येसुइ तालावक् छेओमाहा दुइगोटा डोङालक् देख्लक्, मछौर्यालक् डोङा छारिबानाइ जाल धोइतिहि रैल्हुहुन्। 3एक्टा डोङा सिमोन बाज्ल मछौर्याक् रैल्हकुन्। येसुइ ओक्रिहिंक् डोङामाहा चर्हिबानाइ सिमोनलाइ डोङा पाखाक्भटे चुटेक् माझक्पटि लेगाउ बाजिहिन् बोल्लोकुन्। तसौ ओच्छिहि बसिबानाइ येसुइ मानुसलकलाइ सिच्छा देबा ठाल्लाहा।
4परमेस्वरक् सिच्छा देहिन् सक्नेसौ येसुइ सिमोनक्लाइ बोल्लोकुन्, “तोरा डोङा गैर्होक्पटि लेगाउ आउँ माछा मार्बाक्नि जाल झाँक्।”
5ओहिं आर्हाल सुनिहिन् सिमोने येसुलाइ बोल्लोकुन्, “ओहो गुरु, हामि ता रातभोरिय मच्छ्वारि फेंकुहुँक् भेटौसुधा एकौ फर्ह्या माछा बैनेपाइल। भेटौ तुँइ बोलिहालैबे उहेसैर्हे मुँइ एक्बाजिसे जाल झाँकम्ना।”#यहुन्ना २१:३ 6जाल किस् झाँक्बा ओछि ता यट्का धेरेक्कुर माछा झाँकि जाइलुहुन् कि उखर्हाक् जालौ फाटाबाक् सनकक् परौ भेलाहा।#यहुन्ना २१:६ 7तसौ उखर्हाइ ओछि ओर्को डोङामा रैल्ह सङ्लकलाइ चिच्याइबानाइ हाथ लम्काइ-लम्काइ हाँख्रालाहा। उखर्हाइ आइबानाइ माछा गर्थि-गर्थि झिंक्बा ठाल्लुहुन्। झिंक्ते-झिंक्ते दोहोगोटा डोङाइ माछालक् धेरेक्कुर भेइबानाइ डोङाय दुब्बाक् भेलाहा। 8ओरङ् देख्नेसौ सिमोन पत्रुस येसुक् पाओमा घोप्टो पोरिबानाइ ढोक् करिहिन् बोल्लोकुन्, “पर्भु, मुँइ पापि रहम्ना, उहेसैर्हे मोराभटे टार्हो भेइदे!”
9किसाबुने ओट्का धेरे माछा झाँकिजाइल देखिहिन् सिमोन आउँ ओक्राक् सङ्लक् छक्क पोर्लुहुन्। 10आउँ सिमोनक्सङ्हिं मिलिबानाइ माछा मार्लाहार जब्दिया बाज्ल मानुसक् बेटायकलक् याकुब आउँ यहुन्नाहुलाइ आको सार्होय अचम्म लाग्लाहा। येसुइ सिमोनलाइ बोल्लोकुन्, “बुन् डर मान्, अखसौ तुँइ माछालक् बोइनेकि, तुँइ असौ मानुसलकलाइ गर्थिबानाइ मोराठालाइ आन्लाहार बनस्ला।”
11यि कहिन सुन्नेसौ उखर्हाइ आफ्निक् डोङालक् तालावक् छेओमाहा तानिबानाइ आन्लुहुन् आउँ सेप्थोक् छारिहिन् येसुक् पाछु-पाछु लाग्लुहुन्।
येसुइ माहारोग लाग्ल मानुसलाइ राम्रो पार्लक्
(मत्ति ८:१-४; मर्कुस १:४०-४५)
12एक्बाजि येसु कुन्हुँ एक्टा सहरै रैल्हक्। उ सहरै देहिय भोरि माहारोग लाग्ल एक्जेना मानुस रैल्हक्। ओहिं येसुलाइ देखिहिन् ओक्राक् पाओमा घोप्टो पोरोहिन् यन्हिं बाजिहिन् बिम्ति कर्लक्, “अ! मोरा पर्भु, तुँइ चाहिबुने मोरानि सद्धे काराबा पारस्ला!”
13येसुइ ओक्राक् उप्रै हाथ धरिबानाइ बोल्लोकुन्, “मुँइ चाहाम्ना तुँइ अख्निहिं सद्धे भेउ।” तसौ ताट्काले ओक्राक् लाग्ल माहारोग राम्रो भेइहाल्लकुन्। 14तसौ येसुइ ओक्रालाइ करा करिहिन् आर्हालकुन्, “दिठाउ, तुँइ राम्रो भेल कहिन् कुन्हुँक् ठालाइ बुन् बाज्! आउँ मोसाक् नियमे बोल्लो बमजिम मन्दिरमाहा पुझरिक्ठालाइ जाहिन् आफ्निलाइ देखाउ। आउँ भेंटि चार्हाहिन् जम्माहिंक् आगारि तुँइ सद्धे भेल पर्मान देखाउ।”#लेबि १४:१-३२
15उ दिनेसौ ओर्साक् येसुक् बिसइमा अज्झ बाँइ-बाँइ भेहिन् जाइलकुन्, आउँ एक्दमे धेरे मानुसलक् ओक्राक्पाछु परमेस्वरक् सिच्छा सुन्बाक्लाइ आउँ राम्रो भेबाक्लाइ आबाठाल्लुहुन्। 16भेटौ येसुसेहे अस्करे सुन्सान्न ठाँओमा जाहिन् परमेस्वरक्सङ्हिं पाराथ्ना करिहिन् बसइ।
येसुइ कुज्या मानुसलाइ राम्रो पार्लक्
(मत्ति ९:१-८; मर्कुस २:१-१२)
17एक्दिन येसुइ मानुसलकलाइ परमेस्वरक् सिच्छा सिखातिहि रैल्ह धर्लाहा। कुन्हुँ-कुन्हुँ फरिसिलक् आउँ धर्म-गुरुलक् आको ओक्राक् छेंओइ बसिहिन् धर्ल रैल्हुहुन्। उखर्हासेहे गालिल आउँ यहुदिया बाज्ल ठाँओक् जम्मा गाउँलकक्भटे आउँ यरुसलेम सहरक्भटे आको आइल रैल्हुहुन्। येसुक् ठाँओइ बेरामिलकलाइ राम्रो काराबा पार्बाक् परमपर्भुक् सक्ति रैल्हकुन्। 18मानुसलके येसुक्ठालाइ एक्जेना कुज्या भेल बेरामि मानुसलाइ बिछौनाहिंक्सङ्हिं बोकिहिन् आन्लुहुन्। उखर्ह्वाइ ओक्रानि घरभिट्रइ येसुक् आगारि पुर्याबाक् बल कर्लुहुन्। 19भेटौ ओछि मानुसलक् कोचाम्कोच रैल्ह भेइटे येसुक्ठालाइ ओक्रालाइ पुर्याबाक् पैंदा नहिंपाइलुहुन्। उहेसैर्हे उखर्हाइ उ बेरामिलाइ घरक् छान्हइ लेगालिहिंक् आउँ छान्ह छार्ल खप्तालक् झिंकिबानाइ उ बेरामि मानुसलाइ बिछौनाहिंक्सङ्हिं ओछिसौ बिस्तारे येसुक् आगारि झार्लिहिंक्। 20उ मानुसलके यरङ् बिस्वास कर्ल देखिहिन् येसुइ उ बेरामिलाइ बोल्लोकुन्, “तोरा पाप छेमा भेल रहेस्ला।”
21तसौ येसुइ बोल्लो यि कहिन् सुनिहिन् ओछि रैल्ह धर्म-गुरु आउँ फरिसिलके आफ्नि-आफ्नि मनमा बाज्बा ठाल्लुहुन्, “परमेस्वरक् निन्दा कर्लाहार यि मानुस कुन्ग्वा ते? परमेस्वरे माटेन् पापक् छेमा कर्बा पारैस्!”
22उखर्हाक् मनक् कहिन् बुझिबानाइ येसुइ बोल्बा ठाल्लाहा, “तोहोराखर्हाइ किसा यरङ् सोंचोहोला? 23मुँइ यि कुज्या मानुसलाइ ‘तोरा पाप छेमा भेवास्बे’ बोल्बाक् आउँ ‘उठिबानाइ हिंठ्’ बोल्बामा कुन् सेहे सजिलो भेका, लु बाजह ता? 24भेटौ दिठाहो, यि सन्सारै मुँइ मानुसक् बेटायकलाइ मानुसलकक् पाप छेमा कर्बाक् अधिकार रहैस् बाज्बाक् कहिनक् पर्मान मुँइ तोहोरालाइ देम्ना।” ओछिसौ उ कुज्या बेरामि मानुसलाइ येसुइ बोल्लोकुन्, “मुँइ तोरानि बोल्मेर्ला, असौ उठ् आउँ आफ्निक् बिछौना उठाहिन् बोकिबानाइ घर जा।”
25उ मानुसे उहे तख्नि उठिबानाइ आफ्निक् बिछौना बोकिबानाइ परमेस्वरक् पर्सन्सा कर्ते आफ्निक् घर फर्किहिन् जाइलक्। 26तसौ उखर्ह्वा जम्माय एक्दमे अचम्म भेलुहुन् आउँ परमेस्वरक् यरङ् बर्के सक्तिक् काम देखिबानाइ डर लाग्लाहा। उखर्हा परमेस्वरक् पर्सन्सा कर्ते यन्हिं बाज्बा ठाल्लुहुन्, “आजु ता हामि कनङ् अचम्मक् कहिन् देख्बा पाहुँक्!”
येसुइ लेबिलाइ चेला बन्बाक्नि हाँख्रालक्
(मत्ति ९:९-१३; मर्कुस २:१३-१७)
27ओक्राक्पाछु उ ठाँओक्भटे येसु निस्किहिन् जाइलक्। तसौ लेबि#५:२७ लेबि: यक्रानि मत्ति बाजिहिनौ चिन्हेला। नाउँ भेल एक्जेना तिरो उठालाहार मानुसलाइ तिरो बुझाबाक् अड्डाइ बसिहिन् रैल्ह देख्लकुन्। येसुइ ओक्रानि बोल्लोकुन्, “मोरा पाछु लाग्।” 28तसौ लेबि सेब्भ्रोउ थोक् छार्लक् आउँ उठिहिन् येसुक् पाछु हिंठ्लक्।
29यक्राक्पाछु लेबिय येसुक् लागि आफ्निक् घरमाहा बर्के भोज चालालक्, उ भोजइ ओर्को आको थुप्रोय तिरो उठालाहार मानुसलक् आउँ ओर्को थुप्रोय मानुसलकौ भोज खाबा बस्ल रैल्हुहुन्। 30फरिसि आउँ उखर्हाक् धर्म-गुरुलके घुन्घुनाते येसुक् चेलालकलाइ यन्हिं बोल्लाहा, “तोहोराखर्हाइ किसा तिरो उठालाहार#५:३० तिरो उठालाहार: यहुदिक् अगुवालके तिरो उठालाहार मानुसलाइ पापि ठान्हथ्। उखर्ह्वाक्सङ्हिं बसिहिन् नहिंखाथ। आउँ उहेरङ् ओर्को पापिलकक्सङ्हिं बसिहिन् खाबाक्-पिबाक् करहला?”#लुका १५:१-२
31तसौ येसुइ उखर्ह्वानि जुबाप देलाहा, “रोग नहिंलाग्ल मानुसक् लागि बैध नाचाहेक् तर रोगिलकक् लागि ते चाहेला। 32उहेरङ् करिहिन् मुँइ आको धर्मि मानुसक् लागि बोइने तर पापि मानुसलाइ आफ्निक्-आफ्निक् पाप मानिहिन् परमेस्वरक्पटि मन फर्काबा पोर्लाहार बाजिहिन् हाँख्राबालाइ आइल रहम्ना।”
बर्त बस्बाक् बिसइक् कहिन्
(मत्ति ९:१४-१७; मर्कुस २:१८-२२)
33कुन्हुँ-कुन्हुँ मानुसलके आहिन् येसुलाइ सोर्ल्हिहिंक्, “यहुन्नाक् चेलालके ता साँद्धाउय बर्त बसट्थ्ला आउँ पाराथ्ना करट्थ्ला। फरिसिलकक् चेलालकुहु उहेरङे करट्थ्ला, भेटौ तोरा चेलालक्सेहे खाबा पिबाक् काम माटेन् करट्थ्ला।”
34येसुइ उखर्हालाइ जुबाप देलाहा, “तोहोराखर्हा बिहाओक् भोजइ दुलाहाक्सङ्हिं आइलाहार जन्तिलकलाइ किस् खाबाय नहिंदेहिने पाठाहोला ते? 35भेटौसुधा, यरङक् दिनलक् आको आयला, जख्नि दुलाहा उखर्हाक् माझक्भटे छुटाइजाइस्, तसौ पे उ मानुसलके बर्त बस्बा थालट्थ्ला।”
36फेरि येसुइ ओर्को आको खिसा लेहिन् बोल्लाहा, “कुन्हुँहि लौओ लुगा फाटाइबानाइ थोथ्रो लुगाइ ना टाल्हथ्। तयौ टाल्हिय बुने, लौओ लुगाउ बिग्रेला, आउँ लौओ ढापा थोथ्रो लुगाहुक्सङ्हिं आको नामिलेक्।” 37“उहेरङ् करिहिन् कुनेसेहे भर्खर निस्काल अङ्गुरक् रसलाइ थोथ्रो छालाक् थैल्हिमा हालैस् भेकाते? तयौ हालिय बुनेता उ छालाक् थैल्हि फुटिहालेला आउँ ओछि हाल्ल अङ्गुरक् रस जम्मा हेरिहिन् जायला। 38लौओ भर्खर बानाल अङ्गुरक् रससेहे लौओ छालाक् थैल्हिहिमा हाल्बा पोर्लाहार! 39आउँ खाइलटाकै जुन्हुँ मानुसे भेटौ छिप्ल अङ्गुरक् रस खाहिन् पाछुसेहे भर्खर बानाल लौओ अङ्गुरक् रस खाबा मन ना पोराथ्। उखर्हाइ बाजट्थ्ला, छिप्लसेहे साउह्वार भेला।”
Seçili Olanlar:
लुका 5: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
