लुका 14
14
फरिसिक् घरै येसु
1एक्टा बिसारिक दिनै येसु फरिसिलकक् कुन्हुँ एक्जेना नाइक्या मानुसे खाबा हाँख्राल सिहिरे ओछि जाइलक्। ओछि जम्माभेल मानुसलके येसुलाइ चिवा करिहिन् बस्ल रैल्हुहुन्। 2ओछि एक्जेना हाथौ-टाङौ सुख्ल मानुस येसुक् आगारि बसिहिन् धर्ल रैल्हक्। 3तसौ येसुइ धर्म-गुरु आउँ फरिसिलकलाइ सोर्ल्हाहा, “परमेस्वरे मोसाक्भटे देल नियम अनुसार बिसारिक दिनै बेरामि मानुसलाइ राम्रो काराबा भेला ना बोइने?”
4तर उखर्ह्वाइ किच्छुय नहिं बाज्लुहुन्। तसौ येसुइ उ बेरामिलाइ छुइबानाइ राम्रो काराहिन् पाठालकुन्। 5ओक्राक्पाछु येसुइ उखर्ह्वानि बोल्लाहा, “तोहोराखर्ह्वाइ कुन्हुँक् छावापुटा आउँ गाइ-बोहोरलक् बिसारिक दिनै खार्ह्मा पोरिबुने किस् ओक्रालाइ चान्चारो नानिस्काहो ते?”#मत्ति १२:११
6फेरि आको उखर्ह्वाइ किच्छुय बाज्बा नहिंपार्लुहुन्।
आफ्निलाइ बर्के जुन्ठान्भा
7ओछि आइलाहार पहुनालके मज्जाक्-मज्जाक् ठाउँ छान्ल देखिहिन् येसुइ यरङ् खिसा सुनालाहा, 8“तोहोराखर्हा कुन्हुँक् बिहाओइ जाइलटाकै मज्जाक्-मज्जाक् ठाउँ छानिबानाइ बुन् बसह। कुन्हुँ तोहोराखर्ह्वाइसौ बर्के मानुसलाइ हाँख्राल आको भेबा पारेला।#हितोपदेस २५:६-७ 9तसौ बर्के मानुस आइलटाकै तोहोरालाइ हाँख्रालाहारे ‘इखर्ह्वालाइ बस्बाक् ठाउँ छारहता’ बाजिहिन् तोरानि बस्ल ठाँओक्भटे उठायसा। ओरोङ् काराल बेलाइ तुँइ लाजे लिंल्लिल भेइबानाइ जम्माहिंसौ टरै बस्बा पोरेसा। 10बरुस्ता बिहाउ भोजै जाइलटाकै पाछारिक्पटि जाहिन् बस्ल राम्रो आउँ नेउता देलाहारे आइबानाइ तोहोरालाइ ‘ए सङ्खर्हा, उप्रिहिमा आहोना, यटे राम्रो ठाँओइ बसहना,’ बाजिहिन् जम्माहिंक् आगारि तोरा बर्के इज्जत भेस्ला। 11किसाबुने आफ्नि बिचारे बर्के भेबा खोज्लाहारसेहे जम्माय होच्याइजाट्थ्ला, आउँ आफ्निलाइ होच्यालाहारसेहे बर्के बानाइजाट्थ्ला।”#मत्ति २३:१२; लुका १८:१४
12तसौ येसुइ आफ्निलाइ हाँख्रालाहार धर्मक् अगुवालाइ बोल्लोकुन्, “भोज चालालटाकै तुँइ आफ्निहिंक् मानुसलक्, दाजेरभायर, इस्टमिट्रलाइ आउँ धनि छरछिमेकिलकलाइ माटेन् नेउता बुन्देउ। उखर्ह्वाइ साँटा फर्काबा तोरालाइ आको हाँख्राइहालेस्ला। 13बरुस्ता भोज चालालटाकै गरिप, लुल्ह्या-लङ्रा आउँ अन्धालकलाइ हाँख्राउ। 14तसौ तुँइ आसिक् पास्ला, किसाबुने तोरालाइ साँटा फर्काबाक् उखर्ह्वाक् ठालाइ किच्छु थोक् नाभेथ्। तर परमेस्वरक् नजरइ धर्मि रैल्ह मानुसलक् मोर्लोक्भटे बिउँटतुहु परमेस्वरेहि तोरानि इनाम देबास्बे।”
बर्के भोजक् खिसा
(मत्ति २२:१-१०)
15येसुक् कहिन् सुनिबानाइ ओक्राक्सङ्हिं खाबा बस्लाहार एक्जेना मानुसे यन्हिं बाज्लक्, “परमेस्वरक् राज्जेमाहा भोज खाबा पाइलाहार कट्का आसिक् पाइल भेट्थ्ला।”
16येसुइ उखर्ह्वालाइ खिसा लेइबानाइ यन्हिं बोल्लाहा, “कुन्हुँ एक्जेना मानुसे बर्के भोज तियार करिबानाइ थुप्रय मानुसलकलाइ हाँख्रालाहा। 17भोज खाबाक् समइ भेनेसौ निम्त्यालुलकलाइ ‘असौ खाबाक् बेला भेउकुन्बे’ बाजिहिन् आफ्निक् चाकरलाइ हाँख्राबाक्नि पाठालाहा। 18ओहिं उ निम्त्यालुलकलाइ हाँख्रायटौ एकुन्गोटा निउ पारिबानाइ आबा नहिंमान्लुहुन्। एक्जेनाइ बाज्लक्, ‘मुँइ खेत किन्ल धरम्ना उहेसैर्हे मुँइ उ खेत दिठाबा जाबाक् रहैस्। मोरानि छेमा करिदे, मुँइ जाबा नाँपाम्।’ 19ओर्को जेनाइ आको यन्हिं बाज्ललक्, ‘पाँच होर बोहोर किन्ल धरम्ना आउँ आजुहि उखर्ह्वाक् काम जाँच करिहिन् दिठाबा जाबा ठाल्ल धरम्ना। मोरानि छेमा करिदे।’ 20उहेरङ् करिहिन्, ओर्को मानुसे आको यन्हिं बोल्लाहा ‘मुँइ भर्खरे बिहाउ कर्ल धरम्ना। उहेसैर्हे मुँइ जाबा नाँपाम्।’ 21चाकरे फर्किबानाइ जाहिन् जम्मा कहिन् मालिकलाइ सुनालकुन्। ओछिसौ मालिके रिसाइबानाइ झरक्याहिन् बोल्लोकुन्, ‘चान्चारो करिहिन् सहरक् पैंदालकै आउँ खउला-खउलामाहा जाहा। ओछिसौ गरिप, लुल्ह्या-लङ्रालक् आउँ अन्धालकलाइ हाँख्राहिन् यछि आनिहिखान्।’ 22ओट्का करिहिन् सक्नेसौ चाकरिहिके मालिकलाइ यन्हिं बोल्लोकुन्, ‘मालिक, तुँइ बोल्लोहिंक् परौ मुँइ जम्माहिंलाइ हाँख्राहिन् आन्मिखान्। भेटौसुधा अज्झउ बस्बाक् बानाल ठाउँलक् ता खालिय रहेला।’ 23फेरि मालिके ओक्रानि बोल्लोकुन्, ‘गाँओइ जाइबानाइ पैंदा-पैंदालकै भेल मानुसलकलाइ कर लागाहिन् भेटौ लेहिन् आनिहिखान् आउँ मोरा घर भोरुस्! 24किसाबुने मुँइ तोहोरानि बोल्मेहेर्ला, पैल्हा हाँख्राइ जाइल निम्त्यालुलकक् मध्यमा कुन्हुँहि मोरा भोज चाख्बा नापाथ’।”
चेलालके उठाबा पोर्लाहार दुक्ख
(मत्ति १०:३७-३८; ५:१३; मर्कुस ९:५०)
25एक्दिन मानुसलकक् बर्के धुइरो येसुक्सङ्हिं जाइतिहि रैल्हुहुन्। तसौ उखर्ह्वाक्पटि फर्किबानाइ येसुइ बोल्लाहा, 26“मोरा पाछु हिंठ्बा चाइल्हाहारे आफ्निक् बाप्पो-महँटार, आफ्निक् बहु, छावापुटा, ताचुबाबु, दिदिनानु, आउँ आफ्निहुलाइसौ बर्ता मोरानि माया कर्बा पोर्लाहार नाटेन् ता, उ मोरा चेला भेबा नाप्पारइ।#मत्ति १०:३७ 27मोरा खातिर दुक्ख भोग्बाक्नि आफ्निक् कुरुस बोकिबानाइ मोरा पाछु नहिं लाग्लाहारसेहे मोरा चेला भेबा नाप्पारइ।#मत्ति १०:३८; १६:२४; मर्कुस ८:३४; लुका ९:२३ 28उहेरङ् करिहिन् कुन्हुँ मानुसे धधरा बानाबाक् इच्छा करिबुने आफ्नि ठालाइ रैल्ह पैसाइ पुगेलाना बोइने, कट्का खर्च लागेका, जम्मा खर्चक् हिसाब पैल्हाहि कर्बा पोर्लाहार, ना बोइने ते? 29यरङ् करिहिन् धधराक् जगसेहे बानाहिन् ओर्को कामसेहे सिधाबा नहिं पारिबुने, ओक्रानि मानुसलके यन्हिं बाजिहिन् हँस्थिला, 30‘यि मानुसे बानाबा ता ठाल्लक्, तर सिधाबासेहे बोइने पार्लक्!’ 31उहेरङ् करिहिन्, कुन्हुँ राजाइ ओर्को राजाक्सङ्हिं लाराइ कर्बा जाइलटाकै ‘दस हाजार सिपाहिलक् लेइबानाइ मुँइ बिस हाजार सिपाहि लेहिन् मोरा बिरोधइ आइलाहार राजाक्सङ्हिं लाराइ कर्बा पारम्ना ना बोइने’ बाजिहिन् पैल्हाहि बसिबानाइ सोंचोट्थ्ला! 32लाराइ कर्बा नहिंपार्लाहार भेनेमा, उ ओर्को राजा टार्होय भेइतिहि ओहिं आफ्निक् दुतलकलाइ किस् करिहिन् मिल्बा पारेका बाजिहिन् बुझ्बा पाठाट्थ्ला। 33उहेरङ् करिहिन् तोहोराखर्ह्वाक्मध्ये जैहिं मोरा लागि सेब्भ्रोउ थोक् नात्यागै, उ मोरा चेला बन्बा नाप्पारइ।
34“नुन राम्रो चिंज हो, ओरोङ् भेटौ नुनक् सुवार हेरिहिन् जाइबुने उ फेरि कहने नुनाल बानाबा? 35उ ना ता खेतबारिमा हाल्बाक् ना मलक् धेरिमा हाल्बाक् काम लागेला। मानुसलके उ चिंजलाइ घुघाइ हालट्थ्ला। जक्राक् कान रहेक्ला, ओहिं सुनुस्!”
Seçili Olanlar:
लुका 14: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
