प्रेरित 7
7
माहासभाक् आगारि स्तिफनसक् जुबाप
1तसौ माहा-पुझरिय स्तिफनसलाइ सोर्ल्होकुन्, “तोरालाइ लागाल दोसक् कहिन् किस् साँच्चिहिंक् होय ते?”
2स्तिफनसे जुबाप देहिन् बाज्लक्, “अ मोरा ताचु-बाबु आउँ बाबाहेलक्, मुँइ बाज्ल कहिन् सुनिदेहे– हाम्रा पुर्खा अब्राहाम, हारान बाज्ल ठाँओइ जाबाइसौ आगारि मेसोपोटामिया बाज्ल देसै बसै। ओच्छिहि ओक्रालाइ महिमामय परमेस्वरे दर्सन देलकुन्।#उत्पति १२:१ 3तसौ परमेस्वरे अब्राहामलाइ बोल्लोकुन्, ‘आफ्निक् देस आउँ आफ्निक् मानुसलकलाइ छारिहिखान् आउँ मुँइ तोरानि देखाल देसै जा।’#उत्पति १२:१ 4ओक्राक्पाछु अब्राहाम कल्दिलकक् देसक्भटे निस्किहिन् हारान बाज्ल ठाँओइ जाइलक् आउँ ओच्छिहि बस्लक्। ओक्राक् बापेक मोर्नेसौ परमेस्वरे ओक्रालाइ उ ठाउँयसौ अख्नि तोहोलेक बस्ल यिहे देसै आन्लकुन्।#उत्पति ११:३१; १२:४ 5यि देसै परमेस्वरे अब्राहामलाइ चुटेकौ ठाउँ, एक्टा टाङ् टेक्बाहुँक् जिमि नहिंदेलकुन्। भेटौसुधा ओहिं ओक्रानि यि पर्तिग्या देलकुन्, ‘यि देस तुँइ आउँ तोरा सन्तानलकलाइ देम्ना’ तर अब्राहामक् एकौग्वा सन्तान नहिंभेल रैल्हकुन्।#उत्पति १२:७; १३:१५; १५:१८; १७:८ 6परमेस्वरे अब्राहामलाइ यन्हिं बोल्लोकुन् ‘तोरा सन्तानलक् ओर्कोहिंक् देसै बसहि सरिहिन् बिदेसै जाहिन् बसट्थ्ला, आउँ ओस्कोक् मानुसलके उखर्ह्वालाइ चार सइ बर्ससम्म कामारा बानायट्थ्ला, आउँ नराम्रो बेभार करेट्थ्ला।’#उत्पति १५:१३-१४ 7तर परमेस्वरे यन्हिं बाज्लक्, ‘उखर्ह्वालाइ कामारा बानालाहार मानुसलकलाइ मुँइ साजाइ देम्खान्ला। ओक्राक्पाछु उखर्ह्वा उ देसेसौ निस्किहिन् आट्थ्ला आउँ यिहे ठाँओइ आहिन् मोरा भक्ति करट्थ्ला।’#प्रस्थान ३:१२ 8तसौ परमेस्वरे अब्राहामक्सङ्हिं बाचा बाँर्ल्हक् आउँ उ बाचालाइ सम्झना कर्बाक्नि ‘खतना कर्बाक् बिधि पुरा कर्’ बाजिहिन् अब्राहामलाइ आग्या देलकुन्। आउँ अब्राहामक् बेटायक इसाहाक जर्मनेसौ आठ दिनक् दिनै ओक्राक् खतना करिदेलकुन्। इसाहाक याकुबक् बापेक भेलक्, तसौ इसाहाके याकुबक् खतना करिदेलकुन्। याकुब बार्ह कुललकक् पुर्खा बन्लक्, आउँ याकुबे उखर्ह्वाक् खतना करिदेलाहा।#उत्पति १७:१०-१४; २१:२-४; २५:२६; २९:३१—३५:१८
9“याकुबक् बेटायक योसेफलाइ ओक्राक् दाजिहिके-भाइकेलके रिस कर्थिक्। उखर्ह्वाइ योसेफलाइ मिस्रदेसक् मानुसलकक्ठालाइ बेंच्लिहिंक् आउँ उ कामारा भेलक्। भेटौ परमेस्वर योसेफिहिंक् सङ्हिं रैल्हक्।#उत्पति ३७:११; ३७:२८; ३९:२; ३९:२१ 10परमेस्वरे योसेफलाइ जम्मा दुक्खक्भटे छुटालकुन्। आउँ ओक्रालाइ बुद्धि देलकुन् तसौ फारो राजाक् मनै योसेफ राम्रो मानुस हो बाजिहिन् देखालकुन्। उहेसैर्हे फारो राजाइ ओक्रालाइ मिस्र देसक् सासक बानालकुन्। उहे बेलाहिंसौ दरबार भिट्रै योसेफक् हुकुम चल्बा ठाल्लकुन्।#उत्पति ३९:२१; ४१:४०-४३ 11ओक्राक्पाछु पुराय मिस्र देस आउँ कनान देसभोरिय अलिकाल पोर्लोकुन्। उहेसिहिरे जम्मायँ जेना बर्के दुक्खमाहा पोर्लुहुन्, आउँ हाम्रा बाज्या-बाराजुक् मानुसलके खाबाक् लागि किच्छु अन्नय बोइने पाइलुहुन्।#उत्पति ४२:१-२ 12तर याकुबे मिस्र देसै अन्न रेहेला बाजिहिन् सुनिबानाइ पैल्हा आफ्निक् बेटाहिकलकलाइ ओच्छि पाठालाहा। 13यरङ् करिहिन् उखर्ह्वा दोस्रो बाजि अन्न किन्बा जाइटे योसेफे आफ्निक् दाजेक-भायकलकक्सङ्हिं आफ्निलाइ चिन्हालक्। उहेबेलाइ योसेफक् परिवारक् बिसइमाहा फारोलाइ थाहा भेलकुन्।#उत्पति ४५:१; ४५:१६ 14ओक्राक्पाछु योसेफे आफ्निक् बापेक याकुबलाइ ‘जम्मायँ जाहान-परिवार सुधाय लेहिन् मिस्रै आहो’ बाजिहिन् खभर पाठालक्। उ खभर पाइनेसौ याकुब आफ्निक् जम्मा पचहतर जेनाक् जाहान-परिवार लेइबानाइ मिस्रक्पटि झर्लक्।#उत्पति ४५:९-१०; ४५:१७-१८; ४६:२७ 15यरङ् करिहिन् ओच्छिहि याकुब आउँ हाम्रा बार्ह कुलक् बाज्या-बाराजुलक् मोर्लुहुन्।#उत्पति ४६:१-७; ४९:३३ 16ओक्राक्पाछु उखर्ह्वाक् मोर्लो देहिलक् सकेम सहरै लेगालुहुन् आउँ अब्राहामे सकेमै हमोरक् बेटाहिकलकक्भटे पैसा तिरिहिन् किन्ल चिहानै गार्लुहुन्।#उत्पति २३:३-१६; ३३:१९; ५०:७-१३; यहोसु २४:३२
17“जब परमेस्वरे अब्राहामक्सङ्हिं कर्ल बाचा पुरा भेबाक् बेला आबाय लाग्ल रैल्हकुन्, उहेबेलाइ मिस्र देसै हाम्रा इस्राएलि मानुसलक् बर्हिबानाइ थुप्रोय भेहिन् सक्ल रैल्हुहुन्।#प्रस्थान १:७-८ 18उहे समइमा मिस्र देसै योसेफक् बिसइमा किच्छु थाहा नहिंभेल एकजेना लौओ राजाइ राज्जे चालाबा ठाल्लक्। 19ओहिं हाम्रा बाज्या-बाराजुलकक् बिरोधै जाल रच्लक् आउँ उखर्ह्वालाइ अत्याचार कर्बा ठाल्लक्। ओहिं इस्राएलिलकक् बालखलकलाइ मोरुस् बाजिहिन् जर्मेहेबिट्के जबरजस्ति करिहिन् घरेसौ बाहार घुघाबा लागायथ्।#प्रस्थान १:१०-११; १:२२ 20उहेबेलाइ मोसाक् जल्म भेलकुन्। मोसा परमेस्वरक् नजरै राम्रो रैल्हक्। ओक्राक् माँयके-बापिहिके ओक्रालाइ तिन मैन्हाँसम्मयँ घर भिट्रिहिमा नुकाहिन् पाल्लिहिंक्।#प्रस्थान २:२ 21तर पाछु ओक्रालाइ घरेसौ बाहार लेगाहिन् धर्लटाकै फारो राजाक् बेटिहिके भेंटाहिन् लेगाइबानाइ आफ्निक् छाउरा बानाहिन् पाल्लकुन्।#प्रस्थान २:३-१० 22मोसाइ पर्हिबानाइ मिस्रिलकक् जम्मा ग्यान पाइलक्, आउँ उ बोलिचालिमा आउँ कामकाजै पर्भाबसालि भेइटे जाइलक्।
23“जब मोसा चालिस बर्सक् भेलक्, तसौ ओहिं आफ्नि इस्राएलि दाजेक-भायकलकलाइ भेंटाबा जाबाक् इच्छा ओक्राक् मनै आइलकुन्।#प्रस्थान २:११-१५ 24एक दिन मोसाइ एकजेना मिस्रि मानुसे एकजेना इस्राएलिलाइ पिट्बा ठाल्ल देख्लक्। ओहिं उ इस्राएलिलाइ जोगालकुन्, आउँ अत्याचार कर्लाहार मिस्रिलाइ मारिबानाइ बद्ला लेलकुन्। 25परमेस्वरे मोसाक्भटे इस्राएलिलकलाइ छुट्कारा देबा ठाल्ल धरैस् बाजिहिन् आफ्निक् मानुसलके बुझट्थ्ला भेका बाजिहिन् ओहिं सोंच्लो धर्लक्, तर उखर्ह्वाइ उ कहिन् नहिंबुझ्लुहुन्। 26ओर्को दिनै मोसाइ दुइजेना इस्रायलियलक् आको बाज्रा-बाज्रि कर्ल देख्लक्। उखर्ह्वालाइ मिलाबाक् खोजिहिन् ओहिं यन्हिं बोल्लाहा, ‘तोहोलेक एके जातक् मानुस भेहिनौ किसा यरङ् करिहिन् आफ्निहिमा झग्रा करहला?’ 27तर आफ्नि जातक् मानुसलाइ पिट्लाहारे मोसालाइ यन्हिं बाजिहिन् ठेलिपाठालकुन्, ‘कुनेग्वाइ तोरालाइ हाम्रा उप्रै हाकिम आउँ नियाँधिस बानाहिन् पाठावास्? 28काल्हु उ मिस्रिलाइ मार्लक् परौ तुँइ मोरोउलाइ मार्बा चाहास्ला?’ 29यरङ् कहिन् सुन्नेसौ मोसा पाराइबानाइ मिद्धान देसै जाहिन् बसबास कर्बा ठाल्लक्। ओछि बस्ते-बस्ते ओक्राक् दुइजेना बेटायकलक् जर्मलकुन्।#प्रस्थान १८:३-४
30“चालिस बर्स बितिहिन् सक्नेसौ सिनै बाज्ल डाँराक् उखास लाग्दो ठाँओइ बलिहिन् रैल्ह झाङक् आगिमा एकजेना स्वर्गोदुत ओक्राक्ठालाइ देख्वार पोर्लक्।#प्रस्थान ३:१-१० 31जख्नि मोसाइ यि देख्लक् तसौ ता यि दर्सन देखिहिन् उ छक्क पोर्लक्, आउँ ओहिं उ दिठाबालाइ लज्जिकिहिमा जाइलटाकै ओहिं परमेस्वरक् सोर सुन्लक्, 32‘मुँइ तोरा बाज्या-बाराजु अब्राहाम, इसाहाक आउँ याकुबक् परमेस्वर हो।’ तसौ मोसा यि सुनिहिन् डरे थरथराबा ठाल्लक्, आउँ ओहिं ओसाक्पटि दिठाबाउसम्म आँट नहिं कर्लक्। 33तसौ परमपर्भुइ मोसालाइ बोल्लोकुन्, ‘तोरा टाङक्भटे जुत्ता फुक्लाउ, किसाबुने जुन् ठाँओइ तुँइ ठड्ध्याल रहस्ला, उ पबित्र जिमि हो। 34मिस्र देसै भेल मोरा मानुसलके पिरा सहबा पोर्लो मुँइ देख्ल धरम्ना, आउँ उखर्ह्वा छट्पटाल आउँ काँराना-रुवानाँ कर्ल सुन्ल धरम्ना। मुँइ उखर्ह्वालाइ छुटाबाक्नि आइल रहम्ना, आउँ यि कामक् लागि मुँइ तोरानि मिस्र देसै पाठामेर्ला।’
35“यिहे मोसा हो, जक्रालाइ आफ्निक् इस्राएलि जाते यन्हिं बाजिहिन् असुइकार कर्लिहिंक्, ‘कुने तोरालाइ हाम्रा उप्रै हाकिम आउँ नियाँधिस बानाहिन् पाठावास्?’ जिक्-जिक् बल्ल झाङै मोसाक्सङ्हिं स्वर्गोदुत देख्वार पोरिहिन् परमेस्वरेहि मोसालाइ इस्राएलिलकलाइ छुट्कारा देबा आउँ उखर्ह्वाक् उप्रै अगुवा भेबालाइ चुनिहिन् पाठालकुन्।#प्रस्थान २:१४ 36उहे मोसाहि इस्राएलिलकलाइ मिस्र देसक्भटे बाहार निस्काहिन् आन्लाहा, आउँ मिस्र देसै, लाल समुन्रै आउँ चालिस बर्ससम्मयँ उखास लाग्दो ठाँओइ मोसाइ अचम्मक् काम आउँ चिन्हँलक् देखालाहा।#प्रस्थान ७:५; १४:२१; गन्ति १४:३३ 37उहे मोसाइ इस्राएलिलकलाइ बोल्लो धर्लाहा, ‘परमेस्वरे तोहोराखर्ह्वाक् आफ्निक् दाजु-भाइलकक् माझक्भटे मोरे परौ एकजेना अगमबक्ता तोहोराठालाइ पाठाइदेहेर्ला।’#ब्यबस्था १८:१५; १८:१८ 38इस्राएलिलक् उखास लाग्दो ठाँओइ सिनै डाँराक् फेद्राइ जउर भेइटे मोसा उहेखर्ह्वाक्सङ्हिं रैल्हक्। स्वर्गोदुत सिनै बाज्ल डाँराइ ओक्राक्सङ्हिं साराओइ आउँ ओइहिंय स्वर्गोदुतक्भटे पाइल जिबन देलाहार सिच्छा इस्राएलिलकलाइ सुनालाहा।#प्रस्थान १९:१—२०:१७; ब्यबस्था ५:१-३३
39“हाम्रा बाज्या-बाराजुलके ओक्राक् आग्या पालन कर्बा नहिं मान्लुहुन्। बरुस् उखर्ह्वाइ मोसालाइ छारिहिन् मिस्र देसिहिमा फर्किहिन् जाबाक् मन कर्लुहुन्। 40उखर्ह्वाइ मोसाक् दाजेक् हारुनलाइ यन्हिं बोल्लिहिंक्, ‘हाम्रा आघु-आघु डोर्यालाहार कुन्हुँ देउतालक् हाम्रा लागि बानाइदे, किसाबुने हाम्रालाइ मिस्र देसक्भटे निस्काहिन् आन्लाहार उ मोसालाइ किस्ग्वा भेल रहेक्ला हामि किच्छु थाहा बबेपाइल।’#प्रस्थान ३२:१ 41उ समइमा उखर्ह्वाइ बाछाक् एक्टा मुर्ति बानालुहुन् आउँ ओक्राक् आगारि भोग चार्हालुहुन्। उखर्ह्वाइ आफ्नि हाथे बानाल मुर्तिक् लागि खुसियालि मानालुहुन्।#प्रस्थान ३२:२-६ 42तर परमेस्वरे उखर्ह्वालाइ त्याग्लाहा आउँ आकासक् सुर्ज, चान्दा आउँ तारालकलाइ पुजुस् बाजिहिन् छार्लाहा। यक्राक् बिसइमा अगमबक्तालके धर्मसास्ट्रै यन्हिं लेख्ल धरट्थ्ला–#आमोस ५:२५-२७; रोमि १:२४; ब्यबस्था १:१९
“‘ए इस्राएलिलकेहेलक्!
किस् तोहोराखर्ह्वाइ चालिस बर्ससम्म उखास लाग्दो ठाँओइ
मोरा लागि पसुलकक् बलि आउँ भेंटिलक् चार्हाउहे ते?
43तोहोराखर्ह्वाइ मोलेख बाज्ल देउताक् पाल
आउँ रेफन बाज्ल देउताक् ताराक् मुर्ति बोकिबानाइ आन्लेहे,
आउँ तोहोराखर्ह्वाइ पुज्बाक् लागि बानाल रैल्हुहुन्।
उहेसैर्हे असौ मुँइ तोहोराखर्ह्वालाइ साजाइ देबाक्नि बेबिलोनुहुसौ अज्झौ ओर्साकपार पाठामेंहेर्ला।’#आमोस ५:२५-२७
44“उखास लाग्दो ठाँओइ हाम्रा बाज्या-बाराजुलकक्सङ्हिं परमेस्वरलाइ भेंट कर्बाक् पबित्र पाल रैल्हकुन्। मोसाइ देख्ल नमुनाहिंक् ठिकन् परमेस्वरे आर्हालहिंक् परौ यि पाल बानाल रैल्हकुन्।#प्रस्थान २५:९; २५:४० 45परमेस्वरे यि देसै बस्लाहार ओर्को जातक् मानुसलकलाइ धापालक् आउँ हाम्रा पुर्खालके यि देस जितिहिन् लेलटाकै यहोसुक्सङ्हिं उखर्ह्वाइ उ पबित्र पाल यिहे देसै आन्लुहुन्। ओक्राक्पाछु राजा दाउदक् पालासम्मयँ उ पबित्र पाल उहेखर्ह्वाक्सङ्हिं रहिरैल्हकुन्।#यहोसु ३:१४-१७ 46राजा दाउद परमेस्वरक् दाया पाइल मानुस रैल्हक् आउँ ओहिं याकुबक् परमेस्वरक् लागि एक्टा मन्दिर बानाबाक्नि बिम्ति कर्लक्।#२ समुएल ७:१-१६; १ इतिहास १७:१-१४ 47भेटौ परमेस्वरक् लागि उ मन्दिर सोलोमने बानालक्।#१ राजा ६:१-३८
48“तर मानुसलके बानाल मन्दिरै परमेस्वर ना बसै, जहरङ् करिहिन् अगमबक्तालके यन्हिं बाज्ल धरट्थ्ला,
49“‘स्वर्गो मोरा सिङ्हासन हो,
आउँ पिर्थिबि मोरा पाउ टेक्बाक् ठाउँ हो।
असौ तोहोलेके मोरा लागि कनङ् खालक् मन्दिर बानाहोला?
मोरा साँठाबाक् ठाउँ कछि रहेला?
50किस् यि सेब्भ्रोउ थोक् मुँहि बानाल बोइने ते?’
51“ए अट्टेरि मानुसेहेलक्, गाभि मन आउँ काने नहिंसुन्लाहारेहेलक्, तोहोराखर्ह्वाइ सटौघरि पबित्र आत्माक् बिरोध करिहिन् बसहला। तोहोरा बाज्या-बाराजुलके जहरङ् कर्लुहुन् तोहोरौखर्ह्वाइ ओहेरङे कर्तिहि रहला।#यसैया ६३:१० 52किस् तोहोरा बाज्या-बाराजुलके नहिंसाताल कुन्हुँ अगमबक्ता रहट्थ्ला ते? परमेस्वरक् पबित्र जन आइतिहि रहैस् बाजिहिन् खभर सुनालाहार अगमबक्तालकुहुलाइ सुधा उखर्ह्वाइ मार्लुहुन्। तोहोलेकेसेहे पबित्र जन बनिहिन् आइलाहारिहिलाइ धोखा देहिन् मार्लेहेंक्।#मत्ति ५:१२ 53तोहोलेके स्वर्गोदुतलकक् हाथक्भटे देल परमेस्वरक् नियम ता पाइलेहे, तर ओक्रालाइ पालन नहिंकर्लेहे।”
स्तिफनसलाइ दोंखोइ बाज्राहिन् मार्ल
54स्तिफनसक् कहिन् सुनिबानाइ माहासभाइ बस्ल मानुसलक् रिसे आगि भेइबानाइ आउँ उखर्ह्वाइ स्तिफनसलाइ दार्हा किंच्बा ठाल्लुहुन्। 55तर पुराय रुपै पबित्र आत्माइ चालाहिन् स्तिफनसे स्वर्गोक्पाखा दिठालक्। ओहिं परमेस्वरक् चहकारो उँजत आउँ येसुलाइ परमेस्वरक् दैन्हँक्पाखा ठड्ध्याहिन् रैल्ह देख्लक्। 56स्तिफनसे बाज्लक्, “दिठाहो, मुँइ स्वर्गो उद्रिजाइल आउँ मानुसक् बेटाहिकलाइ परमेस्वरक् दैन्हँक्पाखा ठड्ध्याहिन् रैल्ह देख्फाठाल्ल धर्मिना।”
57तर उखर्ह्वा बाराचोटे चिच्याइबानाइ आफ्निक्-आफ्निक् कान थुन्लुहुन्, तसौ उखर्ह्वाइ एकेचोटे स्तिफनसलाइ झम्टलिहिक्। 58उखर्ह्वाइ स्तिफनसलाइ दोंखोइ बाज्राहिन् मार्बालाइ सहरेसौ घिस्याइबानाइ बाहार निस्कालिहिंक्। आउँ स्तिफनसलाइ दोस लागालाहार झुट्ठा साछिलके आफ्निक्-आफ्निक् लुगा फोक्लाइबानाइ साउल बोल्लो जबानलाइ दिठाबाक् जिम्मा देहिन् स्तिफनसलाइ दोंखोइ बाज्राबा ठाल्लिहिंक्। 59उखर्ह्वाइ स्तिफनसलाइ दोंखोइ बाज्राबा ठाल्लटाकै ओहिं पर्भुलाइ यन्हिं बाजिहिन् पाराथ्ना कर्लक्, “अ पर्भु येसु, मोरा आत्मालाइ सुइकार करिदे।” 60ओक्राक्पाछु स्तिफनसे ठेउन्हाँ टेकिबानाइ बर्के सोरेसौ यन्हिं बाज्लक्, “अ पर्भु, यि पापक् दोस इखर्ह्वालाइ बुन् लागुस्।” यट्का बाज्नेसौ ओहिं आफ्निक् पारान घुघालक्।
Seçili Olanlar:
प्रेरित 7: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
