प्रेरित 18
18
पावल कोरिन्थ सहरै जाइल
1ओक्राक्पाछु पावल एथेन्स सहरक्भटे बिदा भेइबानाइ कोरिन्थ सहरै जाइलक् 2ओछि ओहिं पोन्टसै जर्मल अकिलास नाउँ भेल एकजेना यहुदिलाइ भेंटालक्। रोमि राजा क्लौडियसे जम्मा यहुदिलकलाइ रोम बाज्ल सहरक्भटे निस्किबानाइ जाबाक् आदेस देलसिहिरे, अकिलास आफ्निक् बोहेक प्रिस्किलाक्सङ्हिं भर्खरे इटालिया देसक्भटे आइल रैल्हक्। पावले उखर्ह्वानि भेंटाबा जाइलक्। 3पावल उहेखर्ह्वाक् परौ पाल बानाबाक् काम करिबानाइ आफ्निक् जिबिका चालावइ सिहिरे उहेखर्ह्वाक्सङ्हिं बस्लक् आउँ सङ्हिं काम कर्लक्। 4पावल बिसारिक दिनेपिच्छे सभाघरै जाइबानाइ यहुदि आउँ गिरिकलके येसुलाइ बिस्वास करुस् बाजिहिन् उखर्ह्वाक्सङ्हिं तर्क-बितर्क करिहिन् बुझाबाक् खोजेथ्।
5जुन् बेलाइ सिलास आउँ तिमोथि माकेडोनिया इलाकाक्भटे आइपुग्लुहुन्, पावलसेहे पुराय समइ बचन पर्चारक् कामै लाग्लक्। ओहिं यहुदिलकलाइ “येसुय मुक्ति देलाहार खिरिस्ट हो” बाज्बाक् कहिनक् साछि देबाक् लागि सिच्छा देबा ठाल्लाहा। 6तर उखर्ह्वाइ पावललाइ बिरोध करिबानाइ ओक्रानि अपमान कर्बा ठाल्लुहुन्। तसौ ओहिं उखर्ह्वालाइ चेताउनि देबाक् लागि आफ्निक् लुगाक्भटे धुर टक्टक्याइबानाइ यन्हिं बोल्लाहा, “येसुलाइ बिस्वास नहिंकर्ल दोस तोहोरा उप्रै पोरुस्, यछि मोरा किच्छु दोस बोइने। असौसेहे मुँइ अर्जाति मानुसलकक्ठालाइ जाम्ना।” 7ओक्राक्पाछु पावल ओछिसौ तितस युस्तस नाउँ भेल मानुसक् घर जाइलक्। ओक्राक् घर सभाघरक् लज्जिकै रैल्हकुन्। उ अर्जाति मानुस रैल्हक्, भेटौ परमेस्वरक् भक्ति करै। 8सभाघरक् मुख्य सासक क्रिस्पसे आउँ ओक्राक् घरक् जम्मा मानुसलके पर्भुक्लाइ बिस्वास कर्लुहुन्, आउँ कोरिन्थिमाहा भेल थुप्रोय मानुसलके पावलक् सिच्छा सुनिबानाइ बिस्वास कर्लुहुन् आउँ बप्तिस्मा लेलुहुन्।
9एक्टा रातक् समइमा पर्भुइ पावललाइ दर्सन देहिन् यन्हिं बोल्लोकुन्, “बुन् डराउ, आउँ चुप्लाहिन् बुन् बस्, तर खुसिक् खभर पर्चार कर्टेबुल, 10किसाबुने मुँइ तोरासङ्हिं रहम्ना। यि सहरै मोरा थुप्रोय मानुसलक् रैल्हसिहिरे कुन्हुँहि तोरानि हमला करिबानाइ नोक्सान पुर्याबाय नाप्पारथ्।” 11यरङ् करिहिन् पावल कोरिन्थ सहरै एक बर्स छउ मैन्हाँसम्म उखर्ह्वानि परमेस्वरक् बचन सिखाहिनें बस्लक्।
12जुन् बेलाइ गलियोन बाज्ल मानुस अखैया इलाकाक् बारा-हामिक भेलटाकै यहुदिलक् मिलिबानाइ पावललाइ हमला करिहिन् पक्रलिहिंक्, आउँ बारा-हाकिमक् आगारि नियाँ कर्बाक्नि लेहिन् जाइलिहिंक्। 13आउँ यन्हिं बाज्लुहुन्, “यि मानुसे हाम्रा धर्मक् नियमै नहिंमिल्लाहार कहिनलक् करिहिन् परमेस्वरक् भक्ति कर्बाक्नि मानुसलकलाइ सिखातिहि रहैस्।”
14तर पावले साराबाहिंक् कर्लटाकै गलियोने उ यहुदिलकलाइ बोल्लाहा, “अ यहुदिलकेहेलक्, यदि यि कुन्हुँ अन्यायक् काम आउँ बर्के अप्रारक् कहिन् रैल्हसन्टेक्, मुँइ तोहोराखर्ह्वाक् कहिन् सुनिबानाइ नियाँ कर्बाक् सहि भेइटकुन्। 15तर यि तोहोराखर्ह्वाक् कहिनलक्, नाउँलक् आउँ आफ्निहिंक् नियमक् कहिनलकक् बिसइमा भेलसैर्हे तोहोलेके आफ्निहि मिलाहो, मुँइ यि कहिनलकक् नियाँ कर्बा नाँचाहाम्।” 16तसौ गलियोने उखर्ह्वालाइ नियाँ कर्बाक् ठाँओक्भटे बाहार निस्कालाहा। 17तसौ उखर्ह्वा जम्माहिं सोस्थेनेस बाज्ल सभाघरक् मुख्य सासकलाइ गर्थिबानाइ नियाँ कर्बाक् ठाँओक् आगारि पिट्लिहिंक्। भेटौ गलियोने उ कहिनक् किच्छु वास्ताय नहिंकर्लक्।
पावल एन्टिओखिया सहरै फर्कल
18पावल कोरिन्थ सहरै अज्झउ थुप्रोय दिनसम्म बस्नेसौ पर्भुक्लाइ बिस्वास कर्लाहार दाजु-भाइलकक्सङ्हिं बिदाबारि भेहिन् प्रिस्किला आउँ अकिलासलाइ आफ्निक्सङ्हिं लेहिन् पानिजाहाजै चर्हिहिन् सिरिया इलाकाइ जाइलुहुन्। किच्छु समइ आगारि पावले एक्टा भाखल कर्ल सिहिरे किंक्रिया सहरै आफ्निक् कापार मुरालक्।#गन्ति ६:१८ 19जख्नि उखर्ह्वा एफिसस सहरै आइपुग्लुहुन्, तसौ पावले प्रिस्किला आउँ अकिलासलाइ ओच्छिहि छार्लाहा। तर आफ्निसेहे ओस्कोक् एक्टा सभाघरै जाइबानाइ यहुदिलकक्सङ्हिं तर्क-बितर्क कर्बा ठाल्लक्। 20तसौ यहुदिलके पावललाइ अज्झ चुटेक् दिनसम्म उहेखर्ह्वाक्सङ्हिं बस्बाक्नि बिम्ति कर्लिहिंक्, तर ओहिं नहिंमान्लक्। 21बरुस् पावले उखर्ह्वाक्सङ्हिं बिदा भेइटे यन्हिं बोल्लाहा, “परमेस्वरक् इच्छा भेइबुने मुँइ फेरि तोहोराखर्ह्वाक् ठालाइ फर्किबानाइ आम्ना।” तसौ उ पानिजाहाज चर्हिबानाइ एफिससै जाइलक्।
22पावल कैसरिया सहरै उत्रलक्, आउँ ओछिसौ उक्लिहिन् यरुसलेमै जाहिन् ओस्कोक् मन्डलिक् मानुसलकक्सङ्हिं भेंटघाट कर्लक्। तसौ उ एन्टिओखिया सहरक्पटि झर्लक्। 23ओछि उ चुटेक् दिनसम्म बस्लक्, तसौ ओछिसौ निस्किबानाइ गलातिया आउँ फ्रिगिया इलाकाक् ठाउँलकै जाइबानाइ जम्मा चेलालकलाइ बिस्वासै बल्यो बानाबाक् काम कर्लक्।
अपोल्लोस एफिसस सहरै
24उहेटाकै अलेक्जेन्ड्रिया बाज्ल सहरै जर्मल अपोल्लोस नाउँ भेल एकजेना यहुदि एफिसस सहरै आइलक्। उ एकदमे राम्रोइसम् सारालाहार जान्या मानुस रैल्हक् आउँ धर्मसास्ट्रक् बिसइमा थुप्रोय ग्यान रैल्हकुन्। 25ओहिं मुक्ति देलाहार पर्भु येसुक् पैंदाक् बिसइमा सिच्छा पाइल रैल्हक्, आउँ सार्होय जोसिलो भेहिन् येसुक् बिसइमा सहि सिच्छा मानुसलकलाइ राम्रोसम् सिखायथ्। तर ओक्रानि यहुन्नाइ देल बप्तिस्माक् बिसइमा माटेन् थाहा रैल्हकुन्। 26ओहिं सभाघरै निधक्काइसौ सिखाबा ठाल्लाहा, तर ओहिं सिखाल कहिन् सुनिबानाइ प्रिस्किला आउँ अकिलासे ओक्रानि आफ्निक् घरै लेगाहिन् उखर्ह्वाइ परमेस्वरक् मुक्तिक् बिसइमा थाहा नहिंभेल कहिन् ओक्रानि अज्झ राम्रोइसौ बुझालिहिंक्। 27ओक्राक्पाछु अपोल्लोस अखैया इलाकाइ जाबाक् बिचार कर्लक्, आउँ एफिससै रैल्ह पर्भुक् चेलालके ओक्रानि ओछि जाबाक्नि हौसला देलिहिंक्। तसौ यक्रालाइ राम्रोइसौ स्वागत कर्बेहेका बाजिहिन् ओस्कोक् चेलालकलाइ एक्टा चिठि लेखिदेलाहा। अपोल्लोस अखैयाइ पुग्नेसौ परमेस्वरक् अनुग्रह पाहिन् बिस्वास कर्लाहारलकलाइ धेरे सहयोग कर्लाहा। 28किसाबुने ओहिं धर्मसास्ट्रक् बचनक्भटे बल्यो तर्क देहिन् येसुय खिरिस्ट हो बाज्बाक् कहिन् देखाहिन् यहुदिलकलाइ ओछि रैल्ह जम्मा मानुसलकक् आगारि पर्मान देहिन् मुखे बन्ध काराइदेलाहा।
Seçili Olanlar:
प्रेरित 18: DEWZ
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Mother Tongue Translators Society and Wycliffe Bible Translators, Inc. All rights reserved.
