متّی 1

یسُوع المسیح دا شجرہ

1یسُوع مسیح اِبنِ داؤد اِبنِ ابرہام دا شجرہ۔

2ابرہام تُوں اِضحاق جمیا تے اِضحاق تُوں یعقُوب جمیا تے یعقُوب تُوں یہُوداہ تے اُوندے بِھرا جمے۔ 3یہُوداہ تُوں فارص تے زارح تمر تُوں جمے۔ فارص تُوں حصرون تے حصرون تُوں رام جمیا۔ 4رام تُوں عِمّینداب جمیا تے عِمّینداب تُوں نحسون جمیا تے نحسون تُوں سلمون جمیا۔ 5سلمون تُوں بوعز راحب تُوں جمیا تے بوعز تُوں عوبید رُوت تُوں جمیا۔ عوبید تُوں یسّی جمیا، 6تے یسّی تُوں داؤد بادشاہ جمیا۔

داؤد تُوں سُلیمان اُوں عورت تُوں جمیا جیہڑی پہلے اُوریاہ دی ذال ہئی۔ 7وَل سُلیمان تُوں رحُبعام جمیا تے رحُبعام تُوں ابیاہ جمیا تے ابیاہ تُوں آسا جمیا۔ 8آسا تُوں یہُوسفط جمیا تے یہُوسفط تُوں یُورام جمیا تے یُورام تُوں عُزیاہ جمیا۔ 9عُزیاہ تُوں یُوتام جمیا تے یُوتام تُوں آخز جمیا تے آخز تُوں حِزقیاہ جمیا۔ 10حِزقیاہ تُوں منسّی جمیا تے منسّی تُوں امُون جمیا تے امُون تُوں یُوسیاہ جمیا، 11تے گرفتار تھی تے بابل ونجنڑ دے زمانے ءچ یُوسیاہ تُوں یکُونیاہ تے اُوندے بِھرا جمے۔

12گرفتار تھی تے بابل ءچ ونجنڑ تُوں بعد یکُونیاہ تُوں سیالتی ایل جمیا تے سیالتی ایل تُوں زرُبابل جمیا۔ 13زرُبابل تُوں ابِیہُود جمیا تے ابِیہُود تُوں اِلیاقِیم جمیا تے اِلیاقِیم تُوں عازور جمیا۔ 14عازور تُوں صدُوق جمیا تے صدُوق تُوں اخیم جمیا تے اخیم تُوں الِیہُود جمیا۔ 15الِیہُود تُوں الِیعزر جمیا تے الِیعزر تُوں متّان جمیا تے متّان تُوں یعقُوب جمیا، 16تے یعقُوب تُوں یُوسف جمیا۔ ایہ اُوں مریم دا پایا ہا جِیں تُوں یسُوع جمیا جیہڑا المسیح اکھویندا ہے۔

17اِینویں ساریاں پُشتاں ابرہام تُوں داؤد تئیں چوڈھاں پُشتاں تھیّاں تے داؤد تُوں گِھن تے گرفتار تھی تے بابل ونجنڑ تئیں چوڈھاں پُشتاں تے گرفتار تھی تے بابل ونجنڑ تُوں گِھن تے المسیح تئیں چوڈھاں پُشتاں تھیّاں۔

یسُوع المسیح دی پیدائش

18یسُوع مسیح دی پیدائش اِینویں تھئی: جِیں ویلے اُوندی ماء مریم دی منگنڑی یُوسف نال تھی گئی تاں اُنہاں دے کٹھے تھیوݨ تُوں پہلے او رُوح القُدس دی قُدرت نال حاملہ تھی گئی۔ 19اِیں واسطے اُوندے پئے#1‏:19 یہُودی منگنڑی ویلے نکاح پڑھیا ویندا ہا تے بعد ءچ رخصتی تھیندی ہئی۔ مریم دا نکاح تھی گِیا ہا پر یُوسف دے گھر نہ گئی ہئی۔ یُوسف، جیہڑا راستباز ہا تے اُونکُوں بدنام کرݨ نہ چاہندا ہا، اُونکُوں چُپ کر تے چھوڑ ڈیوݨ دا اِرادہ کیتا۔ 20او اِنہاں گالھیں دے بارے ءچ سوچیندا ای پِیا ہا جو رب دے فرشتے اُونکُوں خواب ءچ نظر آ تے آکھیا، ”یُوسف! داؤد دے پوتر، آپنڑی ذال مریم کُوں آپنڑے کولھ گِھن آوݨ تُوں نہ ڈر، کیوں جو جیہڑا اُوندے پیٹ ءچ ہے او رُوح القُدس دی قُدرت نال ہے۔ 21اُوندے پوتر جمسی تے تُوں اُوندا ناں یسُوع رکھیں کیوں جو اُوہو آپنڑے لوکاں کُوں اُنہاں دے گُناہاں تُوں نجات ڈیسی۔“

22ایہ سبھ کُجھ اِیں واسطے تھیّا تاں جو رب العالمین دی او گالھ پوری تھیوے جیہڑی اُوں نبی دی معرفت فرمائی ہئی جو

23”ڈیکھو ہِک کُنواری حاملہ تھیسی تے پوتر جمسی

تے اُوندا ناں عِمانُوایل رکھیسن#یسعیاہ 7‏:14۔۔“

جِیندا ترجمہ ہے خُدا ساڈے نال۔

24جِیں ویلے یُوسف نیندر تُوں اُٹھیا تاں اُوں اُونویں ای کیتا جِینویں رب دے فرشتہ اُونکُوں حُکم ڈِتا ہا تے آپنڑی ذال کُوں آپنڑے گھر گِھن آیا۔ 25پر جئیں تئیں مریم دے پوتر پیدا نہ تھی گِیا، اُوں ویلے تئیں اُوندے کولھ نہ گِیا۔ تے یُوسف بال دا ناں یسُوع رکھیا۔

Seçili Olanlar:

متّی 1: SKRV

Vurgu

Paylaş

Kopyala