Luke 9
9
Sa talai iratou na nona tisaipeli ko Jisu me ratou cakava na ka-mana e so, ka vunautaka nai tukutuku-vinaka, 1-6. Sa via raici Jisu ko Eroti, 7-9. Sa vakani ira na lewe vuqa ko Jisu, 10-17. Sa vakavulici iratou na nona tisaipeli, 18-27. Sa matalia na yagona, 28-36. Sa vakabula e dua sa curumi, 37-43. Sa vosa vei iratou na nona tisaipeli, 44-50. Sa tukuna na ka me ra cakava era sa muri koya, 51-62.
1SA qai kacivi iratou mai na nona tisaipeli e tinikarua me ratou soqoni vata, a sa solia vei iratou na lewa kei na kaukauwa vei ira kecega na tevoro, me ratou vakabula talega na veimate; 2a sa talai iratou ko koya me ratou vunautaka na matanitu ni Kalou, ka vakabulai ira sa tauvi-mate. 3A sa kaya ko koya vei iratou, Kakua ni kauta e dua na ka e na gau-ni-sala, kakua nai titoko, se na taga i vaqa, se na madrai, se nai lavo; se yarua na nomudoui curucuru. 4Ia na vale kecega dou na curu kina, dou tiko ga kina, ka cavu yani maikina. 5Ia ko ira vakaaduaga ena sega ni vakacegui kemudou, ni dou sa lako tani e na koro ko ya, kuretaka sara na kuvu-ni-soso mai na yavamudou, mei vakatakilakila vei ira.
6A ratou sa lako yani, ka lako ki na veikoro lalai, ka vunautaka nai tukutuku-vinaka, ka ia na veivakabulai e na veiyasana kecega.
7A sa rogoca ko Eroti na turaga na ka kecega sa cakava ko koya: a sa kidroa kina, ni sa kaya e so, Sa tu cake tale mai na mate ko Joni; 8ka so, Sa rairai mai ko Ilija; ka so tale, Sa tu cake tale e dua na parofita eliu. 9A sa kaya ko Eroti, Au a tamusuka na ulu i Joni: ia ko cei beka o qo, au sa rogoca kina na veika vakaoqo? A sa via raici koya.
10Ia ko iratou nai apositolo, ni ratou sa lesu tale mai, eratou sa tukuna vua na ka kecega eratou sa kitaka. A sa kauti iratou ko koya, ka lako vakatikitiki ki na dua na vanua lala sa voleka ki na koro na yacana ko Peciseita. 11Ia ko ira na lewe vuqa, ni ra sa kila, era sa muri koya; a sa vakacegui ira ko koya, a sa vosa vei ira e na ka ni matanitu ni Kalou, a sa vakabulai ira era sa tawa bula vinaka.
12Ia ni sa kala na siga, sa lako mai ko iratou na tinikarua, ka kaya vua, Vakatalai ira tani na lewe vuqa, me ra lako ki na veikoro lalai sa vakavolivoliti, kei na veiyasana kisau, me ra moce, ka cakava na kedra: ni da sa tiko eke e na vanua lala. 13A sa kaya ko koya vei iratou, Dou solia vei ira me ra kana. A ratou sa kaya, Sa sega na ka vei keitou, e lima walega nai buli madrai kei na ika e rua; ke keitou sega ni laʼki voli kakana me kedra kecega na lewe vuqa o qo. 14Ni ra sa lewe lima beka na udolu na tagane. A sa kaya ko koya vei iratou na nona tisaipeli, Kaya me ra tiko sobu me yalimasagavulu me tiko vata. 15A ratou sa kitaka vakakina, ka sa kaya me ra tiko sobu kecega. 16Sa qai taura ko koya nai buli madrai e lima kei na ika e rua, a sa ta cake ki lomalagi, ka vatonaka, ka dovia, ka solia vei iratou na tisaipeli me ratou tauca e matadra na lewe vuqa. 17A ra sa kana, a ra sa mamau kecega: a sa tomiki vata na vo ni kedra ka sa dovi, a sa tinikarua nai su.
18A SA yaco, ni sa tiko duaduaga ko koya ka masu, sa tiko talega kaya ko iratou na tisaipeli: a sa tarogi iratou ko koya, ka kaya, Era sa kaya ko ira na tamata se ko cei koi au? 19A ratou sa vosa, ka kaya, O Joni na dauveipapitaiso; ia ka so, O Ilija; ia ka so tale, Sa tu cake tale mai e dua na parofita eliu. 20Sa qai kaya vei iratou ko koya, Ia dou sa kaya koi kemudou se ko cei koi au? Sa vosa ko Petero, ka kaya, A Karisito ni Kalou. 21A sa vosa matua vei iratou ko koya, ka vakarota vei iratou me ratou kakua ni tukuna na ka ko ya vua e dua; 22a sa kaya, ni sa kilikili kaya na Luve ni tamata me vosota na ka e vuqa, me ra biuti koya talega ko ira na qase, kei ira na bete levu, kei ira na vu-ni-vola, ka me vakamatei ko koya, ka vakaturi cake tale mai e nai katolu ni siga.
23A sa kaya vei ira kecega, Kevaka e dua sa via muri au, me kakua ni muria na lomana, ia me colata ga na nona kauveilatai e na veisiga, ka muri au. 24Ia ko koya yadua sa via maroroya na nona bula, ena vakayalia; ia ko koya ena vakayalia na nona bula e na vukuqu, ena maroroya. 25Ia ka cava na kena yaga vua na tamata, kevaka e rawati vuravura kece, ka vakayali, se biu tani? 26Ia ko koya yadua ena maduataki au kei na noqu vosa, ena maduataki koya na Luve ni tamata, ni na lako mai e na nonai ukuuku, kei na nei Tamana, kei na nodra na agilose yalosavasava. 27Ia kaʼu sa kaya vakaidina vei kemudou, Sa tu ca eke e so, era na sega ni tovolea na mate, era na raica mada na matanitu ni Kalou.
28Ia sa bogi walu beka ni sa oti na vosa o qo, sa qai kauti Petero kei Joni kei Jemesi ko koya, ka lako cake ki na ulu-ni-vanua me masu. 29Ia ni sa masu tiko ko koya, sa matalia na matana, a sa vulavula ka lumilumisa na nonai sulu. 30Ka raica, e le rua na tamata sa veivosaki kaya, oi rau ko Mosese kei Ilija; 31erau sa rairai mai e nai ukuuku, ka rau vosataka na nona ciba ena vakayacora ko koya mai Jerusalemi. 32A sa bibi e na moce ko Petero kei rau eratou sa tiko kaya: ia ni ratou sa yadra mai, eratou sa raica na nonai ukuuku, kei rau na tamata eratou sa tu vata kaya.
33A sa yaco, ni rau sa lako tani tiko vua, sa kaya ko Petero vei Jisu, Turaga, sa vinaka na nodatou tiko eke: ia me keitou tara na vale vakacevaceva e tolu: e dua me nomu, ka dua me nei Mosese, ka dua me nei Ilija: ia ka sa sega ni kila na ka sa kaya. 34Ia ni sa vosa tiko vakaoqo, sa dua na o sa lako mai, ka vakarurugi rau: a ratou sa rere ni rau sa curu ki na o. 35A sa dua na vosa sa lako mai na o, ka kaya, O qo na noqu Gone ni toko: dou rogoci koya. 36Ia ni sa oti na vosa ko ya, sa kune duaduaga ko Jisu. A ratou sa vunia ga, a ratou sa sega ni tukuna vua e dua e na gauna ko ya e dua na ka eratou a raica.
37A sa yaco e na sabogibogi, ni ratou sa lako sobu mai na ulu-ni-vanua, era lewe vuqa sara sa veitata kaya. 38Ka raica, sa dua vei ira na lewe vuqa sa qoqolou cake, ka kaya, Vakavuvuli, au masuti iko, mo mai raica na luvequ-tagane; ni sa luvequ dua bauga: 39ka raica, sa dua na yalo sa tauri koya, a sa qoqolou vakasauri kina; a sa drebasuka, ka sa qai tuburaki vuso, a sa vakanara ka dredre ni lako tani vua: 40ia kaʼu a masuti iratou na nomu tisaipeli me ratou vakasavi koya tani; a ratou sa sega ni rawata. 41A sa vosa ko Jisu, ka kaya, Ai tabatamata tawa vakabauta ka yalo vakatani! me bogi vica meʼu tiko kei kemudou, ka vosoti kemudou? kauta mai na luvemu kike. 42Ia ni sa lako tiko mai ko koya, sa vakabalea ko na tevoro, ka drebasuka. A sa vunauca na yalo tawa-savasava ko Jisu, a sa Vakabula na gone, a sa solia tale vei tamana. 43A ra sa kidacala kecega e na kaukauwa levu ni Kalou.
Ia ni ra sa kidacala kecega e na vuku ni ka kecega sa cakava ko Jisu, sa kaya ko koya vei iratou na nona tisaipeli, 44Me lutu sobu ki na daligamudou na vosa o qo: ni na soli yani na Luve ni tamata ki na ligadra na tamata. 45A ratou sa sega ni kila na vosa ko ya, a sa vuni vei iratou, a ratou sa lecava: a ratou sa rere ni tarogi koya e na vosa ko ya.
46Sa qai tubu na veileti vei iratou, se ko cei vei iratou ena uasivi cake. 47Ia ni sa raica ko Jisu na nanuma ni yalodratou, sa kauta e dua na gone lailai, ka vakatura voleka vua, 48a sa kaya vei iratou, O koya yadua sa vinakata na gone lailai o qo e na vuku ni yacaqu, sa vinakati au: ia ko koya yadua sa vinakati au, sa vinakati koya sa talai au mai: ni na uasivi cake ko koya sa lailai sara vei kemudou kecega.
49Sa qai vosa ko Joni, ka kaya, Turaga, keitou sa raica e dua sa vakasava tani na tevoro e so e na yacamu: a keitou sa tarova, ni sa sega ni muri kedatou. 50A sa kaya ko Jisu vua, Kakua ni tarova, ni sa nodai to ko koya sa sega ni noda meca.
51IA ni sa yaco dina na gauna me kau cake ko koya, sa vaqara matua na matana me lako kivaka ki Jerusalemi. 52A sa tala e so na tamata talai me ra liu e matana: a ra sa lako ka curu ki na dua na nodra koro lailai na kai Samaria, me ra vakarautaka na kena. 53A ra sa tawa vakacegui koya, e na vuku ni sa vaqara na matana kivaka ki Jerusalemi. 54Ia ni sa raica koi rau na nona tisaipeli ko Jemesi kei Joni, erau sa kaya, Turaga, o sa vinakata beka me keirau kaya me lutu sobu mai lomalagi na buka waqa, me vakamai ira, me vaka na ka sa kitaka ko Ilija? 55A sa vuki ko koya, ka vunauci rau, ka kaya, Drau sa sega ni kila nai valavala ni yalomudrau: 56ni sa sega ni lako mai na Luve ni tamata me vakamatei ira na tamata, me vakabula ga. A ratou sa lako ki na dua tani na koro lailai.
57A sa yaco, ni ratou sa lako tu e na sala, sa dua e kaya vei koya, Turaga, au na muri iko ki na veiyasana ko na lako kina. 58Sa qai kaya vua ko Jisu, Sa vaqara na fokise, a sa vakairoro na manumanu ni lagi; ia na Luve ni tamata, sa sega vua na tikina me vakadavora kina na uluna.
59A sa kaya ko koya vua e dua tale, Muri au. A sa kaya ko koya, Turaga, biuti au meʼu lako mada ka buluti tamaqu. 60A sa kaya vua ko Jisu, Biuta na mate me ra buluta na nodra mate; ia ko iko, mo laʼki vunautaka na matanitu ni Kalou.
61A sa dua talega sa kaya, Turaga, au na muri iko; ia mo biuti au ga meʼu lako mada me veitatau kei ira mai neitou. 62A sa kaya vua ko Jisu, E sega e dua na tamata, sa laʼki taura nai siviyara ka qai rai vuki ki dakuna, me yaga e na matanitu ni Kalou.
Seçili Olanlar:
Luke 9: FIJ1864
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
First full Bible in the Fijian language © British and Foreign Bible Society, 1864.
