युहन्ना नेॽचिरामि चिनारि
नेॽचिरामि चिनारि
इगो येसुमि एप्पा चोङ्सा युहन्नाडे़ॽ साप्पॽआ सुसमाचारमि नेॽचिरा ले़ये। इगोबेॽ युहन्नाडे़ॽ येसु चाहिँ निवाहाङ्मि ए़ॽसिमे बचन ले़ये लुनुङ लुटुए, मो “बचन याॽमि लिनुङ कानिङ्मि रुम्बेॽ लेङ्इटे़” लुनुङ साप्मिटुए। येसुनोॽ निवाहाङ्मि पसानुङ निवाहाङ्डे़ॽ याॽमिजिबेॽ पाङ्इनुङे लुनुङ हेन्ज्रुङ हे़म्बॽआ मुक्तिदाङ्बा ले़ये। इगो सुसमाचारमि नेॽचिरा नेॽखुबे़ॽ येसु मुक्तिदाङ्बा ले़ये लुनुङ बिस्वास ले़टुजिरो, मो बिस्वासबाङ खोजिडे़ॽ ए़स्सिमे हिङ्मवा चुप्टुजिरो लुमे आसाबेॽ साप्पॽआ ले़ये (युहन्ना २०:३१)।
निवाहाङ्मि बचननुङ येसु इक्कोनोॽ ले़ये। इघा खाबाङ ए़क्साङ इगो नेॽचिरामि याक्लोए भागाडे़ॽ येसुडे़ॽ ले़ःॽपॽआ खरिहा योम्बोकमि टुम्बेॽ इन्डुहा, युहन्नाडे़ॽ बेॽलो जोड पिनुङ इगो साप्चिराबेॽ येसुमि पबित्रा होङ्निवामि टुम्बेॽ साप्इटुहा येसुमि पबित्रा होङ्निवा कनिङ्बेॽ मआहोङ कनिङे़ॽ इमाङसो ले़ॽहेसुङ्मानि, मोबा इडोक्हा योम्बोकडे़ॽ येसुनोॽ निवाहाङ्मि पसानुङ निवाहाङ्डे़ॽ याॽमिजिबेॽ पाङ्इनुङे लुनुङ हेन्ज्रुङ हे़म्बॽआ मुक्तिदाङ्बा ले़ये लुनुङ छे़ङ्गै लुये। मोबा ए़क्साङ परभुमि खरिहा योम्बोकडे़ॽ इमा खाङ्मुये लुमे खा खोमि अरतिडे़ॽसो छे़ङ्गै टोङ्इये। याक्लोए भागाडे़ॽ याॽमिजिडे़ॽ येसुबेॽ बिस्वास ले़ःॽनुङ खोमि चोङ्सा लिबॽआ, तर हाइखाजिडे़ॽ चाहिँ खोमि बिरोध ले़ःॽपॽआनुङ खोबेॽ बिस्वास मे़ले़ःॽपॽआ खा लुये। सुम्जि अध्ययबाङ सत्रो अध्ययबेॽ येसुडे़ॽ टाङ्बा राःप्मे याकपेॽ चोङ्साजिनुङ ले़ःॽपॽआ सङ्गतिनुङ काप्सिङ्बेॽ सिमा याक्लो खोसे़ॽ चोङ्साजि पोरोक्पॽआनुङ बोलियो लिमा खे़ये लुमे बचन पिबॽआमि टुम्बेॽ साप्पॽआ ले़ये। इगोबाङ ए़क्साङ्हा अध्ययबेॽ येसु राःप्पॽआ मोबा खो जाँचबेॽ सिॽपॽआ, खो काप्सिङ्बेॽ सिबॽआनुङ सिबॽआबाङ हिङ्बोक्पॽआ, मोबा ए़क्साङ खो टाङ्बामि चोङ्साजिबेॽ खाङ्मुबॽआ खामि टुम्बेॽ साप्पॽआ ले़ये।
ए़ॽसिमे हिङ्मवागो खिरिस्टबाङ चुप्मिये। इगो येसुनोॽ चाइबमा मरामनुङ हिङ्मवा ले़ये मिॽनुङ खोबेॽ लेङ्घुबाजिडे़ॽ मो चुप्मिन्डुजे। इगो सुसमाचारमि नुबा खा इघा ले़हा- होङ्निवामि खा इःॽमामि योङा, चरेपा, जोति, गोठ्लानुङ सामु, अङ्गुरमि डाङ्नुङ मोमि चाडोक्हा माङ्माङ्हा खानुङ टोङ्इहा खानवाबाङ इःबॽआ ले़हा।
नेॽचिरामि बिसय सुचि
१. याक्लोमा योम्बोक १:१-१८
२. बप्तिस्मा पिघुबा युहन्नानुङ येसुमि चोङ्साजि १:१९-५१
३. येसुडे़ॽ याॽमिजिमि रुम्बेॽ ले़ःॽपॽआ योम्बोक २:१–१२:५०
४. येसु यरुसलेमबेॽ किॽयु मिॽयु पेम्बॽआ ए़क्साङ्हा याक १३:१–१९:४२
५. येसु सिबॽआबाङ हिङ्बोक्नुङ याॽमिजिबेॽ खाङ्मुबॽआ खा २०:१-३१
६. ए़क्साङ येसु फेरि गालिलबेॽ खाङ्मुबॽआ २१:१-२५
Seçili Olanlar:
युहन्ना नेॽचिरामि चिनारि: YAMP
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2023, Wycliffe Bible Translators, Inc. and Nepal Bible Society