SAN MATEO 18
18
¡Ayxsen tej xjal ncub tkꞌoꞌn tzpetsabl tuj tbe juntl!
(Mr. 9:42-48; Lc. 17:1-2)
1Cyuj ja kꞌij lu, e pon lkꞌe ke t-xnakꞌatz Jesús tiꞌjxin, bix e xiꞌ cykanenxin texin:
—Oj tul tcawbil Dios tzul tuj cyaꞌj, ¿alcye xjal mas jawnex tuj?―tz̈ikexin.
2Tuꞌntzen taj ttzakꞌbeꞌnxin, e tzaj ttxcoꞌnxin jun neeꞌ ttxlajxin tuꞌn toc weꞌ cywitzxin. 3Bix e xiꞌ tkbaꞌnxin cyexin:
—Jaxxix cxeꞌl nkbaꞌna cyey, ka min ma cub cychꞌixpuꞌna cynaabla tuꞌn cyoca tisen ja neeꞌ lu, mlay chi ocxa tuj tcawbil Dios tzul tuj cyaꞌj. 4Alj xjal ma tzꞌoc tkꞌon tiib tuꞌn toc te jun xjal maans tisen ja neeꞌ lu, ja tzunja mas jawnex tuj tcawbil Dios. 5Alj ma tkba ka il tiꞌ jun neeꞌ, jaxse weya il wiꞌja. 6Pero alj xjal ncub tkꞌoꞌn tzpetsabl tuj tbe juntl yaaꞌn cyiw tuj tocslabl tuꞌn t-xiꞌ tzpet tuj tbe Dios, masetlpele baꞌn oj tcub yeꞌ jun xak al tkul, tuꞌn t-xiꞌ xeꞌt tuj mar. 7¡Ayxsen cyej xjal twitz txꞌotxꞌ, cuma ncub cykꞌoꞌn tzpetsabl tuj cybe juntl! Mlay weꞌ at ocsabl cꞌuꞌjbaj tuꞌn t-xiꞌ tzpet jun xjal tuj tbe Dios. ¡Pero ayxsen tej xjal ncub tkꞌoꞌn tzpetsabl tuj tbe juntl!
8Yaltzen ka ma chi cub tzꞌaka tuj il tuꞌn cykꞌaba bix ka tuꞌn cykena, cytxꞌomela bix cyxoomexa. Mas baꞌntetpele oj tel txꞌomet jun cykꞌaba bix ka jun cykena tuꞌn cycyaja cox pero tuꞌn cyocxa tuj cyaꞌj twitzj tuꞌn cyxiꞌy tuj kꞌakꞌ te junx maj tuya caꞌba cykꞌaba bix ka caꞌba cykena. 9Bix ka nchi jyona il tuya tbakꞌ cywitza, cyimetz bix cyxoomexa. Mas baꞌntetpele tuꞌn cytena tuya junx tbakꞌ cywitza twitz txꞌotxꞌ pero tuꞌn cyocxa tuj cyaꞌj twitzj tuꞌn cyxiꞌy tuj kꞌakꞌ te junx maj tuya cycaꞌbel tbakꞌ cywitza.
Jaj jun techel tiꞌj jun carnel e xiꞌ tzꞌak
(Lc. 15:3-7)
10Miꞌn tzꞌel cyiiqꞌuena ke neeꞌ, cuma jaxxix cxeꞌl nkbaꞌna cyey, n-oc cycyeꞌyen tsanjel Dios tuj cyaꞌj ti nbaj cyiꞌj, bix nchi pon kej ángel lu twitz Dios te kbalte texin ti nbaj.
11Il tiꞌj qꞌuelel cyniꞌya tiꞌj o chin uꞌla te jyol cyej xjal o cheꞌx tzpet, tuꞌntzen cyclet wuꞌna, inayena, jxjal Smaꞌn tuꞌn Dios tuꞌn ntena cyuya xjal. 12¿Ti toc cyuꞌna? Ka at jun cylel carnel, ka at syent tcarnelxin, bix ka ma txiꞌ tzꞌak junjil, ¿miꞌmpa cyaj tkꞌoꞌnxin jnoventa y nuevejil jaaꞌ eteꞌjil, tuꞌn t-xiꞌxin jyol tej jil otk cyaj tzꞌak, tuꞌn tcnetjil? 13Bix ka ma cnetjil tuꞌnxin, jaxxix cxeꞌl nkbaꞌna cyey, mas ctzalajelxin tiꞌj ja jil lu twitzj noventa y nuevejil min e cheꞌx tzpet. 14Juꞌ tzunj, tzinen taꞌ tcyꞌi Cymana tuj cyaꞌj tuꞌn t-xiꞌ jun neeꞌ tuj il.
Ti tten tuꞌn tcub knajsaꞌn til kermano
(Lc. 17:3)
15Ka at jun kꞌiꞌn tyol Dios tuꞌn bix ka ma tbincha il, cutxetey tuya tuꞌn t-xiꞌ tkbaꞌn te tuꞌn miꞌn binchantl il, pero cyjunala tuya. Ka ma cyaj tkꞌoꞌn til, ma camana tuꞌn miꞌn cyaj j-ocslala tuj til. 16Pero ka min ma cyaj tkꞌoꞌn til, kꞌiꞌnx juntl ocslal bix ka caꞌba ocslal tuyey, tuꞌntzen at caꞌba oxe tstiwa tuꞌn toc cycyeꞌyen tiiꞌn tnaabl j-ocslala. 17Ka tcyꞌi binchal il tuꞌn toc tbiꞌn cyyola, kbanx cye cykilca ocslal tuj tja Dios. Ka ma tzꞌel tiiqꞌuen cyyol cykilca ocslal, yaaꞌntltzen ocslal tuj cywitza, sino tisencꞌa jun xjal yaaꞌn te ttanem Dios bix ka jun chmol alcabala.
18Jaxxix cxeꞌl nkbaꞌna cyey, ejeeꞌy kbalte ti pjel cyxol ocslal twitz txꞌotxꞌ. Alcyej cxeꞌl cykbaꞌna yaaꞌn baꞌn tuꞌn tbint, baꞌntzen qꞌuelel cyyola tuj cyaꞌj. Bix alcyej cxeꞌl cykbaꞌna baꞌn tuꞌn tbint cyxol ocslal, jax baꞌntzen qꞌuelel cyyola tuj cyaꞌj.
19Juntl maj cxeꞌl nkbaꞌna cyey, ka at caꞌba cyey twitz txꞌotxꞌ junx taꞌ cykanbila te Dios, ctzaal kꞌoꞌn cyey tuꞌn Nmana Dios tuj cyaꞌj. 20Cbinel tuꞌn Nmana, cuma jaaꞌ nchmet caꞌba oxe ocslal tuꞌn cyajben weya, ntiiꞌn tzuna cyxol―tz̈i Jesús cye t-xnakꞌatz.
21Bix e pon lkꞌe Pedro tiꞌ Jesús, bix e xiꞌ tkanenxin te:
—Taat, ¿jteꞌ maj cwel nnajsaꞌna til jun xjal ka ma tbincha jun kaꞌ wiꞌja? ¿Yaaꞌmpa wuuk maj?―tz̈i Pedro.
22Aj ttzakꞌbeꞌn Jesús:
—Min nxiꞌ nkbaꞌna tey ka oꞌcx wuuk maj. Jatzen nxiꞌ nkbaꞌna tey tuꞌn tcub tnajsaꞌna cykilca maj, seya wuuk maj setenta. 23Jnbaj cyej xjal ttanem Dios tisenj e baj cyej xjal jun maj tjakꞌ tcawbil junxin rey twitz txꞌotxꞌ. E tajbe rey tuꞌn tchjet texin cykilca cycꞌasben t-akꞌanalxin. 24Tej cypon t-akꞌanalxin twitzxin tuꞌn tchjet cycꞌasben, e pon kꞌiꞌn twitzxin jun t-akꞌanalxin nimxsen tcꞌasben. Laaj mil talento tcꞌasben. 25Pero mintiiꞌ tpwak. Juꞌ tzunj, e tkba rey tuꞌn t-xiꞌ qꞌueyet, tuyax t-xuꞌl, cyuyax tcwal, tuyax cykilcaj at te, tuꞌntzen tkꞌoj pwak te rey. 26Tej tbinte t-akꞌanalxin jlu, biꞌxsen e cub mutzkꞌajxin twitz txꞌotxꞌ twitz rey, bix e xiꞌ tcubsaꞌn twitz texin: “Taat, ten tpasensyiya wiꞌja, bix cxeꞌl nchjoꞌna cykilca ncꞌasbena tey,” tz̈i t-akꞌanalxin. 27Bix oc qꞌuixbe tcꞌuꞌj rey tiꞌ t-akꞌanalxin, bix e xiꞌ ttzakpiꞌnxin, bix e cub tnajsaꞌnxin cykilca tcꞌasben.
28Pero tej tetz jxin el libre, bix e xiꞌxin jyolte tej jun tuyaxin cꞌasbenel twitzxin. At chꞌineeꞌ tcꞌasben twitzxin. Bix e xiꞌxin tzyulte, bix oc tẍkꞌoꞌnxin tkul, bix e xiꞌ tkbaꞌnxin te: “Kꞌontz jtey tcꞌasbena jun syent denario weya.” 29Bix e cub mutzkꞌaj tuyaxin twitz txꞌotxꞌ twitzxin, bix e xiꞌ tcubsaꞌn twitz texin: “Ten tpasensyiya wiꞌja, bix cxeꞌl nchjoꞌna ncꞌasbena tey,” tz̈i. 30Pero ja tzunj texin min e xiꞌ tbiꞌnxin tuyaxin. Nuk oꞌcx ocx tkꞌoꞌnxin tuj tzeeꞌ, tuꞌn miꞌn tzꞌetz ojxe tchjet cykil tcꞌasben.
31Tejtzen toc cycyeꞌyen niyꞌtl t-akꞌanal rey ti otk baj, kaꞌxsen el tuj cywitzxin, bix e xiꞌkexin kbalte te rey ti otk baj. 32Tbintetzen rey, bix e tzaj ttxcoꞌn rey jaj xin akꞌanalxin otk najsaxin tcꞌasben, bix e xiꞌ tkbaꞌnxin te: “Jay akꞌanal yaaꞌn baꞌn, e cub nnajsaꞌna cykilca tcꞌasbena weya cuma e tzaj tcubsaꞌna twitza weya. 33¿Yaaꞌmpatzen tuꞌn toc qꞌuixbe tcꞌuꞌja tiꞌ tuyey, tisen e xiꞌ nkꞌoꞌna lastim tey?” tz̈i rey. 34Bix e tzaj tkꞌoj rey, bix e xiꞌ tkꞌoꞌnxin tuj cykꞌab pjul xjal tuꞌn tqꞌuixbaset nim ojxe tchjet cykilca tcꞌasben texin.
35Jax juꞌx ctbinchaꞌ Nmana tuj cyaꞌj cyiꞌja ka min xcub cynajsaꞌna ke cyuyey tuya cykil cycꞌuꞌja―tz̈i Jesús cye t-xnakꞌatz.
Seçili Olanlar:
SAN MATEO 18: mamTS
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2000, Wycliffe Bible Translators, Inc. All rights reserved.
