SAN MATEO 15
15
Alcyej ctzꞌilelxix xjal tuꞌn twitz Dios
(Mr. 7:1-23)
1Attzen jun kꞌij bix e pon tuya Jesús cab xjal nimalxsen te ley, ejeeꞌj xjal fariseo, tuya cabxin txꞌolbal ley. Otk chi tzajxexin maa Jerusalén. E xiꞌ cykanenxin texin:
2¿Tikentzen min tzin cyniman tey t-xnakꞌatza ley cye xjal te ootxa? Nchi waaꞌn pero min ma txjet cykꞌabxin tisex tten te mitknaꞌx toc waaꞌn―tz̈i ke fariseo.
3Bix aj ttzakꞌbeꞌn Jesús cyexin:
—¿Tiken n-el cyiiqꞌuena tley Dios tuꞌn cyoc lpey tiꞌj jcyexa cyleya? 4E tkba Dios cyjulu: “Cybiꞌnqꞌuey cymana bix cytxuy. Alcye ma txiꞌ tkbaꞌn kaꞌ tiꞌj tman bix ka tiꞌj ttxu, il tiꞌj tuꞌn tbyet,” tz̈i Dios. 5Pero cyey, tzin cyxnakꞌtzaꞌna cye xjal: “Amale atet il tiꞌj tman jun xjal bix ka ttxu, pero ka ma txiꞌ toyen tpwak te tja Dios, 6mas il tiꞌj jlu twitzj tuꞌn t-xiꞌ tkꞌoꞌn onbil cye tman,” tz̈ikey. Juꞌtzen tten n-el cyiiqꞌuena jtzin tkbaꞌn Dios tuꞌn toc cycꞌojlaꞌna jcyexa cyleya. 7¡Xmeletzꞌ xjalkey! Jaxxix toc tuꞌn tyol tyolel Dios Isaías tej tcyaj ttzꞌiꞌben cyiꞌja cyjulu: 8“‘Kej xjal lu nchi naꞌn Dios nim tuya cytzi, perotzen cyanem nakch taꞌ wiꞌja. 9Mintiiꞌ baꞌn tajbeꞌna oj nchi naꞌn nbiꞌya. Bix xnakꞌtzbil cye yaaꞌn wuꞌna, sino nuk cyuꞌnx,’ tz̈i Dios,” tz̈i Isaías―tz̈i Jesús cye fariseo.
10Yajcꞌatltzen bix e ttxoc Jesús ke xjal, bix e xiꞌ tkbaꞌnxin cyexin:
—Chin cybiꞌtzen, bix tzꞌelx cyniꞌya tiꞌj nyola. 11Yaaꞌn jcꞌoquex tuj ttzi jun xjal cchucjalet tuꞌn, sino ja tej ctzaal tiꞌ tanem xjal, jatzente teja ctzꞌilaxix xjal tuꞌn twitz Dios―tz̈ixin.
12E pontzen lkꞌe ke t-xnakꞌatzxin ttxlajxin, bix e xiꞌ cykbaꞌnxin texin:
—¿Mapa tzꞌel tniꞌya tiꞌj kaꞌ s-ela tyola tuj cywitz fariseo?
13E xiꞌ ttzakꞌbeꞌnxin:
—Miꞌn baj cycꞌuꞌja cyiꞌj, cuma miꞌn cyaj cybinchben cyuꞌn. Cykilca awal min ma cuꞌx tawaꞌn Nmana at tuj cyaꞌj, cjawetz lequet cylocꞌ. 14Juꞌ tzunj, miꞌn cheꞌx lpey cyiꞌj aj fariseo. Ejeeꞌ cyisen mos̈, bix kej xjal nchi oc lpe cyiꞌj, jax cyisen mos̈. Ka ma txiꞌ tyeecaꞌn jun mos̈ be te juntl mos̈, junx chi xeꞌl tzꞌak tuj jun jul―tz̈i Jesús.
15E xiꞌ tkbaꞌn Pedro te Jesús:
—Kbantz keya ti elpenina tyola cye xjal tiꞌj waabj.
16Bix aj ttzakꞌbeꞌnxin:
—¿Minaꞌxpatzen tel cyniꞌya tiꞌj? Ejeeꞌy tisen ke niyꞌtl xjal. 17¿Mimpa ma tzꞌel cyniꞌya tiꞌj ka ti jilel ma tzꞌocx tuj ttzi jun xjal, cxeꞌlte tuj tcꞌuꞌj, tuꞌn tiyꞌ tcꞌuꞌn? 18Jaj ctzaal itzꞌj tiꞌ tanem xjal bix n-etz tuj ttzi, jatzen teja ctzꞌilelxix xjal tuꞌn twitz Dios, 19cuma tujxe tanem ntzaaꞌ itzꞌja tkaꞌyel, biꞌyen, aj pajlel, tuꞌn toc ipan tiꞌ juntl xuuj, alkꞌal, ẍtakꞌel, bix tuꞌn tyolen kaꞌ tiꞌ juntl xjal. 20Cykil tzunj lu ntzꞌilaxix xjal twitz Dios. Pero oj t-xiꞌ twaaꞌn jun xjal bix min ma tzꞌel ttxjoꞌn tkꞌab, mlay chucj te xjal tuꞌn―tz̈i Jesús.
Jaj tocslabl xuj xuuj te Canaán
(Mr. 7:24-30)
21Yajcꞌatltzen, bix etz Jesús tuj lugar lu, bix e xiꞌ tuj tnom te Tiro tuyax tnom te Sidón. 22Attzen junxuj xuuj yaaꞌn judío najl tuj lugar lu, aj Canaánxuj. Etzxuj tuj ttanemxuj tuꞌn tponxuj tuya Jesús, bix akꞌxuj s̈-il:
—Taat, jay Tcwal Rey David, kꞌontz tcꞌuꞌja wiꞌja, cuma nimxsen nyajlan jun biman tiꞌj txin wala―tz̈ixuj.
23Pero te Jesús, min aj ttzakꞌbeꞌnxin texuj. Bix e pon lkꞌe ke t-xnakꞌatzxin tiꞌjxin, bix e xiꞌ cykanenxin texin:
—Kbanxa te xuuj lu tuꞌn taj, cuma nuk lepchec s̈-il kiꞌj.
24Pero aj ttzakꞌbeꞌnxin cyexin:
—Nuk cyej xjal aj Israel o cheꞌx tzꞌak cyisen carnel e tzaj tsmaꞌn Dios inayena―tz̈ixin.
25Pero te xuuj, e cub majexuj twitz Jesús, bix e cubsanxuj twitzxuj texin:
—Taat, chin tonentza.
26Bix aj ttzakꞌbeꞌnxin texuj:
—Yaaꞌn tumel oj tel kꞌiꞌn cywa neeꞌ tuꞌn t-xiꞌ kꞌoꞌn cye txyan―tz̈ixin.
27Pero e xiꞌ tkbaꞌnxuj:
—Jax toc tuꞌna, Taat. Pero tzintlpe cyyoꞌn txyan tjakꞌ mes niyꞌ qꞌuelel tzꞌak ttxꞌakan cywa cyaawjil ttxaꞌn mes―tz̈ixuj.
28Bix aj ttzakꞌbeꞌn Jesús texuj:
—Naa, nimxix tocslabla wiꞌja. Cbinel tajbila―tz̈ixin. Bix jaxj hora e kꞌanj talxuj.
Tej tul cynaabl nim xjal tuꞌn Jesús
29Yajcꞌatltzen, bix etz Jesús cyuj tnom lu, bix aj meltzꞌajxin ttziiꞌ tnijabel aꞌ te Galilea. Bix e jaxxin twiꞌ jun witz, bix e cub kexin. 30E pontzen nimxsen xjal tuyaxin. E xiꞌ cyiiꞌn kej xjal ẍtꞌunc, kej xjal cox, kej mos̈, kej men, bix kej xjal yaab, bix e cub cykꞌoꞌn t-xeeꞌ tkenxin. Bix cykilca e kꞌanj tuꞌnxin. 31Tejtzen cylonte xjal nbintl cyyolen men bix e cyaj baꞌn ke ẍtꞌunc bix nchi bet ke cox juntl maj bix nbintl cycyeꞌyen ke mos̈, e jaw kleeꞌtzen ke xjal, bix e jaw cynimsaꞌn tbi Dios ncawen cyibaj aj Israel.
Tej t-xiꞌ tkꞌoꞌn Jesús cywa cyaja mil xjal
(Mr. 8:1-10)
32Bixse e tzaj ttxcoꞌnxin ke t-xnakꞌatzxin, bix e xiꞌ tkbaꞌnxin cyexin:
—Ma tzꞌoc kꞌaꞌben ncꞌuꞌja cyiꞌj xjala, cuma ma bint oxe kꞌij cyten wuyena tzalu, bix mintzentiiꞌtl cywa. Ncyꞌiya tuꞌn t-xiꞌ nsmaꞌna cye cyja mitkx nchi waaꞌn, cuma kape yaaꞌn yaj chi tzaj yumtzꞌaj tuj be tuꞌn weyaj―tz̈ixin.
33Bix aj cytzakꞌbeꞌn t-xnakꞌatzxin texin:
—¿Pero titzen tten tuꞌn tcnet waabj kuꞌna tuꞌn cynoj cykilca xjal lu? Min-al xjal najl tzalu―tz̈ikexin.
34Bix e xiꞌ tkbaꞌnxin cyexin:
—¿Jteꞌ mukan kꞌiꞌn cyuꞌna?
E xiꞌ cykbaꞌnxin:
—Wuuk kꞌiꞌn kuꞌna, cyuyax cab quis̈ cocꞌ―tz̈ikexin.
35Bixse e xiꞌ tkbaꞌnxin tuꞌn cycub ke cykil xjal twitz txꞌotxꞌ. 36Bixse e tzaj ttzyuꞌnxin jwuuk pan cyuyax quis̈, bix e xiꞌ tkꞌoꞌnxin chjonte te Dios cyiꞌj, bix e cub tpaꞌnxin, bix e xiꞌ tkꞌoꞌnxin cye t-xnakꞌatzxin tuꞌntzen t-xiꞌ cypaꞌnxin cyxol xjal. 37Cykilca xjal e waaꞌn tejxe cynoj. Bix e jaw cychmoꞌn ttxꞌakan waabj ya min otk baj cyuꞌn xjal, bix e noj wuuk chiꞌl. 38Kej e waaꞌn, cyaja mil xinak, bix at nimtl xuuj cyuya ke cyal e waaꞌn. 39Tej cybaj waaꞌn xjal, bix e xiꞌ tkbaꞌnxin cye tuꞌn cyaj cyja. Bix e cuꞌxxin tuj jun barc, bix e ponxin tuj txꞌotxꞌ te Magdala.
Seçili Olanlar:
SAN MATEO 15: mamTS
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2000, Wycliffe Bible Translators, Inc. All rights reserved.
