SAN MATEO 11
11
Kej tsanjel Juan Bautista
(Lc. 7:18-35)
1Tejtzen tbaj tkbaꞌn Jesús ja xnakꞌtzbil lu cyej cablaaj t-xnakꞌatzxin, iyꞌtzen tuj ja lugar lu bix e xiꞌxin xnakꞌtzal cyuj cytanem judío.
2Yaltzen te Juan Bautista tocx tuj tzeeꞌ, tej tbinte cykilcaj e bint tuꞌn Cristo, e xiꞌ tsmaꞌnxin caꞌba xjal lepchec tiꞌj t-xnakꞌtzbilxin, tuꞌn cypon tuya Cristo. 3Bix e xiꞌ cykanenxin te Jesús:
—¿Japa tey Jscyꞌoꞌn tuꞌn Dios tuꞌn tul te cawel, bix ka at juntl ko ayola tiꞌj tuꞌn tul?―tz̈ikexin.
4Bix aj ttzakꞌbeꞌn Jesús cyexin:
—Cyucxey tuya Juan bix cykbanx texin jaj ma cybiy bix jaj ma cyila nbint wuꞌna. 5Kej mos̈ ya lutlke nchi cyeꞌyena. Kej cox ya lutlke nchi bete. Kej xjal ma kꞌey cykꞌab bix cyken tuꞌnj yabel lepra, ma kꞌanj. Kej chquint ya niyꞌxtl tuj cywiꞌ. Kej cyimne ma chi jaw itzꞌj juntl maj. Bix kej mebe lu n-oc cybiꞌn baꞌn tpocbal colbil cye. 6Cykꞌumenx te Juan ctzaal tkꞌoꞌn Dios t-xtalbil cyej xjal min baj cycꞌuꞌj wiꞌja, bix min cyaj cykꞌoꞌn tuꞌn cyxiꞌ lpe wiꞌja―tz̈i Jesús cyexin.
7Tej cyex tsanjel Juan, akꞌtzen Jesús yolel cye xjal, bix nim baꞌn yol e xiꞌ tkbaꞌnxin tiꞌ Juan. E xiꞌ tkbaꞌnxin:
—Tej cyxiꞌy te cyeyꞌlecte Juan ttziiꞌ nimaꞌ Jordán, ¿e pompakey cuma e cyajbey tuꞌn toc cybiꞌna jun xjal yaaꞌn cyiw tnaabl, tisen jun ptzꞌunt nbaj lajpaj tuꞌn cykꞌiꞌk? Min. 8¿Bix e pompakey nuk te cyeyꞌlecte t-xbalen jawnex? Min. Cykilcakey cytzkiꞌna nuk ejeeꞌ cyej xjal kꞌina tuj nin tja cawel n-oc jawnex xbalen cyiꞌj. 9¿Bix e pompakey te cyeyꞌlecte jun tyolel Dios? Jaxte jun tyolel Dios Juan, bix cxeꞌl nkbaꞌna cyey, yaaꞌn nuk oꞌcx jun tyolel Dios Juan, sino atl mas. 10Tzin tkbaꞌn tyol Dios cyjulu: “E tkba Dios te Tcwal: ‘Cxeꞌl nsmaꞌna nsanjela nejl twitza, tuꞌntzen binne cyten xjal oj tpona twitz txꞌotxꞌ,’ tz̈i Dios te Tcwal,” tz̈i tyol Dios. Ma japan baj twiꞌ ja tyol Dios lu tuꞌn Juan. 11Jaxxix cxeꞌl nkbaꞌna cyey, cyxol tyolel Dios o ten twitz txꞌotxꞌ, min-al jun mas jawnex twitzj Juan. Pero jxjal mas chꞌin tuj tcawbil Dios mas jawnex twitzj Juan. 12At nim tajbel taakꞌen Juan Bautista, cuma jatxe tej takꞌ Juan kbalte hasta jaꞌlewe, ma tzꞌoc cyipen nim xjal tiꞌj tuꞌn cyocx tuj tcawbil Dios, bix tuya cykil cycꞌuꞌj nchi ocx xjal tuj. 13Cykilca tyol Dios te ootxa e tkba at tuꞌn tul Elías juntl maj, bix ja Juan ul. 14Ka cyaja tuꞌn cyocslana tyol Juan, ja Juan tisen Elías, jtyolel Dios at tuꞌn tul. 15Cyjkom cyẍquina tuꞌn tel cyniꞌya tiꞌj nyola, bix cybisenx tiꞌj.
16Key xjal n-el cyiiqꞌuena j-e tkꞌumen Juan bix jnxiꞌ nkꞌumena, ¿ti techel cꞌajbel tuꞌn tel cyniꞌya tiꞌj ti cytena? Ejeeꞌ tzuna tisen kej neeꞌ tuj be cycyꞌi tuꞌn cykẍan cyuya kej nchi kẍan. Oj cykẍan kej neeꞌ tisen tiꞌ jun mejoblenel, cxeꞌl cykbaꞌn cyekej cycyꞌi chi kẍan cyjulu: 17“Keya, n-oc kxuxen. Cyey, ¿ti min chi tzaja te bixel kuyena?” tz̈ike. Bix oj cykẍan kej nchi kẍan tisen oj ncuꞌx maket jun cyimne, cxeꞌl cykbaꞌn cyekej cycyꞌi tuꞌn cykẍan cyjulu: “Keya, nko ookꞌa. Cyey, ¿ti min chi tzaja te ookꞌel kuyena?” tz̈ike. 18Ejeeꞌy tisenj kej neeꞌ cycyꞌi chi kẍan, cuma tej tul Juan bix min ex tkꞌij nwaaꞌn bix ncꞌan, e xiꞌ cykbaꞌna, “Jxjal lu ma tzꞌoc jun biman tiꞌj, cuma min bint tuꞌn tisenj nbint cyuꞌn cykilca. Min tzꞌajben tyol,” tz̈ikey. 19Pero tej tul jxjal Smaꞌn tuꞌn Dios tuꞌn ntena cyuya xjal, bix min e cub npaꞌnwe weyaj tisen Juan, sino in waaꞌnwe bix in cꞌanwe tisex tten, tzin cykbaꞌna, “Jeyꞌ, jxjal lu min cub tpaꞌn weyaj tisen tten kxol, sino nuk nwaaꞌn bix ncꞌan vino bix nbet cyuya chmol alcabala bix cyuya niyꞌtl aj il. Il tiꞌj qꞌuelel kiiqꞌuen tyol,” tz̈ikey. Pero cchicꞌajaxeltzen alcye kej xjal at cynaabl tuꞌnj alcyej chi ocslal tyol Juan bix weya nyol―tz̈i Jesús cyej xjal el cyxooꞌn jaxin bix tyol Juan.
¡Ayxsen kej tnom o tzꞌel cyiiqꞌuen tyol Dios!
(Lc. 10:13-16)
20Bix oc ten Jesús ilel tiꞌj kej tnom min e meltzꞌaj tuya Dios, amale nimxsen otk tyeecꞌanxin tipemalxin cyuj. 21E xiꞌ tkbaꞌnxin:
—¡Ayxsen kej judío te Corazín! ¡Bix ayxsen kej judío te Betsaida! O tzꞌel cyiiqꞌuen tyol Dios, amale nimet e yecꞌj wipemala cyuj tzunj tnom lu. Nuket e yecꞌj jwipemala cyej aj il yaaꞌn judío cyuj tnom te Tiro bix Sidón, ya otetle tzꞌoc cykꞌoꞌn cyxbalen te bisbajil bix otetle chi cub ke tuj tzaꞌj te techel eteꞌtzen tuj bis tuꞌn cyil. 22Jaxte min e meltzꞌaj tuya Dios, pero cxeꞌl nkbaꞌna cyey, tuj jkꞌij te castiwa tzul, mas castiwa tzul tkꞌoꞌn Dios cyej xjal aj Corazín bix cyej xjal aj Betsaida twitzj tzul tkꞌoꞌnxin cyej xjal te Tiro bix cyej xjal te Sidón. 23Yaltzen cyej xjal te tnom te Capernaum, tuj cywitz baꞌnxsen chi elel twitz Dios bix chi camal jun jawnex lugar tuya Dios tuj cyaꞌj, pero yaaꞌn juꞌwa. Chi cwel baj tuj chꞌixbajil tuj kꞌakꞌ. Nuket e yecꞌj jwipemala cyej xjal tuj tnom te Sodoma tisen ma yecꞌj cyxola, at-xetle tnom te Sodoma jaꞌlewe. 24Jaxte min e meltzꞌaj tuya Dios, pero cxeꞌl nkbaꞌna cyey, tuj jkꞌij te castiwa tzul, mas castiwa tzul tkꞌoꞌn Dios cyey twitzj tzul tkꞌoꞌnxin cyej xjal te Sodoma―tz̈i Jesús.
Tej tnaꞌn Jesús Dios
(Lc. 10:21-22)
25Tuj ja tyem lu, e naꞌn Jesús Dios. E xiꞌ tkbaꞌnxin:
—Taat Nmana, jay taaw tibaj cykilca tuj cyaꞌj bix tibaj cykilca twitz txꞌotxꞌ. Bix nxiꞌ nkꞌoꞌna chjonte tey tiꞌj e cub tnincꞌuꞌna tiꞌj tcawbila eꞌwen tuꞌna te cyej xjal nimxsen baꞌn cyuꞌn tuj cywitz, pero te cyej xjal ajnintz cynaabl tisen ke neeꞌ, o txiꞌ tkꞌoꞌna tuꞌn tel cyniyꞌ tiꞌj ti tten tcawbila. 26Juꞌtzen o bint tuꞌna, cuma juꞌ tajbila―tz̈i Jesús te Tman.
27Bix e xiꞌ tkbaꞌn Jesús cye xjal:
—O tzaj tkꞌoꞌn Nmana cykilca at tuj nkꞌaba. Min-al ttzkiꞌn inayena, Tcwal Dios. Nuk oꞌcx Nmana ttzkiꞌn inayena. Bix min-al ttzkiꞌn Nmana. Nuk oꞌcx inayena ntzkiꞌna Nmana, bix kej xjal waja tuꞌn t-xiꞌ nyeecꞌana Nmana cye, tuꞌn tel cyniyꞌ tiꞌjxin. 28Key xjal ma chi sicta tjakꞌ cyiketza te cyiw ley, chi ocslana wiꞌja, bix cxeꞌl nkꞌoꞌna cyajlabla te junx maj. 29Chi eletza tjakꞌ cyiketza al, bix cyiiꞌnxa nxnakꞌtzbila. Cyxnakꞌtzamel cyiiba wiꞌja, cuma yaaꞌn cyiw nxnakꞌtzbila bix maans kena, bix ctemeltzen cyajlabla. 30Yaaꞌn cyiw nxnakꞌtzbila, bix yaaꞌn al cyiketza oj t-xiꞌ cyiiꞌna nxnakꞌtzbila―tz̈i Jesús cye xjal.
Seçili Olanlar:
SAN MATEO 11: mamTS
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2000, Wycliffe Bible Translators, Inc. All rights reserved.
