Ap'u 31
31
A Sikup iruh asn a Lapan
1Dav'a, a Sikup irn v'nenar a natn a Lapan, avvr ti a, “A Sikup ituala sera sian a tetiad udlani. Itlev' sera si p'sp'asan udlani asn sian a tetiad uaki.” 2Laha, a Sikup ila ti a Lapan im'er nahn m'ei, hin ianep'a tituei ml. 3Sarei, a Mlin Eia ivr an a Sikup kavr ti a, “Pam'alet ml arna nadep'ar a tetiam m'er nl nam'elam. Laha, Kana p'elak m'ah.”
4Laha, a Sikup itep'a v'nen kav'ara an a Retsel m'ei a Lia kavr ti aparma al pitvetan asn sivsivan. 5Kavr anr kavr ti a, “Nla ti a tetiam'i im'er nahn m'a kana, hin ianep'a tituei ml, v'eti Atuan a tetiak ilak m'a kana nakl. 6Kam'i krrndu ti nen parian a tetiam'i arna nut huak udlani. 7V'eti a tetiam'i ihap'il m'a kana kavav ulienak iv'anal, v'eti Atua iam'ahu a ti iputakm a kana. 8Naran ivr ti a, ‘Drentalei, mak nen isusupa, ipav'i ulienam,’ sarei, si slm udlani avtu natr avv'i drentalei, mak nar isusupa. V'eti naran ivr ti a, ‘Drentalei, mak nen ip'arei kasapei, ipav'i ulienam,’ sarei, si slm udlani avtu natr avv'i drentalei, mak nar ip'arei kasapar. 9Inap'i lera Atua itlev'la sera si slman a tetiam'i kattau a kana.
10Dav'a, naran pua nar avhap'ra prapar, nklus m'atak kala si kinkin naran nm'atr. Laha, parrni, nla pua nar la avhap'ra prapar ha avv'i drentalei, nki mak nar ip'arei kasapar, nki mak nar isusupa m'a nki mak nar ilil. 11Laha, Enselan Atua iv'ana m'a kana naran nm'atr kala sei kavr ti a, ‘Sikup.’ Laha, nvr ti a, ‘Kana hilaha.’ 12Laha, ivr ti a, ‘Pap'a nut eia kalei. Pua na sivsiv m'a nani udlani, la avhap'ra prapar nar ha, avv'i drentalei, mak nar ip'arei kasapar, v'aha mak nar isusupa, v'aha mak nar ilil, sena ti Kana ntla sera si udlani a Lapan iten sarei anh. 13#Ap'u 28:18-22.Kana nv'i Atua na nut a Petel, iv'i nut khsran ueil arna nav'et kani ip'tir kan turanien asnk. Hilaha, pap'tir karuh arna nadep' laha, kam'alet arna nadep'ar nl nam'elam.’ ”
14Laha, a Retsel m'ei a Lia arvrpren v'nenan karvr ani karvr ti a, “Kam'em' m'lnam'em' v'aha siam'em' ihei ml al nmahan a tetiam'em'. 15Hin ila kam'em' inep'a ti nrv'i v'anudl uaki. Sena ti itulul a sera kam'em' kahiris a nav'etam'em' udlani. 16Sena ti si udlani Atua ilev'lei asn a tetiam'em', iv'i nkam'em' m'er a netm'em'. Hilaha, pan si udlani uaki Atua itvr sarei anh.”
A Sikup iruh asn a Lapan
17Arna naran nen lera a Sikup ip'tir katau a natn dui m'er artav'etan avlak arna kam'el kinkin. 18Kauirv'a si slm udlani m'a si udlani itlev' sarei, avv'i si slm itlev' sarei arna nut a Patan Aram, a ti ipav'a asn a tetian, iv'i Aisak, arna nut a Kenan. 19Hin a Lapan itav'a sarei a ti ipakas nil sivsivan. Laha, a Retsel iv'nah aitulan a tetian. 20Laha, a Sikup iruh, v'eti a Lapan, la iv'i dui a Siria ha, ialei, sena ti iavr ani kavr ti iparuh. 21Iruh kaua si udlani iv'i nkan, kathal kav'el kaluvn a nauei, kav'elur ptha, nahan iv'i Kiliat.
22Arna nitla napn avr an a Lapan kavr ti a Sikup itruh. 23Sarei, ilev' tv'aln udlani avsapei, kavv'el napn isaru kaviari arna ptha, iv'i Kiliat. 24Laha, Atua ima asn a Lapan, iv'i dui a Siria hara, naran im'atr kala sei, kavr ani, kavr ti a, “Pav'ahah ti mavr si kinkin an a Sikup, si p'as v'aha si stu.”
25Dav'a, a Lapan ier asn a Sikup. A Sikup ittu sera nmah kanuisan arna ptha. Laha, hin a Lapan m'er tv'aln avhl nmah kanuisar arna ptha arna nut a Kiliat.
26Sarei, a Lapan ivr an a Sikup kavr ti a, “?Kan v'ata a kana, sena ti kruh uaki asnk naran kana narndaui, kaualar a natk tav'et, inep'a ti arv'i tav'et avualar arna naur? 27?Inap'i hin kruhv'nahi asnk katutuani, v'eti kaavr a kana arna ti p'etap'ah arna vtmien, m'a npin, m'a hmau m'a kita? 28?Inap'i hin kaam'ahu a ti p'esikan m'er a m'hip'ak m'er a natk tav'et? Naran kani inap'i lera, kani inep'a m'ertu ptn ihei. 29Kana nut huak iak a ti p'utakm anh, v'eti Atuan a tetiam iv'ana m'a kana nanv' lihat kavr ti a, ‘Pav'ahah ti mavr si kinkin an a Sikup, si p'as v'aha si stu.’ 30V'eti hilaha ktruh sarei, sena ti krn nam'er istudau a ti pahau a utan a tetiam. ?V'eti inap'i hin ktv'nah sarei atuak kinkin?”
31A Sikup ivrpren v'nenan a Lapan kavr ti a, “Sena ti ndedrn. Sena ti nv'ah ti imahei ti nakm pahua kalev'lar a natm tav'et asnk. 32M'ertu papasla atuam kinkin asnn, hin ikasilv'. Arna nahr tv'ald, pav'iv'en sei iter asnk iv'i nkam, kalav'i.” Sena ti a Sikup iarndu ti a Retsel itv'nah sera aitul lera.
33Laha, a Lapan iv'a al nmah kanuisan a Sikup, kadav'a al nmah kanuisan a Lia, kadav'a al nmah kanuisar vitar na m'akarienar arru, v'eti iapasla si kinkin. Sarei, iaan al nmah kanuisan a Lia, kadav'a al nmah kanuisan a Retsel. 34V'eti a Retsel itlev' sera aitul lahara kattutuan sarar a nv' satel na kam'el kalak aranan. Laha, a Lapan itala anr arna nut udlani eim al nmah kanuis lera, v'eti iapasla si kinkin. 35Laha, a Retsel ivr an a tetian kavr ti a, “Mlinak, nlm imahrer a ti nkap'tirdri arna nahm, sena ti nla m'etienar tav'et.” Laha, a Lapan itala dav'a dav'a v'eti iapasla aitul lahara.
36Sarei, a Sikup nln irer kav'ana hua m'ei a Lapan. Laha, a Sikup ivrprani kavr an a Lapan kavr ti a, “?Nen v'ata iaviviln? ?Nen si stu v'ata hin ktp'ev' kana ihua ihuadau inap'i lera? 37?Ktp'ep'a sera siak udlani kapasla v'ata iv'i nkam? Pataui atlaha arna nahr tv'alk m'a tv'alm a ti apavv'ana hua m'a nakd sanan. 38Kana ntlak sarei asnm pai itnelru. Prapar na sivsivam m'a naniam ahalev'us natr. Nahan pua na sivsivam naran kinkin. 39Sei si dm ihap'ni nauirma asnm, kana uaki ntu m'lnen. Idvr ti si dm iduala si slm kinkin arna nut ren v'aha lihat, nakm krn ti p'etu m'lnen nakl. 40Kana nv'i m'ertu, arna ren, neiel iutakm a kana, arna lihat, m'la iutakm a kana, nam'atr mamh nakl. 41Inap'i lera ntlak sarei al nmaham pai itnelru, nm'akaram pai inal lman iv'a sanar a natm tav'et arru, pai ilm'sei sena si slmam. Ktvav sera ulienak itv'anal. 42Idvr ti Atuan a tetiak, iv'i Atuan a Epraham, kav'i nki Aisak idedrn ani, idalak asnk, nvrdaui, nakm mttep'a sera kana m'tahu vn uaki. Atua itla sera derak m'a pari hua nani a lm'ak, katv'ana hua m'ah nanv' lihat.”
43Laha, a Lapan ivrprani kavr an a Sikup kavr ti a, “Tav'et laha arv'i a natk. Mardel laha avv'i a natk. Si slm udlani laha avv'i si slmak. Si udlani klei iv'i nkak. ?Kana p'en v'ata an a natk tav'et, m'er mardel atrlev' sarar? 44Sena si lera nakm pama lei, p'eran turanien, nakm, kana, p'erru. P'erani ipav'i v'nen arna p't nut nad.”
45Sarei, a Sikup ilev' nav'et lil iamk kahi ip'tir, 46kavr an a tv'aln kavr ti a, “Pavrav'a kavtupien nav'et.” Sarei, avlev' nav'et kavtupiani kavhatat atlera arna nav'et nen. 47Laha, a Lapan itu nahan iv'i Sekar--Sahatuta, v'eti a Sikup itu nahan iv'i Kalet. 48A Lapan ivr ti a, “Nav'et laha ipav'i v'nen a p't nut nad dika.” Sena si lera avtu nahan iv'i Kalet, 49Kav'i Mispa, sena ti ivr ti a, “A Mlin Eia ipap'ei a p't nut nad, naran tv'aln ikala tv'aln ml. 50Ipavr ti nakm putakm anr a natk tav'et, v'aha ipavr ti pul tav'et uraur ml aranar a natk tav'et, nsarei m'ertu uraur ialak, v'eti Atua ilak arna p't nut nad kap'a nakd.”
51A Lapan ivr an a Sikup ml kavr ti a, “Nav'et atupiani hilaha, nav'et ip'tir hilaha, la ntaui ip'tir arna p't nut nad ha. 52Navet atupiani m'a nav'et ip'tir lahara, arv'i v'nen ti kana nkasiv' nav'et lera kav'alet asnm, nakm mkasiv' nav'et atupiani lera m'a nav'et ip'tir lera kadama asnk, a ti putakm a kana. 53Atuan a Epraham, Atuan a Nahur, m'ei Atuan a tetiar, ipalak arna p't nut nad kav'ana hua m'a nakd.” Sarei, a Sikup iah lm'an katuran ani arna nahan Atua, la a tetian iv'i Aisak idedrn ani ha. 54Sarei, a Sikup itrp'n si slm katau asn a Mlin Eia arna ptha, kav'ara a tv'aln a ti apavhatat m'ei. Laha, avhan p'ret kavlak arna ptha lera lihat p'arei iamk. 55Laha, arna m'etav'aran nrnren a Lapan ithal kasmr a natn dui m'er a natn tav'et kamhmah anr. Sarei, a Lapan ihum'alet a utan.
Seçili Olanlar:
Ap'u 31: nmb
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2023 Presbyterian Reformed Church of Australia