लूका 24

यीशुन पोशो जीव उठणो

(मत्ती 28:1-10; मरकुस 16:1-8; यूहन्ना 20:1-10)

1हफ्तान पेल्ला एक दिह वेगोस ता बायकू कबरेफाय आपु तियार किरील सुगंधि द्रिन्य लीन आवीन. 2ताह कबरेन आहने दिगुड हेरकेल देखानो, 3एने तामाय गीया पुण ती जागी प्रभु यीशुन शरीर नाह सापडील. 4तेवी त्यू ताह देखीन बोंग्लान्यू ते देखू दुय माणहे दोवल्या फाडका पेरील त्यून आहने आवीन उबरेना. 5जेवी त्यू बिय जाईल, एने जोमनि पोर मूय केर रीयील एत्यू; तेवी तो त्यूह कियील, “तुमु जीवतालाह मुरीलामाय काहा होदतेह? 6तो आवो जागापूर नाहं तो जीवतालू एनो हि ज्यामायकेर ताहेरया तो ऐवी गलीलामाय एतो तेवी तुमूह काय कियील एता, 7तान कियील एता कि, माणहान सोरो पापी माणहान आथे देरीन आपणे निश्चित हि ओवतो तो क्रुस पोर चेढाविन, गीयो एने तिसऱ्या एक दिह ताह पोशो जीवतालू केरणेन निश्चित एता.” 8तेवी ता बायकूह तान शब्द एरायेल, 9ता कबर मायरीन परतल्या एने तासहे आखा अकरा चेलाना, एने दिहरी माणहाह कियील. 10ज्याह बायकू एता मरियम मग्दालिया, योअन्ना एने याकूब ची आहाक मरियम हे तोहोलोच ताहेर्यो दिहीरा बायकू पुण ता चेलान किथी एता. 11पुण तान शब्द ताह वाया लागिल तास तानकेरीन विश्वास किरील नाहं. 12पुण पतरस उबरील रेणू एने कबरे वोर दोवळतीन गीयो, एने तान बुंदे वाकून देखील, पुण ताह केवळ तागान फाडका देखा तान काही देखा नाहं. एने जो एनो तासे बोनगलायीन घर गीयो.

इम्माउसान वाटी पोर चेलाह दर्शन

(मरकुस 16:12-13)

13तान एक दिह तान चेला मायरीन दुय जन यरूशलेम मरीन लेगभोग सात मिल सेटो एईच इम्माउस नावान गावाह जात एता. 14जी घटना घेडील एती, तापोर ते बोलीह चाली एता. 15ताहेरया ते ता विषयी चर्चा केरतीन एता, एने विचार केरतीन एता तेविरीन यीशु ताजागेन उपस्थित एनो एने तान हेरीचालू लागिल. 16पुण ता ताह ओळखू नाह केरीन तान डोलाह जीहीकाय बंद केरणेन आवील एता. 17यीशु तान कियील, “चालणे एक दिहीराह तुमूह कोहलो विषयी चर्चा केरीन हेते?” ते चालणे थोबना ते जुलुम दुखी दिसत एता. 18तामायरीन क्लयपा नावान एक व्यक्तीने ताह कियील, यरूशलेम माय रेणार मायरीन तू एखालो ओहलो माणुह रेंय जे पासाण दिहामाय घटना घेडील ती मालूम नाहं. 19यीशु तान फुसील, काल्ली वातू? तास ताह आखा नासरी यीशु विषयी हि हा एक ओहलो माणुह एतो ज्यान जे कियील एने किरील ज्यासे बोगवान एने आखा माणहे ज्यान ओगाण हे देखाडीन आपील कि तो एक महान भविष्यवक्ता एतो. 20पुण मी ज्यान विषयी बोलीह एतो कि आमरा मुख्य याजक एने सरदारे केवी मृत्यू दण्ड आपणे माय होपील गीयो एने तास ताह क्रुस पोर चेढ़ाइल. 21आमु आशा मेलीकि जोस एतो इस्राएलान मुक्ती आपणार एने आखा काही ज्याह घेटनाह तिसरू दिह हि. 22एने आमरा टोलामायरीन काही बायुकू आमूह चितेत केरीन आपील हि आज वेगोस ता माहुफाय गीया. 23पुण ताह यीशुन शरीर देखा नाहं ते परतल्या एने आमूह कियेल कि तास स्वर्गदूतान दर्शन किरील एता कि तो जीवतालू हि. 24ओवतो आमरीमायरीन काही माहुफाय गीया एने जोहलो ता बायुकू कियील, तोहोलोच तास देखील एने तास ताह देखील नाहं. 25तेवी यीशु ताह कियील, तुमूह मूर्ख हेते एने भविष्यवक्तान जे काही कियील तापोर विश्वास केरणेन कोलाक बागे हि. 26काय मसीहान हे आवश्यक नाह एता कि तो ज्या त्रासांना बोगीन एने ज्यानहोस आपणो महिमा माय प्रवेश केरूह? 27एने ज्याह प्रमाणे मुसान सुरुवात केरीन भविष्यवक्ता फायवोर एने शास्त्रामाय ज्याह विषयी जे कियील एता तान ताह व्याख्या केरीन होमजाडील एता.

28ते ताहेर्यो ता गावान आहने आवा, ताजागेन जात एता यीशु ने ओहलो वागणू केरील जोहलो काय ओगाण जाणेन हि. 29पुण ताह शेक्तीसे आग्रह केरतीन कियील, आमरा हेर्यो थोबीन जा कारण लेगभोग हांजपोर एनी हि एने ऐवी दिह पुण टापेल गीयो हि तो ताहेर्यो थोबण्याकेरता आहने आवा. 30ताहार ताहेर्यो खाणेन मेजवर एतो तेवी तान रूटू विसील एने धन्यवाद आपील ओवतो ती मुडीन ताहेर्यो तो ताह आपतेन एतो. 31तेवी तान डोला उघाडील गीया एने तास ताह ओलखिन लीईल पुण तो तान ओगाण गायप एनो. 32ओवतो ते आपसामाय बोलहू लागिल, ताहेर्यो आपु ताहे-या बोलीह एतो एने शास्त्र होमजाळीन एतो तेवी काय आपणो हृदयाफाय उखाली आविह नाहां एती? 33ओवतो ते चालूच उबरीयेल रेणा एने पोशा यरूशलेम माय निकेलना ताह अकरा प्रेरित एने दिहरा माणहे हि एक्ठाच जुडील. 34जे किथी एता कि प्रभु खेरीच जीवतालू एनो हि तान शिमोनाह दर्शन आपील हि. 35ओवतो ता दुयुन वाटेमायबी जी घटना घेडील ता आखा कियील, एने तास कियील कि रोटान टुकडा किरील एता तेवी यीशुह केवी ओलखिल एता.

यीशुन आपणा चेलाह देखाणो

(मत्ती 28:16-20; मरकुस 16:14-18; यूहन्ना 20:19-23; प्रेरितान कामे 1:6-8)

36एव्ही ते ताह ज्याह वातू केताच एता कोलाकामाय स्वयं तान विचमाय आवीन उबरील रेणू एने ताह कियील, तुमूह शान्ति जुळी. 37पुण ते चक्कित एईन भयभीत एय गीयो तास विचार किरील ते एखादु भूतडो दिखिह हि. 38पुण तो ताह कियील, तुमूह इही बियेना सारकोस का हेते? तुमरो मोनाम शंका का हि? 39मारो आथाह एने मारो पायांना देखू माहु स्पर्श केरू एने देखू कि काल्लोबी भूतडा मा एने आडे नसतातव जोहलो तुमूह दिखिह हि ते मारा हि.

40हे केयीन तान आथ एने पाय देखाडीन. 41पुण आपणो आनंदाच्या भारत ऐवी पुण ते तापोर विश्वास केरतीन नाह एता, ते भौचक्के एता, यीशु ने तान कियील, न्या तुमरीफाय काही खाणेन हि काय? 42तास बुजाईल मासान टुकडा ताह आपील. 43तान तान ओगाण लीन खादो. 44ओवतो तो ताह कियील, ज्याह वातू हि ज्या मी तेवी तुमूह केदाह एता ताहेरया मी ऐवी तुवाहेर्यो हेतूप्रत्येक वात जो मारबाराम मुसान व्यवस्था माय भविष्यवक्तान एने शास्त्र ज्याह पुस्तकामाय लिखील हि पुरो एयुच हेते. 45ओवतो पवित्र शास्त्र सोमजाळणेन केरता तास तान डोला उगडीन आपील. 46एने तास ताह कियील, हा तोच हि जे लिखील हि मसीह त्रास बोगीन एने तिसऱ्या एक दिह मुरील मायरीन जीवतालू एय. 47एने पाप्यान क्षमान केरता मोन फिरावान संदेश यरूशलेम पासून सुरुवात केरीन आखा नाव दिहरी जातीन पोरचार किरील जाहो. 48तुमूह ज्याह वातू चे गवाही हेते. 49एने आखा मारो परम आबुक मारहे-यो जी प्रतिज्ञा केरील हि ताह मी तुमरीकेरता मोकलुह पुण तुमूह ज्या नगरामाय ता टायमाउर थोब रेवू जाहुख वोर तुमूह स्वर्गान सामर्थ्य जुडीत नाह.

यीशुन स्वर्गाम जाणेन

(मरकुस 16:19-20; प्रेरितान कामे 1:9-11)

50यीशु ओवतो बैथानी ताहवोर लीन गीयो एने तान आथ उपेर केरीन आशीर्वाद आपील; 51ताह आशीर्वाद आपतेन तो ताह सोडीन आलेग एय गीयो एने तो स्वर्गामाय उपेर विसाय गीयो. 52तेवी तास तान महिमा किरील एने मोठू आनंद केरीन यरूशलेमाम पोशा गीया. 53एने ता मंदिरामाय बोगवानान स्तुती केरती रेताला.

Seçili Olanlar:

लूका 24: NLXNT

Vurgu

Paylaş

Kopyala