यूहन्ना 9

जल्मा से आंधलाह हुदारणेन

1जातेलीन तो एक माणहाह देखील तो पायदा एयील तेवीचरीन तो आंधलू इतू. 2तान चेला ताह फुसील, “हे गुरुजी, कूण पाप किरील एतो का ज्यो आंधलो पायदा इनूह, ज्यो माणुह का ज्यान आहाक आबोक?” 3यीशु उत्तर आपील, “नाह ते ज्यो पाप किरील इतू नाह ते तान आहाक आबोक ज्यो ज्यानकेरता एनोह का बोगवानान काम तामाय प्रगट एने जुवी 4जो माहु मोकलील हि, आमूह तान काम दिह दिहेच केरणे गिरीज हि; ती रात आवणी हि जांमाय कूण काम नाय केर सेकी. 5जेवीवूर मी जगाम हि, ताहुकवोर मी जगान उजालो हि.” 6ज्यो केयीन तो बुईपोर थूपील, एने थूपऱ्यान माटळ्यो गारो केरीन, तो गारो ता आंधलान डोलापोर लागाडीन. 7तो ताह कियील, “जा शीलोहान कुंडामाय दोव ली” शीलोहान अर्थ मोक्लील ओहलो हि तो जाइन दोवील, एने देखतेलीन पोशो आवु 8तेवी पडोसी एने जां पेल ताह भिख मांगतालो देखील एता, केणे लागिल, “काय ज्यो तोच ते नाहं, जो बोहीन भिख मांगते रेतालो?” 9काही माणहे कियील, “ज्यो तोच हि, दिहरा कियेल, नाहं, पुण तानहोस हि.” तो कियील, “मी तोच हि.” 10तेवी ता ताह फुसणे लागिल, “तार डोला किहीकांय उगडील?” 11तो उत्तर आपील, “यीशु नावान एक माणुह माटळ्यो गारो केरीन, मार डोलाह लागाडील एने माहु कियील, शिलोह माय जाइन दोव ली, सेवट: मी जाईल एने दोवील एने देखणे लागिल.” 12ता ताह फुसील, “तो कां हि?” तो कियील, “माहु नाहं मालूम.”

फरीसी द्वारा आंधलान जाच पडताल

13माणहे ताह जो पेल आंधलू इतू ताह फरीसीफाय ली जाईल. 14जेवी दिह यीशु गारू केरीन तान डोलाह उघाडील इतू, तो शब्बाथान दिह इतू 15पोशा फरीसी भी ताह फुसील का तान डोला काल्ली रीती से उगडी गीया. तो ताह कियील, “तो मार डोलापूर गारू लागाडील, ओवतो मी दोव लीईल, एने ऐवी देखथु.” 16ज्यापोर काही फरीसी केणे लागिल, “ज्यो माणुह बोगवाना फायरीन नाहं, काहाकाय ज्यो शब्बाथान दिह नाहं मानीत.” दिहरा कियील, “पापी माणुह ओहला चिन्ह नाह देखाड सकीत?” सेवट: तामाय फुट पोड गीयी. 17तास ता आंधलाह पोशा कियील, “तोच तार डोला उघाडील हि. तू तान बारामाय काय किथे?” तो कियील, “तो भविष्यवक्ता हि.”

18पुण यहूदीह विश्वास नाहं एनो का तो आंधलो इतू एने ऐवी दिखेह, जेवीवूर ताह तान डोला उघाडील एता, आहक आबाकाह हादाडीन. 19ताह फुसील, “काय ज्यो तुमरो सोरो हि, ज्याह तुमूह केणु का ज्यो आंधलो पायदा एयील इतू का? एने ऐवी तो किहीकाय देखीह हि?” 20तान आहाक आबोक उत्तर आपील, “आमूह ते मालूम हि का ज्यो आमारो सोरो हि, एने तो आंधलो पायदा एयील इतू; 21पुण आमूह ज्यो नाहं मालूम का ऐवी तो किहीकाय देखीह, एने ज्यो नाहं मालूम का कूण तान डोला उघाडील. तो वयामाय आयील हि, ताहुच फूस लिवू; तो आपणा बारामाय स्वतान केय आपण्यू.” 22जीवात तान आहाक आबोक ज्यानकेरता कियील कारण ता यहूदीह बिताला, काहाकाय यहूदी एकमोत एय जाईल एता का जर कूण ताह केय का तो मसीह हि, ते प्राथना आराधनालय मायरीन काड देती. 23ज्या कारण से तान आहाक आबोक कियील, “तो वयाम आवील हि, ताहुच फूस लिवू.”

24तेवी तास ताह माणहाह ज्यो आंधलो इतो, दिहरी वारीन हादाडीन ताह कियील, “बोगवानान महिमा केर आमूह ते मालूम हि का तो माणुह पापी हि.” 25तो उत्तर आपील, “माहु नाह मालूम का तो पापी हि; माहु एकुच वात मालूम हि का मी आंधलू इतू एने ऐवी देखतू.” 26ता ताह पोशा कियील, तो तारहेर्यो काय किरील? एने तार डोला उघाडील? 27तो ताह कियील, मी ते तुमूह केय आपील हि, एने तुमूह ते नाहं होमल्या; ऐवी दिहरी वारीन काहा होमलने होदतेह? काय तुमूह भी तान चेला बोडण्या हेते? 28तेवी ता ताह हाजो बाक्तो केयीन केदा, “तूच तान चेलो हि, आमु ते मुसान चेला हेते 29आमूह मालूम हि का बोगवान मुसा हेर्यो वातू केरील इतू; पुण ज्या माणहाह ते नाहं ओलखते का ज्यो का वालू हि.” 30ता ताह उत्तर आपील, जी ते नवलने वात हि का तुमूह नाहं मालूम का तो कावालु हि, तेभी तो मार डोला उगाड दियील हि. 31आमुहू मालूम हि का बोगवान पापी माणहान नाहं होमलने, पुण जर बोगवानान भक्त रेंय एने तान इच्छेप्रमाणे चालते रेंय, ते तो तान होमलने. 32जगान सुरुवातनात एताच ज्यो केध्दी होमलने माय नाहं आवो का कूण तेभी आंधलोच पायदा एयील तान डोला उघाडील. 33जर ज्यो माणुह बोगवाना फायरीन नाय रितू, ते कायीच नाह केर शकतालु. 34ता ताह उत्तर आपील, तू ते बिलकुल पापामाय जेल्मो लियेल हि, तू आमूह काय हिकाडीह? एने तास ताह बाहेर काड दियील.

आत्मिक आंधलोपण

35यीशु होमलेल का ता ताह बाहेर काड दियील, एने ता हेर्यी भेट एनी ते कियेल, “काय तू बोगवानान सोरा पोर विश्वास करने?” 36तो उत्तर आपील, “हे प्रभुजी, तो कूण हि, का मी तापोर विश्वास केरू?” 37यीशु ताह कियील, “तू ताह देखील भी हि, एने जो तारहेर्यो वातू केरील हि, तो तोच हि.” 38तो कियील, “हे प्रभु मी विश्वास केरथू” एने तो ताह वोंदिल 39तेवी यीशु कियील, “मी जगाम न्यायनिवाडू केरणे केरता आवील हि, कारण जां नाह देखते ता देखती, एने जां देखतेह ता आंधला एय जाती.” 40फरीसी मायरीन जाता हेऱ्या एता तां ज्यू वातू होमलीन ताह कियील, आमूबी आंधला हेते काय? 41यीशु ताह कियील, जर तुमु आंधला रेतां ते पापी नाय ठेरता; ऐवी केतेह का आमु देखतेह, केरीन तुमरो पाप बोणीन रेणें.

Seçili Olanlar:

यूहन्ना 9: NLXNT

Vurgu

Paylaş

Kopyala