यूहन्ना 7

यीशु एने तान बाहाक

1आवो वातू ओवतो यीशु गलील माय फिरीन रेणू; काहाकाय यहूदी ताह मारीन टाकणेन प्रयत्न केरतीन एता, तामुळे ताह यहूदामाय फिरनेन नाह एता. 2यहूदीयानन मंडपान तिवार आहनी आवील इतू. 3तामुळे तान बायाक ताह कियील, “यारीन यहूदामाय जा, कारण जे उचकाहुच किरील काम तू केरणू ते तारो चेला ताभी देखणार. 4कारण ओहलो कुनुस निह एय जो प्रसिद्ध एहू इच्छितो पुण गुप्तपणे काम केरुहू, तेवी तू ज्यो काम केरतालु तेवी जीवाच जगाम प्रकट केर.” 5कारण तान बाहाक पुण तापोर विश्वास केरतीन नाह एता. 6तेवी यीशु ताह कियील, “मारी टाइम उंजू आवी, नाहं पुण तुमरीकेरता आखीच टाइम हि. 7जगाम तुमरो द्वेष केरतीन नाहं, पुण ते मारो द्वेष केरणू कारण मी तान विरोधामाय गवाही आपथु कि तान कामे वाईट हि. 8तुमूह तीवारामाय जा; मी ऐवी आवो तीवाराम जात नाहं, कारण उंजू ताहवोर मारो टाइम पुरो एनो नाहं.”

झोपडीन पर्वमा यीशु

9तो ताह ज्याह वातू केयीन गलीला मायरीन रेयीन गीयो. 10पुण ताहेरया तान बाहाक तीवारामाय निकलीन गीया तेवी तो जीवेच भी, उघड पुण नाहं पुण जिहकाय लिकाडील पुण गीयो. 11यहूदी तीवारामाय हे केयीन होथू लागिल, “तो कां हि?” 12एने माणहामाय गुपचुप जादा वातू एईल; कूण किथी एता, “तो हाजो माणुह हि. 13तेभी पुण यहूदी भयामुळे ते तान विषयी उघड पुण बोलीह नाह एता.”

पर्वमा यीशुन उपदेश

14जेवी तीवारान आर्दो दिह निकलीन गीया; तर यीशु मंदिरामाय जाइन शिकवन आपुह लागिल. 15तेवी यहूदीयांनी चक्कित एय कियील, “ज्यासे हिकना नाहं तेभी ज्यान कारीन आवा?” 16यीशु ताह उत्तर आपील, “मारी लिकाडतालु मारी नाहं, पुण माहु मोकेलणा-या हि.” 17जर कूण तान ईच्छापूर चालणेन ईच्छा करने, तर तो आवो हिकणे होमजाडीन जाहू कि हे बोगवाना फायरीन हि केव्ही माफायरीन किथी हि. 18जो आपणे वूगेरीन काही किथे तो आपणाच दिखेह; पुण जो आपणो मोकलणारान महिमा देखहुं इच्छितो तोच खेरो हि एने तामाय अधर्म नाहं. 19काय मुसाने तुमूह व्यवस्था आपील नाह एता? तेभी पुण तुमरे माय कोलाक जन व्यवस्था वर चालतो नाहं तुमूह काहा माहु मारीन टाकणे केरता मागतले? 20माणहान उत्तर आपील, “तुमरीम दुष्ट आत्मा हि! कूण तुवाह मारीन टाकणे केरता मांगथू?” 21मी एक काम किरील, एने तुमूह आखा आश्चर्य केरणू. 22तान केरताच मुसान तुमूह खतनान आज्ञा आपील हि ती मुसाफायरीन नाहं पुण वेगालाफायरीन आईल हि, एने तुमूह शब्बाथच्या एक दिह खतना केरणू. 23जेवी शब्बाथ ने दिह माणहान खतना एतालो म्हणजे मुसान व्यवस्थान आज्ञा टाल नाय जाय, केरीन तुमु माहु पोर राग केरतेह, का मी शब्बाथ ने दिह एक माणहान पुरी रीती से हाजो किरील. 24“मूय देखीन न्याय केरूह मा तर खेरी खेरीच न्याय केरू.”

काय यीशु महान हि?

25तेवी कोलाक यरूशलेमाम रेणारे केहू लागिल, “काय हा तो नाहं काय ज्याह मारीन टाकणेन प्रयत्न केरूह रेणा हि? 26पुण देखू, तो तर उघड पुण बोलेहे एने ताह कूण काही किथी नाहं, काय सरदारांनी खेरी खेरीच होमजाडीन लीईल हि कि जोस मसीह हि? 27ज्या तर आमु ओळखणे कि हा; कावालु हि; पुण मसीह ताहेरया आवूह तेवी कुणीहुच मालूम नाहा हे तो कि तो कावालु हि.” 28तेवी यीशु ने मंदिरामाय हिकाडतालु आपतेन आयेड मारीन कियील, “तुमूह माहु ओलकतेह एने, हे पुण मालूम हि कि मी कारीन हि मी तर स्वताह आवूह नाहं, पुण माहु मोकलणार सत्य हि ताह तुमूह ओळखतेह नाहं. 29मी ताह ओळखणे कारण मी ताफायरीन हि एने ताणुच माहु मोकलील हि.” 30जापोर तान ताह देरणेन प्रयत्न किरील, तेभी कुनुस तापोर आथ टाकु शकील नाहं कारण तान टाइम उंजू आवी नाहां एती. 31तेभी पुण गर्दीमाय कोलाक माणहान तापोर विश्वास किरील एने केहू लागिल, “मसीह ताहेरया आवूह तर काय यांपुररीन जादा आश्चर्य काम देखाडणार जे याने देखाडणे?”

यीशुह देरणेन प्रयास

32फरीसी माणहाह ताबारामाय लिकाईन वात केरतालोन होमलील; एने मुख्य याजक एने फरीसी ताह देरणे केरता शिपायांना मोकलील. 33ज्यापूर यीशु कियील, “मी थोडच टायमापोरउर उंजू तुवाहेर्यो हि ओवतो माहु मोकेलनाराफाय मी निकलीन जाहू.” 34तुमूह माहु होद्हू पुण मी सापडील नाहं; एने जाहारी मी हि ताहारी तुमूह आवहू शकत नाहं. 35ज्यापूर यहूदी आपसामाय कियील, “हा कां जाहू कि ताह आमु होथू शकणार नाहं? काय तो ताहेऱ्यो जाहू कि जे यूनानी माय वेराय माय एय रेतेह, एने यूनानी पुण लिकाडतालु आपण्यू? 36हि काल्ली वात हि कि ती ज्यान कियील कि तुमूह माहु होदहू पुण मी तुमूह सापडील नाहं; एने मी जाहारी हि ताहारी तुमूह आवहू शकत नाहं?”

जीवनान पाणीन नद्या

37तीवारान शेवटेस एक दिह जो मुख्य दिह हि यीशु उबरील रेणू एने हादाडळीन कियील, जर कूण तिह्ल्यो हि तर माहफाय आवो एने पिवू; 38जो मारपुर विश्वास केरुहू हि जाणेन पवित्र शास्त्रामाय हि तान मोनामरीन जीवनान नेद्यू वोयीन नीही, 39तान हे वचन पवित्र आत्मान विषयी केईल, ज्याह तापोर विश्वास केरनारापूर उतरीही एता; कारण आत्मा एविवूर उतरना नाह एतो कारण यीशु उंजू पुण आपणो महिमात पोचना नाह एतो. 40तेवी गर्दीमाय कोलाक जाणाह ज्याह वातू होम्लीन कियील, “खेरी खेरीच हा तोच भविष्यवक्ता हि.” 41दिहरान कियील, “हा मसीह हि” पुण कोलाक कियील, “काहा? काय मसीह गलीलामरीन आवूह?” 42काय पवित्र शास्त्रामाय हे आवा नाहं कि मसीह दाविदान वंशामरीन एने बेथलेहेम गावामरीन आवूह जाहारी दाविद रेथे एतो? 43केरीन तामुळे माणहामाय फुट पोडीन गीयी. 44तामायरीन कोलाक जन ताह देरणेन प्रयत्न केरतीन एता, पुण कुनुस तापोर आथ टाकील नाहं.

यहूदी आगुवान अविश्वास

45तेवी शिपायांन मुख्य याजक एने फरीसी आहने फिरीन आवा तो ताह कियील, “तुमूह ताह काहा लीन आवा नाहं?” 46शिपायांनी उत्तर आपील, “काल्लूच माणहान केविज ओहला वातू केरील नाहं.” 47फरीसी ताह उत्तर आपील, काय तुमूह पुण बुलवीन गीया हेते काय? 48काय सरदार एने फरीसी मायरीन कूण तापोर विश्वास किरील हि? 49पुण हे माणुह ज्याह व्यवस्था मालूम नाहं शापित होव. 50निकदेमस जो पेल्लो तान आहने आवा एतो एने तामायवाला एक एतो ताह कियील, 51“काय आमरा व्यवस्था काल्लोबी माणहा जेवीवोर पेल्ला तान होम्लीन होजीन लेतेन नाहं कि तो काय केरतीन हि दोषी ठेरावने?” 52तास ताह उत्तर आपील, “काय तू पुण गलीलान हि? होदणे एने देखू, कि गलीलामरीन कूण भविष्यवक्ता प्रकट एय नाहं काय? 53तेवी आखा आप आपणा गिर निकलीन गीया.”

Seçili Olanlar:

यूहन्ना 7: NLXNT

Vurgu

Paylaş

Kopyala