यूहन्ना 16

1“जीवात मी तुमु ज्ञान केरता केदाली कि तुमु उखालीन नाहा. 2ता तुमूह आराधनालय मायरीन काड देती, ओहलो टाइम आविह हि, कि जो कूण तुमूह मारीन टाकील तो होमजी कि मी बोगवानान सेवा करने. 3इही ते जानकेरता केरती कि तो पित्याहा ओळखतेह नाहं एने माहु नाहं माहु ओलकतेह.” 4पुण हि वात मी तुमूह ज्ञान केरता केयेल, कि ती वातून टाइम आवी, तुमूह तेवी एर आव जाय कि मी तुमूह पेलूच केयेल एतो.

पवित्र आत्मान कामे

“मी तुमूह जी वातू सुरुवातीच जानकेरता नाह कियो काहाकाय मी तुमरे हेरी एतो. 5पुण मी ताहेरया माणहा मोकलणारा उगे जाथू एने तुमरो मायरीन कुनुस माहु फुसतेन नाहं” तू का जाथो हि? 6पुण जीवात मी तुमूह केदाली हि, ज्ञान केरता तुमरो मोन शंका बोरीन गीया हि. 7तेभी मी तुमूह खेरो किथु कि मारा जाणू तुमरो केरता हाजो हि, कारण केध्दीह मी जाहू नाहं तर तो साहायक तुमरो उगे आवूह नाहं; पुण केध्दीह मी जाह, तर ताह तुमरो उगे मोकलुहु. 8तो आवीन जगाह पाप एने धार्मिकाच्या विषय माय हास केरीन केरूह. 9पाप्यान विषयाम जानकेरता कि ते मारपुर विश्वास नाहं केरुहू; 10एने धार्मिकतान विषयाम ज्ञान केरता कि मी पित्या उगे जात हि, एने तुमूह माहु पोशा देखणार नाह; 11न्यायान विषयाम ज्ञान केरता कि जगान सरदार दोषी ठेरावील गीयो हि.

12आवा तुमरो हेरी उन्जू जादा वातू केताला हि, पुण तुमूह ऐवी ताह सहन नाहं केरूह शकणार. 13पुण तो ताहेरया म्हणजे सत्याचा आत्मा आपुहू, तो तुमूह आखा सत्यमाय वाट केय, कारण तो आपणी एने आपणो फायरीन नाहं कारण जी होमेल तोच केय, एने आवणारा वातू तुमूह केय. 14तो मारा महिमा केरूह, कारण मारी मारो वातू विचमायरीन तुमूह केय. 15जे काही पितान हि, ता आखा मारा हि; ज्ञान केरता मी कियील कि तो मारो वातू मायरीन तुमूह केह.

दुख सुख माय बोदलाय जाय

16“थोडच वेलामाईच तुमूह माहु देखणार नाहं, एने ओवतो थोडच वेलामाईच माहु देखहु.” 17तेवी तान कूण एक चेला आपसामाय कियील, हे काय हि जे आमूह किथी हि, “थोडच वेळाने माहु देखणे?” एने जे ज्ञान केरता कि मी पित्या आहने जात हि? 18तेवी तान कियेल “हे थोडो टाइम, जे तो किथे, काय वात हि? आमूह मालूम नाहं कि काय किथी हि.” 19यीशु हे होमजाडीन कि ते फुसहु इच्छिमाय, तान कियेल, “काय तुमूह आपसामाय मारी आवो वातू च्या विषयाम विचार रेणू” थोडच वेळाने तुमूह माहु देखणार नाहं, एने ओवतो थोडच वेळाने माहु देखहु, 20मी तुमूह खेरो खेरो किथे कि तुमूह रेडनु एने दुख केरती, पुण जग आनंद केरती; तुमूह दुख केरती पुण तुमरो दुख आनंदम बोदलीन जाह. 21उदरणे टायीमा बायकू ला त्रास एने, कारण तीन दुखान टाइम आवीन जातेह, पुण ती ताहेरया आतल्यो सोरो जेल्मो आपीह, तर ता आनंदाच्या जगाम एक माणुह उत्पन्न एनो, ता वेला पोशा एर केर सेकेह नाहं. 22ता प्रकारे तुमूह एव्ही तेभी दुख हि, पुण मी तुमूह पोशा मेलूह एने तुमरो मोन आनंदिसे बोरीन जातीमाय; एने तुमरो आनंद तुमरो फायरीन कूण सांडाळील लेहु नाहं. 23ता एक दिह तुमूह माहु कायीच फुसहु नाहं मी तुमूह खेरो खेरो किथु, केध्दीह पित्या फायरीन काही मागू तर, तो मारो नावान तुमूह आपुहू. 24ऐवी ताहवोर तुमूह मारा नावामाय कायीच मांगील नाहं; मांगहू ते तुमूह जुडी कारण तुमरो आनंद पुरो एय जाय.

जगा पोर विजय

25“मी तुमूह हि वात देखाडील माय कियील हि, पुण तीस टाइम आविह हि कि मी तुमूह वार्तामाय पोशा केनार नाहं, पुण उगडीन तुमूह आबाकने बद्दल केह. 26ज्या एक दिह तुमूह मारो नावान मागू; एने मी तुमूह हे नाहं किथी कि मी तुमरीकेरता पित्याला विनंती केरूह, 27कारण आबोक तुमरे पोर प्रेम केरथू, ज्ञान केरता कि तुमूह मारपुर प्रेम केरील एने हा पुण विश्वास किरील हि कि मी पित्या फायरीन आवूह हि.” 28मी पित्या फायरीन जगाम आवूह हि, मी पोशा जगाह सोडीन पित्याफाय जाथू. 29तान चेला केयेल, “जुलुम एव्ही तेभी तू उघड किथी हि, वार्तामाय नाहं किथी. 30ऐवी आमूह होमजाडीन गीया हि कि तुवाह आखो काही मालूम हि, एने तान जरुरत नाहं कि कूण तुवाह काही फुसुहू; याम विश्वास करने कि तू बोगवान फायरीन आवा हि.” 31ज्यो होमलीन यीशु ने ताह केयेल, “काय तुमूह ऐवी विश्वास केरणू? 32देखू, तो टाइम आवी हि नापून आयेलहि कि तुमूह आखा ईकडे-तिकडे जाइन आपणो सिडिक लेती एने माहु एखालु सोडीन आपती; तेभी मी ऐखलो नाहं कारण आबोक मारो हेरी हि. 33मी जीवात तुमूह ज्यानकेरता कियील कि तुमूह कुणबी शान्ति जुडी जगाम तुमूह क्लेश हि, पुण धीर देरू मी जगाह जिंकील हि.”

Seçili Olanlar:

यूहन्ना 16: NLXNT

Vurgu

Paylaş

Kopyala