लूका 21

एकी विधवा रा दान

(मरकुस 12.41-44)

1तेबा तेऊये सेठे आपणी-आपणी भेंट देहुरे रे भण्डारे पाऊदे हेरी। 2तेऊये एकी विधवा भी दुई सिक्क पाऊंदी हेरी। 3तेबा तेऊ बोलू, हाऊं तमावै सच बोला कि ऐसा विधवा बेटड़ी सभी का ज्यादा दान पाऊ। 4किबेकी त्याह सभी आपणी कमाई रा आधा पाऊ पर ऐसा आपणी पूरी उम्रा री भेंट दिनी।

देऊरे रे विनाशा री भविष्यवाणी

(मत्ती 24.1,2; मरकुस 13.1,2)

5जेबा एखे लोका देहुरे रे बारे बोलदे लागे थी, कि सह केहडे शोभले पात्थरे होर भेटा री चीजा करी करे सजाऊद साहा, तेबा तेऊ बोलू, 6त्याह धियाड़ी इहंणी, जासू मे सबे तमे हेरे तेता मे अखे कोहे पात्थरा मे पात्थर भी नांई रहणअ।

मुश्किला होर दुःख

(मत्ती 24.3-14; मरकुस 13.3-13)

7त्याह तेऊका बोलू, हे गुरु यह सबे केबरे हुणा? होर जेबरे या गल्ला पूरी हुणी तेत्का कैह चिन्ह हुणअ? 8तेऊये बोलू, ब्याते रहा तमे ठगी नांई लोडी, किबेकि बहू मेरे ना रे इहंणे, हाऊं सहे साहा, होर यह भी साहा, कि वक्त नेड़े साहा, तमे तेऊ पीछे नांई नाशे। 9जेबा तमे लड़ाई होर झगड़े रे वारे में शुणदे तेबा तमे डरे नांई किवेकी एताक पहिले हुणा जरूरी साहा। 10तेबा तेऊये तेऊवै बोलू, जाति-जाति पैंदे होर राज्य-राज्य पैंदे चड़ाई करणी, 11होर बड़ी-बड़ी जाजरी हुणी, जागा-जागा अकाल पडने होर महामारी हूँणी, डरयाऊणे आली सरगे बडे-बडे चमत्कार हुणे होर बड़े-बड़े चिन्ह प्रकट हुणे। 12पर याह सभी गला का पहिले त्याह मेरे ना मरणे का तमे ढाकणे होर सातउणे होर प्रार्थना घरा में दिणे होर जेला, होर राजे सेटा नीणे। 13पर याह तमावै गुआही दीणे रा मोका हुणा। 14तेबा आपणे मने ठानी ढाहे, की हामा पहिले होरी उतर दीण री चिंता ना कर 15किबेकि हाऊं तमावै, एडा बोला होर बुधि दीणी, की थारे सारे बिरोधी थारे सामने नांई टेकी सकणे 16थारे होर माँ बाब, होर भाई होर कटुबा रे दोस्ता तमे ढाकणे, होर एखा तमे मारी पाऊणे। 17मेरे ना जड़णे कअ लोका तमे संघे वैर ढाहणा। 18पर थारअ एक भी मुंडा रे बाल भी नांई चुटणे। 19आपणे बुशाह संघे तमे, आपणे प्राण बचाऊणे।

यरूशलेमा रा नाश

(मत्ती 24.15-21; मरकुस 13.14-19)

20जेबरे तमे यरूशलेमा सेना संघे घिरिदे हेरले, तेबा तमे ज़ाणे कि तेऊरा नाश हुणा नेड साहा। 21तेबा जोह यहूदी मेंजा का साहा त्या पहाड़ बे नाशे; होर जोह यरूशलेमा मितर साहा त्या वागे निखला; होर जोह ग्राए साहा त्या तखे नांई नाशे। 22किबेकी याहा बदले लउणे रे धयाडे हुणे जासू में सारी लिखदी गल्ला पूरी हुणी। 23त्याह धियाड़ी में जोह धरती मे गर्भवती होर जोह दुधा पिलउदी हुणी, त्याह वे हाय, हाय! किबेकि देशा में बखे प्रकोप हुणे होर याह लोका पैंदे बड़ी आपति हुणी। 24त्याह तलवारा री कोर हुणे, होर सभी देशा रे लोका वंदी करी करे पजेरणे; होर जेबरे तणी अन्यजाति रा वक्त पूरा नाई होला तेवरे तणी यरूशलेम होरी अन्यजाति का रोदण।

यीशु रा भी का इहणे रा इशारा

(मत्ती 24.15-21; मरकुस 13.14-19)

25सूरज होर चाँद होर तारे में चिन्ह हेरण; होर धरती पैंदे, देशा-देशा रे लोका पैंदे संकट इहंणा, किबेकि त्याह समुन्दरा रे गर्जना होर लेहरा रे कोलहाला का घवराउणे। 26होर डरा री बजहा का संसारा पैंदे ईणे आली घटना हेरी करे लोका में जीआ में जी नांई रहणा किबेकि सरगा री सामर्थ्य शक्ति हिलाऊणी। 27तेबा त्याह मणशा रे शोहरू री सामर्थ्य होर बड़ी महिमा संघे बादल़ा पैंदे इहदे हेरणा। 28जेबा या गल्ला हूँदी लागी तेबा सीधे होई करे उज्हे हेरे; किबेकि थारा छुटकारा नेड साहा।

अन्जिरा रे बूटे रा दृष्टान्त

(मत्ती 24.32-35; मरकुस 13.28-31)

29तेऊ त्याह का एक दृष्टान्त खोजी करे, अंजीरा रे बूटे होर सभी बूटे भाल़ा। 30जेबा बूट में नई टिरा लागा, तेबा तमे हेरी करे जाणा की गर्मी रे धयाडे नेड आउये। 31एऊ साबे जेबा तमे याह गला हेरले, तेबा तमे जाणा की परमेश्वरा रअ राज्य नेडअ साहा। 32हाऊं तमा वै सच बोला की, जेबरे तणी या गला नांई होली, तेवरे तणी एसा पीढ़ी रा कधी भी अंत नांई हुणा 33सरग होर धरती टलणी, पर मेरी गला कधी नांई टलणी।

ब्याते रहा

(मत्ती 24.29-31; मरकुस 13.32-37)

34तेबा जागदे रहा, एडा ना हो की थारे मने खुमार होर मतवालेपन, होर एउ जीबना री सोचा का सुस्त होए, होर सह धियाड तमावै फंदे साही एकदम ईछे। 35किबेकि सह धियाड धरती पैंदे रहणे आले सभी वै एउ सावे फन्दे रे साबे ईहणी। 36तेबा ब्याते रहा, होर हेरा वक्ता पेंदे प्रार्थना करदे रहा किबेकी तमे याह इहणे आली घटना का बछे होर मणशा रे शोहरू रे सामने खड़े हुणे का लाईक बणी सके। 37होर याह धियाडी मंदिरे प्रचार करदा थी, होर राची जैतून ना रअ पहाडा में रहंदा थी। 38होर दोती सवै लोका तेऊरी शुणने री तणी देहुरे तेऊ सेटा इह्न्दा थी।

Seçili Olanlar:

लूका 21: ISJNT

Vurgu

Paylaş

Kopyala