लूका 15

गोझी दी भेडा रा दृष्टान्त

(मत्ती 18.12-14)

1सभे चुंगी मागण आले होर पापी यीशु सेटा इंहदा थी, की तेऊरी शूणे। 2होर फरीसी होर शास्त्री कुडकुडाई करे बोलदे लागे, कि यह तअ पापी संघे मिलदा होर त्याह संघे खांदअ। 3तेबा तेऊए त्याह वै यह दृष्टान्त बोलू, 4तमा मेंजा एडअ कूण साहा अगर कासु मणशा री शअ भेडा हो, त्या मेंज़ा का एक गोझे, तेबा नडीनुए भेडा बूणे छाडी करे, तेसा एकी भेडा लोडदे नाहे जो जेबरे तक सह भेटली नांई। 5होर जेबा सह भेटे, तेबा बडी खुशी होई करे तेसा कहाना प्रंदे चुयाकी करे आणे। 6होर घरे ईछी करे आपणे दोस्ता होर पडोसी कठे करी करे बोलदअ लागे माई संघे खुशी मना किबेकि मेंरी गोझी दी भेड भेटी। 7हाऊं तमाबे सच बोला कि एउ सावे एक मन फरेऊण आले पापी रे बारे में भी स्बर्गा में भी एडी खुशी हूँणी। जेडा कि एडे नडीनुए धर्मी रे बारे में नांई हुंदा। जासु मन फिराव री जरूरत नांई।

गोझीदे ढब्बे रा दृष्टान्त

8यह एडी कूण बेटड़ी हुणी की ज़ासरे दस सिक्के सा होर त्याह में एक गोझू; तेबा सह बेटड़ी सजीए जाली करे होर पुरे घरा हेजी बुहारी करे, जेबरे तणी तेसा सह भेटअ नांई, जी लाई करे लोडदी ना रहे। 9होर तेसा भेटअ, तेबा सह आपणी सेहली होर पडोसी कठे करी करे बोला कि माई संघे खुशी मना किबेकि मेंरअ गोझू दअ सिक्कअ भेटअ। 10हाऊं तमावै बोला; कि एडे साबे एक मन फेरने आले पापी रे बारे में परमेश्वरा रे स्वर्गदूता रे सामाने खुशी हूणी।

उडाऊ शोहरू रा दृष्टान्त

11तेऊकी तेऊ बोलू; कि एकी मणशा रे दुई शोहरू थी। 12त्याह में होच्छे शोहरू आपणे बापू वै बोलू कि हे बापूआ संपति में जोह भाग मेरा साहा, तेऊ महाब दे। तेऊ त्याह री संपति बानडी दीनी। 13कुछ धियाड़ी बाद जेबा धयाडी बीतदी लागी होच्छ शोहरू सबे कुछ कठे करू होर एकी होरी देशा वै नाठअ होर तखे कुकर्मा में आपणी सारी जिंदगी री संपति खत्म करी। 14जेबा तेऊ सभे कुछ खरच करी छेकू, तेबा तेऊ देशे आकाल पडू होर कंगाल होऊ। 15होर सह तेऊ देशा रे निबासी में एकी संघे रहदअ लागअ, तेऊ सह आपणे खेचे सूरा चारदअ भेजू। 16सह सूरा रे खाणे री फली संघे आपण पेट भरना चान्दा थी, होर तेऊवै कोई भी किछे नांई दीन्दअ थी। 17तेबा तेऊवै होश आई, तेबा बोलदअ लागअ, की मेरे बापू रे केतरे ही कुली खाणे का भी ज्यदा रोटी भेटा होर हाऊं अखे भोछे मरदअ लागदअ। 18हाऊं एबा उठी करे आपणे बापू जेह चालू होर तेऊवै बोलणा, कि बापूआ माए स्वर्गा रे बिरोधा में होर तेरी आछी रे सामने पाप करू। 19एबा हाऊं एता लायक नांई रहू कि तेरअ शोहरू होए महा एबा एकी कुली साही डाहे। 20तेबा सह उठी करे आपणे बापू जेह चालू सह एबरे दूर ही थी, कि तेऊरे बापू तेऊ हेरी करे दया आई होर ठुरी करे सह आपणे गले लाऊ होर तेऊवै मुंघी दीनी। 21शोहरू तेऊवै बोलू; बापुआ, माई स्वर्गा रे बिरोधा में होर तेरी आछी रे सामने पाप करू; एबा हाऊं एता लयक नांई रहू की तेरअ शोहरू होए। 22पर बापुये आपणे नोकरा वै बोलू; छेको-छेको शोभले-शोभले चोगे काढी आणा होर एऊ वै पनेई देया होर एऊरे हाथे मूंदडी होर टांगा में बूट बनाई देआ। 23होर पालूद बाकरअ आणा होर काटा कि हामे खाए होर खुशी मनाए। 24किबेकि मेरअ यह शोहरू मुंअ थी, आज यह भी जिऊंदअ होऊ, एबा भेटअ होर खुशी मनाऊंद लागअ। 25पर तेऊरअ बडअ शोहरू खेचा का, जेबरे सह घरा वै आऊओ, घरा सेटा पूजअ तेबा तेऊ गाणे बजाणे होर नाचणे रा हाला शुणू। 26होर तेऊ एक सेबक शादू होर पुछु यह केह लागादा हुंदा। 27तेऊये तेऊवै बोलू, तेरअ भाई आअद, होर तेरे बापूए पालूदअ बाकरअ काटू, तेबा सह तेऊए सह भलअ चागअ हेरू। 28यह शूणी करे तेऊ गुस्सा आऊआ, होर भीतरा वै नांई नाठअ; पर तेऊरअ बापू बागे ईछी करे तेऊका बिनती करदअ लागअ। 29तेऊ आपणे बापू वै उतर दीना; हेर हाऊं एतरी साला तेरी सेवा करदी लागदअ, होर कधी भी तेरी आज्ञा नांई टाली ताई एक गाभु भी महा वै नांई दीनअ कि हाऊं आपणे दोस्ता संघे खुशी मनाऊंलअ। 30पर जेबा तेरअ यह शोहरू आऊओ जासुए तेरी सारी संपति बैश्यह पैंदे उड़ाई तेऊरी तणी ताई पालूद बाकरअ काटू। 31तेऊये तेऊवै बोलू; शोहरूआ तूह सदा मांई संघे सहा जोह कुछ मेरा साहा, सह सभे तेरा साहा। 32पर एबरे खुशी होर मगन हुणे रा वक्त सा; किबेकि यह तेरअ भाई मुंअ थी, एबा जिऊंदअ होऊ; गोझू थी एबा भेटअ।

Seçili Olanlar:

लूका 15: ISJNT

Vurgu

Paylaş

Kopyala