यूहन्ना 9

जन्मा का काणे बे हेरना

1नाहंदे-नाहंदे यीशु एक मणश हेरू जोह जन्मा का काणअ थी। 2तेऊरे चेले तेऊका पुछु, हे गुरु, कुणी पाप करू, कि यह काणअ होऊ, हामें मणशे या तेऊरे आमा बापू? 3यीशु उतर दिना, नाह ऐऊ पाप करू, नाह ऐऊरे आमा बापू; पर यह ऐतकी तणी कि ऐऊ में परमेश्वरा रे काम प्रकट हो। 4जूणी हाऊं भेजुदअ, हामा तेऊरे काम धियाड़ी ही धियाड़ी मे करणा जरूरी साहा; राच ईहंण आली साहा जासू में कोहे काम नांई करी सकतअ। 5जेबरे तणी हाऊं संसारा में साहा, तेबरे तणी संसारा बे ज्योति साहा। 6यह बोली करे तेऊ जमीना पेंदे थुकू, होर तेऊ थुकीदे में माटा पाऊ, होर सह माटा तेऊ काणे री आछी में लेसी करे। 7तेऊबै बोलू, नाह, शीलोहा रे कुण्डा में धोह (शीलोहा रा अर्थ, भजु द साहा)। तेऊ धोऊ, होर हेरदे बापस आउअ। 8तेबा पड़ोसी होर जूणी पहिल भीखा माँगदअ हेरू दअ थी, होर बोलदे लागे, कैह यह सहे, जोह बेठअ दअ भीख माँगा। 9कुछ लोके बोलू, कि यह सह साहा, दूजे बोलू, यह तेऊ साही साहा। तेऊ बोलू, हाऊं सहे साहा। 10तेबा त्या तेऊका पूछते लागे, तेरी आछी केढ़े साबे खुली? 11तेऊ उतर दिना, यीशु ना रे एकी मणशे माटा करू होर मेरी आछी लेसी करे महा बे बोलू, शीलोहा में नाहीं करे धोहे, तेबा मांई धोऊ होर हेर्दा लागा। 12त्याहे तेऊका पुछु, सह कई साहा? तेऊ बोलू, हाऊं नाँई ज़ाणदअ।

फरीसी रे साबे चंगाई री जाँच-पड़ताल

13लोका तेऊबै जोह पहिले काणअ थी, फरीसी सेटा बे नीऊं। 14जासू धियाड़ी यीशु माटा लाई करे तेऊरी आछी खोली, सह सब्ता री धयाड थी। 15तेहुकी फरीसी भी तेऊका पुछु कि तेऊरी आछी कासु रीति संघे खुली। तेऊये त्या का बोलू, तेऊ मेरी आछी में माटा लाऊ, तहूकि मांई धोऊ, होर ऐबा हाऊ हेरा। 16ऐता में ऐखा फरीसी बोलदे लागे, यह मणश परमेश्वर री तरफा का नांई, किबेकी सह सब्ता री धियाड़ी नांई मनदअ। दूजे बोलू, पापी मणश केहडे चिन्ह रिहाई सका? होर त्यामें फुट पड़ी। 17त्याहे भी तेऊ कांणे बे बोलू, तेऊ तेरी आछी खोली तूह तेऊरे बारे में कैह बोला? तेऊ बोलू, कि सह भविष्यद्वक्ता साहा। 18पर यहूदी बुशाह नाँई होऊ कि यह काणअ थी, होर ऐबा हेरा, जेबरे तणी त्याहे तेऊरे, जासकी आछी खुली थी, तेऊरे आमा बापू शादी करे 19त्यहा का पुछु, कैह यह थारअ शोहरू साहा, जासू तमे बोला कि काणअ होऊ दअ थी? तेबा सह केहडअ भालाआ? 20तेऊरे आमा बापू उतर दिना, हामे तअ जाणा कि यह महारअ शोहरू साहा, होर काणअ ज़मुदअ; दअ थी। 21पर हामे यह नांई ज़ाणदे कि, कुणी तेऊरी आछी खोली। सह सयाण साहा, एउ का पूछा; सह आपणे बारे में आपे खोज़लअ। 22या गला तेऊरे आमा बापू ऐतकि तणी बोली किबेकी त्या यहूदी का डरा थी, यहूदी एकमत होई मुके थी, कि अगर कोई बोले कि मसीह साहा, तेबा प्रार्थना घरा का काढनअं। 23एसी बजा का तेऊरे आमा बापू बोलू, सह सयाण साहा, एउ का पूछा। 24तेबा त्याह सह मणश जोह काणअ थी, दूजी बारी शादी करे तेऊबै बोलू, परमेश्वरा री महिमा करे। हामे तअ जाणा कि सह मणश पापी साहा। 25तेऊ उतर दिना, हाऊं ज़ाणदअ कि सह पापी साहा कि हाऊं काणअ थी, होर ऐबा हेरा। 26त्याहे भी बोलू, तेऊ तांई संघे कैह करू। होर कासु साबे तेरी आछी खोली? 27तेऊ तयाबे बोलू, मांई तअ तमाबे बोली छेकू, होर तमे शूणु ऐबा दूजी बारी भी किबे शूणना चाहंदा? कैह तमे भी तेऊरे चेले हुणा चाहंदा? 28तेबा त्या तेऊबै बुरा भला बोली करे बोलू , तूह ही तेऊर चेलअ साहा, हामें मूसा रे चेले साहा 29हामें जाणा कि मूसा परमेश्वर संघे गला करी; पर ऐऊ मणशा नांई ज़ाणदे कि कंदा का आउअ दअ। 30तेऊ तयाबे उतर दिना, यह तअ परशानी री गल साहा कि तमे तेऊ नांई ज़ाणदे कि सह कंदकअ साहा तेबा भी तेऊ मेरी आछी खोली। 31हमें जाणा कि परमेश्वर पापी री नाही शूणदअ, पर अगर कोई परमेश्वरा रअ भक्त होलअ होर तेऊरी इच्छा पैंदे चला, तेबा सह तेऊरी शूणा। 32संसारा में कधी भी यह शूणने में नांई आउआ कि कुणी जन्मा का काणे री आछी खोली हो। 33अगर यह मणश परमेश्वरा री तरफा का नाही हूँदअ, तेबा किछे भी करी नांई सकतअ। 34त्याहे तेऊबै उतर दिना, तूह तअ बिलकुल पापा में जन्मुदअ, तूह हामा कैह समझाऊंदा? होर त्याहे सह बाग़े काढु।

आत्मिक काणापन

35यीशु शूणु कि त्याहे सह बाग़े काढु, होर जेबा तेऊ संघे भेट होई तेबा बोलू, कि तूह मणशा रे शोहरू पेंदे बुशाह करा? 36तेऊ उतर दिना, हे परमेश्वर सह कुण साहा कि हाऊं तेऊ पेंदे बुशाह करू? 37यीशु तयाबे बोलू, तांई सह हेरू ऊन्दे भी साहा जोह तांई संघे गला करदअ लागदअ सह साहा। 38तेऊ बोलू, “प्रभु! हाऊं बुशाह करा। होर तेऊ नमस्ते करू।” 39तेबा यीशु बोलू, हाऊं एऊ संसारा में न्याय बे आउअद, कि जोह नाँई हेर्दे त्या हेरे, होर जोह नाँई हेरदा त्या काणे होए। 40जोह फरीसी तेऊ संघे, त्याह या गला शूणी करे तेऊबै बोलू, कैह हामें भी काणे साहा? 41यीशु तयाबे बोलू, अगर तमे काणे हूँदे तेबा पापी नांई हूँदे; पर ऐबा बोला कि हामें हेरा, ऐतकी तणी थारा पाप बणी रहंदा।

Seçili Olanlar:

यूहन्ना 9: ISJNT

Vurgu

Paylaş

Kopyala