Metta 23
23
Jirmi üčünği bab.
1Ol zeman Ysa chalka we kendi šagyrdlerine chytaben dedi ky:
2»Ulema we Ferisiler Musanyn kürsisynde otururlar.
3Imdi size: »Hyfz edinyz!« dedykleri šejleryn ğümlesini hyfz we iğra ejlejinyz. Amma onlaryn amelleri gibi iğra etmejinyz; čünky söjlerler, amma iğra etmezler.
4Zira agyr, we tašynmasi müškil jükler baglajup, adamlaryn umuzlaryne korlar isede, onlari parmaklari‐le teprenmek istemezler.
5We ğümle amellerini adamlara görünmek ičün iğra edüp, hamajillerini genišledyrler, we elbiselerinyn eteklerini böjüdyrler.
6Zijafetlerde dachi baš sadrleri, we synagoglerde baš kürsileri we pazarlarda selamlari;
7We adamlar tarafyndan: »Rabbi, rabbi,« tesmije olunmaklygi sewerler.
8Siz ise, rabbi tesmije olunmajasynyz, zira sizyn müderrisinyz bir, ja’ni Mesih dyr, we ğümlenyz biraderler sinyz.
9We jer üzerynde kimseje: »Pederimyz,« demejesinyz, zira pederinyz bir olup, ol dachi semawatta dyr.
10We müderrisler tesmije olunmajasynyz, zira syzyn müderrisinyz bir, ja’ni Mesih dyr.
11We sizyn en böjügynyz chydmetkjarynyz olsun.
12We her kim ki kendini jükseldyrse, alčaklanyr; we her kim ki kendini alčakladyrse, jükselyr.
13Lakin waj size, ej müraji ulema we Ferisiler, zira adamlaryn önynğe melkjut‐üs‐semawati kaparsynyz; čünky siz ğirmezsinyz, gireğek olanlari dachi girmekten men edersinyz.
14Waj size, ej müraji ulema we Ferisiler, zira dul karileryn ewlerini jejüp, gösteryš ičün uzun dua edersinyz. Bu eğilden daha šedid azaba dučar olağaksynyz.
15Waj size, ej müraji ulema we Ferisiler, zira bir adami imane getyrmek ičün bahr u berri dolašyrsynyz, we imane geldygynde, onu kendinyzden iki kat ziade ehl‐i ğehennem kylarsynyz.
16Waj size: »Biri hejkel hakki ičün jemin ederse, bir šej dejil dyr; amma hejkelyn altuni hakki‐čün jemin ederse, borğlü olur,« dejen kjör kulaguzlar!
17Ej ahmaklar we kjörler, zira kangisi böjük tyr? altun‐mi, joksa altuni takdis eden hejkel‐mi?
18We: »Biri mezbah hakki‐čün jemin ederse, bir šej dejil dyr; amma onun üzerynde olan takdime hakki ičün jemin ederse, borğlü olur,« dersinyz.
19Ej ahmaklar we kjörler, zira kangisi böjük tyr? takdime‐mi, joksa takdimeji takdis eden mezbah‐mi?
20Imdi mezbah hakki ičün jemin eden, onun we üzerynde olan ğümle nesneleryn hakki ičün jemin etmyš olur.
21We hejkel hakki ičün jemin eden onun we onda sakin olanyn hakki ičün jemin etmyš olur.
22We sema hakki ičün jemin eden allahyn tachti, we üzerynde oturanyn hakki ičün jemin etmyš olur.
23Waj size, ej müraji ulema we Ferisiler, zira na’na we anisun ile kimjonyn ušryni weryrsynyz, amma šeryatyn daha mühim olan šejlerini, ja’ni hakkanijet we merhamet we imani terk ettinyz. Bunlari etmeli, we onlari brakmamali idinyz.
24Ej siwri sinegi sözüp, deweji judan kjör kulaguzlar!
25Waj size, ej müraji ulema we Ferisiler, zira kjasenyn we čanagyn dyšyni temizlersinyz, lakin onlaryn iči zulm we fisk ile dolu dyr.
26Ej kjör Ferisi! Ewwela kjasenyn we čanagyn ičini temizle, ky onlaryn dyši dachi temiz ola.
27Waj size, ej müraji ulema we Ferisiler, zira siz dyšarüden güzel görünüp, ičeriden ölü kemikleri we her murdarlyk ile dolu olan badanalü kabrlere benzersinyz.
28Kezalik siz dachi adamlara zahiren salyh görünyrsynyz, amma batynen mürajilyk we fisk ile dolu synyz.
29Waj size, ej müraji ulema we Ferisiler, zira pejgamberleryn türbelerini bina edüp, salyhleryn kabrlerini tezjin edersinyz.
30»We ejer eğdadymyzyn günlerynde olmyš olsajidyk, onlar ile beraber pejgamberleryn kanyne girmez idyk,« dersinyz.
31Bu weğhle pejgamberleryn katillerinyn ewladi oldygynyze, kendinyz šehadet edersinyz.
32Siz dachi eğdadynyzyn ölčegini doldurynyz.
33Ej jylanlar, ej engerek nesli, ğehennem azabynden nasyl kača bilyrsynyz?
34Ište, onun ičün ben size pejgamberler ile hukema we ulema irsal ederym, We onlardan ba’zisini katl edüp, chača gereğeksinyz, we onlardan ba’zisini synagoglerinyzde döjüp, šehirden šehre kogağaksynyz.
35Ta ky salyh Habilyn kanyndan hejkel ile mezbah arasynde katl ettygynyz Zakarija, ibn‐i Barachijanyn kanyne dejin jer üzerynde dökylen sulehanyn kanynyn kjafesi sizyn üzerinyze gele!
36Hakykaten size derym ky: Bunlaryn ğümlesi bu nesl üzerine geleğek tyr.
37Ej pejgamberleri katl eden, we sana gönderylenleri tašlajan Uršelim! Uršelim! Kač defa senyn ewladyni — tawuk kendi piličlerini kanadlerinyn altyna topladygi gibi — toplamak istedim! we siz istemedinyz.
38Ište, chanenyz size wiran bragylyr.
39Zira size derym ky: »Bundan sonra siz: »Rabbyn ismi‐le gelen mübarek olsun!« dejinğejedek, beni asla görmejeğeksinyz.
Seçili Olanlar:
Metta 23: TURMAT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Transcribed from the Bible Society edition. Published in Vienna in 1883.
