यूहन्ना 3
3
यीशु औरौ नीकुदेमुस
1फरीसी लोगौ मुंजीदा नीकुदेमुस नांव का ऐक आदमी थिया, जू यहूदी धरम का नेता थिया। 2तैणै रातै यीशु कै धोरे आयौ बौल़ौ, “ओए रै गुरुजी, आमै जाणुए कै पौरमेशवरे ताखै आमु शिखाणौ कारिए छाड़ै राए, जिथुकै कुणिए बै इनु निशान या चौमत्कारो खै जू तू दिखाए, जै पौरमेशवर तैसकै साथै नी हौंव, तौ दिखाए ना सौकौ।” 3यीशुए तैसीखै जोवाब दिया कै, “हांव ताखै साचौ-साचौ बुलू, जै कुणिए नोऐं सिरै शै ना जन्मो तौ पौरमेशवर कै राज्य ना दैखै सौकौ।” 4नीकुदेमुसे तैसीखै बौल़ौ, “आदमी जोबै बूढ़ा हौए जांव, तौ कैशैखै सै आपणी माँ कै पेटोऊदा पाछु जाऐबा जन्म लोए सौकौ? का सै औटेयौ आपणी माँ कै पेटोऊदा दुजाल़ियो जन्म लोए सौकौ।” 5यीशुए जोवाब दिया, “हांव ताखै साचौ-साचौ बुलू, जांव तौड़ी कुणिए आदमी पाणी औरौ पवित्र आत्मा शै ना जन्मो तौ सै पौरमेशवर कै राज्य दै जाए ना सौकौ। 6आदमी आपणै नानड़िया कै जिन्दगी दैंव। तोबै बै सिरफ पौरमेशवर कै आत्मा तुऔं पौरमेशवर कै संतान कै भैषो दा बौदलै सौकौ। 7हैरान नी हौया, कै मोऐं तांव कैई बौल़ौ, ‘ताखै नोऐं सिरै सै जन्म लोणा जौरुरी औसौ।’ 8हावा जैतौ कै चांव तैतौ कै ही फिरो, औरौ तू तिथकै शब्द शुणै, पौरौ ना जाणै कै कुकै दै आए औरौ कुकै जांव; जू कुणिए पवित्र आत्मा लैई जन्मे रौआ सै ऐशणाई औसौ।”
9नीकुदेमुसे तैसीखै जोवाब दिया, “ऐजी बातौ कैशैखै हौए सौकौ?” 10इथु शौणैबा यीशुए तैसीखै जोवाब दिया, “तू इस्राएल देश कै लोगौ का गुरु औसौ, औरौ ताखै इनु बातौ खै सौमझणी चैंई। 11हांव ताखै साचौ-साचौ बुलू, कै आमै जू जाणुए, सैजौ बुलू, औरौ जैसी आमै दैखी राए तैसकी गवाही दियु, औरौ तुऐं अमारै बौलेयौंदी बातौ पांदी बिशवाश ना कौरदै। 12जोबै मोऐं तुऔं धरती पांदी हौणौवाल़ी बातौ कै बारै मुंजी बौतौऊं, औरौ तुऐं तोबै बै बिशवाश नै कौरदै, तौ जै हांव तुऔं खै स्वर्गो दी हौणौवाल़ी बातौ बुलू तौ तुऐं कैशैखै बिशवाश कौरदै?
13कुणिए स्वर्गो दा ना हौटै रैई, सिरफ हांव आदमी का बैटा स्वर्ग शै धैनै आए रौआ। 14औरौ जैशैखै मूसाए शुनशान जौगैह दा पितलो कै शोंगोऊं कै खोम्बे पांदी चौढ़ौऊवा, तैशैखैई जौरुरी औसौ कै हांव आदमी का बैटा बै क्रूसो पांदी चौढ़ाया जोऊं। 15ताकि जू कुणिए मुं पांदी बिशवाश कौरौ सै सौदा कै जिन्दगी पांव।”
16“जिथुकै पौरमेशवरे दुनिया कै लोगौ शै ऐशणा प्यार कौरा, की तैणै आपणा इकलौता बैटा बै दैय दिया, ताकि जू कुणिए तैसी पांदी बिशवाश कौरौ सै नाश नी हौंव पौरौ सौदा कै जिन्दगी पांव। 17जिथुकै पौरमेशवरे दुनिया कै लोगौ खै सौजा दैणौ कारिए आपणै बैटै कै दुनिया दा ना छाड़ी, पौरौ इथकारिए कै दुनिया कै लोग तैसकै दवारा मोक्ति पांव।
18जू पौरमेशवर कै बैटै पांदी बिशवाश कौरौ, तैसी पांदी कौलोंई दोष ना लाया जांव, पौरौ जू तैसी पांदी बिशवाश नै कौरला सै दोषी बौणै गौआ, इथकारिए की तैणै पौरमेशवर कै इकलोतै बैटै पांदी बिशवाश नै कौरी। 19औरौ सौजा कै बौजैह ऐजी औसौ, कै पेयाशो दुनिया दो ओऊं, औरौ आदमीए इनारै खै पेयाशै शै जादा प्यार कौरा, जिथुकै तिनकै काम बुरै थिए। 20जिथुकै जू कुणिए बुराए कौरौ, सै पेयाशै शै बैर राखौ, औरौ पेयाशै कै नेड़िक ना आंव, ताकि तैसकै पाप सामणै नी आंव। 21पौरौ जू सौचाई पांदी चालौ, सै पेयाशो कै नेड़िक आंव, ताकि तैसकै काम प्रगट हौए जांव कै जू पौरमेशवर चांव सैजौ कौरौ।”
यीशु कै बारै मुंजी यूहन्ना की गवाही
22तोबै यीशु औरौ तैसकै चैलै यरूशलेम शहर कै छोडे़बा यहूदिया प्रदेश कै हौटै गौवै, औरौ यीशु तिथै तिनकै साथै रौयौ लोगौ कै बपतिस्मा दैंदा लागा। 23औरौ यूहन्ना बै ऐनोन गांव दा जू सामरिया जिले दो सालेम नगर कै धोरे औसौ बपतिस्मा दैंव थिया। जिथुकै तिथै बैजाए पाणी थियु, औरौ लोग आयौ तेसीयांदा बपतिस्मा लोंव थिए। 24जिथुकै यूहन्ना इबी तौड़ी कोयदखाने दा ना पाए रैई थी।
25तिथै यूहन्ना कै चैलै औरौ ऐक यहूदी आदमी कै बीच मुंजी आपणै भोवार कै हिसाब शै हाथ धोणो कै बारै मुंजी बैहस हौए। 26औरौ यूहन्ना कै चैलै यूहन्ना कै धोरे आयौ बौल़ौ, “ओए रै गुरुजी, जू आदमी यरदन नोंदी कै पूरब दिशा दा तैरै साथै थिया, औरौ जैसकै बारै मुंजी तुऐं आमु बौताए राए थियु कै सै कुण औसौ; दैख सै बपतिस्मा दैंव औरौ सौबै लोग तैसकै धोरे जांदै लाग रौवै।” 27यूहन्नाए जोवाब दिया, “कुणजाई बै आदमी तांव तौड़ी किछै ना पाए सौकौ, जांव तौड़ी पौरमेशवर तैसी स्वर्ग शै ना दैंव। 28तुऐं मुखै खुद ऐजौ बौलदै बैई शुणौ कै, ‘हांव मसीह ना आथी, पौरौ तैसकै आगै भैजै राए।’ 29दूल्हा दुल्हन शै बैयाव कौरे पांव, पौरौ दुल्है का दोस्त खौड़ा हौंव, औरौ तैसकी शुणौ, औरौ दुल्है कै शब्द लैई बैजाए खुश हौंव, इथकारिए मैरा दिल बै खुशी शै भोरै गौआ। 30जौरुरी औसौ कै सै जादा खास हौए जांव औरौ हांव कम खास हौए जोऊं।”
31“जू स्वर्ग शा आंव सै सौबिदा बौड़ा औसौ, जू धरती पौरैशौ आंव सै धरती का औसौ, औरौ सै धरती कै बातौ बौल़ौ, जू स्वर्गो पौरैशौ आंव, सै सौबिदा ऊबा औसौ। 32औरौ जू किछै तैणै दैखौ, औरौ शौणै राए, तिथकै गवाही दैंव पौरौ बौहुत कम लोग यीशु कै गवाही कै औपनांव। 33पौरौ जैणै तैसकै गवाही ग्रहण कौरे पाए, तैणै इयौं बातौ पांदी छाप लाए दै कै पौरमेशवर साचा औसौ। 34जैसी पौरमेशवरे छाड़ै राए, सै पौरमेशवर की बातौ बौलदा: जिथुकै पौरमेशवरे तैसी पवित्र आत्मा भरपूरी शै दैय राए। 35पिता पौरमेशवर बैटै आरी प्यार कौरौ, औरौ तैणै सौबै चीज़ौ तैसकै हाथौ दी दैय दी। 36जू पौरमेशवर कै बैटै पांदी बिशवाश कौरौ, सै सौदा कै जिन्दगी पांव; पौरौ जू बैटै कै ना मानौ, तैसी सौदा कै जिन्दगी ना भैटदी, पौरौ पौरमेशवर कै सौजा तैसी पांदी रौंदै।”
Seçili Olanlar:
यूहन्ना 3: SRXNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
