1 Kɔ̀rintìyà 5
5
Wòhwe wò Mòrzònje o ndawò ja mitelì me Kɔ̀rintò
1Nà lùu hvotɛ nanù ema o hwèlì mòrzònje ò ìtììtènì ja anyu. Èŋge nyàyi yà mòrzònje ema tɔ̀ hwaŋga ema hwa rza hwiyɛ Lohwɛ̀ hwa rza gbeyà. Nà ohwàhwɛ̀lɛ̀ nanù ema mòtò mɔ̀kɔ hwa anyu a wòwani rzaŋgo wà eni jòjìyɛ̀ wà eni ò lì mò nàŋgana. 2Nɛ inyɔ e àŋgàmɛ̀nɛ̀ lì ohva kumba, ema ene eyà e àŋgàmɛ̀nɛ̀ lì e gbeyà ema e hwɛ̀ɛ rzɔ̀lùu, e àŋgàmɛ̀nɛ̀ lì ulɛ òŋgo mòtò o ŋmèmba mo anyu. 3Ndi tɔ̀ nɛ na rza enje na inyɔ o naŋgɛ, na e ɔ̀ŋgɛ̀lɛ̀ ihvonda ja arzɛ. O èŋgànɛ̀lɛ̀ rzɔ nà mà màa lì akɛlɛ hwèkayirzelì hwe ami o lì teŋgɛ̀nɛ̀ e mɔ̀ ema a gbèyi ene nyayi ya eyà. 4È arzàŋganɛ tɛ e ɛ̀nèyà ndi nàa Imba nà hwèlì nà inyɔ, Rzàŋgo wà arzu Yerzù Krirztò à è ŋgbaà ŋginyà ò lì gbeyà tɔ̀ mamɛ ema inyɔ ya arza o lì gbeyà. 5È ŋgbe rzɔ òŋgo mòtò o ma Mòkarzɛ̀, oma èŋge nyo ya eni ya wòhwe e ma hvàŋgahwà o lì mo rzuŋga èlìŋgɛ̀ ya eni o wùnyà ema Rzàŋgo Yerzù a jà. 6Èŋge kumba ya anyu e rza lɔ̀wu tɛɛ. Inyɔ e rza hwi nanù ema ene nyayi ya wòhwe e gbèyi ndi nàa ŋmanà ehwindi ema e agbɛlɛ lìwu la mbarzi la ehvòòto e? 7È ulɛ èŋge ehwindi ya elùnì aŋga nanù e hwɛ ndi nàa, lìwu la mbarzi hvènya ema e rza hwɛnɛ tɔ̀ ehwindi, nanù ndi inyɔ e hwèlì na e jɔ̀kɛ̀. È hwèlì ndi nanù èhwanja Krirztò ama ŋwèeyà ndi o wòhwe wo anyu. Mɔ̀ à mà hwɛ ndi nàa mɔlɛ̀ŋgu mo jàhwèyà mo è Ndèma yà lì Akà Ɔ̀nɛ̀yi o nyòla wòhwe wo hwatò. 8O èŋgànɛ̀lɛ̀ rzɔ ya anjàwòlɛ̀ o ene ndèma, rzeketɛ na lìwu la mbarzi lì hvènya, na ehwindi ya mbolowa. Ɛ̀ɛmɛ̀ ya arzu ihvonda ja arzɛ e hwɛnì ndi lì hwɛ nàa hwatò hwa ama Lohwɛ̀, ene ŋgàna e hwèlì ndi ema i rza gbeyà hweyà hwe wòhwe ndèŋgàna i rza ohva hvɛ ɛkɔ̀ni. Irzɔ i hwɛnì lì hwɛnɛ hwɛ̀ɛ̀mɛ̀ hwe hvènya, o lì oŋgamà Krirztò na ŋmèma mɔ̀kɔ, i hwɛnì hvɛ lì ohwa e jɔ̀kɛ̀. 9Nà ma e tìleya o itita nanù ema e rzi keka lì hwɛ mòndeŋgè na hwaŋga hwatò hwa mòrzònje. 10Nà rza ohwa ndi lì teŋgɛ̀nɛ̀ hwatò ema hwa rza lòkɛ̀yi Lohwɛ̀, tɔ̀ nɛ lòŋgo hwa hwèlì mɔ̀lɔ̀kɔ̀rzɔ̀ mo mòrzònje, e wɔ̀ hwa hwèlì wɔ̀, hwayihwɛ lòŋgo hvɛ ema hwa kanɛ̀lɛ̀lɛ̀ hwèrzùmbu. È rza tànɛyi lì hwaŋga ini nyayi ja hwatò natɛ̀ɛ na lìrzako ema e lìyà e rze. 11È mòtò ema nà mà e tìleya nanù ema e rzi lata ŋmèmba na mɔ̀, a hwèlì ndi mòtò ema a ahwɛlɛ mɔ̀ ŋmìti e mòlòkèlì ndi à hwèlì ndɔ̀ki, njɔ̀ŋgu, a kànɛ̀lɛ̀lɛ̀ lòohwà là mòlàŋgà, a hwèlì mèhvìlì, a nyɔ mìimbà a woma tɔ̀ a hwèlì ndi ŋmìhwɛ̀. O rzi keka hvɛ tɔ̀ lì lìya o rze o lì làa tɔ̀ mòlelì na ene nyayi ya mòtò. 12Nà rza hwɛnì tɔ̀ wònjà o lì ohwa nanù ema hwa kɔ̀kìrzɛ̀ hwatò ema hwa rza enje hwatò hwa Lohwɛ̀. Ndi e hwèlì ndi èwòlò ya anyu o lì kàyìrzɛ̀ hwaŋga hwatò ema hwa hwèlì o tenì ya mòndeŋgè mò hwatò hwa Lohwɛ̀, ema hwa gbeyà wòhwe. 13Lohwɛ̀ a kàyìrzɛ̀ hwaŋga hwatò ema hwa rza enje o mòndeŋgè mò wònyà Krirztò. È tìlahwì o kààtì ya Lohwà nanù ema, “È hwɛnì lì ulɛ òŋgo mòtò wa wòhwe o ìtììtènì ja anyu.”
Seçili Olanlar:
1 Kɔ̀rintìyà 5: bri
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2022, CABTAL