Juwawu 18

Hindiwa wa Yesu

Matewuji 26:47-56; Markuji 14:43-50; Lukaji 22:47-54

1Yesu agamanle lobela, ohovenyaga na anamamuharaye, aliwa dowa ndabo nneriwa Sedoromi, wewo wafwanyeya munda wazanle atu mitengo dovaha. Evale Yesu ohovolowa mmundani mule na anamamuharaye. 2Fwanyeya ira Judasi, wenno afuna muguliha, ohoiziwa nimburo nenne mwasiwa Yesu agumanetcha wewule fendo didjindji dene na anamamuharaye. 3Fwanyeya ira Judasi agavenyile vevale vadja atu vale, ohotukula nikuru na anyakondo, na agwarda amohiwa a Nyumba ya Yehova anno karumiwe na andimuwa a anamakuta vamohi na aFarizewu, aliwa dowa wewule wafwanyeya Yesu, kaganna mendje, golromondo diwa, na mwanango diwa dene. 4Voira Yesu ohomala iziwa jengo jatene jafuna mpanduwela, agaaonne anyakondwale kazaga, ohobaranya, liye aharelaga wewule wazelaga atu ule. Agaakwivenle ohafukaga eraga: <<Nyo munamusaka ani?>> 5Anyakondwale kohorumelaga keraga: <<Hiyo nnamusaka Yesu wa Nazareti.>> Evale Yesu ohorumelaga eraga: <<Gu miyene.>> Kaira atu enne, Judasi maliba muguliha ali vamohi na anyakondo ale. 6Yesu agawongile ira: <<Gu miyene>>, aliwa kohowelelaga mundulri vang'onove, aliwa gwela vati.#18:6 aliwa gwela vati: Hiyo kaniiziwile yagwela atu eva. Afwase kagwelaga vati, mwasiwa kohotikina zela mutu awongaga vatando mohoova ira: <<Gu miyene.>> Owu afwase ali kopolo da Mulugu muwari moaoniha anyakondo ale ira Yesu ahindiwile mofuna mwaye. Ahakale afuna, erege apa atene. Mwasiwa mowonga bahi, atene kohofiyeda gwela vati.

7Vevale Yesu ohafuka fendo yanembinli ira: <<Nyo munamusaka ani?>> Aliwa kohorumela keraga: <<Nnamusaka Yesu wa Nazareti.>> 8Yesu ohowonga eraga: <<Miyo duhuwandelani ira gu miyene. Akala mwadisaka miyo, ahiyeni anamadiharagala ira kadowege.>> 9Yesu ira awonge enne, awongele ira kakwakwanele mazu awongile liye oira: <<Babani, zela atenene mudivahile nyo, miyo kadimudimelihile nne mmohi.>>

10Tempu yenne Simawu Peduru ohokagana supada naye. Liye agaonne enne, ohopululaga munimbazini mwaye, liye funaga ira ankakatena namalaba mmohi wa mundimuwa wa anamakuta. Mbwenye supada nne nagwadilege nibaru na ikukuru ya muwononi odjana. Namalaba amporotchile liye ule, nzina naye ali Maliku. 11Evale Yesu ohomuwongana Peduru eraga: <<Kavolotchiha supada nawo no munimbazini mwawo. Kodi weyo unaumbuwela ira miyo kannang'wa kopo ya goyi dedo Babaga udivahile liye?>>#18:11 kopo ya goyi dedo Babaga udivahile liye: Yesu awonga mmisimbeni zela makatamiho afuna liye za onihiwa mohodibeliwa. Nione Matewuji 26:39.

12Evale nikuru na anyakondo nne vamohi na musogolrelri wewa vamohi na agwarda anno karumiwe na aJudewu ale, kohomuhinda Yesu, aliwa mmanga. 13Kagammangile, karomile mudowana vande va mulombwana Anasi. Anasi ali Kayafasi moyaye. Kayafasi ule ali mundimuwa wa anamakuta yaka yenne. 14Fwanyeya ira Kayafasi ali wenno aawandenle andimuwa a aJudewu afwaye ira: <<Yali yofuneya ira mulombwana mmohi aakwele atu atene.>>#11:49-50

Peduru ohomuruna Yesu

Matewuji 26:69-70; Markuji 14:66-68; Lukaji 22:54b-57

15Simawu Peduru na namamuhara mmohiwa, kohomuhara Yesu vande va mulombwana Anasi wewo wamudowilena atu. Namamuhara mmohiwole ohowanda volowa vande vale vamohi na Yesu mwasiwa liye ali mutu oiziweya na mundimuwa wa anamakuta. 16Mbwenye Peduru ohokala unde pandi ya va mulango. Noira enne, namamuhara wa Yesu oiziweya na mundimuwa wa anamakuta ule, ohokuma muwari mule, dowa wonga na namwali eni aing'anela va mulango vale ira: <<Dera nfwagola avolowe.>> Evale namwali ule ohorumela, liye nvolotchiha Peduru. 17Peduru avolowaga, namwali ule ohonfukaga ira: <<Weyo unavolowa kuli namamuhara wa mundimuwole?>> Evale Peduru ohoruna eraga: <<Ii, nari kahi miyo.>> 18Voira mahiyu anne unde wodidila, anamalaba vamohi na agwarda kohotumbanyaga munlo, aliwa otaga. Mwa enne Peduru na liyene afwanyeya evale aotaga vamohi na aliwa.

Yesu ohofukiwa na mundimuwa wa anamakuta

Matewuji 26:57-68; Markuji 14:53-65; Lukaji 22:54,66

19Evale mundimuwa wa anamakuta#18:19 mundimuwa wa anamakuta: Afwase mundimuwa wa anamakuta unawongiwa gu Anasi. Tchoira Anasi ali mundimuwa wa anamakuta Kayafasi ahanakale. Nona kamuiragave Anasi mundimuwa wa anamakuta. ohonfukaga Yesu zela anamamuharaye eto zela makalelo afundjiha liye. 20-21Yesu ohomuwakulaga eraga: <<Zela jofundjiha jaga, kamudifuke miyo. Mwaafukege atu anne kadivwile. Aliwa kohoiziwa zela jiwongile miyo tempu yafundjiha miyo. Tchoira miyo deretcha alaleya atu atene mohokoyeya. Eto dolaleyetcha nyumba dofundjamo Mazu na vatando va Nyumba ya Yehova mwemo munagumana aJudewu atene. Mbwenye kadiwongile yengo mokoyeya.>> 22Yesu agawongile eno, gwarda mmohi wa Nyumba ya Yehova ohonvahaga Yesu nikofi. Liye ira: <<Anno ba makalelo omurumela mundimuwa wa anamakuta nnga ha wenna?>> 23Evale Yesu ohowongaga eraga: <<Akala miyo dihiwonga mazu abure, uwonge yabure iirile miyo. Mbwenye akala kadiwongile yabure, nnga udikomele nni?>> 24Agairile enne, Anasi ohomuruma Yesu omangiwene ira adowe wa mundimuwa wa anamakuta eriwa Kayafasi.

Peduru ohomuruna Yesu fendo yanembinli na fendo yaneraru

25Simawu Peduru ali vakwikwi vene na munlole aotaga. Vevale kohonfuka Peduru keraga: <<Weyo kuli namamuhara mmohi wa mundimuwole?>> Evale Peduru ohorunaga eraga: <<Ii, nari kahi miyo.>> 26Evale vawotaga atu vale vohokala namalaba wa mundimuwa wa anamakuta mmohi anna ibali na ule Peduru amugwadile liye nibaru. Liye ohonfukaga eraga: <<Miyo kaduonne weyo vamohi na mulombwanole mmundani mule?>> 27Evale Peduru ohomurunaga fendo imohiwa eraga: <<Ii, nari kahi miyo.>> Peduru agarunile enne, mobaranya mutumbi ohonlaga.

Yesu ohosumeliwa wa mwene Pilatu

Matewuji 27:1-2,11-14; Markuji 15:1-5; Lukaji 23:1-5

28Agairile enne, kohonkumiha Yesu vande va Kayafasi vali atu vale, aliwa mudowana palasiyoni wa governadore Pilatu. Tempu yenno ali ora ya mabebehi. Andimuwa a aJudewu tchavolowile palasiyo ule mwasiwa katawa ira anaze katakale, kahadje Pwando ya Mavirelo. 29Vevale governadore Pilatu#18:29 governadore Pilatu ali mutu oza atonga na nzina na akuda Roma. Tchoira ora yenno aJudewu kafwanyeya mmandani mwa aRoma na mwasa oira kagondjihiwe na aliwene. Mwa enne aRoma koarumetcha atu ira kakale agovernadore oatonga aJudewu. Mwa tempu yenne eto aJudewu tchavahana na Pilatu. Mbwenye nnga aJudewu tchanna utongi ompa mutu, kohomudowana wa mwidaniwa ira kaone akala Pilatu ogorumela mpa Yesu. ohokumela unde, liye dowa afuka ira: <<Kodi mutula munfwannyena mulandu nni ira mmuzena uno?>> 30Evale aliwa kohomurumela governadore Pilatu keraga: <<Ahakale nahanfwanyana mulandu, hiyo kanamuzana wa nyo.>> 31Evale Pilatu ohawandelaga eraga: <<Mutukuleni mutula mwamutonge nnga mwemo munawongela malamulo enyu.>> Evale aJudewu ale kohomuwakulaga keraga: <<Hiyo kaninna utongi ompa mutu okave.>> 32Jiireyaga ejile ali ira kakwakwanelihede mazu anno Yesu awongile liye zela makalelo afuna liye kwa.#18:32 ali ira kakwakwanelihede mazu anno Yesu awongile liye zela makalelo afuna liye kwa: Yesu ahanahindiwe na aJudewu, ohowonga zela liye mwinnya ira: ili pama Mwana wa Mutu atukuliwe, atomeyiwe vaimirini ira ule unamuroromela akayena ingumi yohomala. (Juwawu 3:14-15) Yesu eto ohowonga ira: Mbwenye miyo mwadiona ditomeyiwaga vazulu, nnoaitanela atene wa miyo. (Juwawu 12:32-33) Tomeyiwa vazulu wawonga Yesu ali makalelo afuna liye kwa mokomeliwa vamuradini. AJudewu kohomudowana Yesu wa Pilatu ira kanvepe ira amutukule Yesu, amukomelihe vamuradini ahaiziwaga ira: <<Eniva nnakwakwaneliheda mazu awongile nfwihu unafuna hiyo mpa.>>

33Noira eno, Pilatu ohowelelaga palasiyoni waye, liye muitana Yesu, liye nfuka ira: <<Kodi weyo uli mwene wa aJudewu?>> 34Evale Yesu ohomuwakulaga Pilatu muwari monfuka ira: <<Kodi yofuka yenna inakumela mmuruni mwenyu owu atu amohiwa bauwandenleni zela miyo?>> 35Evale Pilatu ohomuwakulaga Yesu ira: <<Kodi miyo dili muJudewu? Atwawo aJudewu vamohi na andimuwa a anamakuta bouzilena wa miyo. Nnga ira aliwa kauzena uno, weyo utegile nni?>> 36Yesu ohomuwakulaga Pilatu ira: <<Miyo umwene waga kahi wa ilambo ya vati ila. Ahakale umwene waga ukala wa ilambo ya vati, anamalabaga kogowana kondo na ale kadihinda ira miyo dahaveleliwe mmandani mwa andimuwa a aJudewu. Mbwenye jejo kajiireyile, mwasiwa umwene waga kahi wa vati vano.>> 37Evale Pilatu ohonfukagave Yesu ira: <<Ku wonga na ibaribari weyo uli mwene?>> Evale Yesu ohomurumelaga Pilatu eraga: <<Nyo gunawonga eni ira miyo dili! Miyo dibaliwaga, dizaga ilambo ya vati ila, dizele ira diwonge ibaribari. Mutu wenno unafuna ibaribari unovwa mazu aga.>> 38Vevale Pilatu ohonfuka Yesu, liye ira: <<Kodi ibaribari tchi nni?>>#18:38 Kodi ibaribari tchi nni? Pilatu awongaga eno, aona nnga mwilamboni ya vati kamwali ibaribari. Liye aganvwile Yesu, aona nnga unawonga jimohi jiwa johokana mabasa. Ku wonga Pilatu olramwisa jawonga Yesu.

Aganfukile Yesu enne, Pilatu ohokumela unde akoka, dowa wonga na aJudewu ale, liye ira: <<Miyo kannaonavo mwasa ofuna muirelana yabure mulombwanola. 39Mbwenye nnga molemelela mwenyu, yafiyaga tempu ya Pwando ya Mavirelo nnga ha yenna, nyo munodivepetcha ira dimukutche munyakadeya mmohi. Kodi munafuna dukutcheleni Mwene wa aJudewu?>> 40Vevale anamwindji atene kohoroma kuwa keraga: <<Hehi, hiyo kanifunile ira mmukutche wenno. Mbwenye nnafuna mmukutche Baraba.>> Fwanyeya ira Baraba kanfunana atu ira akutchiwe ule, afwanyeya agali mbava.

Seçili Olanlar:

Juwawu 18: iLolo

Vurgu

Paylaş

Kopyala