Marko 15
15
Yesu Aba Wɛ̃ Nɛ Pilato Amɛ
1Nɛ kɛvlɔ nɛ pinii, kpayaɔzakɔanɔ, anɛ ɛshãdɔkasɛ anɛ ɔhamɛ bebhuiklu afɛtegene nɛ petee na ba dɛmɛ atrɔ kibui tirikpoa bha. Banya Yesu, klɛ ba gbanɛ yɛ ada kpɛ ahwɛ akɔ Pilato.
2Pilato ebisi Yesu asɛ, “Wɔ nu Yuɖanɛ ekusi dza?”
Yesu asɛ, “Ee, kɛlɛ ansɛ gɛ ɔɖɔ.”
3Kpayaɔzakɔanɔ nɛ ayɛkɔ ebui kpi nɛ yɛ shu. 4So Pilato eze bisi yɛa sɛ, “Ɔtɛ bɔ bu kibui nɛ nu? Di ebuia nɛ nyɔɔ gɛ ba yɛkɔ nɛ wɔ shu.”
5Pɔ tsyɛ Yesu eze di bu kibuinyɛbui nu, klɛ kɛ bhɛtɛ Pilatio bi.
6Ɔtsɔ̃ nɛ kinu bugu sɛ tɛ ba shɛ̃nahwɛ evuza terikpo gɛ banɔ nɛ ba pɛɛ nɛ shu nɛ Tɛfɛflãwi ŋɛŋa nɛa bha. 7Anyɛ teli gɛ bee kulu asɛ Barabasɛ nɛ aza vu plɛnɔ anɔ dzyidzyeaga teli gɛ eyi anɔ nɛ kititilulɔɛ be tilim. 8Banɔɛza na ba tɔnɔ Pilato sɛ abhɛtɛ kɛgɛ aabhɛtɛ tsã nɛ akɔ balɛ.
9Pilato ebisi alɛ asɛ, “Nɔ pɛɛ sɛ ɛshɛnahwɛ Yuɖanɛ ekusi nɛ shu kɔnɔ?” 10Enyi asɛ ganɔ kawɔ̃kpɛ mɛ kpayaɛzakɔanɔ nɛ ba yɛkɔ Yesu akpɛ yɛ ahwɛ. 11Pɔ kpayaɛzakɔanɔ nɛ ba kpɛahwanɔ banɔɛza nɛ asɛ tɛ be tui lɛ akpɛ tɛ Pilato ashɛ̃nahwɛ Barabasɛ shu.
12Pilato ebisi banɔ nɛ asɛ, “Kidee mɛ ba bhɛtɛ ɔtsɔ̃, nɛ agɛ noo kulu sɛ Yuɖanɛ ekusi?”
13Ba kpɛ igugu asɛ, “Kplayɛɔsɔ!”
14Pilato ebisi asɛ, “Kidee so? Buzizi ɖuweɖu abhɛtɛ?”
Pɔ ba za kpɛ igugu nɛ gɛganɛɛ adɛa na sɛ, “Kplãyɛɔsɔ!”
15Sɛ tɛ Pilato eku banɔ nɛ awɔ̃ so nɛ, ashɛ̃nahwɛ Barabasɛ shu akɔa lɛ. Akɔ ba mɛna Yesu kɛtamu, klɛ ayɛkɔ yɛ akpɛahwɛ kɔa lɛ sɛ ba da kplasɔ.
Keyutugbani Na Kpɛ Yesu Butsɔ
16Keyutugbani na gbanɔ Yesu ebu eyinɔ avɛnɔ ada kpɛ bukusi bupagbla nɛm (gɛ nu Praɛtorium keyutugbani ivulo nɛ oxogokɔ) klɛ be kulu ivulo nɛ petee ebe xogo. 17Ba kpɛ awi dzɛdzã akɔ yɛ, klɛ be tro bɔkpɔewi abhɛtɛ kikutu pɛ ba yɛkɔ ekumu akɔ yɛ. 18Klɛ la kpa yɛ dzɔ sɛ, “Hee, Yuɖanɛ ekusi nɛ naa!” 19Be hu yɛ kesukpogunu nɛ kɛtɔkpu nɛ etsodzini ehu klɛ be bu bututu ata yɛ. Be dzu ekuisiesi akɔ yɛ, sɛ tɛ ba yɛkɔ akpɛ yɛ butsɔ nɔ. 20Klɛ gɛ ba kpɛ yɛ butsɔ nɛ beke, be bu awi dzɛdzã nɛ yɛ shu, klɛ ba yɛkɔ yɛnahwɛ bawi nɛ akpɛ kɔ yɛ. Ɔkɛlɛ ba gbanɔ yɛ ebueyinɔ sɛ tɛ ba da kplasɔ.
Yesu Tɛkpɛkplasɔ
21Anyɛ teli gɛ ede Sirene, Simɔnɛ, gɛ enu Alɛksanda anɛ Rufusɛ alɛ aka, abaa fla denɔ yɛ dzogɛga bha ebe tsoku ɔma nɛ mɛ, klɛ banɔ nɛ ba trɔ yɛa bha sɛ ayɛkɛ butsiosi nɛ etuku. 22Ba gbanɔ Yesu ede kunɔ ɔklɛ gɛ be kulu asɛ Golgata (atɔkpuxwa ɔzakɔ). 23Nɛ ɔklɛ nɛ ba hɔ aɖuɖo akpɛ bulu mɛ akɔ Yesu sɛ awɛ̃, pɔ adɛ wɛ̃. 24Klɛ ba kplayɛasɔ. Be dzyidzyidɔ nɛ yɛ bawi nɛ tɔkpu tɛ bamɔ kapɛ nɔɔ nɛ gɛ anɔnyanɔ aba yɛkɛ. 25Ɔɖa ɔtramɛ nɛ mɛ la kplayɛasɔ. 26Ebui nɛ gɛ ba yɛkɔ nɛ yɛ shu, ba ŋlɔmɛ alɛ ata yɛ asɛ, Yuɖanɛ ekusi. 27Ba kpla bezi tɛabha teli tsyɛ asɔ aplɛnɔ yɛ, terikpo nɛ yɛ kɛŋa nɛm, teli tsyɛ nɛ yɛ kɛbɛtɛkpɛm. 28[Klɛ kibui ŋuŋlɔmɛ nɛ ba klɛ mɛ sɛ, “Kplayɛasɔ akpɛ banɔ nɛ gɛ ata bhɛtɛ ɔshã bha nɛ shi.”] 29Banɔ nɛ gɛ aba fla nɛ balɛ akulatu nɛ yɛa bha, ba hwanɔ atɔkpu atrɔ pɛ ba ɖɔ sɛ, “Klɛ so! Wɔ nɛ gɛ ɔsɛ ɔbɔ yɛ busɔlɛvu pɛ obo tsodzini ɔbhɔ nɛ ewi tata mɛ, 30zhiɔba nɛ butsiosi nɛ shu tɛ obu ishue!” 31Kana ke kpayaɛzakɔanɔ anɛ ɛshãdɔkasɛ petee baa kpɛ Yesu butsɔ nɛ aglɔmɛ. Klɛ baa ɖɔ asɛ, “Ebu banɔ,” “pɔ ataa na shu bu! 32Nɔ kɔ Kristoanɛ, Izraɛlanɛ Ekusia nɛ, ezhi ɔtsɔtsiɔ̃ aba nɛ butsiosi nɛ shu, tɛ bu mɔ tɛ bu yɛkɛ yɛabha ŋae.” Bagɛ yɛnalɛ ba kplasɔ nɛ tsyɛ ba yalɛ akulatu abalɛ akpɛ yɛa bha.
Yesu Tɛtsitsi
33Nɛ kemuze ɛɖa lɔfɔntɛbha mɛ otumu ɔdɔ nɛ kesukpa nɛa bha ɔdɔ nanɔ owulago ɛɖa tɛta mɛ. 34Nɛ ɛɖa tɛta nɛ mɛ, Yesu akpɛ ogugu gɛganɛɛ asɛ, “Eloi, Eloi, Lama Sabaktani?” Gɛ klɛ kesi enu asɛ, “Mɛ Kpaya, Mɛ Kpaya, kidee so pɛ ɔshɛnahwɛ mɛshu ana?”
35Gɛ banɔ nɛ gɛ be li ɔklɛ nɛ be nu kaɖɔ nɛ gɛ Yesu aɖɔ nɛ butsiosi nɛ shu, klɛ baa ɖɔ asɛ, “Nonu mɔ, eklu Eliya.”
36Anyɛ teli akpɛsi, ada yɛkɔ ɔkɔɛsa akpɛ bulu gɛganɛ mɛ, klɛ ayɛkɔ asɔ osi shu, klɛ ayɛkɔ akɔ Yesu sɛ tɛ awɛ̃. “Ɔtsɔ̃ nɛ nɔ shɛnahwɛ yɛ shu. Kɔlɔ di sɛ Eliya aba ba ebe zhinɔ yɛ edzu dza.”
37Nɛ ogugu gɛganɛɛ, Yesu afɔɛ yɛ ɔfufɔɛ gɔgɔɛ.
38Busɔlɛvu mɛ kɛpɔtɛ nɛ tswɛ denɔ kabha ɔbɔ nanɔ kesi nɛ wa. 39Klɛ gɛ keyutugbani Ovuloaka, gɛ aza kititi nɛ Yesu otugba, nɛ enu yɛ ogugu klɛ amɔ kana gɛ etsi nɛɛ, aɖɔ asɛ, “Kɛlɛlɛm sɛ anyɛa nɛɛ enu Kpaya yɛ Eyi!”
40Badzɛ teli aza odzidzekɔ pɛ bee di ɔklɛ asɛsɛ. Balɛ mɛ banɔ balɛ enu Maria Magdaline, Maria Yakobo yɛeni gɛ enu anuvɔ kɔ Yosesɛ, anɛ Salomɛ. 41Nɛ Galelia, badzɛa nɛ balɛ aza Yesue de kɔ kɛdɔnɔ nɛ gɛ ba zhã kɔ yɛ. Badzɛ gelee bhlatɔ gɛ ba za yɛe de aba Yerusalɛm nɛ tsyɛ ba za ɔklɛ.
Yesu Tɛvuvubɔ
42Kiwi lɛlɛ nɛ dzi Tɛbɛbala Kiwi (gɛ putɔkɔ Kimuenewi nɛ gɛ nu Sabatɛ). So gɛ owulago nɛ ɔɔna nɛɛ, 43Yosɛfu Arimatiaeyi, anɔgbla nɛ Beshisheha nɛ shi, gɛ yɛ nahwɛ nɛ eedi kidzoe nu kɔ Kpaya bukusiɔŋakɔ, atɔnɔ Pilato avɛ nɛ awɔ̃dzudzum klɛ ede bisi asɛ ayɛkɔ Yesu ishuidzya tsitsi nɛ akɔ yɛ. 44Kiyinɔ Pilato sɛ Yesu etigble tsi. Eklu Ovuloaka nɛ ebisi asɛ Yesu nɛ eti tsi dza. 45Gɛ Pilato enu denɔ Ovuloaka nɛ ɔkɔ sɛ Yesu etsi kɛgba, ashɛ̃nahwɛ yɛ shu akɔ Yosɛfu. 46Klɛ Yosɛfu ede bhui kɛpɔtɛ fufu, klɛ ede zhinɔ Yesu tsitsi klɛ ayɛkɔ yɛ anya kpɛ kɛlɛ mɛ, klɛ ayɛkɔ yɛ ada vubɔ nɛ kɛklãgbu odzrem. Klɛ ayɛkɔ kɛklãgbugbla bhlatɔ ada ɔlɛ nu. 47Maria Magdaline nɛ Maria Yoses yeni nɛ ba mɔ ɔklɛ gɛ ba vubɔ Yesu.
Seçili Olanlar:
Marko 15: tcd
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© Ghana Institute of Linguistics, Literacy and Bible Translation
