Luka 20
20
1Ili eeloshaa vandu nkonu umwi ifo numba ya Iṛuva na ivaongoya nrumi shisha ya ikia, vakohani vanini vakanshea kwa tiń andu emwi na vaaria va mitisine na vasuṛi. 2Vakarera nae vakanumbua: Toongoye, kukee itana ifi kwa finya ingai? Lingi ni i akuniingie finya ii? 3Kaaṛua kavaia: Nań mmuuṛaa ini kirero kimwi. Shiień: 4Ubatiso lwa Yohane lwauka iṛuvewu ana nkwa vandu naań? 5Vakakusaṛasaṛa wo veni na veni vakanumbua: Tikanumbua: Lwauka iṛuvewu, Uyo anumbuaa: Nki ili kitaare mwamwirikiaań? 6Ana tikanumbua: Nkunu vanduń luukie, vandu woose vatikabaa na mawe. Fulya veeshi deń, sheeli Yohane mmwauya fisuku. 7Vakaaṛua: Tiishi kundo luukie nafo ndi. 8Na Yesu kavaia: Nań nta mmuiaa mfinya ki nkee itana nayo ifi ndi.
9Kabooka iia vandu sumu ii: Nndu umwi aroonga nnda wa misabibu. Karwaa-fo varemi kaenda urukeń lungi kandekaa-fo kyeeri kyaasha. 10Neeli kyeeri kya iilula kindefika, karuma iketi lyamwi kwa varemi valya, amu vanrikie wavi lwamwi lwa nunda ta misabibu. Varemi valya vakankaba vakawwiiṛa na maako a ruu. 11Kaengeṛia iruma iketi lingi. Na uu vakankaba da vakamwumbuta atarie kindo. 12Kaengeṛia karuma ungi wa kararu. Nae da vakankaba mavaṛa vakamburusa na wooṛo. 13Muni nnda ulya wa misabibu kanumbua: Ntanaań are? Vvarumiaa mwana nkunde wakwa. Eeba ye vamwiriaa sonu. 14Kake ili varemi valya vandellolia, vakakurera wo veni na veni veenumbuaa: Uu yye muyadiṅu! Sień tiwwaa, amu diṅu ive yeru ti veni! 15Vakankumba wooṛo ya nnda ulya wa misabibu vakawwaa. A muni nnda ulya wa misabibu avataniaań ki? 16Ashaa na ireta varemi valya na nnda ulya wa misabibu auniingiaa vengi. Ili vandeita ifi, vakanumbua: Tia, nta kitave kuro! 17Kavalla koroo kanumbua: A misendie yayo nkiki kirero ki kyatisiṛwa: Iwe lyo lyalewa watana numba Uyo lyawa iwe inini lya wembe. 18Nndu woose awoyaa iwe lyo afikafikaa. Na ito liwwoyaa limweesaa kutu. 19Na vaaria va mitisiṛie na vakohani vanini vakaraya mwaanya wa iwwara kyeeri kyo kyeni. Vakaeṛea vandu, amu vamanya sheeli sumu yo wwo yavarera.
20Vakallaya si vakanrumia vandu va imwaala, nawo vakakwaṛua sha vandu vasumani, amu vawware na firero famwi, naamu varambikie maakoń a nshili nnini wa uruka. 21Nawo vakamuuṛa veenumbuaa: Llosha, tiishi sheeli kureraa na ilosha filya fikee fa dede ana nta kutaalie unini lwa nndu ndi. Kake iwe kuloshaa shia ya Iṛuva na udede. 22A kisumani tiniingie Kaisari kyaalo ana wode? 23Nae kamanya ntambwe wawo kavaia: 24Shooraseń shilingi te! A fwana yo iiyo yya i na mitisiṛie? Vakamwaṛua: Yya Kaisari. 25Kavaia: Kyasiań niingień Kaisari filya fikee fa Kaisari, na filya fikee fa Iṛuva niingień Iṛuva. 26Nawo nta vakimakii indiinga na firero famwi mbele ya vandu ndi. Vakaṛiikia myaṛue yamwi. Vakasia do do.
27Kyasia kiindi kya Vasadukayo vakanshea valya vanumbuaa sheeli liteefo iṛuka lya vafu. Vakamwuṛa 28vakanumbua: Llosha, Mose atisiṛa: Nndu kafiywa mmwanamae wamwi awore nka, kake atawore mwana, kyawara mwanamae arwaa nka to akooiye mwanamae mwana. 29Kyasia veeifoo vana va nka mfungare. Wa mbele kaora nka kafwa atawore mwana. 30Na wa kavili karwaa nka ulya kafwa atawore mwana. 31Na ulya wa kararu kanrwaa. Na nkuro valya woose mfungare nta itia-wo vana vakafwa. 32Na ifurumia nka ulya nae kafwa. 33Kyasia ifo iṛukioń lya vafu avaa nka wa ungauń! Amu woose mfungare veemwalikaa. 34Llyo Yesu avaia: Vana va isanga li vaalikaa na yalikwa. 35Kake valya vakee vataalie ikooya isanga lia lishaa na iṛukioń lya vafu, wo vaalikaa ana vaalikwaa ndi. 36Ana nta vakimakii ifwa lingi ndi. Amu wo vavakanaa sha vamalaika, nawo wana va Iṛuva, fulya vakee vana va iṛutwa. 37Kake kya kiimba kya vafu sheeli vaṛutwaa, na akwaa mMose arambua alya akee atisiṛie mboni ta ngumiń ilya, alya asendia Nndumi ni Iṛuva wa Abraamu na Iṛuva wa Isaki na Iṛuva wa Yakobo. 38Kyasia ye ni Iṛuva wa vandu vafu ndi, kake wwa veefo na muu. Amu iwo woose vakee vamwi vava vandu vakee na muu. 39Na kiindi kya vaaria va mitisine vakaaṛua vakamwia: Llosha kwanrera kisumani. 40Nawo nta vakikaṛia imwuṛa kindo ndi.
41Kavaia: A naare vandu vareraań sheeli Kristo mmwana wa Davidi? 42Na Davidi arerie muni ifo kitabuń kya fiimbo: Nndumi aia Nndumi wakwa: Kaa rembo ukoń usha lwakwa, 43kumande nrwaa fituva fafo kwa si ya marende afo. 44Kyasia kwakooya Davidi awaangie Nndumi, naare avaań mwanamwi?
45Neeli vandu valya woose vaiyo veearanyaa, kaia vanalosho vamwi: 46Kwiiseń na vaaria va mitisine, vakundaa iṛuaṛua vaṛee miseto myaasha na ikunda iisanio̱ ifo singiṛeń na ikaa mbele ifo numbeń ta iterevia na ikaa fifumbiń fa mbele imutuń. 47Nawo vamiṛaa numba ta misikeeti, na kwa ukavili vaterevaa fiterewo faasha. Iwo vawariaa uumisio lukilie.
Seçili Olanlar:
Luka 20: RWK72
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
New Testament in Kimeru-Tanzania © British and Foreign Bible Society and Bible Society of Tanzania, 1954,1967,1972.
