Luka 19
19
Yesu na Zakayo
1Yesu yakenjila mwi'kaya lya Yeliko, na lono yakolaga mu zinzila za mwi'kaya lilyo, 2hali na munhu, litagwa lyakwe Zakayo. Munhu yuyo yali muwaha we Wakalani watoweza kodi, kanyhi yali munhu mugoli. 3Yahilaga kumuwona Yesu yamumanye; ninga ku soko yo winji we wanhu, kanyhi vyono mwene yali mufupi; hamba siyasuma. 4Hobaho yakalongolela lumangho, yakananuka mu mukuyu, ho yasume kumuwona Yesu, hambi nha yakolaga nzila yiyo.
5Nayo Yesu yaza fika bahalya, yakagalamila, yakamutya, “Zakayo wutime mbela, hambi zuwali nha yinojeye niswe mu kaya yako.” 6Zakayo yakatima mbela mbela, yakamubocela na nyemo. 7Wanhu wose waza kuwona zizo, wakawa kwanza kung'ung'ulika wose, wakutya, “Kenjila kuduwa kuli munhu mubi.” 8Ninga Zakayo yakema, yakamulonjela Yesu, yakamutya, “Lanje ta, Muwaha, Nusu ye sawo yangu nowagawila waciwa; na hono niwe namusolela yunji cinji ko wusugu, nomugomolela mwi'walo lilyo kali kane.” 9Yesu yakamutya, “Zuwali mhonelo yinjila mono kaya yiyi, vyono mwene nayo, mwana wa Abulahamu. 10Hambi Mwana wo Munhu nha yaza kulondola no kuponya i wanhu wono wajiliye.”
I Cihwanicizo ce mapesa
(Mat 25:14-30)
11Mu cipango lono wanhu wali wakali wahulicize zizo, Yesu yakawalonjela cihwanicizo. (Baho yali yasejelela ku Yelusalemi, ne wanhu wawo wehwesaga vyono mwipango yidodo du, u wutemi wo Mulungu wowa wafika.) 12Holeka yakawatya, “Kwali na munhu yunji mutambule, mono yatuluka, yakabita ku yisi ya kutali, yakabocele wutemi ho yawuye. 13Na lono yali yakali si natuluka, yakawacema wetumami wakwe yikumi, yakawagawila pesa munhu ne liwalo lyakwe, yakawatya. ‘Muzinozezaje wusuluza zipesa zizi, sunga nize mbuye.’ 14Ninga wanya wusi wayagwe wakamusula, holeka wakatuma watumwa, wabite wakatye. ‘Si cikusaka yuyu yateme muli sese.’
15“Yuyo munhu yakawuya ku kaya akuno yakondya kupegwa wutemi. Ho baho yakatuma wacemelwe kwakwe wetumami wawalya wono yawapela zipesa zizilya, ho yamanye cambuzi cono watujile mu wusuluza. 16U mwitumami mulongozi yakaza, yakatya, ‘Muwaha, zipesa zako zono wamhela, zonjelezeka kali kumi.’ 17Nayo yakamutya, ‘Ale, kunoza viswanu, wuli mwitumami muswanu. Vyono wali mwihuwilwa mu nghani ndodo muno, ale weze muwaha mu makaya kumi.’ 18U mwitumami we kejete yakaza, yakatya, ‘Muwaha, cijela cambuzi kali kahano muli zizilya zipesa zono wukamhela.’ 19Yakamutya nayo, ‘Nagwe weze muwaha mu makaya mahano.’ ”
20U mwitumami yunji nayo yakaza yakatya, “Muwaha sole pesa zako, nazikamisa mbope mu citambala, 21hambi nha nakogopa vyono agwe wuli munhu mukali. Agwe wuli munhu mono kusolaga cono si wawika, no kududula cono si wahadika.” 22Nayo yakamutya, “Nokusumila mu wulonje wako, wuli mwitumami mubi 'gwe. Wali wumanyile vyono ane nili munhu mukali, mono solaga cono sinawika, no kududula cono si hadice, 23alo so cici si wayiwika sawo yangu mu benki, nane nali niyisole yina ne cambuzi ha wuwuye wangu?”
24Yakawatya wono wali wemile baho, “Mumubokaje zizo zipesa, mumupele ayulya mono yatujile cambuzi kali kumi.” 25Nawo wakamutya, “Muwaha, ayu yena cambuzi cico kali 'kumi.” 26Nayo yakawatya, “Muli wose mono yena nha kopegwa; no konjelezwa. Ninga mono yasina, kosolelwa sunga na cono yena naco. 27Ninga wawo walugu wangu, wono si wali wendile niwe mutemi wawo, waletenyi kuno, muwawulajile hamwande yangu.”
Yesu yakwinjila mu Yelusalemi kwa sasamo
(Mat 21:1-11; Mlk 11:1-11; Yoh 12:12-19)
28Yesu yaza kondya kulonga zizi, yakalongola kubita ku Yelusalemi. 29Kukawa yaza sejelela ku Betifage na Betaniya, he 'tunda lye Mizeyituni, yakawatuma wejizwa wakwe wejete, 30yakawatya, “Bitenyi ku citumbi cono cili ha mwande yenyu, na kolo mukwinjila mu citumbi, mowona nyana ye ndogowe yiwopigwe, yono yikali hamba si netumamilwa na munhu. Muyiwopole, muyilete baha.” 31Hono munhu yamuwuzenyi, so cici lo mukuyiwopola, mumulonjelaje mutye, “U Muwaha yakuyisaka.”
32Nawo wono watumwa wakabita, wakawona nha vyono yawalonjela. 33Nawo lono wayiwopolelaga nyana ye ndogowe, wanye ndogowe wakawawuza, “Nhawule mukuyiwopolela i ndogowe yiyi?” 34Nawo wakawapitula, wakatya, “U Muwaha yakuyisaka.” 35Wakayileta kuli Yesu, wakatandika myenda yawo mu nyana ye ndogowe, wakamupandiza Yesu. 36Nayo Yesu yakajendelela no muhinzo, akuno yapandile mu ndogowe, ne wanhu wakatandika myenda yawo mu nzila. 37Nayo yaza sejelela behi na Yelusalemi, ha nhenenhuko ye litunda lye Mizeyituni, i wejizwa wakwe mu winji wawo, wakanza kusangalala no kumulumbo Mulungu kwe 'zi yiwaha, so metumo mawaha gono wagawona, 38wakutya, “Mumoti u Mutemi mono yakuziza mwitagwa lyo Muwaha, Mulamu ku wulanga, no lukumyo lweze kuli Mulungu.”
39Wafalisayo wanji wono wali wali mwi'puga lye wanhu, wakamutya Yesu, “Mwijizi wanyamazaje wejizwa wako wanyamale.” 40U mwene yakawapitula, yakatya, “Nghumulonjelenyi anye vyono, hono wawa wanyamale, mabwe gago gozoza.”
Yesu yakulililila likaya lya Yelusalemi
41Nayo yaza sejelela, yakaliwona likaya yakalililila, 42yakutya, “Yali yiwe yili ciba hono nagwe wali wumanye mwizuwa lili, inghani yo mulamu! Ninga alu yihundicizwe ha meso gako. 43Hambi vilo nha vyolokuziza, lono Walugu wako wolokupilima no kukutejela kose kose. 44Wolokongomeza gwegwe, hamonga ne wanago wono wali mumo. Nawo si wolokusigaziza hamba libwe limonga mucanyha mwibwe liyagwe, vyono si watanga ilipango lyono Mulungu yaziza kukuponya.”
Yesu yakwinjila mu Nyumba yo Mulungu
(Mat 21:12-17; Mlk 11:15-19; Yoh 2:13-22)
45Hanyuma Yesu yakenjila mu Nyumba yo Mulungu, yakanza kuwawinjila kunze wono wambazaga, 46yakuwatya, “Yandikwa, Nyumba yangu yowa nyumba yo kulombela; ninga anye mwayinoza kuwa mhango ya Wahizi.” 47Yesu yakawa kwijiza vilo vyose mu Nyumba yo Mulungu. Ninga Wakohani wawaha, ne wejizi wo Wulajilize ne walongola we wanhu, wasakaga kumuwulaga, 48ninga si wayiwona nzila yo kunozeza zizo. Hambi wanhu wose nha wali wamumemeleye, wakumuhuliciza muno.
Seçili Olanlar:
Luka 19: LLKWW
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Cigogo Bible © Bible Society of Tanzania, 2002.
