युहन्ना 1

बैणै लई मणछे देही

1सारी सृष्टी का पैहलै आसा त एक, ज़हा लै बैण बोला,

सह बैण त परमेशरा संघै,

सह बैण ई त परमेशर,

2अह ई बैण त सोभी का पैहलै परमेशरा संघै।

3परमेशरै बणांईं सोभै गल्ला तेऊ करै,

इहअ निं किछ़ै आथी ज़ुंण तेऊ बाझ़ी बणअ।

4सह आसा सोभी ज़िन्दगीओ मूल़,

तेऊए ज़िन्दगी करै हुअ सोभी लै प्रैशअ।

5प्रैशअ च़मकअ न्हैरै दी,

न्हैरै च़ाहअ सह शेऊणअ पर सह निं तेऊ शेऊई सकअ।

6परमेशरै छ़ाडअ एक मणछ तेऊ नांअ त युहन्ना। 7सह आअ संसारा लै लोगा का तेऊ प्रैशे बारै समादा खोज़दअ, ताकि सोभ ज़ण्हैं तेऊए गल्ला शूणीं करै विश्वास करे। 8युहन्ना नांईं त आप्पू प्रैशअ आथी; पर सह आसा त तेऊ प्रैशे बारै लोगा का खोज़दअ आअ द।

9असली प्रैशअ ज़ुंण सोभी मणछा लै प्रैशअ दैई सका; सह आसा त संसारा दी एछणैं आल़अ।

10सह आअ एऊ संसारै ज़ुंण तेऊ आप्पै आसा बणांअ द, पर एऊ संसारे लोगै निं सह बछ़ैणअ आथी। 11सह आअ आपणैं देशै; पर ज़ुंण तेऊए आपणैं लोग तै तिन्नैं निं सह मनअ। 12पर ज़ुंणी बी सह मनअ और तेऊ दी विश्वास किअ, तिन्नां लै दैनअ तेऊ परमेशरे लुआद हणैंओ हक। 13तिंयां निं संसारे रिती दी परमेशरे लुआद बणैं ज़िहै संसारै मणछ बैह करी करै शोहरू लै ज़ल्म दैआ। पर तिन्नों बाप्पू आसा परमेशर और तेऊ दैनअ तिन्नां लै नऊंअ ज़ल्म।

14तेऊ बैणै लई मणछे देही और झींण और सत्ता दी भर्हुई करै किअ हाम्हां जैंदरी बसेरअ, हाम्हैं भाल़अ तेऊओ इहअ प्रतप, ज़िहअ बाप्पूए तेऊ शोहरूए प्रतप हआ ज़ुंण आपणैं बाप्पूओ कलौतअ शोहरू हआ। (1 युहन्ना 4:9)

15युहन्ना बी खोज़अ तेऊए बारै और हाक्का लाई करै बोलअ इहअ, “अह आसा सह ई ज़सरै बारै मंऐं इहअ बोलअ त कि मुंह बाद एछणअ एक इहअ; ज़ुंण मुखा बडअ आसा और ज़ुंण मुखा पैहलै आसा त।”

16किल्हैकि तेऊए भरपूर झींण करनै करै भेटअ हाम्हां जशा प्रैंदै जश। 17इहअ करै बधान ता खोज़अ हाम्हां का परमेशरे गूर मुसा, पर जश और सत्त रहैऊअ परमेशरै मसीहा ईशू करै। 18परमेशर निं आझ़ तैणीं कोही भाल़अ, पर परमेशरो एक्कै शोहरू ज़ुंण तेऊए कल़टी दी आसा, तेऊ किअ परमेशर हाम्हां लै प्रगट।

युहन्ना डुबकी दैणैं आल़े गवाही

(मत्ती 3:1-12; मरकुस 1:1-8; लुका 3:1-18)

19युहन्ने गवाही आसा एही, ज़ांऊं यहूदी मुखियै येरुशलेम नगरी का परोहित और लेबी युहन्ना सेटा लै इहअ पुछ़दै छ़ाडै, “तूह कुंण आसा?” 20युहन्ना निं एसा गल्ला लै हुधूअ, पर तेऊ मनी अह गल्ल और बोलअ, “हुंह निं मसीहा आथी।”

21तेखअ पुछ़अ तिन्नैं युहन्ना का, “ज़ै तूह मसीहा नांईं आथी, तै तूह आसा कुंण? तै तूह परमेशरो गूर एलियाह आसा?”

युहन्ना बोलअ, “हुंह निं आथी”

“तै कै तूह परमेशरो गूर आसा?”

ता युहन्ना दैनअ तिन्नां लै ज़बाब, “हुंह निं इना मांझ़ै कोहै बी आथी।”

22तेखअ पुछ़अ तिन्नैं युहन्ना का, “तै तूह आसा कुंण? हाम्हां लागा तिन्नां लै ज़बाब दैणअ ज़ुंणी हाम्हैं छ़ाडै दै आसा कि तूह आपणैं बारै किज़ै बोला?” (याशायाह 40:3)

23तेखअ बोलअ युहन्ना, “ज़िहअ परमेशरे गूर याशायाह आसा बोलअ द,

‘हुंह आसा उज़ल़ ज़ैगा एकी हाक्का लाणैं आल़ैओ बोल कि

प्रभूए सल़का करा सरली और तेऊए सुआगत करना लै रहा तैर्हुई।’”

24ईंयां तै फरीसी लोगा बाखा छ़ाडै दै। 25तेखअ पुछ़अ तिन्नैं युहन्ना का सुआल, “ज़ै तूह मसीहा बी नांईं आथी, नां ता तूह परमेशरो गूर एलियाह आथी, और नां ता तूह परमेशरो गूर आथी, तै तूह लोगा लै डुबकी किल्है दैआ?”

26युहन्ना दैनअ तिन्नां लै ज़बाब, “हुंह ता दैआ पाणीं दी डुबकी; पर तम्हां मांझ़ै आसा एक मणछ खल़अ ज़हा तम्हैं नांईं बछ़ैणदै। 27मतलब ज़ुंण मुंह बाद एछणैं आल़अ आसा, सह आसा सोभी का महान और इधी तैणीं कि हुंह निं तेऊ सेटा एता जोगी बी आथी कि हुंह तेऊए पोलल़ै खोल्हणैं च़ाकरी करनै आल़अ टैहलू बणीं सकूं।”

28ईंयां गल्ला हुई जरदण नदी पार बेतनियाह नगरी दी; ज़िधी युहन्ना लोगा लै डुबकी दैआ त।

परमेशरो मिम्मूं

29दुजै धैल़ै भाल़अ युहन्ना ईशू आप्पू बाखा एछदअ और तेऊ बोलअ, “भाल़ा, अह आसा परमेशरो मिम्मूं, ज़ुंण एऊ संसारे सारै पाप दूर करा। (1 पतरस 1:19; याशायाह 53:7)

30“अह आसा सह ई ज़सरै बारै मंऐं बोलअ त कि एक मणछ एछणअ मुंह पिछ़ू, ज़ुंण मुखा बडअ आसा किल्हैकि सह आसा त मुखा पैहलै। 31मुंह ता निं तेऊए बछ़ैण आथी ती, तैही आअ हुंह पाणींए डुबकी दैंदी-दैंदी कि सह लोल़ी इस्राएले लोगा दी प्रगट हुअ।”

32युहन्ना दैनी अह गवाही, “मंऐं भाल़ी पबित्र आत्मां पालल़ी ज़ेही सरगा का होथदी और सह बेठी ठीक ईशू प्रैंदै। 33मुंह ता निं एऊए बछ़ैण आथी ती, पर ज़ुंणी हुंह पाणींए डुबकी दैंदअ छ़ाडअ, तेऊ परमेशरै बोलअ मुखा इहअ कि ज़हा प्रैंदै तूह आत्मां होथदी और बेशदी भाल़े, सह ई आसा पबित्र आत्मां करै डुबकी दैणैं आल़अ। 34आझ़ भाल़अ मंऐं आपणीं आछी, और आझ़ आसा हुंह एसा गल्लो गवाह कि अह ई आसा परमेशरो शोहरू।” (भज़न 2:7)

ईशूए पैहलै च़ेल्लै

35दुजै धैल़ै बी तै युहन्ना और तेऊए च़ेल्लै मांझ़ै दूई ज़ण्हैं खल़्हुऐ दै। 36युहन्ना बोलअ ईशू डेऊंदअ भाल़ी करै, “भाल़ा, अह आसा परमेशरो मिम्मूं।” 37एसा गल्ला शूणीं लागै तिंयां युहन्ने दूई च़ेल्लै ईशू पिछ़ू हांढदै।

38ज़ांऊं ईशू तिंयां आप्पू पिछ़ू एछदै भाल़ै ता सह लागअ तिन्नां का पुछ़दअ, “तम्हैं कसा लोल़ा?”

तेखअ बोलअ तिन्नैं ईशू लै, “हे गूरू, तूह किधी रहा?”

ईशू बोलअ, “च़ाल्ला हांढदै लागा, तम्हां का जाणअ आप्पै शुझुई।”

39तेखअ भाल़ी तिन्नैं ईशूए रहणें ज़ैगा, और तेसा धैल़ी रहै तिंयां तेऊ ई संघा; ईंयां गल्ला हुई दपहरा का बाद उडै।

40तिन्नां दूई मांझ़ै ज़ुंण युहन्ने गल्ला शूणीं करै ईशू पिछ़ू आऐ, एक त शमौन पतरसो भाई आन्दरू। 41तेऊ बोलअ आपणैं सकै भाई शमौना सेटा लै डेऊई करै, “हाम्हां गअ मसीहा भेटी।” (युहन्ना 4:25)

42आन्दरू आणअ शमौन ईशू सेटा लै और तेऊ भाल़ी करै बोलअ ईशू, “तूह आसा युहन्नो शोहरू शमौन ताल्है बोल़णअ कैफा मतलब ‘पतरस।’”

फिलिप्पुस और नतनेल शादणैं

43दुजै धैल़ै किअ ईशू गलील लाक्कै लै डेऊणेओ बच़ार, तिधी भेटअ तेऊ फिलिप्पुस नांओं मणछ ईशू बोलअ तेऊ लै, “मुंह संघै च़ाल।” 44फिलिप्पुस, आन्दरू और पतरस तै चिहै बैतसैदा नगरी का।

45फिलिप्पुसै बोलअ नतनेल सेटा डेऊई करै, “ज़सरै बारै परमेशरे गूर मुसा लिखै दै बधाना दी बोलअ, और परमेशरे गूरै आसा आजू हणैं आल़ी गल्ला प्रगट की दी, सह गअ हाम्हां भेटी, सह आसा युसुफो शोहरू नासरत नगरीओ ईशू।” (मत्ती 21:11)

46नतनेलै बोलअ तेऊ लै, “नासरत नगरी का कै कोई राम्बल़ी च़ीज़ बी निखल़ी सका?”

फिलिप्पुसै बोलअ, “च़ाल्ल आप्पै भाल़।”

47ईशू भाल़अ नतनेल आप्पू बाखा लै एछदअ और बोलअ, “भाल़ा, अह आसा असली इस्राएले खांनदानी का। एऊ दी निं किछ़ै कपट आथी।”

48नतनेलै बोलअ ईशू लै, “तंऐं किहअ करै बछ़ैणअ हुंह?”

ईशू दैनअ तेऊ लै ज़बाब, “फिलिप्पुसै शादअ तूह बादा का, तेता का पैहलै हेरअ त मंऐं तूह फेडूए बूटा गोधै भाल़ी।”

49तेखअ बोलअ नतनेलै, “हे गूरू, तूह ई आसा परमेशरो शोहरू और तूह ई आसा इस्राएलो माहा राज़अ।”

50ईशू बोलअ तेऊ लै, “मंऐं बोलअ, तूह भाल़अ मंऐं फेडूए बूटा गोधै, तै किअ तंऐं विश्वास? अह निं किछ़ बी आथी, ताह भाल़णैं एता का बडै-बडै काम।” (युहन्ना 11:40)

51तेखअ बोलअ ईशू, “हुंह खोज़ा तम्हां का सत्त कि तम्हां भाल़णअ स्वर्ग खुल्हअ द और परमेशरो स्वर्ग दूत हेरनअ तम्हां मुंह मणछे शोहरू लै उंधै एछदअ और उझै डेऊंदअ।” (मूल़ 28:12)

Seçili Olanlar:

युहन्ना 1: OSJNT

Vurgu

Paylaş

Kopyala