MATIUS 2
2
Manga sake bou simbuka ngu Raki
1I Yesus nipahinding su soa ngu Betlehem su tana Yudea sutempo ngu Ratu Herodes kapamarentange. Tempo e'e pia pirangkatau mapapandengu wituing bou simbukangu Raki nusumongo su Yerusalem. 2I sire nukina suapang tampa, “Suapa Ana ko wuhu nipahinding ko nitantu makoa ratu ngu tahu Yahudi? I kami nakawua wituing-E nusumuwang su pungu Raki, dang i kami nusumongo i'i musuba si Sie.” 3Suapangi Ratu Herodes nakaringihi hal᷊i e'e, i sie nahuwi l᷊ail᷊ai, kere e l᷊ai kaul᷊iu taumata su Yerusalem nughigho. 4Hakiu e'e i sie nuparenta pukui apang manga mawu imam, dingang u manga meteru agama pukomol᷊i. Bou e'e i sie nukina si sire, “Suapa uare Ratu ko ipudiandi ngu Mawu Ruata sarung i pahinding?”
5Nisibahengi sire “Su Betlehem, su tana Yudea. Ualingu singkatau nabi seng namohe kiri'i,
6 #
Mi. 5:1
‘I Kau Betlehem, su tana Yehuda,
tinga-tingari i kau wal᷊inge we kadiokange su tal᷊oara u apang soa kapiange su Yehuda.
Watu u boi kau sarung sumongo singkatau
pangaha ko sarung magaha umati-Ku Israel.’ ”
7Suapang nakarea l᷊ahe e'e, i Herodes nukumui Mapapandengu wituing bou simbukangu Raki e'e kere niputahawuni. Bou e'e i sie nukina si sire minsang kangereng wituing e'e nanita nikawua. 8Mbuhue i sie namarenta si sire patamai sarang Betlehem l᷊au nutumanata, “Dakoe tamai, riake Ana e'e pakatiti. Boko i kumu mu makarea si sie, puhabari mai si sia, tadeau ia tamai l᷊ai masuba si Sie.”
9-10Bou e'e i sire natamai. Wituing ko nikawuangi sire horo supungu Raki sau nikawuangi sire. Nanamba te l᷊iaghi sire suapang sau nakawua wituing e'e. Wituing e'e nuhoro boi sire, bou e'e nangiro nukita su wawou tampau Ana e'e. 11I sire nusumu su l᷊al᷊ungu wal᷊e e'e dang nakawua Ana e'e dingang i Maria, imamange. I sire nusuba dang nanumba Ana e'e, bou e'e namuka pinikungi sire, nanarakang sasumba ngi sire si Sie, wul᷊aeng, kamania, dingang u mur.#2:11 kamania: kakoa u dupa ko mal᷊ighari harigange, nikoa bou kau. mur: pul᷊u ko seng namara ko mawungi bou kau. 12Mawu Ruata nangonggo ingati si sire su ipi tadeau i sire kumbahang musul᷊e sarang koa i Herodes. Haki tewe i sire napul᷊e nundea ral᷊eng ko wal᷊inge.
Nipakaru sarang Mesir
13Saritau mapapandengu wituing seng natamai, malaekatu Mawu nutingkaandaghu badange si Yusuf su l᷊al᷊ung u ipi. Malaekati e'e nangul᷊i, “I Herodes pia naunge mundea mamate Ana e'e. Ual᷊ingu e'e, wangung te, wawa Ana e'e dingang i mamange tal᷊ang sarang Mesir. Katanae pai se'e sarang Ia sau mangul᷊i si kau.”
14I Yusuf nuwangung, dang suhuwi e'e i sie numbawa Ana e'e dingang i mama-Nge nakoa sarang Mesir. 15#Hos. 11:1I sire natana pai se'e sarangi Herodes nate.
Dingangu e'e nariadi apang ko niul᷊iu Mawu bou mohongu nabi-Nge, kiri'i, “Ia mukui Ana-Ku bou Mesir.”
Mangarario kodio nipate
16Saritau i Herodes natitong i sie ko niakal᷊engi sire mapapandengu wituing wou simbukangu Raki, i sie nuwawal᷊uang we l᷊ai-l᷊ai. Bou e'e i sie nuparenta pamate apang ana koese su Betlehem dingang u su tampa ko masandighi bou e'e ko umure dua taung sintanae. E'e nuhino musul᷊ung niul᷊iu mapapandengu wituing hal᷊i u orasu wituing e'e nikawua.
17Ko kere'e nariadi apang ko l᷊inau niul᷊i i Nabi Yeremia,
18 #
Yer. 31:15
“Su Rama nikaringihi pia tingihu ral᷊ungkang,
kahioro dingang u sangi.
I Rahel kapul᷊ungkangu manga anae,
i sie mandi sal᷊iwuhang, watu'u i sire seng tarie e.”
Nusul᷊e bou Mesir
19Suapangi Herodes nate, su tempo ngi Yusuf mborong su Mesir singkatau Malaekatu Mawu nutingkaandaghu badange si Yusuf su ipi. 20Malaekati e'e nangul᷊i, “Manga taumata ko mamate Ana e'e kaul᷊ie seng nate. Ual᷊ingu e'e wangung te, al᷊a te Ana e'e dingang i mamange dang pusul᷊e te tamai sarang Israel.” 21I Yusuf nuwangung, bou e'e numbawa Ana e'e dingang i mamange napul᷊e sarang Israel.
22Kateho bou e'e i Yusuf nakaringihi i Arkhelaus, ana i Herodes seng nundol᷊osi si papange nakoa Ratu su Yudea. Ual᷊ingu e'e i Yusuf maghagha tamai. Bou e'e i sie nakarea tatul᷊ara ngu Mawu su ipi. Mbuhue i sie natamai sarang Galilea. 23#Mrk. 1:24; Luk. 2:39; Yoh. 1:45Pai se'e i sie natana su soa arenge Nazaret. Dingangu e'e nariadi te apang ko niul᷊i u manga nabi hal᷊i u Ana e'e: “I Sie sarung isigho Tau Nazaret.”
Seçili Olanlar:
MATIUS 2: LAISXN
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
2014 Indonesian Bible Society (Lembaga Alkitab Indonesia)
