MATIUS 2
2
Jaki owe ajinaoes atakam
1Emesare. Yesus Yudea tapirmi kota juas Betlehem ajisamsen. Era baream raja ipit juas Herodes era tapirmi aememen. Baet tastu oweam, jee ajapejisemarpu tapirmi aejinaoesen. Are kota Yerusalem ambaremesen. 2Are atakam akoresen. “Me japen ajisamse Yahudi owe araja Ipit etepepuram? Me jee ajapejisemarpu abaet oup atemete ere, danom aporom. Dararawa, Armat Ipit basitim ajinaoapom.” Emes atakam aesimesen. 3Me raja Herodes emes atakam jane ajie ere, ombare aememen. Yerusalem owe takesam ombare aememesen. 4Emesare, Herodes, Allah Tame pak baem owe daytuam, Musa Basakamtam Atakam baememtam oweam, ajarisimapomen. Are ajateporen. “Kristus etepu jisamesto?” Emes ajateporen. 5Era owerawa, atep ajitesen. “Are Yudea tapirmi kota juas Betlehem ajisamestem. Emesare, Allah atakam bakoretam ipit, emes atakam, buku aeapomen:
6‘Kota Betlehem! Wore Yudea saman tapirmi kota. Yudea
tapirmi kotaiin kotaiin, wore anakot apok kota apok. Wore anakotnak.
Era woowe damon, kapar ipit taka aememtem. Armat Ipit,
Israel deowe, aomeptem,’
Emes atakam buku aeapomen.” Era owe emes atakam aesimesen.
7Era owe emes atakam aesimes arawa, Herodes baet tastu owe tiruu ajaten. Are era owe ajateporen. Era owerawa, baet ajise bare, atakam baso Herodes aesimtamkoromesen. 8Me Herodes arawa, atakam era owe asakamtamen: “Betlehem aesosay. Tanom banamek fiaka. Era Jii bandimarporay. Era Jii andimartaertakam, atakam baesimtamani. Dere erapu baesos wanam era Jii basitim, akot ajimin.” Emes atakam aesimen. 9Era owe raja atakam jane ajiesen. Jane ajies arawa, aesosesen. Era bonak atemete apores baetam, era owe abinpu aesosen. Era baet ajarerawa, era Jii aemansepu era oup asiapen. 10Era owe baet apores, are jak akotnak aememesen. 11Are era tame ajiiemesen, wanam era Jiiam, arsoot Mariaam, aporesen. Are jindi andaepuapesen wanam era Jii asitimesen. Are aapak ese ambumesen. Ambumes arawa, emasam, pinim akot wus tapi juas kemenyanam, wan wus tapi juas muram, era Jii atetamesen.
12Emesare, baet tastu owe ise atamwitesen. Era ise atamwites ere, Allah, era owe, Herodespu bofasios bas, emes atakam aesimtamen. Era owerawa, atapirmi wan bokot aoesosesen.
Yusufam, Mariaam, Yesusam, Mesir tapirmi aesoses atakam
13Aesoses arawa, Yusuf ise atamwiten. Ise atamwite ere, are Tuhan amalaikat bi aporen. Era malaikatam atakam armat ipit aesimtamen. “Bawasitey! Era Jii arsootam, ombare Mesir tapirmi atuomasey. Era asan aemapey. Atakam wora aesimtamtey bare ajiire. Herodes era Jii batatii andimarportem.” Emes atakam aesimen. 14Yusuf arawa, awasiten. Awasite ere, are era Jiiam, arsootam, ataeren. Are Mesir tapirmi eam aesosismapesen. 15Are Herodes dambir aeme bare ajiire era asan aemapesen. Bonak ere, Tuhan, atakam aatakam bakoretam ipit aesimtamen. “Dere Detii Mesir tapirmi beken bajios ajateo.” Emes atakam aesimen. Erarawa era owe era pak aemesen. Ere era atakam jipu aren.
Oorey jii koser batakorom atakam
16Emesare. Herodes, baet tastu owe, potet armat ipit atutumes aporen. Ararawa, jak ambap daytinak aemapen. Are owe Betlehem oorey jii koseram, era apakaiosar tapirmi oorey jii koseram, batakorom, atakam asakamtamen. Ere umur tahun jamnuk jiiam, umur tahun jamnuk apok jiiam, aren. Me umur, era baet tastu owe aesimtames atakam jipu aren. 17Owe era jii atatiies ere, Allah atakam bakoretam ipit juas Yeremia aesimtame atakam jipu:
18“Owe, kota Rama owe asawuames jane ajies. Ere era owe
bate daytinak. Rahel ajii jier bate ambate.
Me ajii, ere dambir takes aemes. Erarawa armat taot, owe,
ajak, akot baemapom potan.”
Emes atakam aesimen.
Yusufam, Mariaam, Yesusam, Israel tapirmi aofasies atakam
19Emesare. Herodes dambir aemen. Dambir aemerawa, Yusuf Mesir tapirmi ise atamwiten. Era ise atamwite ere, are Tuhan amalaikat bi aporen. 20Malaikatam atakam armat ipit aesimtamen. “Bawasitey! Era Jii arsootam, bataerey. Era Jii batatii aememes owe, ere dambir eteemes. Emesare tare Israel tapirmi ofasiosay.” Malaikat emes atakam aesimen. 21Me Yusufam awasiten. Are era Jii arsootam ataeren. Are Israel tapirmi aesosesen. 22Me, Arkelaus, aritipit Herodes, Yudea tapirmi raja ipit, jow auuemen. Yusufam emes atakam jane ajien. Ararawa, era asan baesos ombare aememen. Are ise atamwiten. Era ise atamwite ere, Allah, Yusuf era asan baesos bas, atakam aokoromen. Me Yusuf arawa, Galilea tapirmi aesosen. 23Bonak ere, Allah atakam bakoretam owe, atakam aesimtamesen: “Owe, ‘Armat Ipit, Nasaret Ipit,’ emes atakam aesimtemas.” Emes atakam aesimesen. Erarawa Yusuf kota juas Nasaret aemapen. Era atakam jipun.
Seçili Olanlar:
MATIUS 2: LAIASC
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
