LÚU 24
24
Jísu yooɣéndai sái h̃u
(Máfiyu 28:1-10; Máa 16:1-8; Njɔú 20:1-10)
1Ná í ɣɛ́i ngáá Tɛnɛ́mai holoí ngelendáá lɛtɛngí, nyah̃áitii tí ngulɔ w̃ááku nɛɛ nɛɛngi yeɣéni ti ɣɛ́i kɛ kíli batɛní, tí li kambái ŋála. 2Ná tí fóloni na, tí mááleni kɔtuí sí tibingɔ́ í ɣɛ́i la kambái la, siɣengɔ́ nda. 3Aáva ná ti wálani kambái h̃u, taá Ndemɔí Jísu vuw̃aí lɔ́ni na. 4Maa gíndaa vilingí i loí nɔ́ɔ ti w̃a, kɛ siỹɛ́ félengɔ gulangá ti yaah̃ú w̃a nɔ́ɔ ngamá, ti lóóni ti béla ti w̃ááyilingɔ ngáá kula woléngi áá hólo míl̃a mil̃a. 5Nduwái i ɣɛi nyah̃ái nátiini su ngwala, faalɔ, tí wú máa hítɛni ndɔwɔlɔ́i wa. Kɛ siỹɛ́ félengɔi nátiini ti ɣɛa ti w̃a, “Ndeénii lé wúwaa nuí síí w̃ɔ́i wɔli saangɔ láá lé mbéi táa saa yeláitii kpɔ́lu na? 6Jísu aa mɔɔ mbéinda, i yooɣénga sái h̃u. A giséi ma kíya i ndéni wú w̃a ná wáa tiyéni wú ɣɛ́i Galéli, ngáá sí í ɣɛ́i ta, 7‘Kɛ tí nuí síí w̃ɔ́i taa ɣɛ́ ma Nuu Búsa Goo H̃ú Loí lókoleve faa ỹɔ́u yélaitii ma aáva taá kpakpá kulɔ́sii w̃a í há ma. Kɛ́ ná foló félengɔ áá gúla su sawa kélei w̃a, aa yooɣé sái h̃u.’ ”
8Kɛ nyah̃ái nátii ti gingí i hitɛngá Jísu laa wói nátii mba. 9Ná tí yangáimani táá gúla kambái ŋál̃a, tí fái sítiini kpɛ́lɛɛ súúɣɛni ngáá Jísu volú yélaa púúngɔ maah̃úú yiláángaitii ɛ́ɣɛ pekaítii kpɛ́lɛɛ. 10Sítiini ti ɣɛ́i liiní kambái ŋál̃a ti ɣɛi ngáá Mɛɛloí, Magadála taí h̃uu w̃ɔ́i ɛ́ɣɛ Jowána ɛ́ɣɛ Jimisí njéé Mɛɛloí ɛ́ɣɛ nyah̃á vékaitii. Tiyá lɔ ti fái sí h̃úúɣɛni ngáá sítiini Jísu i lokoloní ti wa ngáá Ngalángi géélaitii. 11Kɛ́ Ngalángi géélaitii taá láni ngáá nyah̃ái nátiini ndaa wói, bɔw̃álale nátii ndaa wói gúlangɔ i ɣɛi nɔ́ɔ la tí yaá ngáá kele ɣelé tála háa. 12Kɛ́ ná fíli su, Pítɛ í yooɣéni í lí ngáá viliỹɛ́ kambái ŋál̃a. Ná í fóloni na, i wu máa laní su, í maa gúla wólengaitii tɔ ti láni bɔwɔ́ yɛ, kɛ i gulangá na í lí, kindáá vílingɔ ngáá bɔwɔ́ ngáá sí í híyanga.
Jísu i gulaní volú yélaa félengɔ yaah̃ú
(Máa 16:12-13)
13Aáva folói ná kái kái má, Jísu volú yélaa félengɔ ti ɣɛ́i taa lí taa yílaa su, taá náa lolí ngáá Ɛmééyɔ. Í gúla Jɛlúsɛl̃ɛ í lí na, aa ɣɛ ngáá háwa félengɔ híya mbomáá. 14Ti ɣɛ́i taa lí ngáá yɛpɛ ỹɔw̃ɔ́ ỹɔ́w̃ɔ yelé kɔwɔ́ato fái sí kpɛ́lɛɛ mbá í ɣɛ́i hiyaní. 15Kíya ti ɣɛ́i taa li ngáá hiya táa yɛ́pɛ maa hái wa, Jísu buteí i vaaní í báha ti wa táá híya taá tiyéni. 16Tí tɔ́ni, kɛ́ taá ɣɛi kɔlɔ́ ngáá kɛ Jísu le. 17Kɛ Jísu i ti w̃ɔ́ɔ́ninga, i ɣɛ ti w̃a, “Ndeé lɔ wáá li ngáá nde ỹɔw̃ɔ́ ỹɔ́w̃ɔ lówah̃u?”
Kɛ nátii tí longá kpɛ́, tí yaah̃ú hítɛngɔ nga. 18Kɛ ngiláángi tɔ́ɔ́ ɣɛ́ ma Kiliyɔ́pa, i Jísu w̃ɔɔnínga, i ɣɛ ma, “Kɛ í yílaa kpé tɔ nɔ́ɔ yí Jɛlúsɛl̃ɛ yáá faa wɔ́lɔ fái sítiini mba ti hiyangá kuu félengɔi sí h̃u?”
19Kɛ Jísu i ti w̃ɔ́ɔ́ninga, i ɣɛ ti w̃a, “Ndee háa?”
Kɛ ti ngoo yápotenga, ti ɣɛ ma, “Faí sí í híyangɔ ngáá Jísu, Násɔlɛ taí h̃uu w̃ɔ́i. Siỹɛndópoi ná í ɣɛ́ngɔ ngáá Ngalá ndaa háá lé mɔ́ɔ ngakpángɔ ngwala ndaa wóó h̃u ɛ́ɣɛ tuva gilí h̃u. Ngalá pa taa nungáitii ti lokoheíni mbu. 20Kɛ́ Ngala sááɣa gula mbélai ti wútuwɔaitii ɛ́ɣɛ ni wútuwɔaitii tí tokolevéngɔ ngáá í saa w̃ááhɔlɔ, aáva tí kpakpángɔ kulɔ́sii w̃a í há ma. 21Kɛ́ i ɣɛngɔ ɣɛi ni gi má ngáá kɛ laá lɔ́ í ɣɛ́ngɔ áá vá Ísulɔ yélaitii ngumááwo má. Í síɣe féa ná wa, fái sí kpɛ́lɛɛ siyangɔ́i w̃a maa hóloi hawá mbáá háá. 22Ná vólu, nyah̃ái sítiini tí ni h̃u, ti lɛ́ingaa tí ni gindáa víli fáá ɣɛngɔ́. Tí liingɔ́ kambái ŋál̃a ngelendáá lɛtɛngí sí, 23kɛ́ taa Jísu vuw̃ái lɔ́ngɔ na. Tí vá tí ndé ni w̃a ngáá malékaitii tí gulangɔ́ ti yaah̃ú ti ɣɛ́ ti w̃a Jísu lɔ ndɛɛh̃ú h̃u. 24Kɛ́ ni mbálangaitii ti lɛ́ingaa tí líínga kambái ŋál̃a tí náa w̃áále nɔ́ɔ jɔ́ kíya nyah̃áitii tí ɣɛ́i ndéni, kɛ́ taa Jísu lɔní na.”
25Kɛ Jísu i ɣɛa ti w̃a, “Wa lɔ ngáá faa yátɔ tála yelaa, a wú h̃úú lɛí kíli lɔ lɛ́ɛ ngáá wú lándai ngáá fái sítiini kpɛ́lɛɛ Ngalá ndaa háá lé mbélaitii tí ndéni! 26Kɛ́mbɛ i ɣɛngɔ pele w̃a ngáá Ngalángi Lókolo Mbá W̃ɔ́i í maanɔw̃ɔ́i sítiini kpɛ́lɛɛ ngéɣe ɔ́ɔ́ ɣɛ́a yangáima ngi yákpangi h̃u, kɛlɛ́i?” 27Kɛ Jísu í sítii kínɛi súúɣɛnga ngáá ti ye Muusé í pɔnɛní í fólo sí kínɛi má Ngalá ndaa háá le mbélaitii tí pɔ́nɛni kɔwɔ́ato mba.
28Ná ti ɣɛ́i taá bɛ́ɛ taí wa mbéi ti ɣɛ́i taa lí na, Jísu i kpatɛní ngáá kɛ aá lɔɔ lɔ́ve naa w̃a. 29Kɛ́ siỹɛ́ félengɔi nátii tí ndení ma ngáá hɛmbɛ́, ti ɣɛ́ ma, “Ló, a mú ỹíí mbéinda, folói vilangɔ́ɔ́ lé náa kíli.” Faalɔ, i líi náa ngáá taá tiyéni tí ỹíi ỹanda yílaa. 30Ná ti ɣɛ́i taá laaỹɛ́, kɛ Jísu i bilé búsai yéɣenga, í sɛ́ɣɛɛ gulama hé Ngalá mbɛ, í pɛ́lɛ ngalé ngálema su áá fé ti yaá. 31Kɛ siỹɛ́ félengɔi nátii ti hóóvinga ngáá kɛ Jísu le. Kɛ́ Jísu va i mɔɔ ỹɛɛl̃ɛngá ti yaah̃ú. 32Kɛ tí pɛlɛngá ỹɔw̃ɔ́ ỹɔ́w̃ɔ w̃ɔ́ɔ́nima táá ɣɛ ta, “Kɛmbɛ mu góó h̃úi i ɣɛngɔ ɣɛi súwuvɛ súwuvɛ ngáá kooh̃unɛ́i ná í ɣɛ́ngɔ áá yɛ́pɛ mu yelé peleí h̃ú ɛ́ɣɛ ná sí pɔ́nɛngɔ Ngalá Kɔ́lɔi h̃u i ngakɛ́ni kpál̃au ngáá mu ye, kɛ́lɛi?”
33Kɛ ti yooɣénga, tí yangáima nɔ́ɔ ngamá Jɛlúsɛl̃ɛ. Ná tí fóloni na, tí Ngalángi gééla púúngɔ maah̃úú yiláángaitii maalení na ti yatɛ́ngɔ mba taá tí mbálangaitii, 34táá ɣɛ́ ta, “Tɔɔỹaá le Ndemɔí Jísu i yooɣéa sái h̃u, i gulangɔ́ Sáimɔ yaah̃ú!”
35Kɛ ti félengɔ bɛ́lɛ tí tí ndái h̃úúɣɛnga ngáá sí í híyangɔ ngáá ti ye peleí h̃u ɛ́ɣɛ kíya tí hóóvini Jísu w̃á ná í biléi yalé ngáleni su.
Jísu i gulaní volú yélaitii ngaah̃ú
(Máfiyu 28:16-20; Máa 16:14-18; Njɔú 20:19-23; Ti Gɛ́ɛ́ Haítii 1:6-8)
36Tí lói nɔ́ɔ yɛpɛmá kɔwɔ́ato faí sí wa, kɛ Jísu buteí i longá ti liiwáá nyɔ́ɔ́, i ɣɛ ti w̃a, “Ndiihéi í ɣɛ́ wú yɛ.”
37Ti kpɛ́lɛɛ ti h̃úú í bɛ́lini nduwái í vú ti h̃u, sífaa ti ɣɛ́i taá gisíya ngáá kɛ tí ngafuw̃á tɔngá. 38Kɛ́ Jísu i ɣɛi ti w̃a, “Ndeénii le faí sí í gɔ́ɔ́langa wú wá? Ná vólu, wú gíndaa vílingɔ? 39A wɔlɛ lɛ́ɛ tókoitii mba ɛ́ɣɛ kɔ́wɔitii. Nyá bútei nyá kái kái tɔ́ ngáá sí! A luba mbá wú tɔ, nduwú ɛ́i ɣɛ ngafuw̃á ma kaalɛ́ ɔ́ɔ́ ɣɛ́ su kíya waa tɔ́ ngí na.”
40Ná Jísu í fái sí léni ti w̃a, kɛ i lokoítii ɛ́ɣɛ gɔwɔ́itii ngakɛ́nga ngáá ti ye. 41Kɛ́ ná nɛ́nɛ taa ɣɛ́i laní lá kpɛ́, kɔwɔ́ato kooh̃unɛ́i ɛ́ɣɛ kindaa vilíngi wa ti ɣɛ́i su, Jísu i ti w̃ɔ́ɔ́nini, i ɣɛ ti w̃a, “Mɛɛní fíli tɔ́ wú yaa mbéi mɛ́ fááw̃a?” 42Kɛ tí nyɛɛ w̃áálevengi yílaa ngéɣea, tí fé ngeyá ngilíngɔ. 43Kɛ i soungá, i mɛ́ ti kpɛ́lɛɛ kpɛ́lɛɛ ngaah̃ú.
44Kɛ i ɣɛa ti w̃a, “Sí lɔ ngí ndéni wú w̃a ná h̃u ngí ɣɛ́i wú lííwaa ngáá kɛ sí kpɛ́lɛɛ pɔnɛngɔ́ kɔwɔ́ato mbá Ngala Kɔ́lɔi h̃u Muusé í pɔ́nɛni ɛ́ɣɛ sí Ngalá ndaa háá lé mbélaitii tí pɔnɛní i hítɛ nga. Ná vólu, ɛ́ɣɛ sí pɔnɛngɔ́i kɔlɔí sí h̃u taá tolí ngáá Ngala Fɛ́li Ngúle Gɔlɔí.” 45Kɛ Jísu i kɛngá ngáá háwu ti gi máitii ndaa í wó kpál̃au kɛinɔɔ́ sí pɔ́nɛngɔ Ngala Kɔ́lɔi h̃u tí ngatɔ́ mba. 46I ndení ti w̃a, i ɣɛ ta, “Sí lɔ pɔnɛngɔ́ Ngala Kɔ́lɔi h̃u ngáá kɛ Ngalángi Lókolo Mbá W̃ɔ́i w̃aa í nɔ́w̃ɔ. Aáva ná foló félengɔ áá gúla su sawa kélei w̃a, aa yooɣé sái h̃u. 47Aáva keela woí kɔwɔ́ato polú yafé fái wa faa ỹɔ́i wa, ɛ́ɣɛ faa ỹɔ́u h̃úúhaalondai ndaahéingi h̃uu lɔ taá nde na. Kɛ́ kɛ tɔkúla aa hei Jɛlúsɛl̃ɛ í ló su í foló ngelewu kpɛ́lɛɛ. 48Aáva wá lɔ ngáá faí sítiini mbaa héélea. 49Sí ní Kɛ́ɛ́ɣɛ í wú gúúlongɔ la, nyá ngáá kɛ ngáá háwu wú mááhɔlɔ. Kɛ́ a ló mbéinda taa walái sí h̃u í ló su kpóloo Ngalángi yákpangi áá gúla ngelegóóh̃u wú maahɔ́lɔ.”
Jísu lɛɛlaí ngelegóóh̃u
(Máa 16:19-20; Ti Gɛ́ɛ́ Haítii 1:9-11)
50Kɛ Jísu i gulangá ngáá volú yélaitii taí ná wa. Ná ti ɣɛ́i náa taa bɛ́ɛ Bɛ́tani taí h̃úu wa, kɛ i lokoí lɛ́nga ngeleya, í hɛ́ɛ́ ti w̃a. 51Í loní nɔ́ɔ hɛ́ɛ́ma ti w̃a, kɛ i ti longá í lɛ́ ngelegóóh̃u. 52Kɛ polú yélaitii tí fɛlingá, tí yángaima Jɛlúsɛl̃ɛ ngáá kooh̃unɛ́ɛ́ wála. 53Aáva ngele fíli ɔ́ɔ́ wó, tɔɔ́ li Hɛ́ɛ́ma Yála Pɛ́lɛi góvii h̃u táá Ngalá ndaaw̃áálɛ.
Seçili Olanlar:
LÚU 24: KNNT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Bandi New Testament © Bible Society in Liberia, 2000
