Лука 16
16
Пал Мэндронэ́-Кхэрэ́скирэ Барыдырэ́стэ
1И пхэндя́ Ису́со ж и Пэ́скирэ сыкляибнытконэ́нгэ: “Сыс екх барвало́ ману́ш, конэ́стэ сыс кхэрэ́скиро барыдыро́, савэ́с мануша́ бангякирэнас хула́скэ, со ёв розмэкэлас хуласкиро миштыпэ́н. 2И адава́ барвало́ ману́ш выкхардя лэс и пхэндя́: ‘Со да мэ шунава пал ту́тэ? Подэ ма́нгэ розгиныбнытко папиря, сыр ту хулаиндян мирэ́ миштыпнаса, пал-дова́ со буты́р ту́кэ нашты́ тэ ячэспэ кхэрэ́скирэ барыдырэ́са.’ 3Нэ кхэрэ́скиро барыдыро́ пхэндя́ пэ́скэ: ‘Со ма́нгэ тэ кэра́в, ке́ли Миро рай отлэла ма́ндыр буты́ пир кхэри́тко миштыпэ́н? Мэ на могина́ва тэ ґанавав, ладжава тэ мангав. 4Мэ джино́м (джина́в), со мэ ява́ва тэ кэра́в; соб (кай) мануша́ тэ прилэ́н ман дрэ пэ́скирэ кхэра́, ке́ли ман злэна бутя́тыр пир кхэри́тко миштыпэ́н.’ 5И ёв выкхардя пир екхэ́стэ кэ пэ кажнонэ́ манушэ́с, кон сыс вужло лэ́скирэ ра́скэ, и пхэндя́ пэрвонэскэ: ‘Кицы́ ту сан вужло мирэ́ ра́скэ?’ 6И одова́ отпхэндя́: ‘Шэл цэбры (меры) дзэт’ (елеё). И кхэрэ́скиро барыдыро́ пхэндя́ Лэ́скэ: ‘Лэ тыро́ росчхиныбнытко, бэш сы́гэс и чхин пандждэша́’. 7Тэ́ньци ёв пхуця́ явирэстыр: ‘А кицы́ ту сан вужло мирэ́ ра́скэ?’ И ёв отпхэндя́: ‘Шэл гонэ́ (меры) парно́ гив.’ И кхэрэ́скиро барыдыро́ пхэндя́ лэ́скэ: ‘Лэ тыро́ росчхиныбнытко и чхин охтодэша́’. 8И шардя ж рай пэ́скирэ начачунэ кхэрэ́скирэ барыдырэ́с, со ёв адя́кэ годьварэс кэрдя́. Пал-дава́ со мануша́, савэ́нгэ исын дро́го екх дава́ свэ́то, исын годэдыр манушэ́ндыр, савэ́нгэ исын дро́го духовно (фаноскиро) свэ́то. 9И Мэ пхэна́ва тумэ́нгэ: малынэнпэ барвалыпнаса далэ́ свэто́стыр, саво́ могинэ́ла тэ явэ́л биба́хт адя́кэ, сыр исын лачхо́ Дэвлэ́скэ, соб (кай), ке́ли дава́ барвалыпэ́н кончынэлапэ, тумэ́ тэ явэ́н прилынэ́ дро ве́чно кхэр.’” 10Кодова́, кон исын патяибны́тко дро набаро́ рэ́ндо, явэ́ла чачуно́ дро баро́ рэ́ндо; а кодова́, кон исын начачуно дро набаро́ рэ́ндо, явэ́ла адя́кэ-паць начачуно дро баро́ рэ́ндо. 11И ко́ли тумэ́ на са́нас чачунэ́ дро далэ́ свэтоскиро барвалыпэ́н, кон тумэ́нгэ допатяла Болыбна́скиро чачуно́ барвалыпэ́н? 12И ко́ли тумэ́ на са́нас чачунэ́ дро чу́жо барвалыпэ́н, кон тумэ́нгэ дэ́ла пэ́скиро миштыпэ́н? 13Ние́кх дына́ри (слуга) на могинэ́ла тэ дынарьел дуе рангэ, ци екхэ́с тэ явэ́ла тэ на камэл, нэ явирэ́с тэ камэл, ци явэ́ла чачуно́ кэ екх, а пэ явирэ́стэ явэ́ла тэ дыкхэ́л вучипна́стыр. Тумэ́нгэ нашты́ тэ дынаринэ́н Дэвлэ́скэ и барвалыпнаскэ.”
Ису́со Сыклякирэ́ла пал Зако́но
14Шундлэ́ саро́ дава́ и Фарисе́и, савэ́ зоралэ́с традынэпэ пал барвалыпэ́н и ёнэ лынэ́ тэ санпэ Исусо́стыр. 15Ёв пхэндя́ лэ́нгэ: “Тумэ́ сыкавэ́на пэс, со тумэ́ сан чачунэ́ манушэ́нца анги́л манушэ́ндэ, нэ Дэвэ́л джинэ́ла тумаро́ ило́; со мануша́ гинэ́на пал бари паты́в, исын джунгалыпэ́н (брыткима) анги́л Дэвлэ́стэ. 16Мойза́скиро Зако́но и пророкэ́нгирэ зачхиныбэна сыс анги́л Ианостэ Болдэипнаристэ: далэ́ часостыр бахталы́ зан (звесь) пал Дэвлэ́скиро Кралипэ́н дро Болыбна́скиро Раё миштопхэнэлапэ, и кажно ману́ш зорья́са заджа́ла андрэ́. 17Нэ сыгэды́р болыбэ́н и пхув проджа́на, сыр екх тыкны буквица (литэрка) Законо́стыр нашадёла. 18Кажно ману́ш, кон мэкэ́ла пэскирья́ ромня́ и лэ́ла явирья, одова́ кэрэ́ла биладжаипэ́н; и кажно ману́ш, кон лэ́ла явирья, савья́ ром мэкця́, одова́ кэрэ́ла биладжаипэ́н’.
Пал Барвалэ́ Манушэ́стэ и Лазарёстэ
19“Гада, сыс екх барвало́ ману́ш и ёв урьеласпэ дрэ порфиритко и най фэдыдыр и́дя, хая и пия со фэдэды́р со дывэ́с. 20И сыс екх чороро́ ману́ш, пир лав Лазарё, кон сыс пашто́ пашы́л барвалэскири по́рта и лэ́скирэ маса́ сыс дрэ фра́нсы, 21а адава́ бо́го сыс радо тэ чалёл котэрэнца, со пэрэнас барвалэ́ – манушэ́скирэ скаминдэстыр, и джукэла, ке́ли явэ́нас, чарэнас лэ́скирэ фра́нсы. 22И сыс адя́кэ: ке́ли мыя́ бо́го Лазарё, тэды Янго́лы залыджинэ лэс тэ явэ́л пашы́л Авраамостэ. 23И барвало́ ману́ш адя́кэ-паць мыя́ и гарадэ́ лэс. И ёв мэнчындяпэ древа́н дро лю́но (адо) и, ке́ли ёв ґаздыя́ якха́, тэды дыкхця́ дура́л Аврамос и Лазарёс, саво́ сыс пашы́л Лэ́стэ. 24И ёв дыя́ го́дла зоралэ́с: ‘Да́до, Аврааме, потангинэ ман и бичха́в Лазарёс, соб (кай) ёв тэ киндякирэл ангу́шт дро пани́ и тэ киндякирэл мири́ чиб, со мэ адя́кэ мэнчынавапэ дрэ дая́ хачкирды яг’. 25Нэ Авра́мо пхэндя́: ‘Чха́ва, пририпир, со ту́тэ сыс лачхо́ джиибэ́н, ке́ли ту са́нас джидо́, а Лазарёстэ сыс пхаро́ джиибэ́н. А какана́ ёв ада́й радынэ́лапэ, а ту мэнчынэсапэ. 26И апри́ч дава́ саро́, машки́р амэ́ндэ исын бидугноскиро пропэрибэн, со одолэ́, кон камэ́ла тэ пириджал адатхы́р кэ тумэ́, нашты́ тэ пириджан кэ амэ.’ 27Тэды барвало́ ману́ш пхэндя́: ‘Мэ мангав тут, Да́до, тэ бичхавэл Лазарёс кэ Мирэ́-дадэ́скиро кхэр; 28одо́й ма́ндэ пандж пша́ла, а ёв тэ патякирэл лэн тэ на явэ́н пэ дава́ штэ́то тэ мэнчынэнпэ.’ 29Нэ Авраа́мо пхэндя́ лэ́скэ: ‘Лэ́ндэ исын Мо́йза и проро́ки: мэк тэ шунэ́н лэн’. 30А барвало́ ману́ш пхэндя́: ‘Над, Да́до Аврааме! Нэ ко́ли вари-кон мулэ́ндыр тэ явэ́л кэ ёнэ, ёнэ рискирэнас пэ́скиро джиибэ́н кэ Дэвэ́л’. 31Нэ Авраа́мо пхэндя́ лэ́скэ: ‘Ко́ли ёнэ на кандэ́на Мойза́с и пророкэ́н, тэды хоць и вари-кон отджидёлас мулэ́ндыр, ёнэ на упатянас.’”
Seçili Olanlar:
Лука 16: ROMBALT
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
maintained by the United Bible Societies for the Baltic Romani Mission
