MATTHEW 1
1
Mash hedai d si shohshonaj g Jesus
An g neid g Luke 3:23-38
1Ia atsh mahsi g Jesus Christ jewed dahm k ab d amjedkamaj hegai t‑kekelibad ha‑kownalig mash hab chehgig David. Kush g Davidbad ab d amjedkamaj hegai mash d t‑shohshon ahchim Tutuligo ch hab chehgig Abraham.
In ant wo oꞌoha g ha‑chechgig hegam mash d Jesus Christ shohshonbad.
2Abraham atsh wa an alidt g Isaac.
Tsh g Isaac an alidt g Jacob.
Tsh g Jacob an ha aꞌalidt hegam Judah.
3Tsh g Judah an ha aꞌalidt g Perez ch Zerah heg ab mash d Tamar.
Tsh g Perez an alidt g Hezron.
Tsh g Hezron an alidt g Ram.
4Tsh g Ram an alidt g Amminadab.
Tsh g Amminadab an alidt g Nahshon.
Tsh g Nahshon an alidt g Salmon.
5Tsh g Salmon an alidt g Boaz heg ab mash d Rahab.
Tsh g Boaz an alidt g Obed heg ab mash d Ruth.
Tsh Obed an alidt g Jesse.
6Tsh g Jesse an alidt g David.
David atsh an alidt g Solomon heg ab mash d chum hohnigaj g Uriah.
7Tsh g Solomon an alidt g Rehoboam.
Tsh g Rehoboam an alidt g Abijah.
Tsh g Abijah an alidt g Asa.
8Tsh g Asa an alidt g Jehoshaphat.
Tsh g Jehoshaphat an alidt g Joram.
Kush ihda Joram d shonaj g Uzziah.
9Tsh g Uzziah an alidt g Jodam.
Tsh g Jodam an alidt g Ahaz.
Tsh g Ahaz an alidt g Hezekiah.
10Tsh g Hezekiah an alidt g Manassah.
Tsh g Manassah an alidt g Amos.
Tsh g Amos an alidt g Josiah.
11Kush ihda Josiah d ha‑shon hegam Jeconiah matsh eda gam hu hab i e juh g t‑shohshonbad Babylon kihhim wui.
12Jeconiah atsh an hahawa alidt g Shealtiel.
Tsh g Shealtiel an alidt g Zerubbabel.
13Tsh g Zerubbabel an alidt g Abiud.
Tsh g Abiud an alidt g Eliakim.
Tsh g Eliakim an alidt g Azol.
14Tsh g Azol an alidt g Zadok.
Tsh g Zadok an alidt g Akim.
Tsh g Akim an alidt g Eliud.
15Tsh g Eliud an alidt g Eliazar.
Tsh g Eliazar an alidt g Matthan.
Tsh g Matthan an alidt g Jacob.
16Tsh g Jacob an alidt g Joseph.
Kush ihda Joseph d kunaj hegai mo d Jesus jeꞌe ch hab chehgig Mary.
K ihda Jesus hab e aꞌaga Christ.
17Pegih, nt gamai giꞌik an oꞌoha g ha‑chechgig hegam mo d e‑oꞌogbad am i amjed mash eda am oimmed g Abrahambad ch am hugkam mash eda am oimmed g Davidbad. Kunt hab waꞌap gamai giꞌik an oꞌoha g ha‑chechgig hegam mo d e‑oꞌogbad heg i amjed ch gam hu hugkam matsh eda gam hu hab i e juh g t‑shohshon Babylon wui. Kunt gamai giꞌik an oꞌoha g ha‑chechgig hegam mo d e‑oꞌogbad heg i amjed ch gam hu hugkam matsh ab mahsi hegai mo hab e aꞌaga Jiosh si Kehsha (Christ).
Matsh mahsi g Jesus
An g neid g Luke 2:1-7
18Ia ant wo oꞌoha matsh has e juh matsh eda mahsi g Jesus Christ. Am amtsh i apꞌech matsh idam Joseph ch Mary wo e hohont. Tsh am hahawa s‑e mai mat g ali wo bei. 19K hab chuꞌig g chehanig mat chum pi wo ha bei g cheoj matp hab wo wa e juh. Kush g Joseph am wabsh si s‑ap oid g chehanig ch hekaj hab e elid mat pi wo be k wabshaba pi hedai wo ha ahgi. T hab pi wo si e el g Mary.
20Sh am oidahim ihda g Joseph. Kutsh am haha wabsh ab wui i e chehgi g anghil am chehchkij ed k hab kaij, “Joseph map ab d Davidbad amjedkam, am g wabsh s‑ap e tahtk k wo bei g Mary mat d wo m‑wehm kihkamk. Hekia S‑apꞌekam Gewkdag at hab juh ihda ali mat g Mary wo bei. 21Kut d wo cheojk. Kupt hab wo chehch Jesus mo hab d ahga ha‑Doꞌibiakam. Bat wo chehgigk nat pi wo ha doꞌibia g e‑hemajkamga ab ha‑chuꞌijig amjed.” Neh, bash kaij g anghil am Joseph wui.
22Wehs atsh wa hab e juh ihda hab masma mash wa hab masma heki hu hab kaij g Jiosh. Kelibad Jiosh haꞌichu i tashogiddam atki an oꞌoha mash wa hab kaij:
23Hema g si s‑ap chehia at wo bei g cheoj ali pi koi ab hu i miabidk g cheoj.
Kumt hab wo aꞌagad Manuel mo hab d ahga Jiosh o t‑Wehmaj. Isaiah 7:14
24Kutsh hekid am i nea g Joseph k atsh am ha hekaj hab e juh mash has i kaij g anghil ab wui matsh an bei g Mary. 25Sh wabshaba pi am hu hab masma e wehm kih mo g e wehm kihkam am hugkam mat hekid ip bei g ali. Tsh g Joseph hab hahawa chehch Jesus.
Seçili Olanlar:
MATTHEW 1: ood
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2010, Wycliffe Bible Translators, Inc. All rights reserved.
