Markus 3

Yesu Ku Mbantə Mdə Na Ka Tsiyari Mtəmtari

(Mat 12:9-14; Luk 6:6-11)

1Vir laga tə Yesu jaktə mwari akwa mbwar vəngkər səli, təng tsa wutə mdə laga anda ka tsiyari mtəmtari. 2Azha mji laga aɗi anda na akwa bara laku tə ka da wutə vəi shar Yesu, antə da ku wul ni ka hangkal abbər nuhum tsa ata mbantə mdə ni akwa Vir Ghərəmtaghəra ni. 3Antə Yesu ku pəla aka mdə na ka tsiyari mtəmtari ni, “Səɓəla ka gə si thləthlata akəma azi.” 4Antə tsa pəla aka mji ni, “Kalkal ka mdə hara ɓɗakkur akwa Vir Ghərəmtaghəra, nənga ka mdə hara ɗimikur ri? Kalkal ka mdə mbantə mpika mda, nənga ka mdə kəl mpika mdə ri?”

Amma da dləɓ səri ata kər. 5Antə Yesu wul ɗa ka ɗəffari ɓzəɓzari, kamnyar ɗəffari ku ɓzi ka duna ata kəra kər ɓəɓalkur arɗa. Antə tsa pəla aka mdə ni, “Ndəraɓəla tsiya ga.” Antə tsa ndəraɓəla tsiyari, antə tsiyari ku jaktə ndzi lapiya apa na hwatu. 6Antə mjir Farisi ku təra ləɓəla kazhar mbwar vəngkər səli ni, ka baɗitə pəli mnya kəga mjir Hirudus ata kəra laku tə da ata mzhi tsi Yesu.

Mji Ku Tsaptədzi Hang Ata Mnya Mandar Galili

7Antə Yesu ka mjirthlipərni ku təra ka mwari ata mnya Mandar Galili. Antə mji dlama dlama ku thlata akwa Galili ka nutə ni, har kəga mjir Yahudiya, 8ka Urushalima, ka Idumiya, ka aɓəla bwanda Thlyagha Jodan, ka tsuwa abwar Taya, Ka Sidon. Hang akwa nca ɗa si adzə Yesu ni kamnyar su tə da nggatə abbər tsa hara ni. 9Antə tsa pəla aka mjirthlipərni ka da ɗəmha alari shar na raka ar yimi ka tsa ləkwa ta mji asə ntsəntsəhə ni kamnyar mji ku hara hang kamta adzə ni. #Mar 4:1; Luk 5:1-3 10Kamnyar tsa ku mbantə mji hang, antə shanga mji na ka shilkayeri zumzum akwa ntsə lakur mwari adzə ni kamnyar ka da tsəkwar ni. 11Tsuwa kəlara sakatə mji na ka mambəlayeri na ɗimi ɗimi akwa dza ɗa ku wutə ni, da ana ndla akəmari ka pəla ka kuraku abbər, “Ga an Ɓzər Hyel.”

12Amma tsa tsaktə ɗa ka duna abbər da aɗiya ngkər ni aka mji wa.

Yesu Ku Carɓəla Mjirthlipərni Kumnya Suɗa

(Mat 10:1-4; Luk 6:12-16)

13Antə Yesu lətə kəra gar, ka kəgaɓəla mji tə tsa akwa barari, antə da ku mwari adzə ni, 14antə tsa carɓəla mji kumnya suɗa ka da ndzi ata kəma duku kəga tsa. Tsa akwa bara ka tsa dingngga thlentə ɗa ka da ra ngkər labar, 15ka da wutə dunar kədləɓəla shatanayeri. 16Nayeri ni an thləma mji na kumnya suɗə tə Yesu carɓəla ni.

Siman, natə Yesu vəta alari thləm Bitrəs,

17ka Yakub na ɓzər Zabadi, ka ɓzərma'ni Yahwana, natə tsa vəta ala ɗa thləm abbər Buwanarjis, watau maɗa' dlərər Hyel,

18ka Andrawus,

ka Filibus,

ka Barthlolomiu,

ka Mathliyu,

ka Thlomas,

ka Yakub na ɓzər Halfa,

ka Thladdeyus,

ka Siman na mdər Kanana,

19ka Yahuda Iskariyoti na ɓəli ni.

Yesu Ka Beyelzebul

(Mat 12:22-32; Luk 11:14-23; 12:10)

20Antə Yesu ku ləvəi akwa kəi laga. Antə mji hang jaktə tsaptədzi adzə ni, tsuwa mjirthlipərni aɗi mzhi wutə səm susəm wa. 21Sakatə mjir kutakəyir ɗa nggata apani, antə da mwari kamnyar ka da səvi ka tsa, kamnyar mji akwa pəla, “Ai kərari ku tsa!”

22Antə maləmayeri ar tsawur Musa na thlata ahar Urushalima pəla, “Ai Beyelzebul na kuthlir shatanayeri an akwa dzari. Tsuwa ka dunar Beyelzebul antə tsa akwa kədləɓəla shatanayeri ni.” #Mat 9:34; 10:25

23Antə Yesu ku kəga ɗa adzə ni ka gari ala ɗa ka karapu, abbər, “Shatan ata mzhi kədləɓəla Shatan nvwani ya? 24Ai ma kuthlikur ku ndəkəidzi ka bwa suɗa, kuthlikur ndaga aɗi ndzəndzi wa. 25Tsuwa ma mbwa ku ndəkəidzi ka bwa suɗa, mbwa ndaga aɗi ata thləthlatə wa. 26Antə ma Shatan ku ndəkəmtadzi ka ləkwa mpa aka kərari surni, ai tsa amzhi thləthlatə kəra wa, kamnyar an tsikərari.

27 “Mda aɗi na amzhi ləkwa kəyir mdə na ka duna ka famnya kari kutakəyirni wa, tar ma tsa ku mbwi mdə na ka duna ni katagu, kambəla tsa mzhi famnya kari kutakəyirni.

28 “I akwa pəla ala giri jirkur, shanga biku tə mji hara, ka shanga suayeri na ɗimi ɗimi tə mji pəla, mda ata tifəmta ala ɗa. 29Amma kəlara mdə na ata pəla su na ɗimi ata kəra Mambəl na Ɓɗakkarkara, mda aɗi ata tifəmta alari wala raka wa, kamnyar tsa ku hara biku na ba saka madi.” 30Yesu pəla apani kamnyar tə mji laga akwa pəla abbər, “Tsa ka mambəl na ɗimi.”

Mama' Yesu Ka Maɗama'ni

(Mat 12:46-50; Luk 8:19-20)

31Antə mama' Yesu ka maɗama'ni ku si ka thləthlata aɓəla, ka thlentə abbər ka mdə kəga ni. 32Tsuwa mji aɗi hang andzəndzi adzə Yesu ka kalaktə ni. Antə da pəla alari, “Nggədza mama' nga kəga maɗama' nga na shili aɓəla akwa bara wutə nga.”

33Antə Yesu shinau ala ɗa ka pəla, “Wan mama'na kəga maɗama'na nə ri?” 34Antə tsa wul mji na andzəndzi adzə ni ni ka pəla, “Nggədza, mama'na kəga maɗama'na! 35Kamnyar kəlara mdə na ata hara su tə Hyel hira tsa an ɓzərma'na, ka ngkwarma'na, ka mama'na.”

Seçili Olanlar:

Markus 3: KNB

Vurgu

Paylaş

Kopyala