Markus 1

Yahwana Mdər Hara Baptizma Ku Ngkər Labar Ar Hyel

(Mat 3:1-12; Luk 3:1-18; Yah 1:19-28)

1Ngəni an labar na msəra ata kəra Yesu Kristi na Ɓzər Hyel. 2Tsa baɗitə tsu apatə mdə ku rəbuta akwa kakaɗər naɓi Ishaya abbər,

“Nggədza I akwa thlentə mdərthlentərna akəma ga,

na ata ra namta ala gə laku.

3Kuraka mda akwa kəga akwa mtaku abbər,

‘Namtə gir laku aka Mthlaku,

namtə gir alari laku ni dwaɗu!’ ”

4Mdə wutə Yahwana na Mdər hara Baptizma akwa mtaku akwa ngkər labarər Hyel, abbər ka mji tubi, ka mdə hara ala ɗa baptizma, kamnyar ka mdə yafitə ɗa ata kəra bikər ɗa. 5Antə shanga mji na akwa tsəɗi Yahudiya, ka na akwa bərni Urushalima, ku mwari adzə Yahwana kamnyar ka da nggatə labarərni. Antə da ku pəlaɓəla bikayeri arɗa, antə Yahwana ku hara ala ɗa baptizma akwa Thlyagha Jodan.

6Yahwana ku hatə ləptu tə mdə nam ka shishir dləkəmau, ka mbwi kusarari ka sur mbwadzi tə mdə nam ka kəsəm. Tsuwa susəmərni an hawa ka cirməma na akwa mtaku. 7Antə tsa ngkər aka mji, ka pəla, “Mda aɗi na ata si aghəli na ku təramta ra ka dunar kuthlikur, natə ɓɗakkurərna aɗi mzhi kəi nggyarghəidzi kəi mpəli səwur ɓaɓiyirni wa. 8Arna I ana hara baptizma ala giri ka yimi, amma arni tsa ata hara ala giri baptizma ka Mambəl na Ɓɗakkarkara.”

Yahwana Ku Hara Baptizma Aka Yesu

(Mat 3:13-17; Luk 3:21-22)

9Vir laga Yesu thlata ahar Nazareth akwa tsəɗi Galili, antə Yahwana ku hara alari baptizma akwa Thlyagha Jodan. 10Təkəma sakatə Yesu ku səɓəla akwa yimi ni, antə tsa wutə vəi na amtazi ku kəlardzi. Antə Mambələr Hyel ku səghəi apa bukəl ka pwa ata kərari. 11Antə kuraku laga ku thlata amtazi akwa pəla, “Ga an Ɓzərna natə I hira! I akwa nggatə msərakurər nga ka duna.” #Mat 3:17; 12:18; Mar 9:7; Luk 3:22

Shatan Ku Ngkərtə Yesu

(Mat 4:1-11; Luk 4:1-13)

12Təkəma antə Mambəl ni mwantə Yesu akwa mtaku. 13Antə tsa hara vir nfwarkumari akwa mtaku tə Shatan akwa ngkərtə ni. Yesu ku ndzi ata vəi duku kəga mwaɓi, amma mjirthlentərhyel ku dlar ni.

Yesu Ku Baɗitə Kəthlərərni Akwa Tsəɗi Galili

(Mat 4:12-17; Luk 4:14-15)

14Aghəla sakatə mdə ku ngkəi Yahwana ka hambwa ni akwa pərsəna antə Yesu mwari akwa tsəɗi Galili ka ngkər labar na msəra ar Hyel. 15Tsa akwa pəla, “Saka ku hara! Kuthlikurər Hyel ku hara kudzəha, ka giri tubi ka hamta jiri aka labar na msəra ni.” #Mat 3:2

Mji Na Ntangkəma Akwa Nca Mjirthlipər Yesu

(Mat 4:18-22; Luk 5:1-11)

16Sakatə Yesu akwa mwa ata mnya Mandar Galili, antə tsa wutə Siman ka ɓzərma'ni Andrawus, akwa pu banggama akwa manda, kamnyar da mjir ngka kəlfa. 17Antə Yesu pəla ala ɗa, “Nu gir ra, antə I ata namtə giri ka giri ndzi mjir sənta ali mji.” 18Təkəma antə da zhar banggamar ɗa ka nutə ni.

19Sakatə tsa ɗar ləkəma raka antə tsa wutə maɗa' Zabadi suɗa, Yakub ka ɓzərma'ni Yahwana. Da akwa shar akwa nam banggamar ɗa. 20Təkəma tə Yesu wutə ɗa antə tsa kəga ɗa. Antə da ku zhar baba' ɗa Zabadi akwa shar ni, ka buɗayeri arni na ana kəthlər ala ɗa, ka nutə ni.

Yesu Ku Mbantə Mdə Laga Na Ka Mambəl Na Ɗimi

(Luk 4:31-37)

21Sakatə Yesu ka mjirthlipərni ku mwari akwa Kafarnahum, sakatə Vir Ghərəmtaghəra ku si antə tsa ləkwa mbwar vəngkər səli ka baɗitə thlipa aka mji. 22Antə mji ku ndatədzi ata kəra thlipərni ni, kamnyar tsa akwa thlipa ala ɗa apa mdə na ka kuthlikur, aɗi apa maləmayeri arɗa wa. #Mat 7:28-29

23Təkəma təng da wutə mdə laga na ka mambəl na ɗimi si akwa mbwar vəngkər səli arɗa ni, 24tsa akwa hara kuraku ka pəla, “Man tə ga akwa bara harari ka yeru ri, Yesu, gə na mdər Nazareth? Gə si kamnyar ka gə kurəmta yeru ya? I asəndə nga, ga an Mdə na Ɓɗakkarkara ar Hyel.”

25Amma Yesu ku mpa alari ka pəla, “Hartə mnya ga! Səɓəla kazhar ni!”

26Antə mambəl na ɗimi ni kənggərantə dza mdə ni, ka hara kuraku ka duna, ka səɓəla akwa dzari. 27Antə shanga mji ku ndatədzi, ka pəla aka nvwa ɗa abbər, “Man apani ri? Nggədza jili surthlipə laga bilən ja mara! Har mdə ngəni ka dunar tsawa aka mambəlayeri na ɗimi ɗimi ka da kələngkər alari!”

28Təkəma antə thləma Yesu ku tuwa akwa shanga diyayeri na akwa tsəɗi Galili.

Yesu Ku Mbantə Mama' Mwalar Siman Bitrəs

(Mat 8:14-15; Luk 4:38-39)

29Təkəma tə da səɓəla akwa mbwar vəngkər səli ni, antə da təra mwari aviyar Siman Bitrəs ka Andrawus, ata kəma duku ka Yakub ka Yahwana. 30Ata sakanda mama' mwalar Siman apəpəi ka dzəkdzəku, antə da gari alari ata kəra nggawakur mwala ni. 31Antə Yesu ku mwari adzə ni, ka tamtə tsiyari ka haptə ni. Antə dzəkdzəku ni ku kuri adzə ni. Antə mwala ni thlatə ka namta ala ɗa susəma.

Yesu Ku Mbantə Mji Hang

32Sakatə pci ku təri tə viri ku hara, antə mji səntə shanga mji na nggawa nggawa, kəga mji na ka shatanayeri akwa dza ɗa aka Yesu. 33Antə shanga mjir di nda tsaptədzi anyarfu. 34Antə Yesu ku mbantə mji hang na ka shilkayeri zumzum, ka kədləɓəla shatanayeri. Tsuwa tsa aɗi hir na laku aka mambəlayeri na ɗimi ɗimi ni ka da gari wa, kamnyar da asəndə ni.

Yesu Ku Ngkər Labarər Hyel Akwa Tsəɗi Galili

(Luk 4:42-44)

35Səɓəla ɗəpari ɗəɗəpə mbing, akəmata mji asəɓəla, antə Yesu thlatə ka mwari akwa vəi na kula mda, ka hara adduwa anda. 36Antə Siman ka mji na adzə ni ku ra pakə ni. 37Sakatə da ku wutə ni, antə da pəla alari, “Shanga mji akwa pakə nga.”

38Amma Yesu shinau ka pəla, “Ndzi ka mburu mwari akwa diyayeri damwa, kəi ngkər ndərər Hyel ala ɗa tsuwa, kamnyar an su na səntə ra.”

39Antə tsa dlarhə shanga tsəɗi Galili akwa ngkər labarər Hyel akwa mbwayeri ar vəngkər səli arɗa, ka kədləɓəla shatanayeri akwa dza mji. #Mat 4:23; 9:35

Yesu Ku Mbantə Mdə Laga

(Mat 8:1-4; Luk 5:12-16)

40Antə mdə laga na ka shilkər kəsəm dza ku si adzə Yesu, ka zuzuri akəmari akwa kiɗə kərari abbər, “Ma gə hira, ga ata mzhi namtə ra kəi ndzi ndəlang.”

41Kamnyar tə Yesu ku kətadzə ni ka duna, antə tsa ndərar tsiyari ka tsəkwar mdə ni, akwa pəla alari, “I ku hira, ndzi ndəlang!” 42Təkəma antə shilkər kəsəm dzari ni kura adzə mdə ni, tə tsa ku ndzi ndəlang. 43Antə Yesu ku salamtə ni, ka tsaktə ka duna abbər, 44“Ka gə wuta abbər ga aɗi ngkər su ngəni aka mdə wa. Amma mwari, ka gə ncantə kər nga aka prist. Tsuwa ka gə hamta saɗaka natə Musa thlamta kamnyar kəcimtadzər nga. Ka gə hara apani kamnyar ka mji sənda abbər ga ku mbantədzi.”

45Amma ləɓəlar mdə ni təkəma təng tsa baɗitə titil labar ni akwa kəlara bwa kula ngka səl. Antə su ngəni ku hara tə Yesu aɗi amzhi ləkwa kuta di ata nca mji kəra wa. Antə tsa ləkwa ndzi aɓəla ata hildi, amma wala apani tsu mji akwa thlata akwa bwa zumzum ka si adzə ni.

Seçili Olanlar:

Markus 1: KNB

Vurgu

Paylaş

Kopyala