Mathliyu 18

Wan Olta Shang Ri?

(Mar 9:33-37; Luk 9:46-48)

1Akwa saka nda antə mjirthlipər Yesu mwari adzə ni ka yu ni abbər, “Wan olta shang akwa kuthlikur na amtazi ri?” #Luk 22:24

2Antə Yesu ku kəga ɓzəngkyar laga raka, ka vu ni tə tsa thləthlata akwa nca ɗa. 3Antə tsa pəla, “I akwa pəla ala giri jirkur, ma giri aɗi palidzi ka ndzi apa maɗankyar wa, giri aɗi ata ləkwa kuthlikur na amtazi cap wa. #Mar 10:15; Luk 18:17 4Kəlara mdə na ata tərghəi kərari ka ndzi apa ɓzəngkyar ngəni, tsa an ata ndzi olta shang akwa kuthlikur na amtazi. 5Tsuwa kəlara mdə na ku dlu ɓzəngkyar na raka apa ngəni akwa thləmi, tsa ku dlu ra.”

Suayeri Na Ana Vu Mda Akwa Hara Biku

(Mar 9:42-48; Luk 17:1-2)

6 “Tsuwa kəlara mdə na ata hara ka pal akwa nca maɗankyar ngəni raka raka na ku hamta jiri ali ni, ka tsa hara biku, ata ndzi hərku alari ka mdə mbwatə bur na ola ata wulyari, ka psu ni akwa manda na zurang. 7Sha ku wutə duniya kamnyar tsa akwa ngkərtə mji ka da hara biku! Ku ndzi dwali ka ngkərtədzi wutə mda, amma sha ku wutə mdə natə ngkərtədzi ata si atar ni!

8 “Ma tsiya ga wala səla ga ata vu nga akwa hara biku, nthləmta ni, ka gə ndzəhəmta ni. Kamnyar kuji ka gə ləkwa mpikə na akur wa ka tsiya gə duku, ta mda apsu nga akwa u'u na akur wa ka tsiya gə suɗa wala səla gə suɗa. #Mat 5:30 9Tsuwa ma nca ga ata vu nga akwa hara biku, tuhurɓəla ni bu, ka gə psəmta ni. Ai kuji ka gə ləkwa mpikə na akur wa ka nca gə duku, ta mda apsu nga akwa u'u na akur wa ka nca gə suɗa.” #Mat 5:29

Karapu Ata Kəra Təma Na Ku Sha

(Luk 15:3-7)

10 “Ka giri hara hangkal ta giri arutə wala pal akwa nca maɗankyar na raka raka ni, kamnyar I akwa pəla ala giri, mjirthlentərhyel arɗa akwa wul kəma Təddarna na amtazi tədəku. #18:10 Bwadukwa kakaɗayeri na waci ka vəras 11 ni na pəla “Kamnyar Ɓzər mdə ku si ka tsa bara su na ku sha ka tsa mbantə ni.”

12 “Gə tamatə man tə mda ata harari ri? Ma mdə laga ka təma aru pal, antə pal akwa nca ɗa sha alari, tsa aɗi ata zhar na əmdləkumari ka əmdla ni akwa ɓəla ata gar ni, ka tsa ra pakə na sha duku ni wa ya? 13Tsuwa ma tsa ku wutə ni, I akwa pəla ala giri jirkur, tsa ata ndzi ka kucali ata kərari, təramta na əmdləkumari ka əmdla na aɗi sha wa ni. 14Apani tsuwa, Təddar giri na amtazi aɗi hir ka wala pal akwa nca maɗankyar na raka raka ni sha wa.”

Ma Ɓzərma' Nga Ku Hara Biku Ala Ga

15 “Ma ɓzərma' nga ku hara biku ala ga, ka gə mwari adzə ni ka gə ncanta alari vəi sharni akwa daɓwa giri ka tsa, tə giri shi giri. Ma tsa ku psi thləm ala ga, giri ata jaktə ndzi mdə ka ɓzərma'ni. #Luk 17:3 16Amma ma tsa aɗi psi thləm ala gə wa, ka gə kətə mdə pal wala mji suɗa adzə nga, kamnyar ka kəlara ndər sə ndzi jiri atar seɗar mji suɗa wala makər. 17Ma tsa aɗi hir psi thləm ala ɗa wa, ka gə jikata aka ikələziya. Antə ma har tsa nggəlar ta psi thləm aka ikələziya, ka gə namtə ni apa mdə na aɗi səndə Hyel wa, wala mdər dlu tsəma.”

Ata Kəra Mbwi Ndər Ka Shari Ndər

18 “I akwa pəla ala giri jirkur, kəlara su tə giri ku mbwi akwa duniya, suari ata ndzi mbwimbwiyari amtazi, tsuwa kəlara su tə giri ku mpəli akwa duniya, suari ata ndzi mpəlimpəliyari amtazi. #Mat 16:19; Yah 20:23

19 “I akwa jaktə pəla ala giri ka damwa abbər, kəlara sakatə mji suɗa akwa nca giri akwa duniya ku paktə kər ata kəra kəlara su tə giri akwa kiɗari, Təddarna na amtazi ata hara ala ɗa suari. 20Kamnyar kəlara vəi tə mji suɗa wala makər ku tsaptədzi akwa thləmi, I akwa nca ɗa.”

Karapu Ata Kəra Mdə Na Ana Yafitə Su Wa

21Antə Bitrəs si adzə Yesu ka pəla alari, “Mthlaku, ka yiɗau antə ɓzərma'na ata hara biku ali kəi yafitə nə ri? Ka murfə ya?” #Luk 17:3-4 22Antə Yesu pəla alari, “I aɗi akwa pəla ala gə ka murfa wa, amma murfə vəyari murfəkumari. 23Kamnyar ngəni mda ata gira kuthlikur na amtazi ka kuthli laga na bara ka jikaɓəla gənarni na akəla mjir kəthlər alari. 24Sakatə tsa baɗitə jikari, antə mdə sənta alari mdə laga na ka təmbələrni ata kərari natə tsa amzhi ntəmtari akwa shanga ndzəndziyir mpikari wa. 25Təng tə tsa aɗi mzhi ntəmta təmbəl ni wa, antə kuthli ni tsawa abbər ka mdə ɗələmta ni, ka mwalankiɗa kəga maɗa'ni, ka shanga su tə tsa kəgari, kamnyar ka tsa ntəmta təmbəl na ata kərari ni. 26Antə mdə ni zuzuri ka ɓunjari akəma kuthli ni, akwa kiɗə ni abbər, ‘Mdərkəi, mbwi ɗəffa ga ali, I ata ntəmta ala gə shanga su na aɗi.’ 27Antə kuthli ni ku kətadzə ni, ka psi ni, ka yafitə alari təmbəl ni.

28 “Amma təkəma tə mdər kəthlər ngəni ləɓəla, antə tsa mwari ka lətə kəra pal akwa nca mdər kəthlər nvwani, natə tsa akwa nu ni təmbəl kwaba laga raka daci. Tsa tamtə ni ata ghwarghwarari, ka pəla alari, ‘Ntəmta ali təmbələrna na ata kəra gə ni.’ 29Antə mdə ni ku ndla akəmari ka kiɗə ni abbər, ‘Mbwi ɗəffa ga ali, I ata ntəmtari ala ga.’ 30Amma mdər kəthlər na ntangkəma ni ku nggəlari, ka mwantə ni akwa pərsəna, abbər tar ma mdə ni ntəmta alari təmbələrni. 31Sakatə mjir kəthlər nvwa ɗa ku wutə su na hara ni, antə ɗəffa ɗa ɓzi ka duna. Antə da mwari ka jikatə shanga su na hara ni aka kuthli ni. 32Antə kuthli ni kəga ni ka pəla alari, ‘Gə mdər kəthlər na kəmanggar! I yafita ala gə shanga təmbəl ni, kamnyar tə ga ku kiɗa akəli. 33Kaha, kamnyar mi tə ga amzhi kətadzə mdər kəthlər nvwa nga apatə I kətadzə ngə wa ri?’ 34Antə ɗəffa kuthli ku ɓzi ka duna, tə tsa hamta mdər kəthlər ngəni ni aka mjir ɓəla pərsənayeri, ka da hara bwani alari, har tar ma tsa ku ntəmta shanga təmbəl na ata kərari. 35Tsu apani antə Təddarna na amtazi ata hara aka kəlara pal akwa nca giri, ma giri aɗi akwa yafitə ɓzərma' giri akwa ɗəffa giri wa.”

Seçili Olanlar:

Mathliyu 18: KNB

Vurgu

Paylaş

Kopyala