GÉNESIS 5
5
Adanpa mirayninkuna
1Kaymi Adanpa miraynin qelqa. Diosqa runata kamaspa kikin Diosman rikch'akuqtan ruwarqan. 2Qharita warmitawan kamarqan, hinaspan paykunata samincharqan. Kamasqa kasqanku p'unchaytaq paykunata “Runa” nispa suticharqan.
3Adanqa pachak kinsa chunka watayoq kashaspataq, churiyarqan huk qhari wawata payman rikch'akuq rikch'ayniyoqta, suticharqantaq Set-ta. 4Set-ta churiyasqan qhepatataq Adanqa kawsarqan pusaq pachak watatawanraq, churiyallarqantaq qhari wawakunatapas warmi wawakunatapas. 5Adanmi kawsarqan isqon pachak kinsa chunkayoq watakama, hinaspan wañukapurqan.
6Setmi pachak phisqayoq watayoq kashaspa churiyarqan Enosta. 7Enosta churiyasqan qhepatataq Setqa kawsarqan pusaq pachak qanchisniyoq watatawanraq, churiyallarqantaq qhari wawakunatapas warmi wawakunatapas. 8Setmi kawsarqan isqon pachak chunka iskayniyoq watakama, hinaspan wañukapurqan.
9Enosmi isqon chunka watayoq kashaspa churiyarqan Kenanta. 10Kenanta churiyasqan qhepatataq Enosqa kawsarqan pusaq pachak chunka phisqayoq watatawanraq, churiyallarqantaq qhari wawakunatapas warmi wawakunatapas. 11Enosmi kawsarqan isqon pachak phisqayoq watakama, hinaspan wañukapurqan.
12Kenanmi qanchis chunka watayoq kashaspa churiyarqan Mahalaleelta. 13Mahalaleelta churiyasqan qhepatataq Kenanqa kawsarqan pusaq pachak tawa chunkayoq watatawanraq, churiyallarqantaq qhari wawakunatapas warmi wawakunatapas. 14Kenanmi kawsarqan isqon pachak chunkayoq watakama, hinaspan wañukapurqan.
15Mahalaleelmi soqta chunka phisqayoq watayoq kashaspa churiyarqan Jaredta. 16Jaredta churiyasqan qhepatataq Mahalaleelqa kawsarqan pusaq pachak kinsa chunkayoq watatawanraq, churiyallarqantaq qhari wawakunatapas warmi wawakunatapas. 17Mahalaleelmi kawsarqan pusaq pachak isqon chunka phisqayoq watakama, hinaspan wañukapurqan.
18Jaredmi pachak soqta chunka iskayniyoq watayoq kashaspa churiyarqan Enokta. 19Enokta churiyasqan qhepatataq Jaredqa kawsarqan pusaq pachak watatawanraq, churiyallarqantaq qhari wawakunatapas warmi wawakunatapas. 20Jaredmi kawsarqan isqon pachak soqta chunka iskayniyoq watakama, hinaspan wañukapurqan.
21Enokmi soqta chunka phisqayoq watayoq kashaspa churiyarqan Matusalenta. 22Matusalenta churiyasqan qhepatataq Enokqa kinsa pachak watatawanraq kawsarqan Diospa munayninta ruwaspallapuni, churiyallarqantaq qhari wawakunatapas warmi wawakunatapas. 23Enokmi kawsarqan kinsa pachak soqta chunka phisqayoq watakama. 24Paymi Diospa munayninta ruwaspallapuni purirqan, hinaspan mana kapurqanchu, Dios payta pusakapusqanrayku.
25Matusalenmi pachak pusaq chunka qanchisniyoq watayoq kashaspa churiyarqan Lamekta. 26Lamekta churiyasqan qhepatataq Matusalenqa kawsarqan qanchis pachak pusaq chunka iskayniyoq watatawanraq, churiyallarqantaq qhari wawakunatapas warmi wawakunatapas. 27Matusalenmi kawsarqan isqon pachak soqta chunka isqonniyoq watakama, hinaspan wañukapurqan.
28Lamekmi pachak pusaq chunka iskayniyoq watayoq kashaspa qhari wawata churiyarqan, 29suticharqantaq Noeta:
—Kaymi ruwayninchismanta samarichiwasun, kay pachata Señor Diospa ñakasqanraykun sinchita llank'ashanchis, nispa. 30Noeta churiyasqan qhepatataq Lamekqa kawsarqan phisqa pachak isqon chunka phisqayoq watatawanraq, churiyallarqantaq qhari wawakunatapas warmi wawakunatapas. 31Lamekmi kawsarqan qanchis pachak qanchis chunka qanchisniyoq watakama, hinaspan wañukapurqan.
32Noetaq phisqa pachak watayoq kashaspa churiyarqan Semta, Kamta, Jafet-tawan.
Seçili Olanlar:
GÉNESIS 5: QC88
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Biblia en Quechua de Cuzco © Sociedades Bíblicas Unidas, 1988.