Genesis 36
36
Tsi Wahahwatsiratátie Ne Esau
1Ne ki꞉ken tsi wahahwatsiratátie ne Esau (ne ó꞉ni ronwanaʼtónhkhwa Edom). 2Esau Canaanró꞉non tsonathonwí꞉senʼs wahatateniákten: Adah, ne ne Elon Hitró꞉non shakoièn꞉ʼa: Oholibamah, ne akoièn꞉ʼa ne Anah né shakoièn꞉ʼa ne Zibeon ne ne Hivró꞉non, 3tánon né Basemath, ne ne shakoièn꞉ʼa ne Ishmael; ne iatenoʼsénha ne Nebaioth. 4Adah ne wahonákeratste ne Eliphaz ne ro tiniakón꞉ne ne Esau; tánon ne Basemath ne ne wahonákeratste ne Reuel; 5tánon ne Oholibamah wahonákeratsteʼ ne Jeush, Jalam, ó꞉ni ne Korah. Ne kí꞉ken ne Esau raonekenhteronʼtsheraʼshón꞉ʼahs ne ne tsi ionhontsá꞉te ne Canaan nón꞉we nihonanahkerá꞉ton.
6Eʼthó꞉ne ne Esau iahshakoiaʼténhawe ne rotiniákonʼs, ó꞉ni ne raonekenhteronʼtsheraʼshón꞉ʼahs, ne raoiaʼtaseʼtsheraʼshón꞉ʼahs, tánon ratikwé꞉kon ne skátne ratiʼterón꞉tahkwe ne raonónhskon tsi nón꞉we nihonanataièn꞉tahkwe, ne raotshenenʼó꞉konʼs tiohnhónskwahronʼs, kontikwé꞉kon tsi ní꞉kon ronahskwahièn꞉tahkwe, tánon akwé꞉kon ne kaientahtshera tsi nihoièhnahon ne tsi watonhontsá꞉ien ne Canaan; tánon aí꞉nón nón꞉we tionhontsá꞉ien niahá꞉re ne ne aí꞉non tahiátereke ne iatateʼkén꞉a Jacob. 7Aseʼkénh só꞉tsi wé꞉so rotiientahtsheraièn꞉tahkwe ne skátne ahninákereke; nonhóntsa tsi nón꞉we nihninákere iáh thakakwé꞉ni ne taiakóhshnieʼne tiorí꞉wa tsi wé꞉so rotinahskwaièn꞉tonʼs. 8Katíʼ ne Esau tsi ionontahrónnion kanakerahserá꞉ien ne Seir nón꞉we nahatatíʼteron; né Esau ne ne Edom ó꞉ni ronwá꞉iats.
9Ne kí꞉ken ne Esau tsi niahahwatsiratátie, ráonha ronwahsotkénhen né Edomró꞉nonʼs ne ne tsi ionontahrónnionʼs kanakerahserá꞉ien ratinákerehkwe ne Seir nón꞉we. 10Né kí꞉ken tsi nihotihsennoʼtén꞉shonʼs ne Esau raonekenterontsheraʼshón꞉ʼahs: Eliphaz ne ne Adah roièn꞉ʼa ne ne Esau ró꞉ne; Reuel, ne roièn꞉ʼa ne Esau ó꞉ia ró꞉ne Basemath. 11Ne raonekenhterónʼtsheraʼshón꞉ʼahs ne Eliphaz ne ne Teman, Omar, Zepho, Gatam, tánon ne Kenaz. 12(Ne Timna ne tehniiahshé꞉ne ne Eliphaz, ne ne Esau roièn꞉ʼa; ne Timna tánon ne Eliphaz ne ronwaièn꞉ʼa ne Amalek.) Né kí꞉ken naonekenhteronʼtsheraʼshón꞉aʼhs ne Adah, ne ne Esau ró꞉ne. 13Ne ne kí꞉ken raonekenhteronʼtsheraʼshón꞉ʼahs ne Reuel: Nahath, Zerah, Shammah, tánon ne Mizzah. Né kí: ken naonekenhteronʼtsheraʼshón꞉ʼahs ne Esau ró꞉ne, Basemath. 14Ne kí꞉ken raonekenhteronʼtsheraʼshón꞉ʼahs ne Esau ró꞉ne ne ne Oholibamah, ne shakoièn꞉ʼa ne Anah roièn꞉ʼa, né shakoteré꞉ʼa ne Zibeon: tánon áhsen nahotiwiraièn꞉taʼne ne Esau tánon ne Oholibamah ne ne Jeush, Jalam, tánon ne Korah.
Ne Raotiʼtaraʼshón꞉ʼahs Tánon Rontinontí꞉ioʼs Ne Edom Nón꞉we
15Ne kí꞉ken ne raotiʼtaraʼshón꞉ʼahs ne raonekenteronʼtsherashónhas ne Esau. Ne raonekenhteronhʼtsheraʼshón꞉a ne Eliphaz ne ne thakowá꞉nen ne Esau roièn꞉ʼa: tsi nihotiʼtaroʼtén꞉shonʼs Teman, Omar, Zepho, Kenaz, 16ne Korah, Gatam, tánon ne Amalek; tsi nihotiʼtaroʼtén꞉shonʼs ne Eliphaz ne tsi watonhontsá꞉ien ne Edom; ne ne aonekenhteronʼtsheraʼshón꞉ʼahs ne Adah. 17Ne kí꞉ken raonekenhteronʼtsheraʼshón꞉aʼhs ne Esau roièn꞉ʼa Reuel: ne raotitá꞉raʼs Nahath, Zerah, Shammah, tánon Mizzah; né kí꞉ken ne raotitá꞉raʼs ne tsi ionhontsá꞉ien ne Edom; ne naonekenhteronʼtsheraʼshón꞉aʼhs Basemath Esau ró꞉ne. 18Ne kí꞉ken ne naonekenhteronʼtsheraʼshón꞉aʼhs ne Esau ró꞉ne Oholibamah: ne raotiʼtaraʼshón꞉ʼahs ne Jeush, Jalam, tánon ne Korah; ne kí꞉ken ne raotiʼtaraʼshón꞉ʼahs tsi niiakonakerátston ne Esau ró꞉ne Oholibamah, né shakoièn꞉ʼa ne Anah. 19Né Kih ken raonekenterón꞉tsherashonhas ne Esau (Ne ne Edom ronwá꞉iats), tánon ne kí꞉ken ne raotiʼtaraʼshón꞉aʼhs.
20Ne kí꞉ken raonekenhteronʼtsheraʼshón꞉ʼahs ne Seir ne ne Horʼró꞉non, ne ne sihatinakereʼón꞉we tsi ionhontsá꞉ien: Lotan, Shobal, Zibeon, Anah, 21Dishon, Ezer, tánon Dishan; ne kí꞉ken ne raotiʼtaraʼshón꞉ahs ne Horʼró꞉nonʼs, ne raonekenhteronʼtsheraʼshón꞉ʼahs ne Seir ne tsi ionhontsá꞉en ne Edom. 22Ne raonekenhteronʼtsheraʼshón꞉ʼahs ne Lotan ne ne Hori tánon Heman; tánon ne Lotan ne iatenoʼsénha ne Timna. 23Né kí꞉ken raonekenhteronʼtsheraʼshón꞉ʼahs ne Shobal: Alvan, Manahath, Ebal, Shepho, tánon Onam. 24Ne kí꞉ken ne Zibeon raonekenhteronʼtsheraʼshón꞉ʼahs: ne ne Aiah, tánon ne Anah; tánon ne anah ráonha rotshénrion ne tetiohnekóntieʼs iohnekóthahkwe ne kahentaʼkehkó꞉wa, ne ne sihshakoʼnikón꞉rarahkwe ne roʼníha raotshenenʼó꞉konʼs tewahónhtes ne tsi konwatiʼterontáhkhwah ne kahentowanén꞉ke. 25Ne kí꞉ken ne shakoioʼokón꞉ʼa ne Anah: ne ne Dishon, tánon Oholibamah. 26Ne kí꞉ken ne raonekenhteronʼtsheraʼshón꞉ʼahs ne Dishon: Hemdan, Eshban, Ithran, tánon Cheran. 27Ne kí꞉ken raonekenhteronʼtsheraʼshón꞉aʼhs ne Ezer: Bilhan, Zaavan, tánon Akan. 28Ne kí꞉ken ne raonekenhteronʼtsheraʼshón꞉ʼahs ne Dishon: Uz ó꞉ni ne Aran. 29Ne kí꞉ken ne raotiʼtaraʼshón꞉ʼahs ne Horʼró꞉nonʼs: Lotan, Shobal, Zibeon, Anah, 30Dishon, Ezer, tánon Dishan; ne kí꞉ken ne raotiʼtaraʼshón꞉ʼahs ne Horʼró꞉nonʼs, ne tsi ionhontsá꞉ien ne Seir.
31Né kí꞉ken ne rontinontí꞉ioʼs ne tsi ionhontsá꞉ien ne Edom, ne nohén꞉ton nón꞉ka ne ronnontí꞉iohkwe ahshakoterihwatsteríhsthaʼse ne Israerʼró꞉nons. 32Ne Beor ne roièn꞉a ne Bela ne ronnontí꞉ioʼhkwe ne Edom, tsi niiohsennó꞉ten ne raonà꞉takon ne ne Dinhabah. 33Bela wahrènheie, tánon Jobab ne roièn꞉ʼa ne Zerah ne ne Bozrah nón꞉we ráonha sahatenontí꞉iohste ne raonaktá꞉ke. 34Jobab wahrènheie, tánon ne Husham tsi watonhontsá꞉ien ne Temanró꞉nons nón꞉we nihanákerehkwe ne tonsahonaktáhkwen tsi sahatenontí꞉iohste. 35Husham wahrènheie, tánon ne Hadad né roièn꞉ʼa ne Bedad, ráonha shakoʼshénnion ne Midianró꞉nonʼs ne tsi kanakerahserá꞉ien ne Moab, ráonha tonsahonaktáhkwen tsi sahatenontí꞉iohste, tsi niiohsennó꞉ten ne raonà꞉takon ne ne Avith. 36Hadad wahrènheie, tánon Samlah ne ne Masrekah nón꞉we nihanákerehkwe ráonha tonsahonaktáhkwen tsi sahatenontí꞉iohste. 37Samlah wahrènheie, tánon Shaul ráonha sahatenontí꞉iohste tsi tonsahonaktáhkwen né Rehoboth ne ne Euphrates kaniataratátie. 38Shaul wahrènheie, tánon Baal-hanan ne roʼníha ne ne Achbor ráonha tonsahonaktáhkwen tsi sahatenontí꞉iohste. 39Baal-hanan wahrènheie, né roʼnihkénhen ne ne Achbor, tánon Hadar tonsahonaktáhkwen tsi sahatenontí꞉iohste, Pau konwá꞉iatskwe ne raonà꞉takon; ne ró꞉nehkwe ne ne Mehetabel konwá꞉iatskwe, ne shakoiènʼkénhen ne Matred, tánon ne ne Mezahab shakoteré꞉ʼa.
40Né kí꞉ken tsi niiotihsennoʼtén꞉shonʼs ne Esau raoʼtaraʼshón꞉aʼhs ne shatihwatsirátshonʼs tánon tsi nón꞉we nihatinakerénion tsi nihotihsennoʼtén꞉shonʼs: ne ne Timna, Alvah, Jetheth, 41Oholibamah, Elah, Pinon, 42Kenaz, Teman, Mibzar, 43Magdiel, ó꞉ni ne Iram; ne kí꞉ken ne raotiʼtaraʼshón꞉ʼahs ne Edom (ne ne Esau, ráonha kaʼníhsera í꞉ken ne Edomró꞉nons), ne tioianénha tsi nón꞉we nihatinakerénion ne tsi ionhontsá꞉ien ronatsenawáston.
Seçili Olanlar:
Genesis 36: MHK
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Matthew, Mark, Luke, and John were translated by Sosé Onasakenrat and published by the Montreal auxiliary of the British and Foreign Bible Society in 1880. The text of these books is in the public domain.
The text of the following books is copyright © Kanien’kehá:ka Aotióhkwa Tehatiwennaténie’s Kahiatonhseratokénhti (Mohawk Bible Translation Team): 2 Corinthians (2001), Jonah (2002), Ruth (2005), Daniel (2005), Esther (2006), and Proverbs (2007).
All other text is copyright © Harvey Satewas Gabriel, 2023.