SAN MATEO 6
6
Jesús apkeltenneykha ektémakxa nentamheykha ektakmela
1“Nágkóllána aksa kéltamheykha ektakmela yakwayam enxoho kólxekmósho kéltahakxa énxet'ák.#Mt 23.5. Kéltemék agkok kéxegke xa, megkések sat xama aksok apméso naksa Kélyap apha nak néten.
2“Kélpasmeyk agkok kéxegke m'a énxet'ák ekha nak eyéméxchexa aksok, nágkóltekkesha aksa amya'a ekyókxoho yókxexma, nágkólteme apkeltémakxal'a énxet'ák apkelmeyókásamákpohol'a apkeltémakxa, cham'a apchakneykekxexa nak judíos tén han ma'a ámay nepyeseksa tegma apwányam nak, yakwayam enxoho katakmelek apkelxénamap xa énxet'ák nak. Apkelxakék aksok apkelxawé naksa eñama aptamhéyak xa. Nakso' xa sektahakxa nak seláneya kéxegke. 3Kélpasmeyk agkok kéxegke m'a énxet'ák ekha nak eyéméxchexa aksok, nágkóltekkesha aksa amya'a, nágkóltennasha nahan ma'a kélxegexma'a kélagko' la'a; 4kólyexaxkoho sat cha'a kóltehek xa, étak sat kéltahakxa kéxegke m'a Kélyap apha nak néten, cham'a kélyexamaxkoho nak cha'a kélláneya, egkések sat kéxegke aksok apméso naksa.
Jesús sẽlxekmóso ektémakxa nempeywa nelmaxnagko
(Lc 11.2-4)
5“Kéltemék agkok kéxegke nempeywa nelmaxnagko, nágkólteme aksa m'a aptamheykegkaxa nak énxet'ák apkelmeyókásamákpoho nak apancha'awók apkeltémakxa, cham'a apmáheyol'a etnamha kañe' apchakneykekxexa judíos aptaha enxoho nempeywa nelmaxnagko, tén han etnegwók ma'a máseyak yókxexma apheykegkaxal'a énxet'ák, yakwayam enxoho kataxchek aptahakxa.#Lc 18.10-14. Apkelxakék aksok apkelxawé naksa eñama aptamhéyak xa. Nakso' xa sektahakxa nak sekpeywa seláneya kéxegke. 6Kéltemék agkok kéxegke nempeywa nelmaxnagko, kóltaxnegwakxa kañe' kélxagkok, kólápekxoho nahan átog, kólmaxna Kélyap Dios aptaha nak kélxegexma neyseksók kélteme nempeywa nelmaxnagko kélxakko'. Egkések sat nahan aksok apméso naksa m'a Kélyap Dios aptaha nak apwetayo neyseksók kélyexamaxkoho kélteme nempeywa nelmaxnagko.
7“Nágkóltakheksoho nahan cha'a kélpeywa kéltaha enxoho nempeywa nelmaxnagko, cham'a nempeywa naksal'a, nágkólteme aptamheykegkaxa nak ma'a énxet'ák apkelya'áseyam nak Dios, cham'a apkenagkama nak hegeyxhok Dios nentaha enxoho ekwenakte nempeywa nelmaxnagko. 8Nágkólteme aksa kéxegke aptamheykegkaxa nak xa énxet'ák nak, hakte nano' ey'asagkohok kélyap eyéméxchexa aksok kéxegke. 9Kéméxchek kóltehek kéltaha enxoho nempeywa nelmaxnagko s'e:
‘Egyap negko'o apha néten,
kólpagkanchesek sat apwesey exchep.
10Yána sat kawak yakwayam kóltemésesek
Wese' apwányam xép,
kalanaxchek sat xép apmopmenyého keso náxop, ekhawo
kéltemésesamakxal'a m'a néten.
11Hegmés negko'o nento keso ekhem nak se'e.#Pr 30.8-9.
12Ná eyakmagkásekxa aksa aksok ekmaso
nenlané nak negko'o, ekhawo
nentémakxa nak negko'o magyakmagkáseykekxa cha'a
sentemésesakxa ekmaso egmók.
13Nágyoho aksa hegáhapwak negko'o segyekkónma,
wánxa agkok, hegeys negko'o m'a kelyekhama'.’
14“Hakte agkok kólyakmagkáseykxak kéltemésesakxa ekmaso kéxegke, meyakmagkásekxék sat nahan kéxegkáxa kéltémakxa m'a Kélyap apha nak néten. 15Kélyakmagkásekxeyk agkok aptemésesakxa ekmaso kélmók, eyakmagkásekxak sat nahan kéltémakxa megkólya'asáxma m'a Kélyap apha nak néten.#Mr 11.25-26.
Jesús apkelxekmóso manto nento ólpeykeshok Dios
16“Agkok kóltáwak kélto kélpeykáso Dios, nágkayakhapmakha aksa kélwáxok, nágkólteme aksa aptamheykegkaxal'a énxet'ák apkelmeyókásamákpohol'a apancha'awók apkeltémakxa, máxa katnehek ma'a elyakhápencha'a enxoho apwáxók yakwayam enxoho étak énxet'ák apkelpeykáso Dios yetlo metéyak aptéyak. Apkelxawágkek aksok apkelxawé naksa eñama aptamhéyak xa. Nakso' xa sektahakxa nak seláneya kéxegke. 17Agkok kóltáwak kélto kélpeykáso enxoho Dios, kólyenyes kélnát yegmen, kóltakmelches nahan ekhéyak kélwa', 18yakwayam enxoho mékpelchek énxet'ák megkóltawa kélto kélpeykáso Dios. Wánxa sat ey'asagkohok ma'a Kélyap apha nak néten, aptaha nak han kélxegexma neyseksa kélteme kéxakko' xa, egkések sat nahan aksok apméso naksa kéxegke.
Nenxamáseyak aksok ma'a néten
(Lc 12.33-34)
19“Nágkólxámasák aksok kélagkok keso náxop, ekhakxa nak askok yakwayam katwok, életsagkásamáxchexa nak han cha'a aksok,#Stg 5.2-3. apkelántaxnamakxa nak han cha'a apkelmenyexma yakwayam elmenyexek aksok. 20Akke tásek kólxámaksek aksok kélagkok ma'a néten megkatsagkasamakxal'a aksok askok, cham'a megkatsagkásamáxchexal'a aksok, cham'a melántaxnamakxal'a anhan cha'a apkelmenyexma. 21Hakte, kaxénmakha cha'a kélwáxok ma'a ekhágkaxa enxoho ekxámokma aksok kélagkok.
Chálewaso ekyetno nak negyókxa
(Lc 11.34-36)
22“Egakta'ák negko'o ekteme chálewaso ekyetno keso negyókxa; keltásek agkok kélakta'ák, keytek sat elseyexma agkok ekyókxoho kélyókxa; 23wánxa agkok, asagcha'ak agkok kélakta'ák, kasawhekxohok sat ekyaktesóxma ekyókxoho kélyókxa. Yetneyk agkok kéxegke ekyaktesóxma yakwayam eykhe keytek ma'a elseyexma, kayaktéshok agko' nahan exma.
Dios tén han selyakye
(Lc 16.13)
24“Méko kawának kalanha apkánet kélwese'e, hakte kóltaknók ma'a pók, keñe kalkohok kélwáxok ma'a pók, esenhan kóltehek megkólyenyaweykha m'a pók, keñe kólwanyohok ma'a pók. Megkólwanchek kéxegke kólhéshok mók kélyetlo xa ánet nak, Dios tén han selyakye.
Dios apkeltakmelcheso apketchek
(Lc 12.22-31)
25“Ekeso eñamakxa sektaha nak ko'o seláneya kéxegke s'e: Nágkatne aksa ekxeyenma kélwáxok, yaksak sat kexaha antók, yaksak sat kexaha anhan agyenek, nágkaxénmakha nahan kélwáxok ma'a yakwayam nak kólántaxnekxak neyseksók kélha. Hakte ennókek negyennakte kaxnók ma'a nento, keñe m'a negyókxa nak megkaxnawok apáwa. 26Kóllano nahan náta elchempeykencha'a nak néten, yawanchek kaknekxak aktek, yawanchek nahan kanakxek ekyexna, yawanchek nahan kaxatmok aksok eknakxo m'a tegma kélxátamakxa nak; wánxa agkok, egkéshok eyke cha'a ektéyak ma'a Kélyap Dios apha nak néten. Ennókek eyke kéxegke, kaxnók náta. 27Megkólwanchek kéxegke kólwenaktéshok kélha keso náxop, xámok eykhe katnehek ekxéneykha kélwáxok kólmawhok kólwenaktéshok kélha.
28“¿Yaksak ektaha ekxéneyncha'a nak kélwáxok apáwa? Kóllano hana ektémakxa nak éktega pánakte exnók yókxexma, megkaltamheykha, megkalyetnámáxche nahan. 29Wánxa agkok, ektahak ko'o seláneya kéxegke s'e, axta exnágweykekxohok wese' Salomón#1 R 10.4-7; 2 Cr 9.3-6. ektémakxa nak eltakmela aksok apagkok xama enxoho xa pánakte exnók nak. 30Aptemésesek agkok nahan aptaxneyáseykekxa ektaxno Dios pánakte exnók xa ektaha nak, cham'a élakna nak yókxexma xama ekhem agko', keñe mók ekhem kólchexak nátex, eyeykhásamhok sat eyke ekxéneykha apwáxok kéxegke Dios kéltaha nak ekmasextoho kélteme megkólya'áseyam. 31Nágkaxén aksa kélwáxok kóltehek kélpeywa s'e: ‘¿Yaksak sat antók?’ esenhan kóltehek kélpeywa s'e: ‘¿Yaksak sat agyenek?’ esenhan kóltehek kélpeywa s'e: ‘¿Yaksak sat ólántaxnekxak?’ 32Cháxa ekyetnakhasamol'a apwáxók énxet'ák apya'áseyam Dios ekyókxoho xa aksok nak, yetneyk eyke kéxegke Kélyap apha nak ma'a néten, apya'ásegkok eyéméxko kéxegke xa. 33Kaxénmakha sekxo' kélwáxok ma'a aptémakxa nak Wese' apwányam Dios, tén han kóllának ma'a ekpéwo nak kóllának nápakto' Dios, keñe sat nahan kólxawak kéxegke ekyókxoho xa aksok nak. 34Nágkaxénmakha cha'a kélwáxok yakwánxa katnehek mók ekhem, hakte keytek sat makham yakwayam keytnakhohok kélwáxok mók ekhem. Ekyókxoho ekhem cha'a katnehek ekyentaxnamo kélha kéxegke, nágkóltekkesak.#Sal 55.22; 1 P 5.7.
Seçili Olanlar:
SAN MATEO 6: LEGN
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Lengua Sur (Enxet) New Testament © United Bible Societies, 1992.