KUZOYA 14
14
Abramu kumkira Loti
1Matuku agho, wazuri bana: Amrafeli mzuri wa Shinari, Arioko mzuri wa Elasa, Kedorlaoma mzuri wa Elamu, na Tidali mzuri wa Goiimu, 2wikabonya wuda na Bera mzuri wa Sodoma, Biraha mzuri wa Gomora, Shinabu mzuri wa Adma, Shemeberi mzuri wa Zeboiimu, na mzuri wa Bela (nigho Soari). 3Awa wazuri wasanu wikawadana na kukwanya majeshi andenyi ya vololo ya Sidimu (niyo bahari ya chumbi). 4Werekoghe wamdumikia mzuri wa Kedorlaoma kwa miaka ikumi na iwi, ela mwaka ghwa ikumi na idadu wikamlegha. 5Mwaka ghwa ikumi na inya, Kedorlaoma na wazuri wose werekwanyeghe nao, wikawikaba Warefai aja Ashterothi Kanaimu, na Wazuzi aja Hamu, na Waemi aja Shawe wurindi ghwa Kiriathaimu, 6na Wahori aja mighondinyi kwawo Seiri, hata Elparani iko mwano na kireti. 7Konyuma wikaghaluka na kuwuya wikavika En-mishipati nigho Kadeshi, wikajikaba isanga jose ja Waamaleki na Waamori werekoghe wikikaia Hazazoni-tamari, wikawisima.
8Awo wazuri wasanu, wa Sodoma, Gomora, Adma, Zeboiimu, na Bela (nigho Soari), wikafuma 9wilo na awo wazuri bana; Kedorlaoma mzuri wa Elamu, Tidali mzuri wa Goiimu, Amrafeli mzuri wa Shinari, na Arioko mzuri wa Elasa. 10Ela ija vololo ya Sidimu erekoghe ichulo ni vina va lami. Hata iji majeshi gha Sodoma na Gomora gherekoghe ghikikimbia, wamu wikachunukia andenyi ya ivo vina, na awo weresigharikieghe wikakimbia cha mghondinyi. 11Wamaiza wikawusa vilambo vose va Sodoma na Gomora, na vindo vawo vose wikaghenda chia rawo. 12Wikamdwa Loti, uja mwana wa mruna Abramu uhu orekoghe ukikaia Sodoma, wikaduka vilambo vake vose wikaghenda.
13Niko aho mndumu orefufunukieghe ukacha ukamghoria Abramu Muebrania, uo orekoghe ukikaia kaavui na midi ya kuela ya Mamre Muamori mruna Eshkoli na Aneri, nawo niwo werewadaneghe na Abramu. 14Nao iji Abramu wasikira angu mwana wa mruna wadwalwa wunyika, ukawilongoza wandu wa irika wivalo nyumbenyi kwake, wandu maghana adadu ikumi na wunyanya wifundishiro wuda, ukawinugha wamaiza hata Dani. 15Aho ukawaghanya wandu wake nakio, ukawingiria, ukawikaba na kuwisima, ukawiwinga hata Hoba kaskazinyi ya Dameshki. 16Ukawunja vilambo vose, na Loti mwana na mruna andwamweri na vilambo vake vose, waka na wandu.
Melkizedeki kumrasimia Abramu
17Nao iji Abramu orekoghe ukiwuya, nyuma ya kumsima Kedorlaoma andwamweri na wazuri waja orekwanyeghe nawo, mzuri wa Sodoma ukafuma kummara aja vololo ya Shawe (niyo Vololo ya Mzuri). 18Na Melkizedeki mzuri wa Salemu ukamredia mkate na divei, nao orekoghe ni Mkohani wa Mlungu-Uko-Aighu-Nandighi.#Waeb. 7.1-10 19Nao ukamrasimia Abramu ukaghamba,
“Mlungu Uo-Uko-Aighu-Nandighi,
uo oreumbieghe mlungunyi na ndoenyi,
ndemrasimie Abramu.
20Mlungu ndekaso Uo-Uko-Aighu-Nandighi,
uo orekunekieghe wusimi kwa wamaiza wako.”
Nao Abramu ukamneka ifungu ja ikumi ja ivo vose orekoghe navo.
21Nao mzuri wa Sodoma ukamzera Abramu, “Wusa vilambo vose putu ela kuniwunjire wandu wapo weni.” 22Ela Abramu ukamzera mzuri wa Sodoma, “Naghema kwa BWANA MLUNGU Uo-Uko-Aighu-Nandighi, muumbi mlungunyi na ndoenyi, 23angu sichaawusa hata uzi, angu kamba ya chadu, angu chingi chose chiko chako; kusecheghora wei, ‘Namfughisha Abramu.’ 24Sichaawusa kindo chingi, na mawaghio gha awo wandu wereghendanyeghe nani, awo Aneri, Eshkoli, na Mamre; awo ndewiwuse mawaghio ghawo.”
Seçili Olanlar:
KUZOYA 14: TAITA
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
©Bible Society of Kenya, 1997
All rights reserved.