Aˇ dahˬ 32
32
Iˇsawˇ-ahˇ tahˬ puˬ-iˇ-eu gʼaˇ duˬ Yaˬkoˆ lehˬ hmˬ-euˬ
1Mehˬ hu paw Yaˬkoˆ gaˇ ma paˇ doˆ-iˇ ngeh, mˬ taˆ gʼaˬ kʼehˇ tiˬ paˆ na deuˬ-ahˇ tahˬ puˬ-euˬ meh. 2Mˬ taˆ gʼaˬ kʼehˇ kʼoeˇ deuˬ-ahˇ aˬ yawꞈ ya mawˇ ngeh, “Heu-aˬ, Miˬyehˇ-euˬ sehˬ gʼawˆ nga” lehˇ aˬ yawꞈ ehˇ-awˇ, jawˇ duˬ kʼoeˇ tsahˇ-ahˇ Maˬhaˬneˬ#32.2 ‘Maˬhaˬneˬ’ lehˇ ehˇ-eu dawˬ tsuiꞈ-aˬ, ‘sehˬ gʼawˆ nyiˬ gʼawˆ’ lehˇ ehˇ mawꞈ-eu meh. lehˇ myahˇ nehˬ-euˬ meh.
3Yaˬkoˆ-aˬ, aˬ yawꞈ oe luꞈ-eu gaˇ kawˆ Eˬdoˬ miˇ kʼahˬ-ahˇ jawˇ-eu aˬ yawꞈ-euˬ aˇ doˆ Iˇsawˇ-ahˇ bi tsaꞈ gaˬ-iˇ-eu gʼaˇ duˬ, aˬ yawꞈ-euˬ zaˬ kʼaˆ deuˬ-ahˇ mehˬ hu paw kʼehˇ gʼeh-euˬ meh. 4Iˇsawˇ-ahˇ dawˬ tsaꞈ bi tsaꞈ-iˇ-eu gʼaˇ duˬ, aˬ yawꞈ maꞈ-ahˇ heu loꞈ-ehˇ mehˬ nehˬ-euˬ meh. “Yaw zeu baw-eu laꞈ kʼoeˇ, aˇ doˆ Iˇsawˇ jawˇ gaˇ, nawˬ-euˬ zaˬ kʼaˆ Yaˬkoˆ heu loꞈ-ehˇ dawˬ tsaꞈ tsaꞈ ahˇ leꞈ-eu ma. Iˬ nah keuˆ ni ngaˇ maˬ gʼoꞈ doˆ le-ehˇ, Laˬbaˬ nehˬ-ehˇ jawˇ-euˬ ma. 5Ngaˇ-aˬ, mawˇ neˇ, mahˬ tahˬ laˆ, yawˇ, ciꞈ myehꞈ deuˬ jawˇ-awˇ, zaˬ kʼaˆ deuˬ kʼawꞈ cu taˬ-euˬ ma. Nawˇ ngaˬ-ahˇ gʼawˬ shaˬ gaˬ nehˬ laꞈ-awˇ, bi gʼoꞈ jawˇ le tehꞈ-a lehˇ noeˬ tmˬ dui dui-eu laꞈ kʼoeˇ, heu loꞈ-ehˇ tsaꞈ ahˇ leꞈ-euˬ ma.”
6Dawˬ tsaꞈ bi tsaꞈ-iˇ-euˬ deuˬ gʼoꞈ keuˆ laˇ-awˇ ehˇ-eu, “Nawˬ-euˬ aˇ doˆ Iˇsawˇ jawˇ gaˇ nga maꞈ iˇ keuˆ yaꞈ-euˬ ma. Nawˬ-ahˇ tahˬ puˬ laˇ-eu lehˇ, tsawˇ haˬ oeˬ yaˇ gʼaˬ sheuˬ-awˇ aˬ yawꞈ laˇ luꞈ meh.” Kʼoeˇ ngeh, Yaˬkoˆ noeˬ shaˬ-awˇ guˆ-euˬ meh. 7Aˬ yawꞈ nehˬ-ehˇ jawˇ luꞈ-eu tsawˇ haˬ deuˬ hawˇ-eu, yawˇ, ciꞈ myehꞈ, mawˇ neˇ, law taw kʼoeˇ deuˬ dawˬ tawˆ luꞈ-ahˇ, nyiˬ muˇ muˇ-euˬ meh. 8“Jeˬ hu muˇ-ahˇ Iˇsawˇ ceh laˇ naˇ, jeˬ nah muˇ cehˆ dzeuˇ nya tehꞈ-a” lehˇ aˬ yawꞈ noeˬ-euˬ meh.
9Kʼoeˇ naˇ, Yaˬkoˆ heu loꞈ-ehˇ guiˬ lahˬ shaˇ-euˬ meh. “Ngaˬ bawˇ Aˬbyaˬhaˬ hawˇ-eu ngaˬ da Iˇtsaˆ-euˬ Miˬyehˇ-oˇ, ngaˬ-euˬ guiˬ lahˬ shaˇ dawˬ-ahˇ naˇ haˬ nehˬ laꞈ-awˬ. Sahˬpaˬ Miˬyehˇ-oˇ, ngaˬ-euˬ aˬ yuiꞈ aˬ nyiˇ deuˬ jawˇ-eu ngaˬ-euˬ miˇ kʼahˬ-ahˇ gʼoꞈ-iˇ-awˬ lehˇ, nawˇ ngaˬ-ahˇ kʼehˇ-awˇ, yawˬ jeˬ na luꞈ laꞈ kʼoeˇ nawˇ ngaˬ-ahˇ haw piˇ nehˬ ma lehˇ ehˇ taˬ-euˬ meh. 10Nawˬ-euˬ zaˬ kʼaˆ pyeuꞈ-eu ngaˇ-aˬ, nawˇ gʼawˬ shaˬ gaˬ-eu jeˬ hawˇ-eu, nawˬ-euˬ saˇ jaˇ ziꞈ-eu jeˬ-ahˇ za-eu maˬ geuˇ-a. Aˇ hu ngaˇ Yawˇdaˬ lawˇ baˬ tsehˆ doˆ ngeh, ngaˬ-euˬ aˬ laꞈ laꞈ kʼoeˇ gawˬ yoeˬ tiˬ yoeˬ tehꞈ-ehˇ ahˇ-euˬ kʼawꞈ, nymˬ-mˇ ngaˇ gʼoꞈ doˆ laˇ ngeh poˆ jawˇ, ngaˬ nehˬ-ehˇ tsawˇ haˬ nyiˬ muˇ ahˇ-eu ma. 11Ngaˬ-euˬ aˇ doˆ Iˇsawˇ-euˬ aˬ laꞈ laꞈ kʼoeˇ, ngaˬ-ahˇ taˬ bi luˬ taˬ bi seˇ-iˇ laꞈ. Zaˬ miˬ zaˬ deuˬ hawˇ-eu zaˬ yaw nyiˇ heu deuˬ ahˇ leˇ-ehˇ, nga maꞈ dawˬ tawˆ luꞈ-ahˇ aˬ yawꞈ laˆ cawˆ le gaˇ ngaˇ guˆ dui dui nya. 12Ngaˬ-euˬ zaˬ ngaˬ-euˬ uˆ deuˬ-ahˇ, iˬ ma laˆ shaˆ lawˇ deh-ahˇ jaˆ-eu kʼaˇ shuiꞈ deuˬ loꞈ-ehˇ, tsawˇ haˬ tiˬ gʼaˬ-iˬ maˬ gui jiˇ coeˇ ni bi jeuˬ bi o le-awˇ, ngaˬ-ahˇ yaw muiˬ-ehˇ haw piˇ nehˬ ma lehˇ, nawˬ neh ehˇ taˬ-euˬ dawˬ-ahˇ taˬ ngehˇ nehˬ laꞈ.”
13Kʼoeˇ naˇ, aˬ yawꞈ kʼoeˇ gaˇ tiˬ miˇ jawˇ naˬ mˇ-awˇ, aˬ yawꞈ-euˬ aˇ doˆ-ahˇ bi biꞈ-iˇ-eu gʼaˇ duˬ, jeˬ zaˬ tiˬ deuˬ tseˇ doˆ-euˬ meh. 14Ciꞈ myehꞈ ciꞈ ma nyiˬ yaˇ ma, ciꞈ buˬ nyiˬ tseˇ mawˇ, yawˇ nyiˬ yaˇ ma, aˬ buˬ nyiˬ tseˇ mawˇ, 15aˬ coeˇ nyehꞈ dawˇ nya-eu zaˬ caw-eu law taw smˬ tseˇ ma, mawˇ neˇ mawˇ ma oeˬ tseˇ ma, mawˇ gaw tseˇ mawˇ, mahˬ tahˬ laˆ nyiˬ tseˇ ma hawˇ-eu, mahˬ paˬ tseˇ mawˇ tseˇ doˆ-euˬ meh. 16Jeˬ zaˬ kʼoeˇ deuˬ aˬ yawꞈ jeˬ yawꞈ aˇ maꞈ baw baw-ehˇ teh doˆ-awˇ, tiˬ jeˬ-ahˇ zaˬ kʼaˆ tiˬ gʼaˬ bi teh-euˬ meh. “Tiˬ gʼaˬ tiˇ gʼaˬ aˇ kaˬ ui cuiˆ kaˇ-ehˇ, jeˬ zaˬ tiˬ jeˬ tiˇ jeˬ maˬ bi keuˬ leˇ ni, ngaˬ-euˬ mehˬ hu teh-awˇ iˇ tawˬ” lehˇ, zaˬ kʼaˆ kʼoeˇ deuˬ-ahˇ aˬ yawꞈ ehˇ nehˬ-euˬ meh. 17Mehˬ hu hu saˬ bi cah-euˬ zaˬ kʼaˆ kʼoeˇ gʼaˬ-ahˇ, Yaˬkoˆ heu loꞈ-ehˇ ehˇ nehˬ-euˬ meh. “Iˇ no ngaˬ-euˬ aˇ doˆ Iˇsawˇ nawˬ-ahˇ tahˬ puˬ-awˇ, ‘Nawˇ aˬ suˇ gʼaˬ te. Aˬ geu gaˇ iˇ-eu gʼeh te. Jeˬ zaˬ heu deuˬ aˬ suˇ gʼaˬ-euˬ jeˬ zaˬ-a’ lehˇ naˇ haˬ laˇ naˇ, heu loꞈ-ehˇ ehˇ kʼoꞈ nehˬ-awˬ. 18‘Jeˬ zaˬ heu deuˬ-aˬ, nawˬ-euˬ zaˬ kʼaˆ Yaˬkoˆ-euˬ jeˬ zaˬ meh. Aˬ yawꞈ naˆ maˬ tseˇ huiˬ dzehˬ mahˇ dzehˬ-eu aˬ yawꞈ-euˬ aˇ doˆ Iˇsawˇ-ahˇ biꞈ-eu gʼaˇ duˬ bi teh leꞈ-euˬ meh. Yaˬkoˆ gʼeh mehˬ nah paw oe luꞈ meh’ lehˇ ehˇ nehˬ-awˬ.” 19Zaˬ kʼaˆ kʼoeˇ gʼaˬ-euˬ mehˬ nah jeˬ zaˬ kʼaˇ bi teh gʼeh-euˬ zaˬ kʼaˆ kʼoeˇ deuˬ-ahˇ kʼawꞈ, kʼoeˇ loꞈ-ehˇ aˬ yawꞈ mehˬ nehˬ-euˬ meh. “Naw maꞈ yawˬ gʼaˬ na luꞈ Iˇsawˇ-ahˇ ya tahˬ puˬ naˇ, 20Nawˬ-euˬ zaˬ kʼaˆ Yaˬkoˆ mehˬ nah paw oe luꞈ meh lehˇ ehˇ nehˬ-awˬ” lehˇ mehˬ nehˬ-euˬ meh. “Ngaˬ neh mehˬ hu paw biꞈ gʼeh-euˬ laꞈ sawˬ kʼoeˇ deuˬ baˬ da neh, Iˇsawˇ nui ma saˇ laˇ-awˇ, ngaˬ-euˬ gʼawˇ mawˇ aˬ yawꞈ-ahˇ ya tahˬ puˬ ngeh, aˬ yawꞈ ngaˬ-ahˇ iˬ baˇ pyehˬ-awˇ ha geuꞈ nehˬ laꞈ tehꞈ-a” lehˇ, Yaˬkoˆ-euˬ nui ma laꞈ kʼoeˇ noeˬ kʼoeˬ-euˬ meh. 21Aˬ yawꞈ neh lehˬ hmˬ taˬ-euˬ laꞈ sawˬ pyeuꞈ-eu jeˬ zaˬ kʼoeˇ deuˬ mehˬ hu paw bi teh dzeuˇ gʼeh-awˇ, aˬ yawꞈ gʼaˬ sehˬ gʼawˆ laꞈ kʼoeˇ yuꞈ yaꞈ-euˬ meh.
Peˬniˬlaˇ lehˇ kuˇ-euˬ jawˇ duˬ-ahˇ Yaˬkoˆ dawꞈ ceh ceh-euˬ
22Yaˬkoˆ-aˬ, aˬ yawꞈ-euˬ miˬ zaˬ nyiˬ gʼaˬ, ma nyiˇ nyiˬ gʼaˬ hawˇ-eu, aˬ yawꞈ-euˬ zaˬ tseˇ tiꞈ gʼaˬ sheuˬ-awˇ, kʼoeˇ ngeh miˇ Jaˬboˆ lawˇ baˬ tsehˆ-euˬ meh. 23Aˬ yawꞈ maꞈ-ahˇ sheuˬ tsehˆ gʼaˬ ngeh, aˬ yawꞈ-euˬ myawˬ gahˬ dawˬ tawˆ luꞈ bi yuˇ tsehˆ jiˇ-euˬ meh. 24Ehˇ kʼawꞈ, aˬ yawꞈ tiˬ gʼaˬ tehꞈ-ehˇ nui baˬ-ahˇ jawˇ yaꞈ-euˬ meh.
Kʼoeˇ ngeh, tsawˇ haˬ tiˬ gʼaˬ oe-awˇ, uˬ ciꞈ miˇ lah-ehˇ aˬ yawꞈ nehˬ-ehˇ dawꞈ ceh ceh-awˇ, uˬ bya dawꞈ bya-euˬ meh. 25Yaˬkoˆ-ahˇ aˬ yawꞈ maˬ dawꞈ gʼaˬ nya luꞈ-a lehˇ tsawˇ haˬ kʼoeˇ gʼaˬ siˬ duˬ ngeh, Yaˬkoˆ-euˬ shaˬ pyaˬ kʼehꞈ-ahˇ teˇ-awˇ, shaˬ pyaˬ myaˆ teˇ puiˇ nehˬ-euˬ meh. 26“Ngaˬ-ahˇ pyehˬ-awˇ bi iˇ laꞈ-awˬ. Uˬ bya bya laˇ shaw-iˬ ngaˇ” lehˇ, tsawˇ haˬ kʼoeˇ gʼaˬ Yaˬkoˆ-ahˇ ehˇ-eu meh. “Ngaˬ-ahˇ dawˬ ngehˬ maˬ gʼeh nehˬ laꞈ kʼoeˇ keuˆ ni, ngaˇ nawˬ-ahˇ maˬ pyehˬ nehˬ” lehˇ, aˬ yawꞈ-ahˇ Yaˬkoˆ ehˇ nehˬ-euˬ meh.
27“Nawˬ-euˬ tsawˇ myahˇ aˬ joˆ-ehˇ kuˇ te” lehˇ tsawˇ haˬ kʼoeˇ gʼaˬ naˇ haˬ ngeh, “Yaˬkoˆ lehˇ kuˇ-eu ma” lehˇ Yaˬkoˆ ehˇ kʼoꞈ nehˬ-euˬ meh.
28Tsawˇ haˬ kʼoeˇ gʼaˬ ehˇ-eu, “Aˬ kaˇ naˇ, nawˬ-euˬ tsawˇ myahˇ Yaˬkoˆ lehˇ maˬ paˇ ngeuˇ meh. Nawˇ-aˬ, Miˬyehˇ-ahˇ maˬ ehˇ, tsawˇ haˬ-ahˇ maˬ ehˇ, dawꞈ gʼaˬ-euˬ meh. Kʼoeˇ miˇ neh, nawˬ-ahˇ Iˇsaˬleˬlaˆ#32.28 ‘Iˇsaˬleˬlaˆ’ lehˇ ehˇ-eu dawˬ tsuiꞈ-aˬ, ‘aˬ yawꞈ Miˬyehˇ nehˬ-ehˇ dawꞈ ceh ceh-euˬ’ lehˇ ehˇ mawꞈ-eu meh. lehˇ ya kuˇ tehꞈ-a” lehˇ ehˇ-eu meh.
29“Nawˬ-euˬ tsawˇ myahˇ ngaˬ-ahˇ tiˬ poˆ ehˇ nehˬ laꞈ sheˇ” lehˇ, tsawˇ haˬ kʼoeˇ gʼaˬ-ahˇ Yaˬkoˆ ehˇ nehˬ ngeh, “Aˬ jeˬ miˇ neh nawˇ ngaˬ-euˬ tsawˇ myahˇ siˬ nya mawꞈ-eu nya” lehˇ tsawˇ haˬ kʼoeˇ gʼaˬ ehˇ-eu meh. Kʼoeˇ naˇ, Yaˬkoˆ-ahˇ aˬ yawꞈ dawˬ ngehˬ gʼeh nehˬ-euˬ meh.
30“Ngaˇ Miˬyehˇ-ahˇ myaˆ pyawˬ ciˬ daˬ-awˇ ya mawˇ-euˬ kʼawꞈ, maˬ ya shiˇ-aˬ” lehˇ Yaˬkoˆ ehˇ-awˇ, jawˇ duˬ kʼoeˇ tsahˇ-ahˇ Peˬniˬlaˇ#32.30 ‘Peˬniˬlaˇ’ lehˇ ehˇ-eu dawˬ tsuiꞈ-aˬ, ‘Miˬyehˇ-euˬ myaˆ pyawˬ’ lehˇ ehˇ mawꞈ-eu meh. lehˇ myahˇ nehˬ-euˬ meh. 31Peˬniˬlaˇ lehˇ kuˇ-eu jawˇ duˬ kʼoeˇ tsahˇ-ahˇ neh Yaˬkoˆ doˆ-iˇ ngeh, nahˇ ma doˆ laˇ-euˬ meh. Aˬ yawꞈ-euˬ shaˬ pyaˬ myaˆ bi teˇ puiˇ-euˬ miˇ neh, kuiˇ dzaˇ kuiˇ dzaˇ-ehˇ iˇ gʼeh-euˬ meh. 32Iˇsaˬleˬlaˆ tsawˇ haˬ deuˬ iˬ nah keuˆ ni, shaˬ pyaˬ myaˆ nyiˬ paˆ-ehˇ tsoꞈ-eu shaˬ jiˇ maˬ dzaˬ-a. Aˬ jeˬ miˇ neh ehˇ naˇ, Yaˬkoˆ-euˬ shaˬ pyaˬ myaˆ bi teˇ puiˇ-euˬ miˇ neh meh.
Seçili Olanlar:
Aˇ dahˬ 32: AHK
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Akha Bible Revision (Latin Script) © Thailand Bible Society, 2011.