Joannostir 8
8
Džeļ, 8.
1Iisusos gija pe Jeleonakīri berga.
2Ne tašarlatir noko jāvdža ane khangīri, te sāre mānuša gīne ke Jov. Jov bešča, te sikļaikirdža len.
3Doi lilengīre te fariseji dolidžīne ke Jov džūļa, dojāvdli ano lubnāruma, te, tčudle la maškirāl,
4Phendle Leske: sikļakirbnaskīro! da džūli dojavdli ano lubnāruma.
5Moisejos ano dopheniben dophendža menge domāras dasajen barensa: Tu so phenesa?
6Dava rakirde, Les čipindoi, sobi lačen sočimoņi Les ke bang. Ne Iisusos, dobandžija telle, čhindža palcosa pe phu, nariškirindoi pe lenge nisav haļipen.
7Kedi līne dūredīr phučen Les, Jov, poušča, te phendža lenge: kon tumendir begrehoskīro, pšeršo thurde pe lake bar.
8Te noko, bandžija telle, čhindža pe phu.
9Te jone, šunindoi dova te obdžinindoi pengo dži, līne džan jek pal vavreske, phuredīrendir žin ko statno; te jača jek Iisusos te džūli tardindoi maškiral.
10Iisusos, poušča te nadikša nikones, sir feņu džūļa saji isis tardi maskiral, te phendža lake: džūļi! kai tīre sendipnaskīre nikon nasendžakirdža tut?
11Ioi otpendža: nikon, Raija, Iisusos phendža lake: te Me nin nasendinava tut; dža, te angil nagrehini.
12Noko rakirdža Iisusos ko mānuša, te phendža lenge: Me švatluma svetoskīro: kon jāvela pal mange, doleske najāla džal ano čemņuma, ne jāla leske džībnasko švatluma.
13Togi fariseji phendle Leske: Tu Kokoro Tutir švatkinesa; švatkuma Tīro nāni lašņo.
14Iisusos phendža lenge ano otpheniben: keļi Me nin Kokoro Mandir švatkinava, švatkuma Mīro lašņo; vašo dova so Me džinav, kārig jāvdžom te kai džāva; ne tume nadžinen, kārig Me, te kai džava.
15Tume sendinena palomasa; Me nasendinava ni kones.
16Te keļi Me sendinava, togi sendos Mīro lašņo; vašo dova so Me naison jek, ne Me te Dād, Kon bičadža Man.
17Te ano dopheniben tumāro isi čhindlo nin, so dui mānušengo švatkuma isi lašņo (5. Mois. 17, 6. 19, 15).
18Me Kokoro švatkina Mandir, te švatkini Mandir Dād, Kon bičadža Man.
19Togi phendle Leske: kai Tīro Dād? Iisusos otphendža: tume nadžinen ni Man, ni Mīre Dādes; keļi tume džindlesis Man, togi džindlesis Mīre Dādes.
20Da lava rakirdža Iisusos ke Davleske rakhibnaskīri kedi sikļaikirdža ane khangīri; te nikon nalija Les, vašo dova so oščo najavdža Leskīri štunda.
21Noko phendža lenge Iisusos: Me otdžava, te tume rodena Man; te mērena an tumāro grehos. Kai Me džava, doi tume našti dojaven.
22Doi Judi rakirdle: hobi Jov domarla Kokoro Pes, so rakirla: kai Me džava, doi tume našti dojaven?
23Jov phendža lenge: tume isan talatunestir, Me isom aprotunestir; tume isan da svetostir, Me na da svetostir.
24Vašo dova Me tumenge phendžom, so tume merna an tumāre grehi: keļi napačana, so Me dava isom, togi merna an tumāre grehi.
25Togi phendle Leske: kon Tu? Iisusos phendža lenge: samo pšersumastir, sir rakirava tumenge.
26Mange būt te rakirav te sendinav tumendir; ne bičaibnaskīro Man isi lašņo, te so Me sundžom Lestir, dova rakirava svetoske.
27Na halīne, so Jov rakirdža lenge Dādestir.
28Te jake Iisusos phendža lenge: kedi tume pohučakirna mānušeskīre Čhāves, togi tume uzdžinena, so dava Me te so niso nakērava Mandir: ne, sir sikļakirdža Man Dād Mīro, jake rakirava.
29Bičaibnaskīro Mīro isi Mansa; Dād namukša Man jedženes; Me sajek kerava dova, so Leske kamelapes.
30Kedi Jov rakirdža dava, būt pačandīne an Leske.
31Togi phendža Iisusos dova Judenge kon pačandīne an Leske: keļi tume jačena an Mīro lav, togi tume lašņes Mīre siklaibnangīre.
32Te dodžinena so isi lašņuma, te lašņuma kerla tumen voļnonen.
33Leske otphendle: me isam Abraamoskīro rodos te nasamas bučkīrde ņigdi ni koneske; sir Tu rakiresa: kernatumen voļnonenge?
34Iisusos otphendža lenge: lašņes, lašņes rakirava tumenge: svako, kon kerla grehos, isi bučkirdo grehoske,
35Ne bučkirdo najačela ano khēr mužīges čhāvo jačela mužīges.
36Te jake, keļi Čhāvo kerla tumen voļnonen, togi lašņes voļna jāna.
37Džinav so tume Abraamoskīro rodos: ne tume rodena domaren Man, vašo dova so Mīro lav najačela an tumenge.
38Me rakirava dova, so dikšom ke Mīro Dād; ne tume kerna dova, so dikhle ke tumaro dād.
39Phendle Leske ano otpheniben: dād māro isi Abraamos. Iisusos phendža: keļi tume jān Abraamoskīre čhāve, togi kerībena kernas Abraamoskīre.
40Ne kana rodena domāren Man, mānušes, kon phenela tumenge lašņuma, savo šundžom Davlestir: Abraamos dava nakērdža.
41Tume kērna buča tumāre dādeskīre Pe dava phendle Leske: me nasam ano lubnaruma ločīne; jek Dād menge isi, Dēvel.
42Iisusos phendža lenge: keļi Dēvel jāl Dād tumāro, togi tume Man miļinenas, vašo dova so Me Davlestir vijavdžom te javdžom: hai Me na Mandir javdžom, ne Jov Man bičadža.
43Wasoske tume nahaļona Mīro rakirben? vašo dova so našti šunen lava Mīre.
44Tumāro dād beng; te tume kamena phečkiren tumāre dādesko kamiben, Jov isis mānušego domāribnaskīro pšeršumastir, te nanotardija ano lašņuma; hai an leske nāni lašņuma. Kedi rakirla jov frotaruma, rakirla peskīro; hai jov frotaris te frotarumasko dād.
45Ne sir Me lašņuma rakirava, togi napačana Mange.
46Kon tumendir dosikavela Man ano načačipen? keļi Me rakirava lašņuma, vassoske tume napačana Mange?
47Kon Davlestir, dova šunela Davleskīre lava, Tume vašo dova našunena, so tume nasan Davlestir.
48Pe dava Judi otphendle te rakirdle Leske: te načačo hobi me rakirasa, so Tu samarāņinos te so beng an Tuke?
49Iisusos otphendža: an Mange beng nāni; ne Me važina Mīre Dādes; ne tume Man nočhuvena.
50Ne Me naroda Mīri slava; ne isi Rodipnaskīro te Sendipnaskīro.
51Lašņes, lašņes rakirava tumenge: kon rakhela Mīro lav, dova nadikhela šmerč ņigdi.
52Judi phendle Leske: kana uzdžindžam me, so beng an Tuke. Abraamos meija te proroki; ne Tu rakiresa: „kon rakhela lav Mīro, dova šmerč nahaļola ņigdi“.
53Hobi Tu bāredīr māre dādestir Abraamostir, sav mēja? te proroki mēnē: koneske Tu kēresa Tut.
54Iisusos otphendža: keļi Me Man Kokoro slavinava, togi slava Mīri niso. Man slavini Dād Mīro, Saijestir tume rakirna, so Jov Devēl tumāro.
55Te tume nauzdžindle Les; ne Me dzinav Les; te keļi phenava, so nadžinav Les, togi javava dasav sai tume hohāne. Ne Me džinav Les te rakhava lav Leskīro.
56Abraamos dād tumāro rado isis dikhel dīves Mīro; te dikša, te radidžapes.
57Pe dava phendle Leske Judi: Tuke nāni oščo pandžvardeš berš, — te Tu dikšan Abraamos?
58Iisusos phendža lenge: lašņes, lašņes rakirava tumenge: vago sir isis Abraamos, Me isomas.
59Togi līne bara, sobi thurden pe Leske; ne Iisusos garūdžapes, te vigija khangirjatir, te vigija maškīr lenge; te gija durēdīr.
Seçili Olanlar:
Joannostir 8: LET1933
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© British and Foreign Bible Society 1933, 2016
