Joannostir 11
11
Džeļ, 11.
1Isis nasvalo jek sav Lāzaros Wifanijatir, foricostir, kai džīvelas Marija te Marfa, phen lakīri.
2Marija, sajako pšal Lāzaros isis nasvalo, isis doja, saji makša Ras mirensa te nokhošča Leskīre pīre peskīre balensa.
3Pheņa bičadle phenen Leske: Raija! dik, kones Tu miļinesa, isi nasvalo.
4Kedi Iisusos šundža dova, togi phendža: da nasvalipen na ke šmerč, ne ke slava Davleskīre, me proslavinelpes druh dava Davlesko Čhāvo.
5Iisusos miļidža Marfa, te lakīre pheņa, te Lazaros.
6Kedi šundža, so jov nasvalo, togi jača dui dīvesa pe do štetos, kai isis.
7Pošļi dova phendža sikļaibnangīrenge: jāven noko ane Jūdejā,
8Sikļaibnangīre phendle Leske: Ravvi! hāra hobi so Judi rodīne domāren Tut barensa; te Tu noko džasa doi?
9Iisusos otphendža: hobi ano dīves nāni dešodui štundi? kon džala dīvese, dova nadodaužinipes, vāšo dova so dikhela da svetosko švatluma.
10Ne kon džala rati, dodaužinipes, vašo dova so nāni lesa švatluma.
11Kedi dava rakirdža, togi phenela lenge: Lazaros, māro pšečeļos pašija; ne Me džāva džangavav les.
12Sikļaibnangīre Leskīre phendle: Raija! keļi pašija, togi visaščola.
13Iisusos rakirdža leskīre šmerčatir; ne jone dufidle, so Iov rakirla dasai saj sajek isi lindra.
14Togi Iisusos phendža lenge lašņes: Lazaros meija.
15Radinaman vaš tumenge, so Me naisomas doi, sobi tume mepačan; ne javen ke jov.
16Togi Foma, varčanes dīno goli Dvoikos, phendža sikļaibnangīrenge: jāven te me nin mēras lesa.
17Iisusos jāvdža, lača, so jov uže štār dīvesa ano grobos.
18Wifanija isis paše ke Ijerusaļima, staģiji despadž#11, 18 Sai paš miļa..
19Te būt Judendir jāvdle ke Marfa te Marija — hotņakiren len ane tuga vaš lengīre pšaleske.
20Kedi Marfa šundža so javela Iisusos, gija angil Leske; Marija bešča khēre.
21Togi Marfa phendža Iisuske: Raija! keļi Tu javdžanas dai, nameijasis mīro pšal.
22Nete kana džīnav, sir so Tu mangesa Davles, Dēvel dela Tuke.
23Iisusos phenela lake: opreuštela tīro pšal.
24Marfa phenela Leske: džinav, so opre uštela ano stano, opreuštibnasko dīves.
25Iisusos phendža lake: Me isom opreuštiben te džīben; pačaibnaskīro an Mange, keļi te mērel, otdžīdžola.
26Te svako, kon džīvela te pačala an Mange, namērla ņigdi. Pačasa feņu tu daleske?
27Joi phenela Leske: jake, Raija! me pačava, so Tu Hristos, Davlesko Čhāvo koneske isis javel ano svetos.
28Kedi phendža dava, gija te čorahanes dija goli peskīre pheņa Marija, phenindoi: Sikļaikirbanaskīro isi dai te kherla tut.
29Sig joi šundža zaras ušča, te gija ke Jov.
30(Iisusos oščo nazagija ano foricos, ne isis pe do štetos, kai lača Les Marfa.)
31Judi, saje isis lasa ano khēr te hotņakirdle la, kedi dikhle, sir Marija sig ušča te vigija, gīne pal lake, dufindle, so joi gija po grobos rovel doi.
32Kedi Marija javdža doi, kai isis Iisusos, te kedi dikša Les, peija ke Leskīre pīre, te phendža Leske: Raija! ja Tu javdžanas dai, togi nameijasis mīro pšal.
33Kedi Iisusos, dikša so joi rovela te Judi saj lasa jevdle so rovena, togi kokoro jača smetno, duhosa zalīno.
34Te phendža: kai tume čhudle les? rakirna Leske: Raija! jov te dik.
35Iisusos rovdža.
36Togi Judi rakirdle: dik, sir Jov milindža les.
37Ne vār lendir phendle: naštandija Dava, Kon otkērdža jakha kororeske, kērel sobi dava namērel?
38Iisusos, noko smentno andratunestir, javela ko grobos. Doja isis jama, te bar pašija pe lake.
39Iisusos phenela: otlen bar. Mūleskīri phen, Marfa, phenela Leske: Raija! uže khandela; hai štār dīvesa, sir jov ano grobos.
40Iisusos phenela lake: naphendžom Me tuke, ja pačasa, dikhesa slava Davleskīri?
41Te jake otlīne bar jamatir, kai isis mūlo. Iisusos hadija jakha ko boliben te phendža: Dād! porikirav Tut, so Tu kandijan Man.
42Me džindžom, so Tu sajek kandesa Man, ne phendžom dava vaše mānušenge, kon dai tarde, sobi pačan, sir Tu bičandžan Man.
43Kedi phendža dava, Jov dija goli fardo glosasa: Lazaro! jov avri.
44Te mūlo jāvdža avri, zapačkirde vastensa te pīrensa garubnaske cerhensa, te mui leskīro isis obphandlo dikhloresa. Iisusos phenela lenge: rozphanden les, medžal.
45Togi būt Judendir, sai javdle ke Marija te kedi dikhle, so kērdža Iisusos, pačandīne an Leske.
46Ne vār lendir gīne ko fariseji te phendle lenge, so kērdža Iisusos.
47Togi rašange bāredīra te fariseji zakherdne godžvaren te rakirde: so menge kēras? da mānuš būt džīvi kērla.
48Keļi jake mukhasa Les, togi sāre pačana an Leske; te javena Rimļani, te otlena māri phu te mānušen.
49Jek lendir, savo to Kaiafa, jov do berš isis rašango bāredīr, phendža lenge: tume niso nadžinen.
50Te napomišļinena so fidīr menge, sobi jek mānuš mērel vaš mānušenge, nasir sāro rodos zgiņinel.
51Dava jov phendža nakokoro pestir, ne jake, so do berš jov isis rašango bāredīr, rakirdža angīl paphenindoi, so Iisusos mērla vašo rodos.
52Te na feņu vaš mānušenge, ne sobi do rozgīne Davleskīre čhāven zalel ano jek.
53Da dēvestir nočhudle domāren Les.
54Vaša dava Iisusos nagija šmales maškir Judenge, ne gija lenge rīgatir ane jek vār rīg paše ke čuči phu, ano foros goli dīno Jefraim, te doi jača Peskīre sikļaibnangīrensa.
55Isis nadūr Judenge Patradžin, te būt dorīgatir javdle ane Ijerusaļima angil patradžin, sobi otčistinenpen.
56Togi rodīne Iisusos, te rakirdle doi tardindoi ane khangīri jek vavreske: sir tume dufinena? najavela hobi Jov po svenkos?
57Rašangīre bāredīra te fariseji dīne avri dasav pokēriben, so, keļi kon uzdžinela, kai Jov jāla, pophenel, sobi len Les.
Seçili Olanlar:
Joannostir 11: LET1933
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© British and Foreign Bible Society 1933, 2016
