MARIKO 10
10
Kaneetisyet Jeso agobo peesyet
(Mat 19:1-12; Luk 16:18)
1Ki ng'eet anyun eng' olooto, konyo tabanwegap Judea ak pitetap Jordan. Ki iyumjigei ineendet tuiyosyek kogeny, ak ko uu ye ki cham koyaei ko ki ineet icheek.
2Ki pwanji ineendet `Pharisaik, koteebe ineendet koyomei kole, “Tos chamdaat eng' ng'atuutik koon chii osotyonnyi?” 3Ak ki wolji `Jeso koleenji, “Nee ne king'ataak Musa?” 4#NKNg'a 24.1-4; Mat 5.31 Ak ki le icheek, “Ki cham Musa kesir sireet ne po peesyet, si koon kwo.”
5Ago ki leenji `Jeso icheek, “Kisirwak ng'atuutyonooto Musa amu uuindap mugulelwekwok.” 6#Tau 1.27; 5.2 Ago kobooch taunetap yaetap ng'wony, ko ki yai Kamuktaindet icheek muren ak kobogoryo. 7#Tau 2.24 Amu ng'olyoondoni kobagaaktoi chii kwanda ak kamet, ak konamgei ak osotyonnyi; 8ak koek chooto aeng' poorto agenge: si ma ko aeng', ago egu poorto agenge. 9Chooto anyun che kagotuiyo Kamuktaindet, ko mat kobesyo chii.
10Ak kiteebe kasubikyik ineendet kogeny eng' ko, agobo ng'olyoondonooto. 11#Mat 5.32; 1Kor 7.10-11 Ak ki leenji icheek, Chii age tugul ne oonei osotyonnyi, ak kotun age, ko kabaigei. 12Agot kobogoryot agine ngo pagaakta manong'otyondennyi, ak kotun chiito age, ko kabaigei.
Jeso ak lagok che mengechen
(Mat 19:13-15; Luk 18:15-17)
13Ak ki kimutyi ineendet lagok che mengeechen, si kobiit kotwa icheek: ago ki kergong' kasubikyik icheek. 14Ago ye kingo keer Jeso, konyit, ak koleenji icheek, Ochamji lagok che mengech kobwanjo; amoete icheek: amu po laitornatetap Kamuktaindet che uu chu. 15#Mat 18.3 Amwaiwok iman ale, Chii age tugul ne mataachei laitornatetap Kamuktaindet ko uu lakweet ne ming'in, koma itei olooto matiny. 16Ak kiganap icheeget eng' eunekyik, ak koberuur, kogonoor eunekyik icheek.
Nyoorunetap Saboondap koigeny
(Mat 19:16-36; Luk 18:18-30)
17Ak ye kiwendi eng' ooreet, kolabatyi chiito age ineendet ak kogutung'ji, ak koteebe kole, “Kaneetindoni myee, ayai nee si anyoor saboondo ne po koigeny?” 18Ak ki leenji `Jeso ineendet, “Kalya si iguureno ne myee? Ma mi chii ne myee, kobatee agenge, ineendet Kamuktaindet. 19#Kom 20.12-16; NKNg'a 5.16-20 Ingen inyee ng'atuutik: ‘Amerumisye; Amoipkei; Amechoorse; Amebaoryanji lembech; Ameng'aalse; Teech kwandang'ung' ak kamenng'ung'.’ ” 20Ago ki leenji, “Kaneetindoni, ki ariip tuguuchuuto tugul kobooch ko aa ming'in.”
21Ki keer anyun `Jeso ineendet ak kocham, ak koleenji, “Ta ko rartaat kiit agenge eng' inyee; ui, ialde tuguuk tugul che itinye, ak igoochi kibananook, si inyooru mogornateet eng' kipsengwet: ak inyoo isubwo.” 22Ago ki kereer met agobo ng'olyoondonooto, ak kwo eng' arageneet: amu ki tinyei ineendet tuguuk che chaang'.
23Ak ki keer Jeso komoswek tugul, ak koleenji kasubikyik, “Pichiy ne tya koit laitornatetap Kamuktaindet che tinyei mogornatosyek!” 24Ak ki kwong'yo kasubikyik eng' ng'aleekyik. Ago ki wol Jeso kogeny, koleenji, “Lagochu, pichiy ne tya eng' icheek che tiegei mogornatosyek koit laitornatetap Kamuktaindet! 25Nyamnyum eng' tambeesyet kochut kondap sindanut, kosiir komong'ji mogoryot laitornatetap Kamuktaindet.” 26Ak ki kwong'yo icheek miising', ak koleenji, “Ara ng'oo anyun ne imuuchi konyoor saruunet?” 27Ak kingo keer `Jeso icheek, kole, “Ma imugaksei eng' piik, ago ma uu nooto eng' Kamuktaindet; amu imugaksei tuguuk tugul eng' Kamuktaindet.”
28Ki toi anyun Petero koleenji, “Keero, kigebagaakte tuguuk tugul ak ki kisubun.” 29Ki le Jeso, Amwaiwok iman ale, ma mi chii ne ki pagaach koot, anan ng'eetap kametwagik, anan chepkametwagik, anan kamet, anan kwanda, anan lagok, anan mbareenik, agobo anee, ak logoiywek che myach, 30ne ma nyooru konyil pogol nguno eng' peetuusyechu, kooriik, ak ng'eetap kametwagik, ak chepkametwagik, ak kametwagik, ak lagok, ak mbareenik, kobooto usiisyosyek; ak eng' peetuusyek che tuun pwoonei, saboondap koigeny. 31#Mat 20.16; Luk 13.30 Ago tuun egu che chaang' che po tai che po let; ak koek che po let che po tai.
Komwaei Jeso agobo meennyi
(Mat 20:17-19; Luk 18:31-34)
32Ak ki mi icheek eng' ooreet kotogostoi Jerusalem; ak ki indoi Jeso: ak ki kwong'yo, ak koiyweis che ki isubi. Ak ki itabaan kogeny chooto taman ak aeng', kotoi komwachi icheek tuguuk che tuun ityin ineendet, 33kole, “Ogeero, kitogostoi Jerusalem; ak kindoi `Weeriitap chii eunegap tisiik che eecheen ak siriik; ak korwookyi kirwooget ne po meet, ak konde `ineendet eunegap pororyosyek; 34ak kochurochur ineendet ak kong'utyi, ak kobire kipchoritiit, ak kobar; ak ye ibata peetuusyek somogu kong'eet kogeny.”
Soometap Jakobo ak Johana
(Mat 20:20-28)
35Ak ki riikyi ineendet Jakobo ak Johana, weeriigap Zebedayo, ak koleenji, “Kaneetindoni, kimache iyaiywech kiy age tugul ne kisoomin.” 36Ak ki leenji icheek, “Omache ayaiywok nee?” 37Ak ki leenji, “Koonech ketebee, age eung'ung' ne po tai, ak age eung'ung' ne po kaataam, eng' telunateng'ung'.” 38#Luk 12.50 Ago ki leenji `Jeso icheek, “Mongen kiit ne osoome. Tos omuuchi oee kigombet ne aee? Anan kibatisanenak kabatisanet ne kibatisanena?” 39Ak ki leenji, “Kimuuchi.” Koleenji anyun `Jeso icheek, “Kigombet ne aee ko tuun oee ak okweek; ak kabatisanet ne kibatisanena ko tuun kibatisanenok ak okweek nooto; 40ago ma anee ne igoitoi kotebee chii eunnyu ne po tai anan eunnyu ne po kaataam: ago po icheeget che kigechopchi.”
41Ak ye kingo kas chuun tamanu, kotoi pichooto konereekyi miising' Jakobo ak Johana. 42#Luk 22.25-26 Ak kiguur Jeso icheeget kobwa ole mi, ak koleenji icheek, “Ongen ole icheeget che kiiti keele pou Pororyosyek, koyaegei koek kiptainik eng' icheek; ak chechwaak che eecheen kobou icheek. 43#Mat 23.11; Mar 9.35; Luk 22.26 Ago ma uu nooto eng' okweek: ago chii age tugul ne machei koek ne oo eng' okweek, koek ne poisyewok: 44ak chii age tugul ne machei koek ne po tai eng' okweek, koek otwogindetap tugul. 45Amu ki ma nyo agot Weeriitap chii si keboisyechi, ago si kobois ineendet ak kogoito saboondanyi koek kiit ne kityage che chaang'.”
Kigoochin Bartimayo kogeerto
(Mat 20:29-34; Luk 18:35-43)
46Ak kiit anyun Jeriko: ak kingo mandae Jeriko, kobooto kasubikyik ak tuiyet ne oo, ko kitebyei eng' ooreet taban, Bartimayo, weeriitap Timayo, ineendet kipkoraatyat ne soomsei. 47Ak ye kingo kas kole, niito ko Jeso ne po Nazareth, kotoi kowaach ak kole, “Jeso, Weeriitap Daudi, rireena.” 48Ak ki kergong' che chaang' koleenji, “Siis!” Ago k ites kowaach miising' kole, “Weeriitap Daudi, rireena.”
49Ak ki tonon Jeso ak kole, “Oguur ineendet.” Ak ki kiguur kipkoratyandanooto, keleenji, “Paibaitu; ng'eet, kuurin ineendet.” 50Ak ki wiirta ngoryennyi ak koryakta kwo ole mi Jeso.
51Ak ki wolji `Jeso ineendet koleenji, “Imache ayaun nee?” Ak kole chiito ne koraat, “Rabboni, amache ageerto.”
52Ak ki leenji `Jeso ineendet, “Ui pandang'ung'; kagosaabin kayaneng'ung'.” Ak kigeerto sainooto ak koosup ineendet eng' ooreet.
Seçili Olanlar:
MARIKO 10: KALDC
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Kalenjin Revised Bible Catholic Edition © Bible Society of Kenya, 2015.
