MAT 23
23
Gbalo ye sariya karanmɔɔilu ni Farisilu yɛ
1Wo kɔ rɔ, Isa kumara jama ni a la karandenilu yɛ. A ka a fɔ ko: 2«Ka mɔɔilu karan Nabi Musa la sariya la, se wo karifani Sariya karanmɔɔilu ni Farisilu la. 3Wo rɔ, ii wa mɛn fɔ ai yɛ, ai ye wo labato. Kɔni ii jɛrɛ ye kɛwali mɛnilu kɛla, ai kana woilu ɲɔɔn kɛ de, baa ii ye mɛn fɔla, ii tɛ wo kɛla. 4Ii ye donin gbilinilu sidila ka woilu sii mɔɔilu kun. Ii jɛrɛ don ti sɔn ka mɔɔ woilu dɛmɛn hali dɔɔni. 5Wo rɔ, ii ye ko bɛɛ kɛla kosa mɔɔilu ye ii yen. Ka a masɔrɔn, ii ye Kitabu kumailu sɛbɛla, ii ye ii sidila ii tindailu la a ni ii boloilu la haan a bonyara ka dan natamin, ka ii la durukiilu masidini julu denni janilu la. 6Sii diya ɲumaɲumailu le duman ii yɛ dɔɔnninba diya. Mɔɔbailu la sii diyailu duman ii yɛ salibonilu la. 7Ii ye a fɛ mɔɔilu ye ii kɔndɔn jamama yɔrɔilu rɔ. Ii ye a fɛ fanan mɔɔilu ye a fɔ ii ma ko ‹Rabi›#23.7 Rabi kɔrɔ ye Karanmɔɔ. 8Kɔni ai kana sɔn mɔɔilu ye a fɔ ai ma ko ‹Rabi›, baa karanmɔɔ kelen de ye ai la. Ai tɔilu ye badenmailu le ri. 9Ai kana a fɔ mɔɔ si ma duukolo kan yan ko n fa#23.9 A ti fɔla i sɔrɔn fa ma, kɔni a ye a fɔla karanmɔɔ wala duutii wala mɔɔ gbɛrɛ, baa Fa kelen de ye ai la, ni a ye Alla ri, mɛn ye sankolo rɔ. 10Ai kana sɔn mɔɔilu ye a fɔ ai ma ko ‹karanmɔɔ›, baa karanmɔɔ kelen de ye ai bolo, ni a ye Ɲenematɔmɔnin di. 11Mɔɔ mɛn ka bon tɔilu ri ai tɛma, wo ye tɔilu la baaraden di. 12Mɔɔ mɔɔ wa a jɛrɛ bonya, Alla ri wo majii. Kɔni mɔɔ mɔɔ wa a jɛrɛ fanmajii, Alla ri wo bonya.
13-14«Gbalo ye ai sariya karanmɔɔilu ni Farisilu yɛ! Ai jɛrɛmayuwailu! Baa ai ra Harijeene Mansaya da tuun mɔɔilu ɲɛrɔ. Ai jɛrɛ tɛ don a rɔ, mɛnilu fanan ye a fɛ ka don, ai ti sɔn woilu ye don.#23.13-14 Do ye a sɛbɛla ko «Gbalo ye ai sariya karanmɔɔilu ni Farisilu yɛ! Ai filanfilanteilu! Baa ai ye cɛsamusoilu bolofenilu bɛɛ dɔɔnna, ka ban ka mɛn Alla tarala sa mɔɔilu ri ai yen. Wo le kosɔn, Alla ri kiti labe ai kan, mɛn di juuya mɔɔ tɔilu ta ri.» Kɔni wo tɛ sɛbɛni kɔrɔman na
15«Gbalo ye ai sariya karanmɔɔilu ni Farisilu yɛ! Ai jɛrɛmayuwailu! Baa ai ye wala fan bɛɛ rɔ duukolo kan, ai ye kɔɔji fanan tɛɛla, sa ai ri mɔɔ ɲinin, mɔɔ mɛn di sɔn ka don ai la dina rɔ. Kɔni ai wa a ladon, ai ye a kɛla jahanamaden di ka tamin ai jɛrɛ kan fɔɔ siɲa fila.
16«Gbalo ye ai ɲafuyenilu yɛ mɛn ye ɲafuyen gbeleke mirala. Ai ka a fɔ ko ni mɔɔ do ka a kali Allabatobonba la, ko kalili wo tɛ foyi ri. Ko kɔni ni mɔɔ do ka a kali Allabatobonba kɔndɔ sanin na, ko fɔɔ wo tii ye kalilikan wo dafa. 17Ai nalonmailu ni fuyenilu! Ɲuman de ka bon? Sanin de ka bon wa, wa Allabatobonba, wo mɛn ye sanin wo kɛla sanin sɛniman di? 18Ai kan fanan ko ni mɔɔ ka a kali sarakabɔdiya la, ko wo tɛ foyi ri. Kɔni saraka mɛn ye saraka janin diya kan, ni mɔɔ ka a kali wo la, ko fɔɔ wo tii ye kalilikan wo dafa. 19Ai ɲa fuyenilu! Ɲuman de ka bon? Saraka le ka bon wa, wala saraka janin diya, wo mɛn ye saraka wo kɛla saraka sɛniman di? 20Ni mɔɔ ka a kali saraka janin diya la, fen fen ye a kan, wo tii ra a kali wo bɛɛ fanan na. 21Ni mɔɔ ka a kali Allabatobonba la, wo tii ra a kali Allabatobonba la, a ni bontii Alla fanan na, mɛn siini bon na ye. 22Ni mɔɔ ka a kali sankolo la, wo tii ra a kali Alla la Mansaya siifen na, a ni Alla jɛrɛ le la, mɛn siini a rɔ.
23«Gbalo ye ai sariya karanmɔɔilu ni Farisilu yɛ! Ai jɛrɛmayuwailu! Ai ye ai la nakɔ firamɛsɛnilu kelen kelenna bɛɛ jaa bɔla, ka Alla la sariya bonbailu to ye, ni ii ye telenbaya ko ni hina ko ni lemɛniya ko ri. Ai ka kan ka woilu le fɔlɔ kɛ, ka a tɔilu la woilu kan. 24Ai ɲafuyenilu yɛ mɛn ye ɲafuyen gbeleke mirala. Ai ye ai la minji sɛnsɛnna ka hali wolowoloni bɔ a rɔ, ka a tɛrɛn ai ye ɲɔɔmɛ lakununna.
25«Gbalo ye ai sariya karanmɔɔilu ni ai Farisilu yɛ! Ai jɛrɛmayuwailu! Ai ye jilafɛilu ni tasailu kɔkanna makola ka ii gbɛ. Kɔni woilu fani fen mɛnilu la, ai ka woilu sɔrɔn suɲali ni natabaya le rɔ. 26Farisi fuyen! I ye jilafɛ ni tasa kɔndɔ le fɔlɔ ko. Wo rɔ, ii kɔkanna fanan di sɛninya.
27«Gbalo ye ai sariya karanmɔɔilu ni Farisilu yɛ! Ai jɛrɛmayuwailu! Ai ye ikomin kaburu mɛn kɔkanna ra bɔrangbɛ ka kenɲiya, ka a tɛrɛn a kɔnɔ fani mɔɔ koloilu ni nɔɔ su bɛɛ la. 28Nba, ai fanan ye ten de. Ai wa kɛ mɔɔilu ɲakɔrɔ, ai kɛni ikomin mɔɔ telenniilu. Kɔni ai kɔndɔ fani jɛrɛmayuwaya ni kojuu la.
29«Gbalo ye ai sariya karanmɔɔilu ni ai Farisilu yɛ! Ai jɛrɛmayuwailu! Ai ye nabiilu kaburuilu lɔla. Alla la telenba mɛnilu sani, ai ye woilu kaburuilu masidila ka ii lakenɲa. 30Ai ye a fɔla ko: ‹Ni an tɛrɛ ye ye an benbailu la waati rɔ, an tun tɛ ii dɛmɛn nabiilu faala.› 31Ai ye a yirakala wo le fɛ ko ai le nabiilu faabailu denilu ri. 32Nba, ai benbailu ka baara mɛn damira, ai ye wo dafa fasayi! 33Ai duuma sailu! Ai, fɔnfɔnni la munuɲailu! Alla ri kiti labe ai kan ka ai lafili jahanama kɔndɔ! Ai ri bɔ kiti wo kɔrɔ di? 34Wo le kosɔn, n di nabiilu kelaya ai ma, a ni mɔɔ famunyaniilu ni sariya karanmɔɔilu. Ai ri doilu gbɔngbɔn jiri kan ka ii faa. Ai ri doilu gbasi gbiɲɛ la ai la salibonilu kɔndɔ. Ii wa bori ka bɔ so do la ka wa so gbɛrɛ la, ai ri ii kɔsaran. 35N di woilu kelaya ai ma sa telenbailu bɛɛ faa kunko ri be ai kan, telenba mɛnilu bɛɛ faara mɔɔilu bolo duukolo kan. Abila, mɛn telenba, a fɔlɔ faara. A laban, Baraki dencɛ Sakariya faara. Ai ka wo le faa Allabatobonba ni saraka janin diya tɛma. 36N di tuɲa fɔ ai yɛ: mɔɔ woilu bɛɛ faa kunko ri be bi mɔɔilu kan.
Isa jusukasira Jerusalɛmu kosɔn
37«Ee Jerusalɛmukailu, Jerusalɛmukailu. Ai ye nabiilu faala. Alla wa mɛnilu lɔ ai kawandila, ai ye woilu bonna kaba la ka ii faa. Siɲa siyaman, n tɛrɛ ye a fɛ ka ai ladɛn ikomin sisɛ wa ye a denilu ladɛnna ɲa mɛn ma ka ii dokon a kanban kɔrɔ. Kɔni ai ma sɔn. 38Sisɛn, ai la bon dakolon di to ai bolo, 39baa n di a fɔ ai yɛ ko ai ɲa tɛna lala n kan butun fɔɔ ni ai ka a fɔ lon mɛn na ko:
‹Mɛn ye nala Maari tɔɔ rɔ ten,
Alla ra ɲumaya kɛ wo yɛ.›»
Seçili Olanlar:
MAT 23: AKS
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2022 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/
