ATÜTSAR 3
3
Anyiwa nüh Azhü Mküna nüh Sakümü
1Saküüwuowa nüh reza vü kürho sakütsü aveh nyieh vünüh amüre nüh aro kümsütsawa sa. Amüre nüh nyimzawa vü, “Saküüwuowa nüh aphahri vü athsoh wuora vi mütsa tüm üta küza ülo?” ti küna.#Kkt 12.9; 20.2.
2Thinü nyimzawa nüh, “Aphahri vü athsoh küpari avi aveh thuoüji tsa üta: 3thitü aphahri azhila vü küpeh athsohwa avi thuoüji mütsa tüm üta Saküüwuowa nüh küza, akütsa mpa nyu nü aküpa nga müpa tüm üta, Jü müüzhe thuoüji süna ta küza,” ti küza.
4Thinü amüre nüh nyimzawa vü, “Jütü azhütsa nyu, noh tü küsütsawa nyu:#2 Kor 11.3. 5thitü küsie rülo vünüh noh nüh jüma tsa naveh ünüh noh notha tü pieteru na ta Saküüwuowa nüh küthsü kenüh, thi noh tü Saküüwuowa kümjie sateru nü kümhie thi kümsü thsüm nathuoh,” ti küza.
6Jüti küsa vü nyimzawa tü athsohwa no nü ma vi tü tsamhie shehnaküveh küthsü vü, thi ma notha vü noküzüsheh vü thi athsoh küsü nüh nyi küsü sakümtsa shehra naküveh küngu vü, nyimzawa tü athsoh jüma avi la nü tsa, thi ma vüpa vü nga tsü, thinü ma nga tsa. 7Jüti küsa vü masükhürü notha tü pieteru, thinü masü tü anyiju küpehla thsü. Thi masü tü ampah nyawa müzhurü nü athsü müthoh sanü masü kürütso satsawa hiete.
8Thinü masü tü Vüwa Saküüwuowa nüh münüleh küüji tsotho vü aphahri vü kütse khi künara; jüti küsa vü Adam thi Eve masü tü Vüwa Saküüwuowa tü vü nüh küthi nti aphahri athsohza vü peh. 9Thinü Vüwa Saküüwuowa nüh Adam ji taji ma vü, “Noh tü khiela pehveh lo?” ti küna.
10Thinü ma nüh, “Hi tü aphahri vünüh noh jikhi thsüthuoh, thitü hi tü krüküm sa, küpakenühnyunü hi tü eh satsa anyiju küsa kenüh, jükenüh hi tü hi mpa nüh küthiveh lie,” ti küza.
11Thinü Saküüwuowa nüh, “Thawa nüh noh tü noh satsa anyiju pehveh ta noh vü küza lo? Hi nüh mütsa tüm üti noh vü azhükütsü thsohviwa noh tü tsa ülo?” ti küna.
12Thinü anyiwa nüh, “Noh nüh eh nyina sa üta sieru hi vü kütsü nyimzawa nüh athsohviwa hi tsü nü hi nüh tsalie,” ti küza.
13Jüti küsa vü Vüwa Saküüwuowa nüh nyimzawa vü, “Noh tü mokenüh hati samthuoh lo?” ti küna. Thinü nyimzawa nüh, “Amre nüh hi müra lie, thi hi nüh tsam lie,” ti rületsü.#2 Kor 11.3; 1 Tim 2.14.
Saküüwuowa nüh Shihküsa Küphrahtezhu
14Thinü Vüwa Saküüwuowa nüh amre vü, “Noh nüh hama sakümthuoh kenüh noh thuoüji samwa aveh nyie vü nga nüh, thi reza vü asa aveh nyieh vü nga nüh müzümthuoh; noh tü noh vo vünüh zhu nathuoh, thi noh kürho vü arülo aveh azhitho tsatse naveh:#Kkt 12.9; 20.2. 15Thi hi nüh nyimzawa nohsü azhie vü mükünongü thsetsü naveh, thi noh vünüh shuküruri thi ma vünüh shuküruri azhie vü nga mükünoluongü thsetsü naveh; mari nüh noh lü küünyikhrie naveh, thi noh nüh mari mühtse küümko naveh,” ti küza.#Kkt 12.17.
16Thi Saküüwuowa nüh nyimzawa vü, “Hi nüh noh lokürü saküzhitsü naveh, noh tsakümoh sakükhotsü naveh. Noh tü atsaküwuo vü münomna nü wuo naveh, thitü jütawie ketünga noh kümngu tü noh vüpa vü peh wie naveh, thi noh vüpa nüh noh nyieh vü kete naveh,” ti küza.
17Jüsevü ma nüh Adam vü nga, “Noh nüh noh vüvüh zhü künaküm kenüh thi athsohvi hi nüh mütsa tüm üti küüzawa tsaküm kenüh noh kenüh azhihwa tü müzümthuoh, noh tü noh kürho küju münomna nü noh vo phahtsa naveh. #Ebr 6.8. 18Arüzhü thi asheshiri tü noh kenüh küüsho naveh; thi noh tü areza vü küsho areri tsanaveh. 19Noh tü noh rüshi vünüh noh vo phahtsa naveh; noh tü azhih nüh sa thi noh satsa azhih müjie küjele küju nü jüta vünüh noh vo phahtsa naveh,” ti küza.
20Jüti küsa vü Adam tü ma vüvüh nyo Eve ti ji, mazhünyo thuoüji ma tü anyiri aveh azahwa küsa kenüh. 21Vüwa Saküüwuowa nüh Adam masü nyipari kenüh asahu nüh akruzhu sanü vi masü küüzhute.
Adam thi Eve masü Phahri vünüh Zhezhuküm
22Jüti sanü Vüwa Saküüwuowa nüh, “Halie, anyiwa tü hiri azhie vü küsü kümjie kümsü thi kümhie thsümthuoh. Ma tü kürho athsoh aviwa nga latsanü ma tü küsuokürho müküürhora,” ti küza. #Kkt 22.14. 23Jüti sanü ma satsa küsa azhihwa vünüh küüroh tsa nti Eden phahri vünüh Vüwa Saküüwuowa nüh ma tü zhezhum. 24Thi ma zhezhujam nü Eden phahri zhieshu wuovü zhüleri küsü sa, thi anyuchu anyihküju küsü nü kürho thsohwa lehkhuji huoküpeh.
Seçili Olanlar:
ATÜTSAR 3: POCHBSI
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Pochuri Naga Bible - KÜMÜTSE BIBLE
Copyright © 2015 by The Bible Society of India
Used by permission. All rights reserved worldwide.