Luukeꞌ 9

Jiisuu'ke Teing Nanai'keta Kenaanka Mintoong-koo Botovuru'na'

(Mat 10:5-15; Mak 6:7-13)

1Ee'noko Jiisuu'ke teing bakaning barevare-nupoong nanai'keta kenaanka naro' bokuvurira iri' avuru'nung makosi-antavurima ma'nari amutemurii' bata'aarii'naang ee'noko siipananka taare-anta-koo. 2Ee'noko teie botovuru'nung teing taare-anta nkoaama Kumponing bakaang muu' daankiaava'naang. 3Ee'noko teie aa'puru' teing, “Kapoo' nkaveriauka' nanirima: Donsi' ee'noko siirau' nii'noo' taamang nii'noo' mooni'. Ee'noko mononopa' kenaa'ka ninka naniriauka'. 4Ee'noko areva tuntariainava-koo te' naro' otoriai bera te' osi siperiainoo'ke basi. 5Ee'noko are' tokoo dii' onkeonke'daariauka'noo' temono siperima temono-koong da'mong tankaveriaing diikaang pe'naa'keta, temono Kumponing-koo maarekusi'namono taa'ni'antaveri.” 6Ee'noko teing tenkenaara nanau'nung osinankai daankiaama tee doorenang tampara ee'noko avitoitoi-koo siipa-po'nupoong taare-antavaarima.

Eeroti' Papaaravaru'na' Mmau' Taa'ni'anta Ta'nimpaarii' Taaravura

(Mat 14:1-2; Mak 6:14-16)

7Enang teie Eeroti'ke, temeensi'koong ovo'ma'ke taaravuu'nung ookara kapoo' Jiisuu' bakaning ninka nkoau'ning, ee'noko papaaravaru'nung tee nantoonge avitoitoi minkuaako. Nii'ninge aa'paako', “Jooni napo' daa'aring bou'noo'keta.” 8Napo' nii'ninge aa'paako', “Tee Eliasi poaing-koong tavo'aring.” Ee'noko nii'ninge ee' minkuaako', “Nii'nung pa Kumponing-etaing urikupoong nakaro-nupoong-koo daa'aring.” 9Eeroti'ke aa'puu'nung, “Jooni tee ning botomario' kuru napu'au'nung. Teka tee baa aung tee' naumaarimaang?” Ee'noko teie taung Jiisuu' oo-koong besi'uu'nung.

Jiisuu'ke Nantoong Pa'noko' Kokorei' Divu' Bau'uru'na'

(Mat 14:13-21; Mak 6:30-44; Jon 6:1-13)

10Teketa botovuru'noo'keta toroarira kara okovuri nkanukai Jiisuu' nauaako'nung kapoo' teinge nkoau'ning. Ee'noko teie bokuvurira teing tonta'ariru' bii'ka otoroo'naang osinamono-koo miring Besaida. 11Tenang karika'ke noru'aara tee teinge siompau' Jiisuu', ee'noko teie onkeonke'uru' teing, ee'noko kara nauvuru' Kumponing bakaang muu'koong. Ee'noko taare-antavuru' teing siipa-nupoong.

12Enang doong oparama nanuko teing bakaning barevare-nupoong nanai'keta kenaanka porora aa'pau' tee, “Aing nantoong karika' botoveriko osinanka anketa due' otoroining-koo berora aasi'doma ee'noko taamananka ooaavai, ai' nii' anke tee tamung mee'bora' sirakamaa'koo o'noring.” 13Teka teie aa'puru'nung teing, “Dii'ke kapoo' averereriko naiaavaing.”

Ee'noko teinge aa'pau', “Nii' pa'noko'nuri berete' ee'noko keura tavi'ning naing oto'memuring, daua otoa'. Taamang mmau' moo'ampiri dei makotupeu' aing ookara karika' bau'koo dake tampeko deeko'.” 14Aing-koo teing deerunoo' donkaang naing pa'noko' kokorei'pina' otorou'nung teke. Ee'noko teie aa'puru' bakaning barevare-nupoong, “Navituna' ba'nang-antavereriai, naruaape-pina' navitu-koo.”

15Ee'noko teinge tee' nkoaarima doonko ba'nang-antavaaru'. 16Ee'noko Jiisuu'ke teing pa'noko' berete' ee'noko tavi'ning keura nkavura tee ankamparu' deto paning-aape ee'noko biraanke-antavura pisi'uru' teing. Ee'noko avuru' teing bakaning barevare-nupoong tankee'aarii'naang nantoong karika'. 17Ee'noko ookara taamanaara poovorou'. Ee'noko kakita'nanka sipaaru'ning kivora-ita keveku'ka peku' maanto'antavau'.

Piitai Jiisuu' Tee Pako'pari'nii' Tasi'pura Sira'puu'na'

(Mat 16:13-19; Mak 8:27-29)

18Nii'na'mung Jiisuu' baka kunsiarama ee'noko bakaning barevare-nupoong nari' otoroitaa' nia'uru'nung teing aa'puma, “Ning baa nantoonge tammaamaung?” 19Ee'noko teinge maku'aama aa'pau', “Nii'ninge Jooni tee minkinara tantaamaung, ee'noko nii'ninge tee Eliasi poaing-koong tantaamaung, ee'noko nii'ninge urikupoong nakaro-nupoong-koong narung boo'keta daa'aru'nung tantaamaung.” 20Ee'noko napo' teie aa'puru' teing, “Teka dii'ke ning baa tammerimaung?” Ee'noko Piitai bari'uma aa'puu', “Da' aa' tee Kumponinge teroita Pako'pari'nii' nantoong domamperira tareveriainoo'koo.”

Jiisuu'ke Uro'ke Nauvuru'na' Boo'parara Napo' Domamparavaina'

(Mat 16:20-28; Mak 8:30–9:1)

21Teka Piitai Jiisuu' tee Pako'pari'nii' tampuio' Jiisuu'ke nii'nung naning nau-koo aa'na' orokovurima#9:21 Nii'ninge Jiisuu' daurarong deeng-anta-koo paaravaa'neeng-koo. aa'puru', 22“Ning Tee Naning˜naumpo' Paning-etaing teing amutemurii' arikananka tora'pampaing, ee'noko aing aa'ninge tompimaavaing: pankenukai, piristi'koong ovontunukai ee'noko boto naunukai, ee'noko tee dupisi'maavaing. Teketa beenang doong tankinuko napo' domamarara daa'maravaing.”

23Ee'noko teie napo' aa'puru' teing ookara, “Naning ning siomui poo'naang piavora deeko', baka bakaang pia iro' doonko tompimparavaing ee'noko doong kante bakaang aa'barata' poru'ui ning siomumaatoaing. 24Ee'koo, baa tee naning bakaang domaang ning-koo orokovuma baka tare-koo piavoaing tee paa'aravaing, teka baa tee naning bakaang domaang ning-koo aroo'ari dua'uaing tee domamparavaing. 25Naninge kapoo' ookara kansi'kooning barampui okovura bakaang domaang darove'ari paa'arako teinge arekee' pakuaapeu'? Ee'noko naning aming avupeu' tee bakaang domaang paa'aru'nung napo' moo'koo? 26Napo' baa tee naning nkaang miring sira'koo maia'omaung ee'noko nkaang kara-koo, tee-koo naning-koo ning Tee Naning-naumpo' Paning-etaing tee maia'moaing tenang moainang nkaang meenasi ninka ee'noko Mma' bakaang meenasi ninka ee'noko teing koosinunanka meekupoong biikaang. 27Teka ninge masikung naurampimang, nii'ning nantoong anke nari' donkonai otoroining teing boo'koo tora'kaava' muu' Kumponing bakaang taa'ni'poi otoko ooaavaing.”

Jiisuu'ke Beenaumo Taura'puru'na' Muu' Kumponing Bakaang Meenasi Oo-koo

(Mat 17:1-13; Mak 9:2-13)

28Enang aung minkuvuu'noo'keta ˜beenang-taa doong-pina' tankinuko teie aing aa'ning bokuvurira berou': Piita, Jooni, ee'noko Jeemisi nari', iu'koo deto teke kunsi-koo. 29Ee'noko tenang tee kunsiarako aasi'ke Piita dovang tavuru'. Teketa Jiisuu' mme' kunsiaritaa' bakaang oing oro'noo' aampari'aru' ee'noko bakaang mononopa' kakaara sisisiisi deemparu'. 30-31Ee'noko tenang kenaanka naninka ta'nina' paning-etaing meenasi ninka oro'pareta tee ninka kareaako' aa'naanka Moosesi ee'noko Eliasi. Ee'noko Kumponing bakaang miru' dupevui Jiisuu' boo'paravaina' teke Jerusalema'ke minkuaako'. 32Enang tee Jiisuu' ninka minkuai otoko Piita dovange tantearira Jiisuu' bakaang meenasi ooau' ee'noko tenaanka naninka tee ninka donkonuresio'. 33Ee'noko tenang tenaanka naninka Jiisuu'ankoita tenkeng-aapeareko Piitai Jiisuu' aa'puu', “Ovoring ee, bakei tampa' nii' anke o'norimaang. Aia' nii'ke beevaari bare kaniampiai, nava da' dakanava, nava Moosesi bakanava ee'noko nava Eliasi bakanava.” Botu noru'ua', tamung tee' minkuvuko'.

34Ee'noko tenang Piitai tee' minkuvuko kamo'ke pora daka'puru' teing, ee'noko avoreau' ka'mo'ke kuung deempurio'. 35Ee'noko teieta kamo'keta auronge karoma aa'puu',

“Aung tee nnuring, ninge piaavansi miru'antu'nung. Taaraveriaing tee.”

36Ee'noko tenang aurong karoio' Jiisuu' baka otoko ooau'. Ee'noko teinge teing doong-koo makempau' naning nauaava' kapoo' teinge ooau'ning bera Jiisuu' boo'keta daa'aru'noo'ke basi.

Jiisuu'ke Nemaka Taare-antavuu'na' Ma'naange Kookoko-antavuko'nung˜

(Mat 17:14-21; Mak 9:14-29)

37Teketa dauna'mung iu'keta siarira poroio' nantoong mmau'ke kune'au'nung tee Jiisuu'. 38Ee'noko naninge karika'koo meu'keta bokuma Jiisuu' aa'puu', “Nau-anta, eentamaramaang da'koo nnuring oovee'naang ai' tee tee narung masikung nnuring. 39Ee'noko da'maiko' namu'ke teie ma'naange korivuko ta'nina' bokukoo'. Teie nuanua-antavuma bera ka'buaira-antavukoo' napo' mapou-antavuma˜, ee'noko da'deng sipuarukoo'. 40Ee'noko eentamaring dakaning barevare-nupoong-koo bata'aava'naang, teka teing makosiaavaruing.”

41Ee'noko Jiisuu'ke maku'urima aa'puu', “Nko dii' masika'anta otoriainge, koontariaing, are' basinaroonge dii' ninka nari' o'norimaatoainge dooroontampiri? Po'antaveai tee dauring a'.” 42Teketa tenang tee nemaka Jiisuu'anko poko teie ma'naange papaara-antavura nuanua-antavuu'. Teka Jiisuu'ke aka'puu' tee ma'naang orara, ee'noko unaa-antavura tee nemaka bauma napo' avuu'. 43Ee'noko ookara asikovuru' Kumponing aa'na' pankaing tasi'paara.

Jiisuu'ke Dama'ke Boo'antavaavaing Kemu'kana' Sira'puu'noo'

(Mat 17:22-23; Mak 9:30-32)

Teka ta'ninaara karakaraarearima Jiisuu' daangampaako ookara kapoo' nkovuu'ning-koo teie teing bakaning barevare-nupoong aa'puru', 44“Kara aing pinka'eriaining: Ning Tee Naning-naumpo' Paning-etaing tee nkaning-koo navumainuka-koo narunge tooka kompui taura'muu'naang nantoong oreng biikaang bireng-koo.” 45Teka teinge tasi'paava' tee tee' minkuvuu'nung kapoo' teing-koo baku'nisi deemparako teinge tasi'paa'neeng-koo, ee'noko teinge avoreaara nia'aava' tee aung anaare kara.

Baata Teing Pankeng?

(Mat 18:1-5; Mak 9:33-37)

46Ee'noko teketa bii'ka tata'eeko' aa'paama, “Nii'koo baa pankaing?” 47Teka Jiisuu'ke biikaang domang-koong noru' noru'ura teie narung tooto' nkavura tee-anko donkong-antavuu'. 48Ee'noko aa'puru' teing, “Baa tee naning ning nkaang miring-koo aung tooto' oki'nara onkeonke'uaing teie tee ning onkeonke'muaing, ee'noko baa tee ning onkeonke'muaing teie tee onkeonke'uaing tee ning botomuu'nung, ai' tee naning dii'koo meu'ke oki'nara-pina' otoaing tee tee dii'koo pankaing.”

Nantoong Turamaaria' Otoromaing Teing Pakupaku-nupoong Noru'kooning

(Mak 9:38-40)

49Joonie bari'uma aa'puu', “Ovoring, nii'ke ooampiring naning narung ma'nari bata'uriko dakaang miring-koo ee'noko nii'ke poteampiri tee nii' ninka nari' da' siontuaung-koo.” 50Teka Jiisuu'ke aa'puu' tee Jooni, “Orokoveriauka' tee, ai' tee naning dii' turanturiaung tee dii' pakururimaung.”

Jiisuu' Jerusalema'aape Nanuu'na' Boo' Kune'uu'naang

(9:51–19:28)

Sameria'nupoonge Onkeonke'aavaruu'na'

51Tenang Jiisuu' bakaang doong due'uio' Kumponinge paning-aape boku-koong Jiisuu' Jerusalema'aape be'koo deravaru'. 52Ee'noko teie kara nkanuka tutung uro'ke botovurio' Sameria'koonavuntu'koo berou'nung Jiisuu' bakaning ninka aasiaavainoo' maamu-antavaava'naang. 53Teka nantoonge onkeonke'aavaruu'nung tee Jiisuu', biikanoo' meepo' oki'naa-antavuing-pina' Jerusalema'aape nanuaing deemparako. 54Ee'noko tenang bakaning barevare-naankai oovureta, aa'noko Jeemisi ee'noko Jooni, aa'puretu', “Ovoring, dake ee nee' pia-antameremang nta' paning-eta bokuampeko siarara opuri taivuriaina' aing Eliasie nkovuu'na?”

55Teka teie bere'arara orokovuretu'nung tenaanka aa'purema, 56“Dee'ke noru'erea' aremurii' tanuaang dee' oto'derureng, ai' ning Tee Naning-naumpo' Paning-etaing nantoong orari-koo moa', teka nantoong domang-anta-koo mou'nung.” Ee'noko teing teketa nii'namono-koo berou'nung.

Jiisuu' Siong-koo Makotua'na' Noru'areko'naanka

(Mat 8:19-22)

57Ee'noko taunge beroma naninge Jiisuu' aa'puu'nung, “Ninge tee da' siontampaing are' tokoo da' beainoo'.” 58Teka Jiisuu'ke maku'uma aa'puu' tee, “Nkaunanka biikaning kumpenanka oto'evoromaung, ee'noko barennanka auvi'au-kooning biikaning bitonanka, teka ning tee Naning-naumpo' Paning-etaing tokoo bore' patu'maravainoo' oto'memua'.”

59Napo' Jiisuu'ke nii'nara aa'puu', “Ning siomeaing dake.” Teka teie aa'puu', “Ovoring, io' taura'meko mma' dako'ampainoo' basinoo' mma' ninka o'noreaing, ee'noko mma' dako'amirai'nange da' siontampai.”#9:59 Ee' oro'pari otong: Tee naning kapoo' baumai deing nka-koo noru'uitaa' Jiisuu' tee' minkuvuu'. 60Teka Jiisuu'ke aa'puu' tee, “Siperiko boo'nukai bii'ka boo'nuka dako'aariaing, teka da' aa'damaang: Bera daankieaing tee Kumponing bakaang muu'.”#9:60 Nantoong Jiisuu' domaang okora' tasi'paarimainge tee siompaama domaang oparavaung oto'evoromaung, teka kansi'koong kapoo' domange dai'aamaing teing domaang okora'keta taapo'nupoong, boo'nuka Kumponing-ankoi.

61Nii'nunge napo' aa'puu', “Ninge tee da' siontampaing, Ovoring, teka iro' taura'meko tutung si'noora'arampaing nkanoo'nupoong.” 62Teka Jiisuu'ke tororee'arama-nanu' kenkumpura aa'puu' tee, “Tee naning mintoong-koo mme' komparama torotoroarapeu'nung tee' oro' tee, naning makotua' Kumponing bakaang muu'koo mintoomparaa'naang.”

Seçili Olanlar:

Luukeꞌ 9: nasNTpo

Vurgu

Paylaş

Kopyala