Luukeꞌ 17
17
Purimariri Aarumo Orara-ita Koomariaina' Pakumeerima
(Mat 18:6-7,21-22; Mak 9:42)
1Ee'noko Jiisuu'ke aa'puru'nung barevare-nupoong, “Amutemuriaunanka kapoo' otong nantoong orara aarumo-koo dua'antavurimaung, teka bakei piaaru'nuka teing nantoong nii'ning dua'antavaariaining. 2Teka tee' oro' naning baukoi paravuaruu'nung dei tampa', ai' Kumponinge aa'na' kiimatavuaing tee naning aing toire'koo narung dua'antavuaing tee-koo orara aarumo-koo. 3Tanatarariaing dii' dii'ka. Da'marang-koong oraka' nkoarako sira'pei naueai ee'noko orarunsiarako deeko' tonta'antaevuai tee. 4Ee'noko tee na'mung doong-koo ˜kemu'ka-taae oraka'nko nkovupeu' da'koo ee'noko teing kante napo' ˜kemu'ka-taae da'anko bere'arama poma aa'puko deeko', ‘Ning oraka' nkomaring,’ tonta'antaevumatoai dake.”
5Teinge kara okovuri nkanukai aa'pau' tee Ovoring, “Niikaang baito pankaing-antamemuriaing.” 6Ee'noko Ovoringe maku'urima aa'puru', “Teu masitara'koonu sinanu teu oki'nu, teka teu-eta tee koi' pankaing dupuma deemparamaung, ee'noko tee' nari' dii'ke masika'anta ninka, bane oki'navu' komperi, bakei aa'noaing, avarireto koi'navari aa'periko deeko', ‘Deto bita'darara pirung-koo keentaravai,’ tevarie meunturipeu'.
7“Dii'koo narung ovo'ma' botovotonaa' oto'evumatopeu' mintoomparama nii'noo' sipisipi' tanatavurima, ee'noko tenang tee botovotonaa' osi duparako teie ovo'ma'ke ee kirokaivupeu'? 8A, tee' aa' kirokaivuarupeu', teka aa'pupeu' tee, ‘Dake taamang ua'memuai ee'noko mononopa' paarirarara banto'memuko naiampai ee'noko da' doinang daka taamaniaing.’ 9Tee ovo'ma' amaiaa'oarupeu' bakaang botovotonaa'koo kapoo' botovuko nkoevumaing-koo. 10Ee'noko dii'koo tee' nari'ke, tenang dii'ke bakeveriko tee kapoo'nanka ninge diikaang ovoringe naurampimaing nko-koo ninge dii' pankaing-anta-koo piaroriauka', aming-koo, nna' dii'ke tee nko-nko diikaang bantampiru'nung narung nkoverimang.”
Nanai' Oramuu'po'nupoong Taare-antavuru'na'
11Jerusalema'aape bema Jiisuu' kevora'ka-koo meu'ke tankinuu' aa'ning-koo Sameria' ee'noko Kaaleli'. 12-13Ee'noko namono-koo osi-koo duparako nantoong nanai'ke oramuu'po'nupoonge kune'au'. Teketa isipo' donkonai bokiaama aa'pau', “Jiisuu', Ovoring, piaameriaing nii'.” 14Ee'noko tenang teie oovurira teing aa'puru', “Berira piristi'nanka-koo sira'antarariaing, ee'noko tampa' ooruko Kumponing-koo boontunang nkoveai nantoonge tee taa'ni'anta ooaara da' teing ninka nari' oto'koo taura'nii' tasi'daavaina', tee' Moosesi bakaang botoi minkuvumana'.” Ee'noko tee' beroma mono kiiroraa'orou'. 15Teketa narung teing-koong taarevou'nung ooarara napo' toroaru'nung Kumponing aa'na' bokuma daangampuma. 16Ee'noko Jiisuu'koo kau'kanoo' kinkinura tampara tampuu'. Aung tee ee'nung Sameria'koong.
17Enang Jiisuu'ke aa'puu', “Nanai' ee deea' kuiaririning? Teing ˜karenaumo-taa areinge? 18Teing-koo narung ee otoa' toroarara Kumponing daangampupeu'nung teka aung narung ako'nung toroari?” 19Ee'noko Jiisuu'ke aa'puu' tee, “Daa'darara naniai. Dakaange baitoi domang-antaruing.”
Muu' Paning-nung Poaina'koong Minkunaa Nauvuru'na'
(Mat 24:23-28,37-41)
20Nii'nang napo' Boto Keperuu'navitue Jiisuu' nia'aama aa'pau', “Kumponing bakaang muu' arenang poa'naang?” Teie maku'urima aa'puru' teing, “Tee Kumponing bakaang muu' taa'ni'anta ninka poauka'nung dutai oo-koo. 21Naninge aa'puauka', ‘Ooveriai, aung tee,’ ai' ‘Aunka' tee.’ Aming-koo, nna' Kumponing bakaang muu' tee bakaning nantoong-koo meu'ke otoi tarevuri otomaung.”
22Ee'noko teketa dama'ke Jiisuu'ke aa'puru' bakaning barevare-nupoong, “Batei orananka tee pomaang tenang ning Tee Naning-naumpo' Paning-etaing ninka nari' oto'koo aa'na' piaroriainang, teka ning oomeriauka'nung dii'ke. 23Nka tee nantoonge aa'daariaing dii', ‘Tee aunka' nemperimaung berira ooveriai.’ Nii'noo' aa'daariai, ‘Tee aung a' otong.’ Teka biikaang kara siomperia' otoaing. 24Aming-koo nna' piping tavo'kuma paning-koo auvi'aue bereravaramana' tee' nari' ning Tee Naning-naumpo' Paning-etaing oro'maravaing te'mung nkana'mung. 25Teka tutung ninge kapoo' arikananka kune'ampaing tompimaama nkomaavaining enanavarange.
26“Tee' nari' Nooa' bakanang nkoaru'na' tee' ee'na' nari' ning Tee Naning-naumpo' Paning-etaing moainang nkoaravaing. 27Aa'noko'na': Taamanaama, naikaama, nampeema otoroko' bera Nooa' aaka'nareng-koo tumparu'noo'ke basi, ee'noko douai pora aaruvuru' ookara. 28Napo' tee' nari' nkoariko' tenang Loote' bakanang: Taamanaama, naikaama, baaveveema, keenkeeng nkoaama, pava kaniaarima. 29Teka te'mung Loote' Sodom-navuntu'keta tonta'arako urung ee'noko kapang nta'po'ning apo'pina' paning-eta dua'arara taivuru' teing ookara.
30“Napo' tee' nari' nkoaravainge ning Tee Naning-naumpo' Paning-etaing napo' moainang. 31Te'mung basiarako naning kavo-po'nung daunavaro-koo otoainoo'keta siarama bakaning kavo nka-koo pava-koo kuung tumparavauka'nunge. Napo' tee' nari' naning mintoong-koo otoainoo'keta pava-koo toroaravauka'. 32Noru'eriaing Loote' ba'aang denki'ou'na' tenang nta'ke osi taivuko'namono-aape toroarako bakaang kavo noru'uitaa'.
33“Baa tee naning bakaang domaang baka tarearamaung tee bakaang domaang tee paa'aravaing, ee'noko baa tee naning ning-koo bakaang domaang dua'aravaing tee teie tee' nkoarama tampa' pinka'antavuaing. 34Napo' naurampimang, muunga tee kenaanka naro'ke aaturesi otoko narung pari'uma narung sipuaing. 35Napo' manikumaara kenaanka-koo nari' iinkureko nani pari'uma nani sipuaing. 36Napo' kenaanka naninka pora'ke otoreko narung pari'uma narung sipuai.”
37Ee'noko teinge aa'pau' tee, “Ovoring, are'ka?” Ee'noko Jiisuu'ke aa'puru' teing, “Are' tokoo dera' otoinoo' mareoi'nanka tee te' poroma naro'arimaung maa'aava'naang tee.”
Seçili Olanlar:
Luukeꞌ 17: nasNTpo
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 1994, Wycliffe Bible Translators, Inc. All rights reserved.
