Luku 22

Judasi'a komoru hinkeno Jisasi azerisnaza naneke

(Mat 26:1-5, Mak 14:1-2, Jon 11:45-53)

1Anumzamo Israeli vahe ozmahe zamagterenege'za ana knagu antahimiza, (Pasova) zo'ore bretima kreza nenaza kna fore hu'za nehige'za, 2ugagota prisi vahe'mo'zane kasegere ugota hu'naza vahe'mo'za Jisasima ahefrisaza kanku hake'naze. Na'ankure vahetaminku kore hu'naze. 3Ana nehzageno, Jisasima amage'manentaza 12fu'a disaipol nagapinti, mago zmimofo Judasinku, Iskarioti'e nehaza ne' agu'afi Sata'a ufrene. 4Hagi ana ne'mo prisi vahe'ene, ra mono nonte kegva nehaza vahe'mokizmi kva vahetaminte vuno, Jisasima komoru huno avare zamisige'za ahesaza kea ome retro hu'naze. 5Zamagra muse nehu'za, mago zmarimpa hu'za zgo amisaza naneke hu'naze. 6Judasi'a mago rimpa ana kerera huteno, Jisasima Agraku mni'nenigeno, komoru huno avrezamisia kankamunku hakre'ne.

Tare disaipol netre'moke Anumzamo ozmahe zmagaterenea (Pasova) ne'za retrotra hana'a naneke

(Mat 26:17-25, Mak 14:12-21, Jon 13:21-30)

7Anantera zo'ore bretima nenaza kna ege'za, ese knazupa sipisipi anenta ahe'za kre sramna (Pasova) nevaza kna fore hu'ne. 8Anante Jisasi'a Pitane Jonigizni amanage huno huznante'ne, Isareli vahe Anumzamo ozmahe zmagaterenea zanku antahimiza nenaza ne'za retro hinketa ome namneno. 9Zanagra anage hu'na'e, inante ome retro hanu'egu nehane? huke hakeno, 10Jisasi'a anage huno znasami'ne, tanagra rankumapi ufresakeno'a, mago ne'mo kavofi tina afino afunte nevnigetna ome kesnutna, avaririta umarerisia nompi ufre'o. 11Ana nomofo nefana anage huta asami'o, Rempi hurami ne'mo'a anage kagrikura hu'ne. Anumzamo Israeli vahe ozmahe zamagatere'negu zmagesa antahimiza nenaza ne'zana, inantega namage nentaza disaipol nagani'anena negahune hune huta ome asami'o? 12Anagema hanakeno'a, agofetu nomofona, ra kankamu hunaragintenefinka ko retro hunteneakino, tanaveri hanigeta, anante nezana retro hugaha'e. 13Higene znagra vune ome ka'ana, kehiaza huno makazana fore higene, ana nezana ome retro hu'na'e.

Ramofo ne'za ne'naza naneke

(Mat 26:26-30, Mak 14:22-26, 1 Kor 11:23-25)

14Ana ne'za nesnaza kna egeno, Jisasi'ene aposol nagamo'za, ne'za nenaku trate zmaza tununte magopi mani'naze. 15Anante anage huno zmasami'ne, Nagra knazampina uofrenena, Anumzamo ozmaheno zmagaterenea zanku antahimiza nenaza ne'za tamagrane nesuazankura tusiza huno navesie. 16Na'ankure Nagra anage hu'na neramasamue, Nagra mago'ene amanahu ne'za onenesugeno, henka Anumzamofo Kumapi avufa'a fore hugahie. 17Anagema huteno, waini ti me'nea kapu erino Anumzamofo susu hunteteno, anage huno hu'ne, 18ama'i waini tina eriomi ami hutma magopinti neho. Na'ankure Nagra anage huna neramasamue, Nagra magore hu'na waini tina onena maninenugeno, Anumzamofo Kumara egahie. 19Hagi Jisasi'a bretima erino Anumzamofo susu hunteteno korino nezamino anage hu'ne. Ama'i Nagri navufa tamagrikure huno tami'neanki, nenesutma tamagesa antahinamiho. 20Ne'zama netageno'a, anahukna huno kapu erino anage huno zamasmi'ne, ama'i korani'afi kasefa huvempage hagerafita maninunku tamagritera tagitroe. 21Hu'neanagi keho, komoru huno ha' vahe zmazampi navrentesnia ne'mo, nagrane magote mni'neno neza nene. 22Tamage hu'na neramasamue, Anumzamo hu'nea kante anteno, Vahe'mofo Mofavre'mofontera fore hugahianagi, ha' vahe vahe'mofo zmazampima avrentesimofona, nasunku huntoe! 23Anage hige'za zamagra zamagra ontahige antahige hu'za, iza e'inahu'zana hu'naku higeno nehie? hu'za hu'naze.

Iza pusa vahe manigahie? hu'za fra vazi'naza naneke

24Jisasima amage'ma nentaza disaipol nagamo'za, zamagra zamagra kehakare hu'za, i'za amu'nontifina ra vahera manigahie hu'za nehazageno, 25Jisasi'a anage huno zmasami'ne, megi'a vahe'mokizmi kinimo'za zmagra'a vahe'a kegva krineza huzmantaza kea amage'nentaze. Hankve kva mni'noe haza vahe'mo'za, maka vahe'mokizmi rone mani'none hu'za nehaze. 26Hianagi tamagra anara osugahaze. Hanki mago'moma rama amu'nontamifima mni'naku hanimo'a, osi'tfa maniho. Kva vahe maniku amu'nontamifi hanimo'a, eri'za vahetami manigahie. 27Hanki i'za rankvama manigahie. Nezane trate aza tununte maninemopi? Nezama retroma nehimo'e? Hianagi tamagri amu'nompina, Nagra ne'zama refkoma nehia vahekna hu'na mani'noe. 28Miko knazama e'nerugeta, tamagra nonatraze. 29Nenfama kuma'ama nami'neaza hu'na, Anumzamofo kumara neramuankita, 30anahukna hutma tamagra Nagri kumapina, Nagrane kini trate maninetma, tine nezane nenetma, Israeli vahe'mokizmi 12fu'a naga nofimofona kini trate maninetma refko huzmantegahaze.

Pita'a Jisasi amagena humisnia naneke

(Mat 26:31-35, Mak 14:27-31, Jon 13:36-38)

31 Saimonivoe Saimonivoe, Kagra antahio, witi rgamofo anoma'a hareankna huno Sata'a regaheno kenaku nehie. 32Hianagi Saimoniga kagrikura nunamu hugantenoankino, kamentintimo'a evu oramigahie. Hanki henkama rukrahe'ma hanunka, kagra kafuhe'ina zamazeri hanavetio. 33Hianagi Pita'a anage hu'ne, Ramoka, nagra tro hunoankina, Kagra kina nompi vnanana, nagrane vugahu'e. Frisanana nagrane frigahu'e. 34Anage Agra hu'ne, Pitaga Nagra negasamue, meni kenage kokorege osu'nenkenka, Jisasina onke'noe, hunka tagufa zupa vahane hugahane. 35Nehuno anage huno zmasami'ne, Nagrama erizania omerisazeguma hunermantena, zgo eriri ku'ene, agia nona erineta ovihoma hugeta vzana, tamagra magozankura upara hu'nazafi? Hige'za zamagra hu'za, i'o atupara osu'none hu'naze. 36Jisasi'a anage huno zmasami'ne, hianagi menina, zgoma eriri kura enerita, anahukna hutma kura eneritma, bainati kaziknoma e'orinenamotma nakre (saket) kutmia zgore atretma zgo eritma bainati kazinknona magora mizaseho. 37Na'ankure Nagra anage hu'na neramasamue, avontafipima krente'nea kemo'a, kumi vahe'ene Agrira hampri'naze hu'neana, Nagriku huno krentenea kemo'a nagrite eama hugahie. (Aisa 53:12) 38Hige'za amage'ma nentaza disaipol nagamo'za amanage hu'za hu'naze, Ramoka ko, tare kzi eri'none hu'za hzageno, Sa eri'naze, huno zamasmi'ne.

Jisasi'a Getsameni hozafi nunamu hu'nea naneke

(Mat 26:36-46, Mak 14:32-42)

39Jisasi anage huteno, nompinti atiramino koma nehiaza huno Olivi agonare nevige'za, amagema nentaza disaipol nagamo'za avariri'za vu'naze. 40Jisasi'ma ana agonare uhnatiteno, amanage huno zmasami'ne, nunamu nehutma rehezama esigetma evuoramiho. 41Anage huteno, have matevazageno uneramia avamente zmatreno vuno, ome renarenamagino agafa huno nunamu huno, 42anage hu'ne, Nenfaga Kagri kavesima me'nenigenka ama knazana eri atrenanto. Hianagi nagri navesira ovaririnka, Kagra kavesi avaririo, huno nehigeno, 43anante monafinti mago ankeromo Agrite efore huno azeri hankavetine. 44Jisasina tusiza huno kna'avenesigeno, mago'ane hanavetino nunamu nehigeno, kora amunasisi huno mopafi tagiramine. 45Nunamuma huteno otino vuno ome zmageana, amagema nentaza disaipol nagara zmasunkuma hazazamo kna zamesino, zmazeri zamavutoko hige'za mase'nazageno, 46anage huno zmasamine, nahigeta tamavura mase'naze? Reramahe'za esigetma traka hu'zanku, otitma nunamu hiho.

Judasi'a komoru huno Jisasina ha' vahe zmazampi avrentenia naneke

(Mat 26:47-56, Mak 14:43-50, Jon 18:3-11)

47Jisasi'a anage huno nezmasamigeno, hakare vahe'mo'za eri hantage'za neazageno, ananpina 12fu'a amagema nentaza disaipol nagapintira magozamimo, Judasi'ema nehaza ne'mo zmavreno ne-eno, eama huno Jisasina agi'antako hu'naku e'ne. 48Hianagi Jisasi'a amanage huno Judasina asami'ne, Judasiga nagi antako nehunka, komoru hunka ha' vahe zmazampi, Vahe'mofo Mofavre avrente'za nehampi? 49Anama hige'za, Jisasi'enema mani'namo'za fore'ma hunaku'ma hiazana nege'za, Ramoka, bainati kazinkanonu zamantagi sanune? nehzageno, 50magozmimo kazinkno erino ugagota prisi nemofo kazokzo eri'za nera tmaga kaziga agesa antagi akre'ne. 51Hianagi Jisasi'a anage hu'ne, atro, amanahuzana mago'ane osuo nehuno, agesare avako higeno so'e hu'ne. 52Anante Jisasi'a ugota prisi vaheku'ene, mono nompi kegva nehaza vaheku'ene, mono kva vahe'mo'za azerinakuma aza vahekura anage huno zmasami'ne, Tamagra bainati kazinknonu'ene kumpa kanonu kumzafa vahema azerinakuma hiaza hutma hara renantenaku neazo? 53Hakare zupa kna'ane kna'ane ra mono nompi tamagrane magopi mani'noana nazeori'naze. Hanki ama kna tamagrizane. Hanizamofo hanavemo'a agatere.

Pita'a Jisasinku onke'noe, hu'nea naneke

(Mat 26:57-58,69-75, Mak 14:53-54,66-72, Jon 18:12-18,25-27)

54Jisasina azerite'za avre'za ugota prisi ne'mofo nonte nevazageno, Pita'a zmavaririno ogamu'a e'ne. 55Ugota prisi nemofo kuma amunompi teve hugrete'za, mni'nageno, anampi Pita'a zamagrane umani'ne. 56Mago eri'za mofamo'a Pita'a teve anefate mni'negeno ke'nene huno negeno, ama nera Jisasi'ene nemnia nere. 57Hianagi Pita'a anage hu'ne, ama a'moka nagra antahina kena osunoa neku nehane huno vahane hu'ne. 58Anante osi'agna evigeno, mago nemo negeno Pitanku huno, kagranena mago zmimoke! Hianagi Pita'a huno, ama ne'moka nagra ana nera omani'noe! Hu'ne. 59Mago'a osi'a knama evigeno, mago ne'mo eno mago'ane hankavetino, ama nera agrane vano nehigena kenoa nere. Na'ankure agranena Galili ne' mani'ne. 60Hianagi Pita'a anage hu'ne, ama nemoka, nagra kena antahina osu'noa neku nehane nehigeno, kokorege hu'ne. 61Ramo'a rukrahe huno Pita negegeno, kokoremo ageru orunenigenka, 3'a zupa vahane hugahane huno, Ramoma asami'nea kegu Pita'a agesa antahine. 62Pita'a megi'a vuno tusiza huno zavi ome ate'ne.

Jisasina azanva ke hu'naza naneke

(Mat 26:67-68, Mak 14:65)

63Hagi Jisasima azeri'namo'za azanava ke hunenteza kano nemiza, 64avua kisu hunente'za, iza negehefi kasnampa ke hunka huama huo hu'za antahige'naze. 65Mago'ane hakare azanava ke hunente'za, huhaviza hunte'naze.

Jisasina avare'za kanisol vahete vu'naza naneke

(Mat 26:59-66, Mak 14:55-64, Jon 18:19-24)

66Nanterama segeno'a, kva vahezgane, ugota prisi vahe'ene, kasegere ugota hu'naza vahe'mo'za, Jisasina avare'za mono kanisol vahete vu'za anage hu'naze, 67Kagra Kraisiga maninenunka, tasamio hazanagi, Jisasi'a anage huno zmasami'ne, Nagrama tmasamisugetma, tamentintia osugahaze. 68Hanki Nagrama tmantahiganena, tamagra kenonani'a osugahaze. hu'ne. 69Hianagi amaretima vniana, Vahe'mofo Mofavremo'a, Anumzamofo hanavefi azantmaga'a kaziga manigahie. (Sam-Zga 110:1) 70Hige'za zamagra makamo'za hu'za, kagra Anumzamofo mofavre mani'nampi? Hu'za hazageno, izo Nagra anane, hige'za 71anante zamagra hu'za, mago'enena na'ane hanigeta antahisunku antahigegahune. Na'ankure tagra nentahunkeno Agra'a agipinti Anumzamofo mofavre mani'noe hu'ne.

Seçili Olanlar:

Luku 22: kbq

Vurgu

Paylaş

Kopyala